تابلۆ

 ـ ئەڤ تابلویێ دووماھیێ ل بەر راوەستیای، پێشمەرگەیەكێ دخوینێ وەربوویە و جلكێن د بەر ویدا، رێك ب جلكێن
ویڤە دچن، تایبەت دەما قولپكا چاكیتێ وی ستێركا چاڤێن وی بۆ خوە راكێشایین. ئەو قولپكا ھەڤژینا وی ل جھێ قولپكا دروست دانای، دەما گوتیێ: "ئەڤ قولپكا شێوێ وێ برەنگێ دلی ڤە دچیت، بلا لبیرا تەبیت، دا سەرسالا ھەڤژینیا مە ژبیرنەكەی و مەسجەكا حەژێكرنێ بۆ من بنێری".

ل تەلەفونا خوە گەرییا، دا نامەكا تژی حەژێكرن بنڤیسیت، ژبەركو ئەڤە سال زڤری سالێ و دڤێ رۆژێدا، وان شەھیانا خوەكربوو.

 

ـ ئەڤ تابلویێ دووماھیێ لبەر راوەستیای، كەلەخ ل ئالیەكییە و سەرێ كەلەخی دوو بھوستا ژوی وێڤەتر، ژبێ خودانییێ ھاتیە ژبیركرن و شێوەكارەكێ دلرەق، بدویركرنا سەری ژ كەلەخی، دێ چاوان بەرسڤا روندكێن دایكەكا جەرگ سووتی دەت.

بیرا وی ل روندكێن دایكا وی و پەیڤێن وێ یێن دووماھیێ ھاتن، بەری ژ مالێ دەركەڤیت، دەما گوتیێ: "قوربانی سەرێ تە بم"..

ـ ئەڤ تابلویێ دووماھیێ لبەر راوەستیای، ئالایەكێ پەرتیێ رەش ژ دوورڤە دیاردكەت و دا كچا وی یا شەش سالی و خێزانا وی د پاراستی بن، بەرەڤ ڤی شەری ھاتبوو.

بەری سەرما ھناڤێن وی ب گەزینیت، ئاخفتنێن كچا وی ھاتنە بیرێ، دەما گوتیێ: "دەما دھێی، چاكیتەكێ زڤستانێ بۆ من دگەل خوەبینە".

 

ـ ئەڤ تابلویێ دووماھیێ ل بەر راوەستیای، ژ ھەمی تابلویێن دی زێدەتر خەلك لدوور دزڤرین و ھەر ئێكی چیرۆكەك ژێ د ئینادەر، لێ چیرۆكا وی ژ ھەمیان یا جوداتر بوو، تا دگەھشتە ناڤەرۆكا چیرۆكێ، سەرێ چیرۆكێ ژ بیرێ دچوو و تا ل سەرێ چیرۆكێ دزڤری، ناڤەرۆك ل بیرێ نەدما.

دەما ل وی دەستی ژی زڤری یێ كەتیە سەر ملێ وی، شێوەكاری ب دلەكێ سار گوتێ: "ڤەگەرە ناڤ تابلویی، ژبەركو دەمێ تە بدووماھی ھات".

شورەشا ئەنترنێتێ.. جیھان چ دی چاڤەرێی مەناكەت..!

 عبدالرحمن بامەرنی

بەری دەمەكی بوو، دەما ئەز ژ خەو رابوویم و ئێكەم تشتێ من دەستێ خوە بریێ، پێنەڤێت ئەڤە بەری ژناڤ جھێن خوە دەركەڤم و بچم ددانێن خوە بشووم، ئەو ژی تەلەفونا من بوو و بەرێخوەدانا نویاتییان و لێ ھیچ تشتەك لدەف من ڤەنەبوو، سەرەرای تەلەفونا من بخوە ئەنترنێت یا دناڤدا ھەی و دمالێدا ژیدا مە وایفێ ھەی، یان كو دوو ژێدەرێن ئەنترێنتێ من یێن ھەین. لێ ئەو ئالوزییا ژ نەبوونا ھێلێ، تێرا وێ چەندێ ھەبوو من نە ئارام بكەت و شووینا ل دەستپێكێ بچم دەست و چاڤێن خوە و ددانێن خوە فرچە بكەم، ئەز ل ھێلا وایفی گەریام، كا كارەب دچیتێ یان نە! ئەز ل رۆژان زڤریم، كا بەشدارییا وێ یا ھەیڤانە بدوماھی ھاتیە یان نە! دڤان چركەیاندا چەندین ھزران خوە ل سەرێ مندان، پا ئەگەر ئەنترنێت ب ئێكجاری ھاتە برین، دێ چ رویدەت؟ ئەز ناچمە سەر وان تشتێن ب ئەنترنێتێ ڤەگرێدای، ژ جورێ پەیوەندییان و ئەرشیفكرنا وێنەیاان، فرێكرنا مەسجان، زانینا دەنگ و باسان، خەزنكرنا پێزانینێن رێڤەبەری و سازییان و ئاسانكاریێن برێكا وێ رێكخستن و ئاسانكاری ئێخستیە ھەمی تشتەكی وووووو لیستە یا درێژە، تا وی راددەی ئەنترنێت یا بویە بەشەك ژ ژیانا مە ھەمییان و ئەم نەشێین ئێك مەتر ژی خوە ژ موبایلا خوە دوور بگرین، كو ئەو مە ب جیھانا ژ دەرڤە ڤە گرێددەت.

تەخمین بكە، ژینگەھا مرۆڤان دێ بیتە بیابان، ھەمی تشتەك ل بەر چاڤێن مرۆڤی بەرزەبیت! ددەمەكیدا تەكنەلوجیایێ گەلەك ڤالاتیێن مرۆڤی نەدھێلان و رێكدخستن و سیستەمەكێ دیێ ژیانێ و كونترولكرنێ لدەف ھەر كەسی ژمە دروست دكر و ئەگەر ژ نشكەكێڤە ئەڤە ھەمی بەرزە بوون، ئەم دێ خوە ل كیڤە بینین؟ ژیانەكا دەستپێكی، تو ھزر بكەی جیھان یا چاوا بیت، ئەو جیھانا تەكنەلوجیایێ كریە گوندەكێ بچووك؟!!

ھەر چاوا بیت پشتی دەمژمێر و نیڤان ئەنترنێت وەك خوە زڤری ڤە و لێ ئەز ناڤەشێرم، نە ئارامییا من ھەر وەك خوەمابوو پا ھەكە بۆ راست؟ لێ پشتی ھینگێ لدەف ھەڤالان ژنوی من زانی، ژبەر ئەزموونێن شەشێ ئامادەیی یێن ویزرای، ھێل ھاتیە برین!!!

ئەگەر ل بابەتێ خوە بزڤرم، (جیھان چ دی چاڤەرێی مە ناكەت)، كو من ب مەسەت چیرۆكا برینا ھێلێ كریە دەستپێك بۆ نڤیسینا خوە، ئایا دناڤبەرا ڤان ھەردوو قوناغاندا، قوناغا من ب دەستپێكیێ ناڤكری، قوناغا بەری ئەنترنێتێ و قوناغا نوكە ئەم تێدا، ئەم وەك كومەلگەھێ كوردی ل كیڤەینە؟!!

بۆ پشت بەستنێ ژبۆ ڤێ نڤیسینێ، ئەز دێ تورا فەیس بووكێ وەرگرم و ئەوا دكەڤیتە بەرچاڤێن من ژ ئازراندنا بابەتان، ب حوكمێ كو زێدەتریا دەمێ من ل سەر ڤێ تورێ دەرباز دبیت و سەرەرای كو ئەز بخوە ژی سەرپەرشتیا پەیچەكێ ل سەر ڤێ تورێ دكەم و زێدەباری بەشداری و چالاكییا من د بابەتێن كومەلایەتی و سیاسی و ئابوری و ھونەری و رەوشەنبیری، ئەڤێن وەك پوست دھێنە بلاڤكرنێ.

 

ئەم و تەكنەلوجیا

تەكنەلوجیا یا بەرەڤ مەڤە دھێت و مە بڤێت و نەڤێت یا دبیتە بەشەكێ گرنگ ژ ژیانا ھەر ئێك ژمە، ئەم چەند بەرسینگا وێ بگرین، ل سەر داب و نەریتێن خوە راوەستین و ئاینی بۆ بكەینە بەربەست، لێ ئەو بێ دەستوردان یا دھێت و وەك لەھیەكێ یە یا ھەمی تشتەكی دگەل خوە دئینیت و ھەلبژارتنا مە بۆ بەرسینگرتنا وێ لەھیێ، تێرا وێ چەندێ ناكەت كا ئەم خوە دگەل بگونجینین یان نە! ژبەركو یا دبیتە كەتوار و ئەو ھەمی تشتێن بناڤێ بەدرەوشتی، بێ عاری، شەرم و عەیبە و دگەل داب و نەریتان ناگونجیت، ھەمی یێن دبنە تشتەكێ رابردوو، چاڤێن ھەمیان یێ ڤەدبن، ئێدی خەلك یێ تشتی ب چاڤ دبینیت و خەلك ئێدی باوەر ژ گوھێ خوە ناكەت.

 

ئەگەر چەند نمونان بینم:

 ژ روویێ ئاینیڤە:

 خەلك زێدەتر د ئاینی و باشی و خرابییان دگەھیت و ئەگەر ل دەمەكی بتنێ برێیا بلندگویێن مزگەفتێ و بتنێ زەلامی گوھدارییا مەلای كربایە، ئەڤرو ژن و زارۆك ژی دشێن برێیا تیڤی و موبایلێ گوھدارییا باشی و خرابیان بكەن.

