نەتلەكا كارەبایی!!

سونیا بوقدەیدە/ تونس

وەرگێران: عبدالرحمن بامەرنی

وەك پالەوانان ل سەر تێلان دلەیزت، كەنیا زارۆكان دئینا

مومەك ددەستێن وێدا بوو، دوكێلا وێ‌ رەش دبوو و د حەلییا...

هاتنا بای ئارامیا وێ‌ تێكدا و یا ل ڤالاتیا لبن خوە دنێریت...

ئەو نە بوو یا بەرگری دكر...

بەلكو زارۆكا..

ژیانا وێ‌ بلەز دەرباز دبوو

وەك شەریتا (ئەكشون) یا دەرهێنەرەكێ‌ سەرگردان...

بیرا وێ‌ ل شووماتیێن وێ‌ هات..

قوتانا زارۆكێن تاخی.. سەرێ‌ وان ددا بەر بەرا..

لێگەریانا وێ‌ ل هێلینێن چووچكان و شكاندنا هێكێن وان..

گریانا وان، دەما دایكێن خوە ددیتن و بترس ل هنداڤی وان دزڤرین

بیرا وێ‌ ل گەرمە تەحرێ‌ هات یا زارۆكێن خالەتا خوە تێدا كومكرین و

ئەو برینە سەر بیرێ‌

دا گوهـ ل دەنگڤەدانا بنێ‌ وێ‌ ببن، دەما بەرا د هاڤێژنێ‌

هزردكرن ئەجنە یێن د بیرێدا

ب شەیتانەكێ‌ حەز ژ زارۆكان نەكەت

تشتێ‌ ژ هەمیان زێدەتر ئەو د ئێشاند،

ئەوا بتنێ‌ بوو، سەرا شووماتیان دهاتە سزادان

وان نەدزانی، ئەو ل سەر بارودوخێ‌ نەرازیبوونا خوە یا هاڤی دبیت

دەیكا وێ‌ دا شوو و هێشتا ئەو زارۆك

وێ‌ چ ژ پەروەردەیا زارۆكان نەدزانی

وەك یاریكرنێن وێ‌ ب بیكێن وێ‌..

دەما ژ دایكبووی، زارۆك رادەستی داپیرێ‌ كرن

ئەڤا حەژێكری

هەر وەكو دووبارە زارۆكا خوە زڤراندیەڤە

نیشا وێ ددا، دێ‌ چاوان یا دلرەق بیت و

ئەوا ترسنوكتر كو شیانێن كوشتنا پێشیەكێ‌ هەبن

مەزنبوو و خەونێن زارۆكینیا وێ‌ د بری بوون

وەك پێ‌ دەیكا وێ‌، كو مییان چ خوشی بۆ تێ نەهێلاین و

وەك تەمەنێ‌ داپیرا وێ‌، ئەڤێ‌ پەنجەشێرێ‌ خوە تێوەركری

زارۆكینیا خوە بن ئاخ دكر و

ئەوێ‌ بەرپرساتیێن ژ تەمەنێ‌ خوە مەزنتر، هەلدگرتن

نەساخیا دەیكەكێ‌، كو نەدزانی ئەو دەیكا وێ یە!

خووشك و برایێن هزردكرن ئەو هەڤالێن وێنە و

بابەك د وێنێ وێدا دیمەنێ‌ وێ‌ ژنێ‌ دبینیت، یا وی حەژێكری

بەلێ‌ ب كەلەختر

تا شووكری ژی

هەلگرتنا بەرپرساتیا وێ‌ دهەلگرت، هەر وەكو دەیكا وێ‌.

من زارۆك ژبیركر

ئەو یا ل سەر تێلێ‌ هێسكێ‌ دكەت، وێ‌ دزڤرینیت و

جارەكا دی دبینیتە ڤە

ئەو ژنا ل هیڤیا وێ‌، ژ دوورڤە یا دبینیت

چاڤێن خوە لێ دكەتە گرێ‌ و داخوازا زڤرینێ‌ ژێدكەت

جوان دەردكەت، دەما لێ دزڤری

هشیار بوو، كو ئەو دەیكا وێ‌ یە و ژ تەمەنێ‌ خوە بچووكتر

بۆ پشتێ‌ زڤری

زارۆكی گریەكا دژوار دكر

كوری ژی هەستێن خوە

وەك زەلامەكێ‌ بچووك د ڤەشارتن

بیرا وێ‌ هات كو وێ‌ شیڤ بۆ وان دگەل خوە نەئینایە

لبەر خوەدا كو بزڤریت،

نەتلەكا كارەبای د سینگێ‌ وێدا بەس بوو، چاڤێن خوە ڤەكەت

دەنگێ‌ خودانێ‌ جلێ‌ سپی و یێ‌ دبێژیت:

تو یا ب سەرخوڤە دهێی

شوكور بۆ خودێ‌

یا دزڤریت!!