 

ژ روویێ جڤاكی ڤە:

دەما بەحسا ئەنترنێتێ دھێتە كرنێ، ھەمی گازندا وێ چەندێ دكەن، كو سەرەدان ھەڤگەھشتن یێن كێم بووین، لێ ئەگەر تو برەخەكێ دیڤە لێ بنێری، بەرۆڤاژی یێن زێدەبووین و تایبەتی ئەگەر بەحسا ژنان بكەم، كو رۆژانە دشێن دانوستاندنێ و پرس و سلاڤێن خوە و سەح و سییان ل چەندین كەسان بكەن، خوە چەند ددوور بن، ژبلی كو چاڤ روونیەك ژی لدەف خەلكی ڤەكریە. مرۆڤ رۆژانە پەیوەندیێ دگەل چەندین كەسان دكەت و دان و ستاندنێ دگەلدا دكەت، ئەگەر ددەمەكیدا مە پەیوەندیێن خوە ل سەر بنەمایێ تەمەنی بتنێ كربن، ئەڤرو وەك سەروچاڤ و رەگەز ژی مرۆڤ نابینیت، بتنێ كا ئەو چ دنڤیسیت و گرنگ نینە باوەرناما وی ل چ ئاست بیت، ژبەركو ئەوا ئەو دنڤیسیت ئاستێ وی دیار دكەت.

 

ژرویێ زانستیڤە:

تەكنەلوژیایێ گەلەك تشت دگەل خوە ئینان، كو ژیانا مە ئاسان بكەت و بكەڤنە دخزمەتا مەدا، ئێدی بۆ گەلەك تشتان پێدڤی ناكەت تو پارەی ب مەزێخی و تو دشێی برێكا ئەنترنێتێ باشترین و نووترین رێكارێن جوتیاریێ و پیشەسازیێ و ھەمی بوارەكی وەربگری، ناسیارەكێ مە ھوسا دگوت: ئەز برێكا كورێ خوە یێ شیایم گەلەك مفای ژ جوتیاریێ و چاندنێ وەربگرم، چاوانییا چاندنێ و زێدەكرنا بەرھەمی، ئەو ڤان ھەمیان ب ڤیدبو و دەنگ و رەنگ نیشا من ددەت، ئەز باوەردكەم ئەگەر بەری نوكە مە ئەڤە زانیبان، مە گەلەك زەحمەتی نەدبرن.

 

ژ روویێ پەیوەندیانڤە:

گەلەك دبێژن ئەنترنێت كوشتنا پەیوەندیێن جڤاكییە، لێ بەروڤاژی، ئەز بەحسا وان ناكەم ئەڤێن بێ پلان و ب كوراھی ئەنترنێتێ بكار دئینن، ئەز بەحسا وان دكەم ئەڤێن ب زانابوون دچنە دناڤا ڤان مالپەراندا و باشترین پەیوەندیێن ھەڤالینی یێن دروست كرین، بۆ لێكگوھارتنا پێزانینان، تا بابەتێ دلداریێ و ھەڤژینیێ ژی.

 

 

ژ روویێ خواندن و رەوشەنبیریێ ڤە:

ئەنترنێت باشترین ژێدەرێ بدەستڤەئینانا پەرتووكانە، ئەو پەرتووكێن رەنگە ل پەرتوكخانان بدەستنەكەڤن، یان ژبەر گرانییا وان ھەمی خوێندكار نەشێن ب كرن، ئەڤرو ب كلیكەكێ دێ ئەڤ قوتابیە چیتە ناڤ پەرتوكخانەكێ كو ب ھزاران ناڤ و نیشانێن پەرتووكان تێدا ھەبن. ب كلیەكێ دێ چیتە ناڤا دەھان مالپەران، نووترین فلم و شانۆ بینیت و نە بتنێ ئەو، دێ خێزانێ ژی بەشداری بینەرییا وێ كەن.

 

ژ روویێ داب و نەریتانڤە:

دەما ئەز دبێژم چ دی جیھان چاڤەرێی مەناكەت، ژبەركو ئەڤ پێشكەفتن و تەكنەلوژیایە وەكی لەھیەكێ یا ب سەرمەدا دھێت، ئەگەر مە بەرسینگا وێ گرت، وەك نوكە ئەم دبینین ھەر كەسەكێ بابەتەك ئازراند و دگەل داب و نەریتان یان ئەو تشتێ ل سەر مەزن بووی نەگونجا، ئێكسەر دێ ھێتە بەرسینگا و چ جورەكێ سڤكاتیێ ھەیە، دێ بێژیتێ، كو ئێدی چ بابەتێن ژوی رەنگی نەھێنە ئازراندن، ژبەركو ئەو یێ ل سەر ھندەك بیروباوەران راھاتی و لدەف وی نەگوھورن، سەرەرای كو تشتێن نوی پەیدا دبن و ئەگەر نمونەكێ بینم، خەسیەكێ داخاز ژبیكا خوە یا نوی كر ماسیێ بۆ وان ب قەلینیت، بیكێ ژی لدویڤ داخازیا وێ ماسی قەلاند و دەما ئینای، خەسیا وێ دیت كو ھندەك ژ بەشەك ژ سەری و بەشەك ژ كوریێ یێن ژێڤەكرین و نە قەلاندینە و دەما پرس ژێكری گوتی دەیكا من ھوسا یا نیشا مندای و دەما چووینە دەف دەیكا وێ و وێ ژی گوتێ دەیكا من یا نیشا مندای و دەما چووینە دەف پیرا بیكێ، وێ گوت ھینگێ ئاقلەویكا مە یا بچیك بوو و نەچار دبووم سەروبنێن ماسیێ ژێڤەكەم، دا جھێ وێ د ئاقلەویكێدا بكەت و بھێتە قەلاندن، ئەرێ لڤێرە مە چەند بیروباوەرێن نەدروست ھەنە و دناڤمەدا دبلاڤن و دەما ئێك دئێختە بەر دان و ستاندنێ، دبیتە جھێ نەقەبولكرنێ! لڤێرە ژی مە بڤێت و نەڤێت، بابەت دێ ھێنە ئازراندن، ھەر تشتێ نەباش یان یێ نەگونجای دێ ھێتە ئازراندن و خەلك دێ بینیت و بەراورد كەت، ھینگێ ئەگەر مە ركووی ل سەر بیروباوەرێن خوەكرن، ئەم نەشێین خەلكێ پێگەھشتی و نفشێ نوی رازی بكەین!

 

شورەشا تیك توكی

سەرەرای گەلەك تورێن جڤاكی یێن ھەین، لێ بۆ ڤێ نڤیسینا خوە بتنێ ئەز دێ ل سەر تیك تورا تیك توكێ راوەستم، بەرییا چەند ھەیڤان ڤیدیویەك ل سەر تورا تیك توكێ بلاڤ بوو و ڤیدیو ل دھوكێ ھاتبو وێنەكرن، كەسەكی پارە د جاما ترومبێلێدا دھاڤێژتن، دەھان و سەدان كومێنت بۆ چبوون، ھندا دگوت ئەڤە بەترانە، ھندا دگوت كورێ بەرپرسانە و پارێ وی یێ گەندەلیێ یە و كەس نەمابوو ئەگەر كومێنتەك بۆ نە نڤیسایی و ھەمیان دھاڤێژتێ! ژبەركو د كومەلگەھێ مە و داب و نەریتێن مەدا چ جارەكێ وەسا نەبوویە كو كەس پارەی پاڤێژیت و ئەز باوەرم ئەڤە ل چ جھان نینە، لێ ئەم دێ بێژین بلا وی (20 یان تا 50) ھزار دینار ھاڤێتبن، تو بێژی وی ب وان كومێنت و لایك و بەرێخوەدانا وێ ڤیدیویێ چەند پارە قازانج كربیت؟

 ئەم ھەمی د رێكەفتینە كو (بوبجی) یاریەكە و دەھان جاران مە زارۆك و گەنج یێن پاشە برین، كو ئەڤە چییە دەمێ وان ھەمی پێڤە دەرباز دبیت، لێ كەسێ دوویێ ل سەر جیھانێ دەركەفتی و گەلەك پارە ب ھزاران دولاران برێكا بوبجی بدەست ڤە ئیناین ھەر خەلكێ دھوكێ بوو. نمونا وی كابرای ئەڤێ (رووداو) دیدار دگەلدا كری (ئەبو رەیانی) و ئەگەر بەرێخوە بدەیە پارچە ڤیدیویێن وی، ھەمی خەبەرێن رەشن، چ كرێتێ و ئەزمان رەشی دھێنە گوتن، كچك ژی و ب كوردی مێھڤانێن وینە و بناڤ بەحسا وان دخێتە كرنێ، كو مرۆڤ گوھێن خوە ژبەر بگریت، د پارچە ڤیدیویەكا ویدا ژنەكا دھوكێ دكەڤیتە سەرچوكان و وەك كوچكێن سا عەو عەوێ دكەت لدویڤ داخازییا وی، ھەر وەكو وی بخوە گوتی ئەڤە باشترین ژێدەرێ پارەیە بۆ وی!!!!

 

یا من دڤێت ژڤێ نڤیسینێ بێژم، ئەنترنێت یا بویە بەشەك ژ ژیانا مە، خووشك و برا و زارۆكێن مە، ئێدی ئەم نەشێین وان ب ھندەك تشتان رازی بكەین یێن ئەم ژ داب و نەریتێن خوە ل سەر مەزن بووین و مە بۆ خوە كرینە ھەڤكێشەیێن ژیانێ، ئێدی ئەم ل بەر سینگا دوو ھەلبژاردناینە یان دێ خوە دگەل گونجینین و گونجاندنەكا گەلەك زیان ب مە و خێزان و زارۆكێن مە نەكەڤن شیینا خرابیێ بۆ باشیێ بكار ئینین و زانستیانە یان ژی دێ ب داب و نەریتێن خوە بەرسینگا وێ گرین، وەك نوكە گەلەك جاران دھێتە دیتنێ، دێ ھەمی تشتێ وێ رەدكەین و لێ پرسیار، ئەڤ بەرسینگگرتنا مە دێ ھەتا كەنگی بیت، ئەگەر نمونا ماسیێ و بیكێ و خەسیێ ل بەر چاڤ وەربگرین.

ــــــــــــــــــ

1ـ د كوڤارا مەتین ژمارە 234دا بلاڤبوویە.

2ـ د كوڤارا نوێبوونەوە ژمارە 8 دا بلاڤبوویە.

 

 

 

 

خرەخر (كورتە چیرۆك)

د ناڤەراستا ژیێ خوەدا بوو، یان چەند سالەكا كێمتر یان زێدەتر. ئەڤە گوتنێن ھەڤژینا وی بوون، دەما پولیسان ل بەر دەری پرسیارا سالوخەتێن ھەڤژینێ وێ ژێكرین و ھێشتا ئەوی بریار نەدایە، ئایا جارەكا دی بزڤریتە باوەشا وێڤە و شەڤا خوە دگەل دەرباز بكەت یان نە. ئەڤە ددەمەكیدا بوو، خرەخرا وێ، تێرا وێ چەندێ ھەبوو ژ مالێ دەركەڤیت و ھەر جھەكێ بیت، بتنێ بێدەنگی لێ ھەبیت.

ل جاددێ دەنگێ گزوزێ ترومبێلان، ھەر چ قەرەبالغیەكا لڤی باژێری ھەی، لڤێ جاددێ یێن خرڤەبووین و دەھـ قاتی ژ خرەخرا ھەڤژینا وی خرابتر.. خوە سمێ سەعدێ ژی، ئەڤێ ب گولتەی ھەر رۆژ وەكی بانگێ ئێڤاریان، پێ خوە د خراندە بەر ڤی كەربلۆكی و ل سەر دروینشتە خارێ، ڤێ سپێدەھیێ جوداتر ژ رۆژێن بەری وێ، دڤیا ب ئاخفتنێ و پربێژییا خوە، تولێن پێ خوە یێ ژ كاركەفتی، ب ئەزمانێ خوە بەدەلڤەكەت. ھەر ترومبێلا دبەر ویرا دبوری، دەنگێ ھورێنێن وان، جرف ڤێ دئێخستن! ب سەد قەدی و بەلا خوە ژ حەشامەتا ڤان مرۆڤان دویركر و ل بێدەنگترین تاخێ باژێری، چاڤێن وی ب كێلیێن مرییا كەفتن.

بەری وێ تابلۆیا ھەلاویستی یا ل سەر نڤیسی (گورستانا شاخكێ) بخوینیت، چاڤێن وی كچەك دنیڤا ژیێ ویدا بۆ خوە راكێشان و یا لھنداڤ گورەكی.. دئێكەم دیمەندا، دێ ھزركەی د شەڤا بیكینیا وێدا، مرنێ ھەڤژینێ وێ یێ تێر نەدیتی یێ ژێ ستاندی. دیمەنێ ڤێ كچا ھێشتا خەملا بیكینیێ لبەر و لڤێ سپێدەھیێ و لڤی تاخێ بێدەنگ، ھزرا رەڤینێ ژ خرەخرا ھەڤژینا وی و گزوزێن ترومبێلان و قەرەبالغیا باژێری و پربێژیا ئەڤرۆیا سمێ سەعدێ و ھورێنێن ترومبێلان، ھەمی ژ بیرێ برن.

وێ كچا دێ بێژی شنوی یا ژ جوانكاریێ دەركەفتی و لڤی تاخێ بێدەنگ و ل ھنداڤی ڤی گوری، چاوان دەرێ سندوقێ دھێتە ڤەكرنێ، وێ كچێ، دەرێ وی گوری ڤەكر و خوە ژووردا بەردا تێدا.. چەند چیقێن كراسێ وێ، ئەڤێن كێلیێ نەھێلاین دگەل خوەدا ببەتە ناڤ گوری، تێرا چاڤێن وی ھەبوون، كو نە خرەخرا ھەڤژینا وی و نە دەنگێ گزوزێ ترومبێلان و نە قەرەبالغیا مرۆڤان و نە پربێژیا سمێ سەعدێ و نە ژی ھورێنێن ترومبێلان، بشێن وی ژ بریارا وی پاشكەز بكەن..

دەما گەھشتیە ھنداڤی وی گوری و خوە د دویڤ وێ كچێدا بەردایە خارێ و بەری ناڤێ وێ كچێ بزانیت، پولیسان ژ پشتڤە دەستێن وی گرتن و كلامچەكرن و ھێشتا ژ خەیالێن وێ كچا ئەگەر ب ھژمار ژی بیت، نیڤا تەمەنێ وی دەرباز نەكری ھشیارنەبووی، دەنگێ پولیسی و ھورێنا ترومبێلا و پربێژیا سمێ سەعدێ و قەرەبالغییا باژێری و گزوزێن ترومبێلا ھەمی تێكەلی خرەخرا ھەڤژینا وی كرنەڤە، ئەڤا كەتیە سەر پشتێ و برەخ تەنشتا ویڤە ل سەر تەختی، ھەر باش بوو ناڤێ خودێ ژ بیرێ نەچووی و جارەكا دی سەرێ خوەدانا سەر بالیفكێ ڤە.

• دگوڤارا رامان ژمارە (305ـ306)دا یا ھەیڤا (3ـ4/2023)دا بلاڤبوویە.

ئایا باب كییە؟؟؟

 وەرگێران. ع، بامەرنی

ئەڤ پرسیارە ژ كومەكا قوتابیێن ماستەرێ ل ئێك ژ زانكویا ھاتەكرنێ، ئایا باب كییە؟ بەرسڤ ژی گەلەك د كلاسیك بوون و دجوان بوون، بتنێ ئێك تێنەبیت سەرنجا ماموستایی راكێشایی و روندك كەفتینە چاڤان.
قوتابی ھوسا نڤیسی بوو..
باب.. د زارۆكینییا خوەدا دێ پێلاڤا وی كەیە پێ خوە و ژبەركو پێن تە د بچیكن، دێ ھەلنگڤی و نەشێی پێ پرێڤەبچی، دێ بەرچاڤكێن وی كەیێ، دێ ھەست ب مەزناھیێ كەی، دێ كراسێ(قەمیسێ) وی ل بەر خوە كەی، دێ خوە جوان بینی و كەس ژتە مەزنتر نینە..
ھەر تشتێ بھێتە سەر ھزرا تە و چەند یێ بێ رامان ژی بیت، دێ ژتە وەرگریت و نا بێژیتە تە نەخێر و دێ بۆ تە ئینیت.. دێ ھێتە مالێ و تە كێشیتە بەرسینگا خوە و ب كەنیڤە تە ھەمێز كەت، بێی كو تو بزانی وی رۆژا خوە چاوان دەرباز كرییە، وێ رۆژێ چەند ماندی بوویە و چەند ئازار ل سەر كاری كێشاینە.
ئەڤرو ژی د مەزناھییا خوەدا..
تو پێلاڤا وی ل پێن خوە ناكەی، ژبەركو زەوقا وی یا كەڤنە و تە حەژێنەكر! دێ دلێ خوە ژ جل و بەرگێن وی یێن كەڤن، ھەمی تشتێن وی رەشكەی، ژبەركو بدلێ تە نینن! ئێدی ئاخفتنا وی و پرسیاركرنێن وی دگەل تە، نە بدلێ تەنە، ژبەركو ئەو یێ ماكێ خوە دژیانا تەدا دكەت..! رەفتارێن وی تە ل شەرمێ ددەن و ئاخفتنا وی بۆ تە نەخوش دكەت!
ئەگەر تو گیروبووی و ئەو دلگرانبوو و گلەیی ژتە كرن ل سەر گیروبوونێ، دێ ھەست كەی ئەو یێ بێھنا تە تەنگ دكەت، دێ ھیڤیخواز بی خازی، كو ئەو نەبایە دا زێدەتر یێ ئازاد بی! بتنێ كو وی یا ڤییای ئاگەھـ ژتە ھەبیت نە زێدەتر..
دێ دەنگێ خوە ل سەر وی بلند كەی و ب بەرسڤێن خوە و گوتنێن خوە بۆ وی نەخوش كەی، دێ خوە بێدەنگ كەت، ئەو ژی نە ترس ژتە، بەلكو حەژێكرن بۆ تە و لێبورین ژتە.. ئەگەر دبەر تەرا بوری، پشتا وی یا چەمیای، تو دەستێ وی ناگری، ژبەركو تو یێ ژوی درێژتر لێھاتی!
دھی تو د ئاخفتنێدا دھەزقی و تە گەلەك پیت دروست نەدئینان، دا كەتە كەنی و ب سینگەكێ فرەھـ وەرگریت و نوكە ژی تو بێھنتەنگییا خوە ژ زێدە پرسیاركرنێن وی دبینی، شرۆڤەكرنێن وی، پشتی كو گوھێن وی كێم بووین و باش نابینیت ژبەركو یێ ب ناڤ سالڤە چووی.
ھیچ جارەكێ بابێ تە مرنا تە نەخاستی یە، نە تو یێ زارۆك و نە ژی دگەل مەزنبوونا تە.. بەلێ تو مرنێ بۆ دخوازی، ژبەركو د پیراتییا خوەدا دێ ھەر كەسی ژی بێھن تەنگ كەت، ئەڤێن دگەل تە..
بابێ تە بێھنا ل سەر تە فرەھكری، د زارۆكینیا تەدا، د نەزانینێن تەدا، د گەمژەییا تەدا، د مەزنبوونا تەدا، د خواندنا تەدا، د خوشی و نەخوشی و ھەمی تشتەكێن تەدا، ئەرێ تە جارەكێ ھزركریە تو ژی دێیراتییا ویدا و د نەخوشیێن ویدا بێھنا خوە ل سەر وی فرەھبكەی؟!!