دگوڤارا پوپێتیكا ژمارە 2 دا ھاتیە بلاڤكرن

عەریفێ میسل و حكومەتا ھەرێمێ

عبدالرحمن بامەرنی

ئەڤا ئەز دێ نڤیسم ل دەستپێكا سالا 1990ێ بوو یان كو بەری سەرھلدانێ ب سالەكێ و ھینگێ ئەز ل (عێن زالا) عەسكەر بووم. ژبەركو ئەم دەرچوویێن وی سەردەمی ل ئێك گەرا عەسكەریێ بووین، دێ گەلەك ھەڤال دیدەڤانیێ ژی بۆ ڤێ گوتنا من دەن، ئەم ل (موعەسكەر تەدریب) بووین، عەریفەكێ خەلكێ میسل فەسیلا مە برێڤەدبر، عەریفەكێ ھەتا بێژی سەرسەری، كورێ دەقدایەكێ، دێ بێژی دنیا ھەمی یا دبن كەفشێ ویڤە، پتریا فەسیلا مە ژی عەرەبێن میسلێ بوون، وەسا چێبوو ئەفسەرەكێ خودان ئێك ستێر بۆ سەرپەرشتێ فەسیلا مە و رولێ عەریفێ میسل كێم بوو یانكو بكورتی ئەوا بۆ د سەرفی ئێدی ژ دەستا ھاتە دەرێ، رۆژەكێ كو ئەفسەر یێ ئامادە نەبوو، عەریفێ مە بۆ برا بابێ مە، خوە ل سەر سەرێ مە كرە شەریف، ئەم مەزھەب سنینە و و ئەم خەلكێ ئێك دەڤەرین، نابیت بھیچ رەنگەكی كەسەكێ دی ژ جنوبێ عیراقێ بھێت و مەزھەبێ وی وەك یێ مەنە و فەرمانێ لمە بكەت، حال چ حال، ئەو ئەفسەر، كەسەكێ رەوشەنبیر، یاسا زان، مە تاما عەسكەریێ ل سەر دەستێ وی زانی و خەلكێ جنوبێ عیراقێ بوو، عەریفكێ مە ژی كو دگوتی ئەم یێن ئێك دەڤەرین، بھەمی رەنگی مە ئیزعاجیا خوە ژێ ددیت و ھندەك ھەڤالێن مە یێن خەلكێ میسل دڤیان پشتەڤانیا وی بكەن و دگوتن: "ئەڤە سەد قات بۆ مە باشترە ژ ئەفسەرەكێ جنوبێ عیراقێ".
ئەگەر ئەڤا ل سەری من نڤیسی ل موخل و بێژینك و سەرادان بكەین، حكومەتا ھەرێمێ و عەریفێ میسل بكەینە دئێك میزاندا، ئەڤە سەرێ چەندین سالانە بێ مووچەی، پاشەكەفت و ھەوالێ ژ ھەمیا ژی گرنگتر ھەوالێ بلاڤكرنا یان گەھشتنا موچەیە و ئەم ب تشتەكێ دھێینە ئارامكرن، ئەو ژی نابیت حكومەتا مەركەزی دەستھەلاتا ھەرێمێ كێم بكەت و مایتێكرنێ دكاروبارێن مەدا بكەت و د بەرامبەردا، بەرپرسێن مە یێن یێ فول زەنگین دبن، كومپانیێن وان، تەلارێن وان، گر نەھێلان مەزرەعێن وان لێنە و ل ئالیێ دی، ھاولاتیێ عیراقێ ھەمی ھەیڤان، یێ موچەیێ خوە وەردگریت!!

https://rwangauraxna.com/ba/detail.aspx?IDNews=7465 

https://www.facebook.com/photo/?fbid=10219204464022762&set=g.209899095715001

دەستكەفتێن ھەرێمێ ژ بودجێ عیراقێ؟!!