-------------------https://www.facebook.com/photo/?fbid=10218340838792671&set=g.209899095715001

https://rwangauraxna.com/ba/detail.aspx?IDNews=7187

ئومێدا من ھەمی ئەو بوو، بابێ من تێر خارنێ بخوت!

 عبدالرحمن بامەرنی

ئەز دێ ڤێ گوتارێ نڤیسم ژبەركو ئەڤە ھەیڤا رەمەزانێ ھات، ھەیڤا رەمەزانێ ژی ئەم ب ھەیڤا خێران ناس دكەین. د رەمەزانێ دا ئەم ژ بانگێ سپێدێ زكێ خوە دھێلینە برسی تا بانگێ مەغرەب، لێ مە چ جارەكێ پرسیار ژخوە كریە، ئایا بوچی ئەڤ زك برسیكرنە؟ مانە مەبەست ژ رەمەزانێ، دا ئەم ھەست ب كەسێن ھەژار، كەسێن برسی بكەین.
بەری زێدەتر بناڤ گوتارا خوەڤە بچم، ئەز دێ ڤێ سەرھاتیێ ڤەگێرم، ھوسا من خاندبوو، ل قوتابخانەكا ناوەندی یا كچان، قوتابیان د بێھنڤەدانا دناڤبەرا واناندا خارنێن خوە رێزدكرن و پێكڤە دخارن، كچەكا گەلەك ھەژار ھەبوو، ھەڤالەكا وێ ھەست پێكر و گوتێ تو ژی خارنا خوە بینە ناڤ یا مە و ھوسان دێ خارن تێكەلی ئێك بن و كەس نزانیت چ خارن یا كێیە و ھوسان دگەل مەدا دما و كەسێ نەدزانی كێ چ خارن دگەل خوە ئینایە. ئەڤێ چەندێ ڤەكێشا تا مە خواندنا ناوەندی بدووماھی ئینای و وی دەمی بابێ وێ چوو بەردلوڤانیا خودێ، بەرە بەرە حالێ وێ خوشتر لێھات، جل و بەرگێن وێ نویتر و روویێ وێ گەشتر، مرۆڤی ھەست دكر حالێ مالا وان خوشتر یێ لێھاتی، من وەسا ھزركر، ژێدەرەكێ پارەی یێ بۆ وان ژ جھەكی دھێت، من خوە گەھاندێ و من ژێ پرسی، نھێنییا ڤێ گوھورینێ چییە؟
دەستێ من گرت و كرە گری و گوت: ئەم ب شەڤێ ژ برسادا د نڤستین، من خوە دگرت كو رۆژا پاشتر ل قوتابخانێ دێ دگەل وە خارنێ خوم، دەیكا من ژی نانێ شیڤێ ڤەدشارت دا بۆ برایێن من بۆ تێشتا سپێدێ ب ھەلگریت و سپێدێ ئەز زوی ژ مالێ دەردكەفتم، بتنێ مەبەستا من، ئەو نانێ مای دا تێرا خووشك و برایێن من بكەت، بەلێ پشتی بابێ من چوویە بەر دلوڤانیا خودێ، ئێدێ ھەر كەسێ ل دەردوورێن مە، جیران، ناسیار، تا خەلكێن دویر ژی خێرا دگەل مەدكەن، تشتان بۆ مە دئینن، ژبەركو ئەم بێ بابین، ئەم سێوینە! ئەرێ ما ھەتا مرۆڤی سێوی دبیت شنی دێ خێر دگەل مرۆڤی ھێنە كرنێ؟!!

ئاخفتنا وێ یا ئەز گەلەك ئێشاندیم ژی، گوت: (من ھیڤی دخاستن، بابێ من تێر خارن خاربا، بەری ژیانا خوە ژ دەست بدەت).
ھیڤیدارم ئەڤ ڤەگێرانە پەیامەك بیت ژبۆ ھەمی خێركەران، بۆ ھەمی وان كەسان ئەڤێن ھەژارەك و دەست كورتەك ل نزیكی وان، كو راستی ژی بیت مە خەلكەك یێ ھەی پێدڤی ھاریكاریێن مەنە، مە خەلكەك یێ ھەی ب زكێن برسی زارۆكێن خوە د نڤینن و بلا ئەم دەستێ ھاریكاریێ بۆ بگەھینین.

------------------https://www.facebook.com/photo/?fbid=10218302578276182&set=g.209899095715001

https://www.rwangauraxna.com/ba/detail.aspx?IDNews=7165

تەحل و شرین خەلەكا ئێكێ!!

 عبدالرحمن بامەرنی

من د ئەڤ شەڤەدا خەلەكا ئێكێ ژ داراما (تەحل و شرین)دیت، ل دەستپێكێ دەستخوشیێ ل بەرھەمھێنەرێن درامایێ دكەم و رولێ وان یێ جوان، ھەر ژ نڤیسینێ و ئەكتەران بگرە و تا دگەھیتە دەرھێنەری، تشتێ بۆ من ژڤێ خەلەكێ خوش، ئەو راستینە یێن ئەز گەلەك جاران دنڤیسینێن خوەدا ژێ بەحس دكەم، كێشا مە ل ھەرێما كوردستانێ ھند گەندەلی و دزی نینە، ھندی مە چاڤدێری نینە.
دا پیچەكێ بەحسا ڤێ خەلەكێ بكەم، گەنجەك خودان ھەڤژینە و ھزرێن جوان یێن ھەین، ل كارەكی دگەریت و ھزرا وی ڤەكرنا پەرتووكخانەكێ یە، كو خەلكەكێ خواندەڤا پەیدا بكەت، ل جھەكێ پشتەڤانیا پرۆژان دھێتە كرنێ و چەند پارە بۆ دھێنە مەزاختن، لێ ژ گایی گوھی نیشان ددەن، رێك دێ بێژی ئەڤە كوردن و كومەلگەھێ كوردی و حكومەتا كوردییە، ل دووماھیێ و پشتی دزانن ئەو پارە دروست نەھاتیە بكارئینان، پولیسان فرێدكەنێ و زیندان دكەن، بێی دیڤچوون، بێی گەندەل و ئەڤێن ل پشت پەردێ دزیان دكەن بدەنە دادگەھێ و ھوسا (نەبوونا چاڤدێریێ) یا بەردەوامە و ھەر گاڤا ل كوردستانێ مە شیییا ل رێڤەبەریێن خوە، ل سەر ئاستێ پارێزگەھێ ل سەر ئاستێ حكومەتێ دەزگەھەكێ تایبەتێ چاڤدێریێ دانین و دیڤچوونەكا دروست بكەین، ب پشت راستی دبێژم، دێ مە گەندەل كێم بن و دێ جوانترین حوكمرانی ھێتە كرن، من بەحسا بەرپرساتیا ھوبەكا بچیكە تا حكومەتێ ھەمیێ.

----------------

https://www.rwangauraxna.com/ba/detail.aspx?IDNews=7166

https://www.facebook.com/photo/?fbid=10218303400656741&set=g.209899095715001

خیشك!!!

 و. ئا. بامەرنێ

گوت: ئەز و برایێ خوە ل سەر تشتەكێ ب شەرچووین، ئەڤە تشتەكێ ئاساییە ژی د مالێدا خیشك و برا ب شەر بچن. من گەف لێكرن و من گوتێ دێ بۆ تە بێژمە بابووی! دەما بابێ من ھاتی، ئەز ژ ئاخفتنا خوە لێڤە بووم و من بۆ نەگوتێ، لێ دەیكا من ب شەرچوونا مە بۆ وی گوت.
من دیت بابێ من ھاتە دژوورڤە و گوتە برایێ من: تە بوچی شەرێ خیشكا خوە كریە؟
برایێ من گوتێ: ئەوێ بەری دەستپێكر!!
بابێ من گوتێ: ئەڤە تو چ دبێژی، ما تو یێ دینی!! تو یێ دبێژی وێ دەستپێكر، ئەرێ راست تە وەگوت!! دەستێ وی گرت و راكێشا دەرڤەی ژووری و گوتێ: ئەڤ مالە، مەملەكەتا وێیە، ئەگەر د مەملەكەتا خوەدا ھاتە پاشڤەبرن، پا دێ ل كیرێ رێز لێھێتە گرتنێ!!
پشتی من تو پشتەڤانێ وێی، تو گوپالێ ددەستێ وێدای، ئەگەر تە شكاند، پا دێ قەستا كێ كەت!!
بابێ من زێدەتر گوتێ: تو خوشتڤیێ وێی، ئەو ژی ئەو وەریسە یێ تە ژ بیرا ژیانێ رزگار دكەت، من نەڤێت خوە ئەگەر ب ترانە ژی بیت تو وێ بێ ھیڤی بكەی و ژ ھینگێ وەرە، برایێ من یێ خوشتڤی ژبن فەرمانێن ماموستایێ من یێ مەزن ((بابێ)) من دەرنەكەفتیە.

------------------------https://www.facebook.com/photo/?fbid=10218298201606768&set=g.209899095715001

https://www.rwangauraxna.com/ba/detail.aspx?IDNews=7161

وە گوهـ ل سترانا (عەلو و فاتمێ) بوویە؟!

 عبدالرحمن بامەرنی

عەلو فاتمێ چیرۆكا راستەقینەیا دوو عاشقانە، دوتمام و پسمامێن ئێكن و وەك نەریتەكێ كوردەواری، كچەكا نە شویكریا مەزن د مالەكێدا هەبایە و وێ پسمامەك هەبایە، گەنجان خوە ژێ ددانە پاش و دزانین، ئەو كچ دێ بۆ پسمامێ وێ بیت و هوسان، ئەگەر ئێكی كچەك بۆ كورێ خوە دیتبایە و ڤیابا بخوازیت، ئێكەم تشت دا پرسیار كەت، كا كەسەك درێكێ دا هەیە یان نە! مەبەست كا پسمامەك هەیە یان نە. عەلو فاتمێ ژی ئێك ژڤان جورە چیرۆكانە و هێژ دەیكێن وان دوو گیان، هەردوو برا دبێژنە ئێك، ئەگەر خودێ كور دا ئێك ژمە و یێ دی كچ، دێ بۆ ئێك بن و چیرۆكێ بەردەوامی هەیە.
مەبەستا من ب ئینانا ناڤێ ڤێ چیرۆكە سترانێ، ئەز دوو تشتان بینمە زمان، ئێك مە كەلتورەكێ گەلەك زەنگینێ چیرۆكێن عەشقێ یێ هەی، ئەڤە ژی رەسانەتییا مللەتێ مە دیار دكەت، پرانیا وان ژی دەنگبێژان كرینە ستران و وەك ستران ئەم شانازیێ پێببەین و ب ساخكرنا كەلتورێ سترانا خوە یا رەسەن، ئەم دشێین ڤی كەلتورێ بۆ نفشێ نوی ژی شور بكەین و ڤەگوهێزین و ئەو ب شانازیڤە ل مێژوویا خوە بنێرن.
یا من دڤێت ل سەر براوەستم، ئێك: د نوكەیا پێشكەفتنا تەكنەلوجیایێ دا، تورێن كومەلایەتی، كەلتورێ گەلان دێ دناڤ را بەرزەبیت، زانیاری پێكڤە و بلەز یێ دكەڤنە بەر دەستێ خەلكی و وێ دەرفەتێ نادەتێ، ئەڤ خەلكێ هەنێ ل كەلتورێ خوە، ل پاشماوێ باب و باپیرێن خوە، مێژوو و زمانێ خوە ڤەگەرن، د دەمەكیدا، ل وەلاتێن دی، ل ناڤ گەلێن دی، ئەڤ تشتێن هەنێ هەمی یێن هاتینە كومڤەكرن و یێن مە گەفێن ژناڤچوونێ ل سەرن.
خالا دوویێ: من بەحسا سازیێن رەوشەنبیری و هونەرییە، ئەم چاوان ڤی كەلتوری ساخ بكەین و دیجیتال بكەین! ئایا ئەم هەست ب مەترسییا ژناڤچوونێ دكەین، ئەگەر ئەم بیر لێهمشتا دخالا ئێكێدا من بەحسكری و هەر تشتێ بكەڤیتە بەر رامالیت!!

-----------------------https://www.facebook.com/photo/?fbid=10218294761640771&set=g.209899095715001

https://www.rwangauraxna.com/ba/detail.aspx?IDNews=7159

ژ دەستكەفتێن سەرھلدانێ (ئەم بووینە قەرەچ؟!!)

 عبدالرحن بامەرنی

ل دەستپێكێ دگەل رێزگرتنێن من بۆ ھەمی (قەرەچان)، پەیڤا قەرەچ وەك ناسنامە، وەكو كوچەراتی من یا ب كارئینای، كو خوجھێن چ دەڤەرا نەبن وەك ئاخ، وەك نمونەیا عەشیرەتێن مە كو دەڤەرێن وان دیارن. بوچی من گوت قەرەچ؟ راستی ئێكی گوتە من تو قەرەچی و ئەڤە چەند ھەیڤە ئەز ھزرا خوە دكەم، ئایا قەرچیبوون پرۆسەیە، دەستكەفتە و لێ ل دووماھیێ بۆ من دیاربوو، ئەگەر تو عەشیر بی، دێ تە بار د پوستێن حكومی دا ھەبیت، دێ تە پارێ كوچكێ ھەبیت، دێ تە كاندید بۆ پوستێن پەرلەمانی، وەزاری، رێڤەبەرێن گشتی وووو یا ژ ھەمیێ گرنگتر، دێ یاسایێ ژی بەزینی و ژ خوە ئەگەر تو ب سەر حزبا دەستھەلاتدارڤەبی، پیچەكێ مەلاقیێ و تێكڤەدانێ ژی بزانی و یانكو تو ھاولاتیێ دەرەجە ئێكی و دێ شێی بیە رێڤەبەر، شێی بیە بەرپرسێ بەشی، شێی بیە بەرپرسێ ھوبێ و ب كورتی دێ كارێن تە فیتلانی فیت برێڤەچن.
چیرۆك ھوسا بوو، ئەز و دوو ھەڤالێن نڤیسەر ل دھوكێ كو ھەردوو بەرنیاسن، ئەم ژ ھەلكەفتەكێ ژ سلێمانیێ دھاتین و ل زالگەھەكێ مە ترومبێل راوەستاند و مە سلاڤكر، كابرای شوونا وەرگرتنا سلاڤێ، عیرێ خوە یێ پەحن ب دەرگەھێ ترۆومبێلێ ڤە گڤاشت و سەرێ خوە ئینا ژوور، گوت ھین چ عەشیرن و ژبەركو پرسیار یا غەریب بوو، ئەم بێ دەنگ ماین. پاشی ئاخفتنا خوە ئاراستەی من كر، گوت تو چ عەشیری؟ من گوتێ ئەز چ عەشیر نینم، گوت چاوا تو چ عەشیر نینی، گوت عەشیر وەك دوسكی یان بەرواری یان مزویری كا تو شاخێ چ عەشیری؟ ڤییا بۆ من رامان ژ عەشیرەتێ شرۆڤە بكەت! من گوت ئەز چ ژڤان نینم و ئەز ب چ عەشیران ناھێمە ناسكرن، گوت پا تو چ تشتی؟ من گوتێ ئەز (بامەرنی)مە، گوت ئێ بامەرنی شاخێ چ عەشیرە؟ من گوتێ بەرێز بامەرنی نە عەشیرن. گوت پا تو قەرەچی و ئەڤە ژ ھینگێ وەرە پەیڤا قەرەچ زەنگێ دمێشكێ مندا لێددەت و ئھا ئەڤرو، ل رۆژسالا سەرھلدانێ بۆ من دیار بوو، كو راست ئەم قەرەچێن بێ ناسنامەینە، قەرەچ، ب رامانا، ھاولاتیێ دەرەجە دوو و سەرھلدان ب ھەمی ھێزا خوەڤە نەشییا مە بكەتە خوجھێن ئاخێ و مەزنترین بەربەست ژی، دەما ژ ئەڤێن ل سەری من گوتین، كەسێن نە ھەژی چوونە جھێن ھەژی و بوونە بەرپرسێن كەسێن ھەژی و خویایە ژی، ئەگەر تە بڤێت كومەلگەھەكی، مللەتەكی ژناڤ ببەی، بریارێ بكە دناڤ دەستێن كەسەكێ نەزان و بێ پلاندا!

-------------------https://www.facebook.com/photo/?fbid=10218261442927824&set=g.209899095715001