 عبدالرحمن بامەرنی

تشتەكێ ڤەشارتی دناڤبەرا حكومەتا عیراقێ و حكومەتا ھەرێما كوردستانێ دا یێ ھەی و بتنێ حكومەتا ھەرێما كوردستانێ یا باجەی ددەت، ژ حكومەتا ھەرێمێ ژی بتنێ ھاولاتیێ بەدبەخت، كی ژڤێ چەندێ بەرپرسە، كی لێپرسینێ دكەت، خودێ دزانیت و حزبێن مە؟! دا جارێ بەحسا عەرەب و كوردان بكەین، عەرەبان سەرێ كوردان نەڤێت و بھەمی رەنگەكی دژی بەرژەوەندیێن كوردانە، ئێ ئەڤە ژی مە قەبیلە، عەرەب دژی بەرژەوەندیێن كوردانە، ئێ بوچی ل دادگەھا فیدرالی ئەم دھێینە دوراندن، خوە دادگەھـ لدویڤ ھندەك بنەمایان كەیسان ئێكلادكەت! لڤێرە ئەم دكەڤینە بەرامبەری دوو ئەگەران، یان ئەم ھیچ ژ سیاسەتێ نزانین، ئەم ب گوندیكانی و ھێشتا ئەم ب عەقلیەتا چیای سیاسەتێ دكەین، ژخوە ھەر سال كێشا بودجەی ل عیراقێ یا ھەی، ھەر سال ژی كورد خوە ددەنە بەتەنێ و دبیتە لاڤەلاڤا وان، قەیرانێن ئابوری و دارایی دناڤدا سەرھلددەن؟ بوچی كورد خوە ددەنە بەتەنێ؟ ئێ تشتەكێ نە شەفاف یێ دكەتە گازی و ئەو نە شەفافیە ژ پێخەمەت ھاولاتی نینە، ھندی ژ پێخەمەت كومپانیێن ڤەشارتی! ئەگەرێ دووێ، ئێكنەگرتنا حزبێن مە، شوینا دەستێ ئێكبگرن، بەران ل چوكێن ئێكددەن، ركمانیێ دكەن، ئێكودوو قەبیلناكەن و ژخوە حزبێن دەستھەلاتدار، كی بلندە و كی كولند، حزبێن ئوپوزسیون ژی بتنێ دا بھێنە پێش، ھەر تشتی ل بەر پێن نەیارێن كوردان رادئێخن و ژخوە ئەگەر قەلەم و دەفتەران بینین و حسابێن خوە بكەین، دڤان سالێن بوریدا و ژ سیاسەتا كورتبین و نە دیراسەتكری، دێ زانین مە چەند تشت یێن ژ دەستداین، ژڤان دەستدانان ژی (مە وەك جاران دوست نەمان و ژ دەستدانا باوەریێ، ژ دەستدانا ئاخێ، شنگال و كەركوك، چەندین سالێن قەیرانا دارایی و بێ موچەیی، زێدەكرنا دوو قاتی و سێ قاتییا باجان ل سەر ھاولاتیێ ھەرێمێ وووووو ھتد) و ئەڤێن من گوتین ھەمی ژ بۆ چ؟!! پێنەڤێت پێگەھێ كوردان یێ لاواز، بێ باوەریا وان ب ئێك، سیاسەتا كورتبینانە، نە شەفافیەت! و ژخوە دەردێ مە نە شەفافیەتە، نە شەفافیەتا حزبان دگەل ئێك، نە شەفافیەتا دناڤ حزبان بخوەدا ھەی! نزانم چاوان گوتارا خوە بڤێ قفل بكەم، ئەوا دبێژیت: "كابتنێ زیرەك ئەوە، یێ پاپورا خوە ب سەلامەت بگەھینتە كەنارێن دەریای"، لێ ھێشتا خەونێن مە ب وی كەناریڤە د ھلاویستینە!!!

------------------

https://rwangauraxna.com/ba/detail.aspx?IDNews=7461

https://www.facebook.com/photo/?fbid=10219190065302803&set=g.209899095715001