https://www.rwangauraxna.com/ba/detail.aspx?IDNews=7139

ھەشتێ ئادارێ و بەرپرسیاركرنا ژنا كورد

 عبدالرحمن بامەرنی

ھەشتێ ئادارێ ب مەبەستا رۆژا جیھانیا ژنان و بەرپرسیاركرن، ب مەبەستا رەخنەگرتن ل ژنان. نڤیسینا من ژبۆ ئازراندنا ڤی بابەتی و دڤێ سالرۆژێدا، بتنێ ئەم پێداچوونەكێ ل سەر وان بەربەستان بكەین، یێن دبنە ئەگەر، كو ژن دھەمی جومگەیێن رێڤەبرنێ، بەشداریكرنێ، دەرێخستنا شیانان و خوە ئینانە پێشدا، یا چالاك نەبیت!
ب باوەرا مە، ژنەكا چالاك دشێت ببیتە كاراكتەرەكا گرنگ د خێزانێدا، د خوشگوزەرانیا خێزانێدا، د پەروەردەكرنا زارۆكاندا و ئەگەر ژنان شییان ڤێ ئەركی ب ستو خوەڤە بگرن، كومەلگەھـ ل سەر بنەمایەكێ باش، دنیا بینینەكا باش، دێ شێت خوە دگەل ھەر پێشھات، ھەر گوھورینەكێ و جیھانبینینێ گونجینیت. لێ بەروڤاژیا ڤێ، ئەگەر ژن ل سەر عەقلیەتا ئەڤە ئەركێ زەلامییە بمینیت و بێژیت: زەلامی بڤێت و نەڤێت دێ من ب خودان كەت، زەلامی بڤێت و نەڤێت دێ پێدڤیێن خێزانێ و زارۆكان پەیدا كەت و ئەگەر ژن خوە ئاڤا نەكەت، خوە پێش نەئێخیت، بەردەوامیێ ب خواندنێ نەدەت، بیر ل یەكسانیا خوە دگەل زەلامی نەكەت، د ماف و ئەركاندا! ژن دێ ھەر یا دەف گازندە بیت، دیتنا كومەلگەھی دێ یا نە گوھور بیت، شیانێن ژنان نابن، داھێنانێن وان نابن، سەدان دەرچوویێن زانكویان دێ دخانیڤە مینن، نەشێن دكومەلگەھیدا بەشداریێ بكەن، داھێنانێ بكەن، ئافراندنێ بكەن و بتنێ وەك پرسیار، ئەگەر د ئێك خێزاندا بتنێ زەلام كاری بكەت و دخێزانەكا دیدا زەلام و ژن ھەردوو كاری بكەن، ئایا دێ خوشگوزەرانیا ھەردوو خێزانان وەك ئێك بیت؟ پێنەڤێت بەرسڤ دێ نەخێر بیت.
ئەگەر بزڤرینە ژیانا كوردەواری، دخێزانێدا دڤیابا ژن و زەلامان ھەردوویان كاركربایە، دكارێ مالێ، عاقاری، گژوگیا، ھەژكا و بێرێ و دستارێ و ئاشی و داكرنا مریشكا ووووو ئەگەر جوداھی دكاری دا ھەبایە ژی، ئەڤ كارێن پێدڤی ب زەڤلەكان ھەبن، ئەو بتنێ یێن زەلامان بوون، لێ یێن دی ھەمیان ژنێ ژی رول تێدا ھەبوو. ئەگەر پرسیار ژی بكەین، كو پشتی ھاتنا حزبێن ئیسلامی سیاسی یان بێژین جیھانا نوی، سوشیال میدیایێ رێ ل بەر ژنان گرتییە؟ نەخێر، ژبەركو بمن وەرە نمونا (كچێن تاجا زێرین) باشترین نمونەنە، كو ئەو حزبێن ھەنێ ژی رێ ب دەركەفتنا ژنان ددەن، كو یا بەرھەڤ بیت بۆ كارێ ژ دەرڤەی مالێ و ژبیرنەكەین ژی، كەس ژنان ئاڤا ناكەت ئەگەر ژن بخوە خو ئاڤا نەكەت، كەس نەشێت ئێك ئاخفتن نە دجھدا بێژیتە ژنەكێ، ئەگەر ژن یا ئاڤا بیت، لێ ئەگەر ژنێ خوە پێش نەئێخست، خوە ئاڤا نەكر، شیانێن وێ كێم بوون، ئەڤ ژنا ھەنێ دێ ھێتە (ئیستیغلالكرن)، چ ل دەوامێ بیت یان كەرتێ گشتی و چ یا سەركول بیت یان ژی یا پێچایی.
یا من دڤێت بێژم، مە ژنا زیرەك یا ھەی، دشێت برێكا خواندنا خوە كاری پەیدا بكەت و ئەگەر یا خواندەڤا ژی نەبیت، دشێت كارێن دەستی بكەت و سەرەرای نەبوونا كاری، نا بێژم یا ب ساناھییە، لێ یا من مەبەست پێھەی، ژن بشێت خوە ئاڤا بكەت و رێك ژی گەلەك ب ساناھینە، ئەگەر بتنێ رێكارێن نوی بكەتە د خزمەتا ئاڤاكرن و پێشدابرنا شیانێن خوەدا، بۆ نمونە خواندنا وێ و ئەگەر یا خواندەڤا ژی نەبیت، دشێت برێكا بەرنامێن یوتیوبێ، گوھداریكرنا پەرتووكان و بابەتێن خوە ئاڤاكرنێ بكەت و د ئەڤرویا ئەم تێدا، ھیچ بەھانەیەك نینە، ئەگەر كەسەك چ نێر یان مێ بێژیت ئەز نەشێم خوە پێش بێخم.

--------------------https://www.facebook.com/photo/?fbid=10218231707144448&set=g.209899095715001

https://www.rwangauraxna.com/ba/detail.aspx?IDNews=7121

ئەگەر بەحسا سەرھلدانێ بكەین!

 عبدالرحمن بامەرنی

سەرھلدان چێبوو، لێ چاوا چێبوو و چاوا چێنەبوو، كێ رول تێدا ھەبوو و كێ رول تێدا نەبوو؟ راستی بابەتەكێ ئالوزە، لێ ئەڤێن خوە ل سەرھلدانێ كرینە خودان، مەبەستا من خوە ب سەر دەستكەفتێن وێ داداین و ب ملكێ خوە زانین، پشت راست دبێژم ئەگەر وان بارەك تێدا ھەبیت، لێ بارا ژ ھەمیێ مەزنتر، یا خەلكی ھەمیێ یە. ئەگەر خەلك نەبا، خەلكەكێ ب ھەستا نەتەوەی، یێ تژی نەبایە، سەرھلدان دروست نەدبوو و كەسەك نەشێت لبن ھیچ بەھانەیەكێ ڤێ راستیێ ئینكار بكەت، ئەگەر بھێینە قەوارێ ھەرێمێ ژی، ئەگەر كوچا ملیونی نەبایە، باوەرناكەم، دەڤەرەكا دژە فرین بۆ كوردان ھاتبایە دروست كرن و ئەڤا ئەز دبێژم ئەز ژ رولێ شورەشێ و پارتێن سیاسی و قوربانیدانا شەھیدان كێم ناكەم، ئەڤێن گیانێ خوە بەخت كرین، نەخێر و ئەز وی مافی نادەمە خوە ژی، لێ دڤێت ھەڤسەنگیێ ژی راگرین و دا بچینە خالا دیفدا.
سەرھلدان دروست بوو، دا كو گوھورانكاریا دروست بكەت و ئەز دێ بەحسا ھندەك بەراوردیان كەم، بەری سەرھلدانێ ھاولاتیێ دەرەجە دوو ھەبوو و نوكە ژی یا مای! بەری سەرھلدانێ رولێ سەروك عەشیری، ئاغای و بنەمالێ ھەبوو و پارێ كوچكا وی دھاتە دان، نوكە ھەمان تشت! یانكو، ژ دەئەنجامێ (ھاولاتیێ دەرەجە دوو و كوچكا ئاغای)، دێ نە عەدالەتی ھەبیت، كەسێ نەشیاو ل جھێ نەشیاو، یاسا رولێ خوە نابینیت، دێ زەنگینییا فول فول ھەبیت و دێ ھەژارییا فول فول ژی ھەبیت.
ئەگەر ھەبن بێژن، ھەرێم بەرامبەری عیراقێ یا پێشكەفتیە، ھەرێم یا ئارامە! پا ئەڤە چ؟ ژبەركو ھاولاتیێ ھەرێمێ، ھاولاتیەكێ تێرە! تێر، ژبەركو گەلەك نەھامەتی، دەردەسەری و قوربانی و مالوێرانكرن یێن دیتین، بوویە ب ھەر تشتی یێ رازیە و یێ تێرە ژ ڤێ پێشڤەچوون و ئازادییا ھەی، ھەر ئەو تێراتی ژی بوویە ل پشتی سەرھلدانێ وی خوەدایە ئالیەكی و كلیلێن سەرھلدانێ رادەستی پارتێن كوردی كرین و ئەگەر وی بەشداری ھەبایە، ئەز نابێژم دوبەی، لێ دا نوكە مە پێگەیێ خوە گەلەك و گەلەك باشتر ھەبیت!!
ھیڤیدارم، خوینا شەھیدان ژبیرنەكەین، روندكێن دایكێن وان، ئەڤێن كەفتینە زیندانان، خێزان و كەس و كارێن ئەنفالكریان، ئەڤێن تانوكە ل ھیڤیا روفاتێن وان، كەسێن دەربەدەربووین و باوەرناكەم كوردەك مابیت، ئەگەر ب رەنگەكی و دوویان ژبەر رژێما دكتاتورا وی دەمی ئازار نەكێشابن و سەرھلدان ھات، مە ھەمیان دەستێن خوە بۆ ڤەكرن و بلا بەرھەمێ سەرھلدانێ بۆ ھەمیان بیت، نە ھندەك ژ یاسایێ مەزنتر بن و ھندەك ب دەفتەر و ملیونان باخڤن، ھندەكان ژی دولكەكێ گازێ دخانیدا نەبیت!!

-------------------https://www.facebook.com/photo/?fbid=10218220368500989&set=g.209899095715001

https://www.rwangauraxna.com/ba/detail.aspx?IDNews=7116

شانازیێ بتە دبەم باب!

 و، ئا. بامەرنی

شارلی شابلن، ناڤدارترین كەسێ كومیدی د مێژوویا سینەمایێ دا، ھوسا گوت: دەما ئەزێ بچیك، ئەز دگەل بابێ خوە چوومە پێش نمایشەكا (سیرك)ێ، ئەم ل سرایێ راوەستیاین بۆ برینا پلێتا چوونا ژوور و ل بەر سینگا مە خێزانەك بوو ژ شەش كەسان پێكھاتبوو و زارۆك و دەیك و باب، وەك دیار ژی دھەژار بوون، جل و بەرگێن وان دكەڤن لێ د پاقژ بوون، كەیفا زارۆكان ژی گەلەك ھاتبوو، ژبەركو دا چینە پێش سیركێ.
دەما دوورا وان ھاتی، باب چوو بەر پەنجەرا فروتنا پێلتا بۆ كرینێ و پرسیارا بھای كر، دەما كارمەندێ فروشتنا پلێتا بھا گوتیێ، زڤری و تشتەك گوتە ھەڤژینا خوە و نیشانێن شەرمێ لێ دیاربوون! من دیت بابێ من بیست دولار ژ بەریكا خوە دەرئێخستن و ھاڤێتنە عەردی و پاشی خوە چەماند و دەستێ خوە ل ملێ وی زەلامیدا و گوتێ، ئەڤە پارێن تەنە یێن ژتە كەفتین! وی زەلامی سەحكرە بابێ من و چاڤێن وی تژی روندك بوون و گوت سوپاس!
پشتی ئەو چووینە ژوور، بابێ من دەستێ من كێشا و ئەم ژناڤ سرایێ دەركەفتین، ژبەركو بتنێ ئەو بیست دولار ڤ وی ھەبوون! ژ ھینگێ وەرە ژی ئەز شانازیێ ب بابێ خوە دبەم، ژبەركو ئەو دیمەن جوانترین تشت بوو، من دژیانا خوەدا دیتی، گەلەك ژ وێ جوانتر ئەگەر من ئەو نمایشا سیركێ دیتبا.

-----------------------https://www.facebook.com/photo/?fbid=10218193931760087&set=g.209899095715001

https://rwangauraxna.com/ba/detail.aspx?IDNews=7104

سیاسیێن مە دەرچوویێن یاریكێن مە یێن زارۆكینیێ نە!

 

عبدالرحمن بامەرنی

د زارۆكینیێ دا مە گەلەك جورێن یاریان ھەبوون، ئێك ژوان یاریا، ئەگەر مە ڤیابا بابەتەكی بەحس بكەین و مە زانیبا دێ گلیزانكێن ھندەكێن دی پێڤەبن، برەنگەكێ نە راستەخو مە بابەتێ خوە دئینا زمان، رێك وەك ئەڤا دێ نوكە بەحس كەم، ژبەركو من دڤێت پەیاما خوە بگەھینم، چاوا و دێ ژ كێ گریت و ژ كێ ناگریت، لێ یا ئەز ژێ پشت راست، گەلەك سەرساخ ژی دەرباز نابن.
ھوسا من خاندبوو، زەلامەك چوو دەف ھەڤسوو(جیران)ێ خوە و گوتێ: "جیران ئەگەر تە قەد وەریسكەك ھەبیت كەرێ خوە پێ گرێدەم؟"، جیرانێ وی گوتێ: "پێدڤی چ قەد وەریسكان ناكەت، بتنێ ھندەك لیڤنان بكە، كو كەر ھزر بكەت تو یێ وی سەرھەڤسار دكەی و ب سنگەكی ڤە گرێدەی و تەمام". كابرا ژی چوو ھندەك لڤین كرن، ھەروەكو كەری سەرھەڤسار دكەت و ب سنگی ڤە گرێدا و دیت كەر ژ جھێ خوە نە لڤی، ھەر وەكو جیرانێ وی گوتیێ. گەلەك كەیفا وی ھات و چوو نڤست تا لێبوویە سپێدە و دەما رابووی دا بچیت كەری بەتە سەر شولی، ھندی ھاتێ كەر ژ جھێ خوە نە لڤی، ئینا چوو دەف جیرانێ خوەڤە و گوتێ كەرێ من ژ جھێ خوە نالڤیت، جیرانێ وی گوتێ دێ ھەرە ھەڤسارێ وی ژ سنگی ڤەكە، كابرای كرە كەنی و گوتێ، ئێ نێ چ ھەڤسار و سنگ نینن، بتنێ ئەز و تو دزانین، جیرانی گوتێ راستە ئەز و تو دزانین، بەس ئەو كەرە ئەو نزانیت!
مەبەستا من گەلەكا كویر و دویر نینە، ئەرێ بتنێ وەك پرسیار، خوە ئەگەر بەرسڤ ژی نەبیت، ئایا ئەم دشێین ھزر بكەین یان نە؟ كو دراستیا خوەدا ئەم ل سەر گەلەك تشتان یێن راھاتین، ھندی یێ لدەف مە ھاتینە دوبارە كرن و ئەم یێن پێ ھاتینە تەلقینكرن و ژ مەڤە ئەو تشتە دروستن، وەك وی كابرایێ درەو دكرن و ھەمی لدویڤ درەوا وی چووین، پاشی وی بخوە ژی باوەر ژ درەوا خوەكری، دەما بابەت گەلەك بلاڤبووی!! ئەڤ بابەتێ من ژی، رێك من بەحسا سیاسەتێ یە، لێ نە ھەمی سیاسەتێ، بتنێ ئەو بابەتێن گرێدایی خزمەتكرنا خەلكی بن، ژبەركو ئەڤێن دی ژ تاقەتا منەكێ نڤیسەر زێدەترن.

------------------https://www.facebook.com/photo/?fbid=10218189051918094&set=g.209899095715001

https://rwangauraxna.com/ba/detail.aspx?IDNews=7099

بەس رۆندكێن سترانبێژا بیننە خارێ؟!!

 عبدالرحمن بامەرنی

دبەر خواندن و نڤیسینێ را، ھندەك جار ئەز خوە پاداشت دكەم، ئەو پاداشتا ھەنێ بەرێخوەدانا فلمەكییە یان ژی بەرنامەكێ تیڤیێ و تایبەتی ژی دەنگبێژێن كورد. ژوان دەنگبێژێن ئەڤرو من گوھدارییا وی دكر، سترانبێژێ كوچك و دیوانا (فەتاح دوسكی) بوو، ل سەر یوتیوبی، دیدارەكا كەڤن ل وار tv دگەل ھاتبوو كرن، دناڤ وێ دیدارێ دا سترانبێژی ستران دگوتن و دگەلدا بەحسا ژیانا خوەدكر و بەحسا كاروانیەكا خوە بۆ ناڤ گوندەكێ ئێزدییان كر و ل بەراھیێ ترسا وی ژ ئێزدییان و پاشی قەدرگرتنا ئێزدییان بۆ وی، براستی من پێش ویڤە شەرم ژخوە كر، بۆ وێ باوەرییا د سەرێ مەدا ھاتیە چێكرن، بەرامبەر كوردێن ئێزدی و یا كوردێن ئێزدیان بەرامبەر كوردێن موسلمان و ئەو ھزرا دوبەرەكیێ یا لدەف تاكێ كورد ھاتیە دروستكرن كو مە باوەری ب ئێكنەبیت و جارنا بناڤێ نەتەوەی و جارنا بناڤێ دینی ئەڤە دگەل مە دھاتەكرنێ.
ئەڤا من دڤێت دڤێ گوتارێ دا بینمە زمان، رۆندكێن ڤی سترانبێژی بوون، سەرەرای ھونەرمەند بخوە دھەست نازكن، لێ كزگریوكا كەتیە حەفكا وی تێرا وێ چەندێ ھەیە، ئەگەر سەركردە و بریار بدەستێن مە یێن كورد وێ كزگریوكێ ببینن، چاوان د حەفكا ویرا ئاسێ دما، ئەو دا دەستێ خوە ژ بەرژەوەندیێن خوە یێن تایبەت و یێن حزبی بەردەن و دا بەرژەوەندییا مللەتی و نەتەوەیی ب سەر ئێخن.
ڤی سترانبێژی دناڤ ھیڤیێن خوەرا گوت، ئەم دگەل نڤێژێن خوە دوعایێ بۆ كوردستانێ بكەین و كورد ھەمی ببنە ئێك، دەما گوتی (كورد ھەمی ببنە ئێك، ھەمی ببنە برایێن ئێك...)، وی دەمی ئاخفتنێ نەدڤییا خوە ژ گەورییا وی بینە دەر، داخێن ئێكنەگرتنا كوردان چاڤێن وی تژی روندك كرن و گوت ""من ئەڤە ژ ھونەرمەندا دڤێت، من ئەڤە ژ حەجیا دڤێت، من ئەڤە ژ مەلا دڤێت، من ئەڤە ژ سوفیا دڤێت و من ئەڤە ژ ........" و بێدەنگیێ خوە ب سەردا بەردا و ئێدی ئاخفتنێ چ بھایێ خوە نەما..
بەلێ مامێ سترانبێژ، دزانم مەبەستا تە ھونەرمەند و حەجی و مەلا و سوفی نەبوون، بەلكو مەبەستا تە سەركردایەتییا مە یا كوردی بوو، رێك ئەز دێ پێش تەڤە بێژم و دێ دوبارە ژی كەم، سەكردایەتییا كوردی ل بەرامبەری نەتەوەییا كوردی بەرپرسیارە، كو ئەڤرو دەستێ خوە بۆ ئێك درێژنەكەن و كورد ل سەر مێزەكێ نە رووننە خار.
خوزی ئێدی بەس روندكێن سترانبێژا، روندكێن دایكێن جەرگ سوتێ كەتبانە بەرچاڤ و بتنێ داخازیا وان ئێكگرتنا كوردان بایە، بلا ئەڤرو بەرۆكێ كوردان بەرژەوەندیێن مللەتی و نەتەوەیی بانە نەك وان دگەل ئێك.
ھین دشێن بینەرییا بەرنامێ دیدارێ ل سەر ڤی لینكی بكەن:

---------------https://www.facebook.com/photo/?fbid=10218160612727132&set=g.209899095715001

https://rwangauraxna.com/ba/detail.aspx?IDNews=7080

ناما كچەكێ بۆ دایكا وێ!

 و، ع. بامەرنی

دایكەك چوو دژوورا كچا خوەڤە و بتنێ نامەك ل سەر تەختێ وێ دیت و ب دەستێن رەجفی، ئەو نامە خاند، تێدا ھاتبوو:
دەیكا من یا خوشتڤی.. ب لێبورین و مخابنیڤە دێ بێژمە تە، ئەز دگەل ھەڤالێ خوە یێ رەڤیم، من حەژێكرن و ڤیانەكا دروست یا دگەل وی دیتی، ئەو دگەل من گەلەك یێ باشە و ئەڤە سێ ھەیڤە من شوی پێكری، نە بتنێ ئەڤە ژی، بەلكو نوكە ئەز یا ژێ بدووگیانم!!!
وی یا گوتیە من: ئەم دێ دژیانا خوەدا د كەیف خوش بین، مە بریار یا دای تا مرنێ پێكڤە بین و ئەم دێ گەلەك زارۆكان ئینین و ئەڤە خەونا منە. تشتەكێ دی ژی، وی یا گوتیە من كو ماددێن بێھوشكەر چ زیان تێدا نینن و ئەو خوشیەكا مەزن ژ كێشانا وان دبینیت و سوزا بۆ من دای، كو ئەو جارەكا دی نە چیتە دزیندانێ ڤە، پشتی كو جارەكێ ب تومەتا كوشتنێ ھاتیە حوكمكرن و ژێ رەڤی، پشت راست بە دادێ، ئەم دێ بۆ وی ل چارەسەرییا نەخوشیا ئیدێ ژی گەرین..
دایكێ دلێ خوە نەھێلە و ئەز یا مەزن بوویم و نوكە ئەز 18 سالم، یان كو ئەز دشێم خوە برێڤە ببەم، ئەز دێ سەرەدانا تە ژی كەم و دێ نەڤیێن تە ئینمە دەف تە!!
تێبینی: دایكێ، ئەڤا من گوتی ھەمی بۆ ترانێ بوو و نوكە ئەز یا ل سەر بانی، بتنێ من دڤییا بێژمە تە، كو دژیانێ دا گەلەك تشتێن نەخوشتر یێن ھەین ژ ئەنجامێ تاقیكرنان، دادێ ئەز یا ساقت بوویم و مایمە ل پولا خوە..
دایكا دلێ وێ خوە ل سەر سەدێ لێددا و دگەل شوكورا خودێ، گوت: ئەلحەمدوولیللا باشبوو دەركەت وەنە، یا رەبی تو چ جارەكێ ناجح نەبی ژی.
وەرگرتیە.

------------------https://www.facebook.com/photo/?fbid=10218143135170204&set=g.209899095715001

https://rwangauraxna.com/ba/detail.aspx?IDNews=7070

بابێ من و بابێن وان!!

 وەرگێران: ع. بامەرنی

بابێ من د ژیێ (45) سالیێدا ھەڤژینی پێكئینا و دەما خودێ ئەز دایم، تەمەنێ وی (49) سال بوون. بوویە ھەردەم من ھزردكر كو جوداھیەك دناڤبەرا من و ھەڤالێن من یێن قوتابخانێدا ھەیە، بابێ من پرچا وی یا سپییە و د تەمەنێ باپیرێن واندایە. بەلێ ھەستا بۆ من نەخوشتر، ترسا من ژ وێ چەندێ بوو، ئەز وی ژ دەست بدەم و ھێشتا ئەز یا بچیك، كو سێوی بمینم..
بیرا من دھێت ل تەمەنێ نەھـ سالیێ و ژ رەجفكێن ترسێ من دكرە گری و من گوتە بابێ خوە: "ئەز دترسم تو بمری".. ئەز ھەمبێز كرم و گوت: "ئەز نەشێم سوزێ بدەمەتە كو ئەز نامرم.. بەس یا ئەز دشێم، دێ سوزێ دەمە تە، كو ئەز تە پەروەردە بكەم و بشێی پشت بەستنێ ل سەر خوە بكەی"..
د سەر ڤێ چەندێ را، تارمایێ ترسێ كو ئەو بمریت ھەردەم بدویڤ من ڤەبوو.. من ھەردەم ھزردكر، بەری ئەز زانكویێ بدووماھی بینم، ئەز دێ وی ژ دەست دەم.. ئەڤ ھەستە ژی ھەر زێدەتر لێدھات، چەند نەخوش كەفتبا و تەندروستییا وی تێكچوبایە..
ئەز دترسییام نەخوشییا پەنجەشێرێ بھێتێ و ئەو بۆ ماوەكێ درێژ ھەڤكرییا ڤێ نەخوشیێ بكەت.. ئەز دترسیام ئەو لدەف من ھەست ب ئێشانێ بكەت و من شییان نەبن ئەز بۆ وی چ بكەم.. یان من شیانێن پارێ چارەسەریا وی ڤێنەبن..
دیمەنێ مامێ كەمالێ پیر و ئەو ل سەر تەختی یێ درێژكری و نالینێن وی چ جارەكێ ژبیرا من نەدچوون.. بابێ من ژی د نڤێژێن خوەدا ھەردەم لاڤان دكرن، كو ئەو بمریت و ھێشتا تەندروستییا وی یا باش و ل سەر پێن خوە.
بۆ ماوێ 25 سالان، ئەڤ ترس و خەونێن نەخوش بدویڤ من ڤەبوون. لدووماھیێ بابێ من د تەمەنێ ھەشتێ و چار سالیدا وەغەر كر و ئەز گەھشتبوومە سیھـ و پێنج سالیێ و چ جارەكێ ھەڤركیا مرنێ نەكر، كو ھیڤییا وی ئەو بوو.. بەری سێ رۆژان ژ مرنا خوە، نەخوشیەكا سڤك ھاتێ، ئەبەد من ھەست نەدكر كو ئەڤە نەخوشیەكا گران بیت.. درۆژا مرنا خوە ژی دا، من تێشت یا دگەل خاری، وەك ھەمی رۆژێن بێھنڤەدان ئەم وە دكەین و پشتی ھینگێ ب دوو دەمژمێران گیانێ خوە ژ دەستدا.
ژ ڤێ تاقیكرنێ و چەند تاقیكرێن دی ئەز فێر بووم، گەلەك ژوان تشتێن دژیانا خوەدا ئەم ژبەر نە ئارام دبین، چ جارەكێ روونادەن، پرانییا نە ئارامیێن قوناغا سنێلەییێ و گەنجاتیێ ھیچ راستی ژبۆ نینە.. ئەم دشێین ژی وان ترسان ژخوە دویر بێخین، دەما ئەم ئێدی ھزرێ تێدا نەكەین.. ئەز فێربووم ژی، ئەز ل سەر تشتەكی خەمگین نەبم، كو من شیانێن گوھورینا وی نەبن.
ـ جەلال شایب، ژ مالپەرەكێ عەرەبی ھاتیە وەرگرتن.

-------------------

https://www.facebook.com/photo/?fbid=10218052360580896&set=g.209899095715001

https://rwangauraxna.com/ba/detail.aspx?IDNews=7021

(روانگە و رەخنە) لبەر سەكەراتێ؟!!

 عبدالرحمن بامەرنی

ئەڤا ئەز دێ نڤیسم تایبەتە ب ھەلكەفتا دەربازبوونا (3) سالان ژ دەستبكاربوونا مە د مالپەرێ روانگە و رەخنەدا، كو رۆژا وێ بۆ 21/1/2020ێ دزڤریت و چ ھەلسەنگاندن بیت یان گوتنا چەند راستییان، لێ دێ ڤێ گووما مەند شلقینم!!
د سەكەراتێدا، نیشانێن نەمانێ زێدەترن ژ یێن مانێ، بتنێ ئەگەر لێڤەگەرەك بۆ ھەبیت! ھەمان تشت دگەل مالپەرێ (روانگە و رەخنە) ژی و ئەڤە زێدەترە ژ حەفت ھەیڤان تارمایێ سەكەراتێ لھنداڤ، لێ ژ باوەرییا مە بۆ ئەو كارێ ئەم دكەین، ئەم دێ ھەمی بزاڤان كەین بەردەوامیێ بدەینێ، فلییا ڤێ ژی بۆ من نازڤریت، بەلكو بۆ وان ھەمی نڤیسەرێن باوەری ب رەخنێ و رەخنە لخوە گرتنێ ھەیی، بۆ وان ھەمی خواندەڤانێن ھەر چنەبیت ب لایكەكێ یان كومێنتەكێ پشتەڤانیێ ل دیتنێن جودا دكەن. دڤان سێ سالێن دەرباز بووییدا و ئەو پەیڤ و گوتنێن ھاتینە ئاراستەكرن بۆ مە (دوو روویاتی، سەرەدانا نەخوشەكێ دەروونی بكە، دژە دین، تو یێ بوویە ئیسلامی و لیستە یا درێژە و بێژە، ھەمییان برەنگەكێ و دوویان تێبینییا ل سەر مالپەری ھەی! ئەگەر مە بێ لایەنییا خوە ژ دەستدابا، نوكە پالپشتیا لمە دھاتەكرنێ، نەدھاتە سفركرنێ! حزب و لایەنێن دی ژی دھاریكار نەبووینە، بەلكو ھندەكان نڤیسەرێن خوە ھانداینە، كو ئێدی بۆ مالپەری نەنڤیسن و تا كومێنت ژی نەكەن و ھندەكا بۆ پێكدان و تێكدانا مالپەری، ھەر چ سڤكاتی، پاشڤەبرن و گەفێن ترساندنێ ل نڤیسەران دكرن و مالا ھەمیان ئاڤا.
دڤان (3) سالێن بوریدا زێدەتری(7) ھزار گوتارا مە بلاڤكرینە و ھەر كەس دشێت ڤێ ژمارێ ببینیت، ل رۆژێن بێھنڤەدانێ، رۆژێن ئەینی، سەیران و نەورۆزان، خوە ل رۆژێن جەژنێ ژی مە بابەت بلاڤكرینە. مەبەستا من ژی بڤان بلاڤكرنان نە ئەز خوە بینم پێش یان بكەمە منەت، بەلكو ئەم ھەمی دشێین پشتەڤانییا ئاڤاكرنێ بین، من بەحسێ ئاڤاكرنەكێ یە، ئەم بۆ ھەمییان بێ جوداھی بنڤیسین، نەبینە زمانحالێ چ حزبەكێ و چ ئایدولوژیایەكێ و رێك من بەحسا پرۆژێن نیشتیمانییە، نەیێن حزبان، ئەم ب رەخنێن خوە فشارێ ل سەر حزبان، حكومەتێ دروست بكەین، دیاردێن نە جوانێن كومەلایەتی، ژبەركو ژی ئەڤە سوشیال میدیایە، ئەم چ نڤیسەر ب گوتارێن خوە یان ژی خواندەڤا ب لایك و كومێنتێن خوە. ھەر چنە بیت ئەم دشێین ڤێ بكەین و ئەم ھەمی ل خالەكێ ھەڤپشك ببین، ئەو ژی رەخنا ئاڤاكەر، ب رەخنا ئاڤاكەر ژی ئەم دشێین گەندەلیێ، چاكسازییان و خوە حكومەت و حزبێن خوە ژی سەر راست بكەین..!

--------------------------

http://www.rwangauraxna.com/ba/detail.aspx?IDNews=7014

https://www.facebook.com/photo/?fbid=10218038737400325&set=g.209899095715001