ڤالێنسیا ـ كورتەچبرۆك

 

ھەر تشتێ باش ل سەر وی دھاتە گوتنێ و چ جارەكێ نەھاتیە بەر گوھێن من، كو وی خرابییا كەسەكێ كربیت، تا ترومبێل دایە سەر من و ئەز پەشاندیمە بەر لێڤا جاددێ ژی، یێ مژویلی تەلەفونا خوە بوو و شیرەت ل ھندەكان دكر! دەما ژ ترومبێلا خوە ھاتیە خارێ و دیتی ئەز یا د خوینێ وەربوویم، بلەز سیاری ترومبێلا خوە بوو و خوە ھنداكر. رەنگە وی دەمی ئەز گەھاندبامە نەخوشخانێ، نوژداران ژیانا من قورتال كربایە!

تشتێ من ئاگەھـ ژ چركێن دووماھیێ ژ ساخییا خوە ل بیرێ ماین، ھندەك لدوورێن من كومڤەبوون و ھەر ئێكی گال گالەك دكر و خوە دئێكی ژی نەدگەھشتم، لێ من باش دزانی، ئەو یێ ژ من بێ ھیڤی بووین و مرنا من چ زڤرین ژبۆ نینن، لێ تشتێ من ھزر تێدا نەكری یان كەسێ بۆ من نەگوتی، مرنێ ھندەك رێكێن دی یێن ھەین و چاوان پێلێن ئاڤێ مرۆڤی دگەل خوە دبەن و دناڤخوەدا بەرزە دكەن، ئھا ھوسا من ھەست ب مرنێ و بەردەوماییا ژیانێ دكر، تا ژ شەفەقا رۆناھیا ل ھنداڤی سەرێ من، ئەز پێحەسیایم ئەز یا دژوورا نەشتەرگەریێڤە و ئێكەم تشتێ من ڤییای ژ رەوشا خوە بزانم، كا ئەندامێن جەستەیێ من ھەمی ل جھێ خوەنە یان نە!!

نوژدارەكی ب (ڤالێنسیا) گازی من دكر و بەرێخوەدانا من بۆ نوژداری و زمانێ ئەو پێ د ئاخڤیت و بەرێخوەدانا من بۆ لەشێ خوە! ئێدی دڤێ چركەیێدا، ئەز ئەو كچە نەمام، دەما دەستێ من دناڤ دەستێ ویدا و مە دگوتە ئێك، ئەگەر لڤێ جیھانێ نەگەھشتینە ئێك، دێ ل یا دی خەونێن مە بنە راستی، ژبەركو ھەمی رێك ل بەر مە ھاتبوونە گرتنێ و گەھشتنا مە ل سەر ئێك بالگەھێ، تشتەكێ ئەستەم بوو.

دڤێ چركەیێدا، ھەمی تشت ب روھنی بۆ من دیار بوون، كو ئەز یا ساخم و چ راستیەك بۆ مرنێ نینە، ھەر چنەبیت د حالەتێ مندا و  لێ نە لەشێ من بوو، بەلكو لەشێ ڤالێنسیایێ، ئەو كچا كەتیە بن ترومبێلەكا ژ جورێ (ڤولڤوویا رەنگێ وێ رەش). ئەوێ ژی د روودانەكا ترومبێلێ دا گیانێ خوە ژ دەست دابوو و پشتی ھینگێ من زانی، شوفێرێ ترۆمبێلا ئەو دبن خوەڤە ھێلایی، یێ سەرخوش بوو و ب وێ سەرخوشیێ ڤە گەھاندبوو نەخوشخانێ و نوكە یێ د زیندانێڤە، لێ گیانێ وێ كیڤە چوویە و نوكە د لەشێ كێدایە؟ ئھا ئەز وێ نزانم، دبیت ل وەلاتێ چینێ بیت یان ژی ل وەلاتێ ھندێ یان ببیتە ستێرەك و نوكە ل عەسمانان بیت..

ناڤێ منێ نوكە ڤالێنسیایە و ناڤێ منێ بەرێ جانێ بوو. گوندێ منێ نوكە (ساترا بروون)ە ناڤێ گوندێ منێ بەرێ (ئاڤساركێ) بوو و ئێكەم دەلیڤا بۆ من ھلكەفتی، ئەز برێكا ئەنترنێتێ و (جی پی ئێسی) ل گوندێ خوە بگەرم و ئەو كورێ دگوتە من ئەز بێ تە ناژیم، كا ھێشتا ل سەر سوزا خوە مایە یان نە؟ دەما دەیكا من، دەستێ من ژناڤ دەستێن وی ئینایە دەرێ و گوھێن وی وەرباداین و سێ رۆژا دەیكا من دەر و پەنجەر ل سەر من داخستین.

 ئھا من گوندێ خوە دیت، ئەز كولان كولان یا لناڤ دگەرم، وێ ھەنێ ئەو شوفێرە یێ دشییا ژیانا من ژ مرنێ قورتال بكەت و ئەز دناڤ خوینا خوەدا ھێلایم و خوە بەرزەكری، ئاخ تو چەندێ دلرەق بووی!! 

ئەزا كولانا مالا مە و زارۆكێن تاخی دبینم و یێ یاریكانێ دكەن و من دەیكا خوە نەدیت!! چەند ژتە خەریبم دادێ، نوكە ئەزا دبێژمە ژنەكا دی دادێ و ئەز گەرماتییا تە دھەمێزا وێدا نابینم.

كولان كولان ئەزا دناڤ گوندیدا دچم و ئەز وی كوری نابینم و لدویر، ل رەخێ گوندی و دروست ل ناڤا گورستانێ، رەشاتییا دوو كەسان چاڤێن من بۆ خوە راكێشان. پشتی ب (جی بی ئێس)ی ئەز نزیكی وان بوویم، ئەوا ھەنێ دەیكا منە ل ھنداڤ گورەكێ و ئەوێ ژ وی وێڤەتر ژی، ئەو كورە یێ مە پێكڤە سوزداینە ئێك و ھێشتا من كامیرە نزیكر و من سەروچاڤێن دەیكا خوە دیتن. پیراتی و خەمگینیێ یا خوە كێشایە سەر دێمێ وێ و دەما من نڤیسینا كێلیێ باش نزیك كری، ئەڤە گورێ جانێ یە و ئەڤە ئەزم دڤی گوریدا و ژ نشكەكێڤە ئەز ژ خوە ڤەجنقیم، لێ دەنگێ دایكا من، ئەز ھشیاركرم ڤالێنسیا.. ڤالێنسیا كانێ توو؟؟

كارو و كەسپێن من بوونە ئەنترنێت و سوشیال میدیا. د ئێكەم پەیوەندیدا، من ھەڤالینی بۆ وی كوری فرێكر و وی ئەز رەدكرم، لێ رژدییا من و دەما من ناڤێ جانێ دئینا سەر لێڤ، ئەوی ڤیا ژمن بزانیت، جانێ لدەف من چ رامانە و دەما من چیرۆكا وێ و خوشتڤیێ وێ بۆ كری، دەما من بەحسا دەیكا جانێ بۆ كری و چاوان گوھێن وی دناڤ تلێن خوەدا وەرباددان و سێ رۆژا كچا خوە د خانیڤە زیندانكری. ئەز شییام ڤی كوری بخوەڤە گرێدەم، ھەر چنە بیت، بزانیت ئەز كیمە! لێ دەما من گوتیێ، رۆژانە ئەز تە و دایكا جانێ ل ناڤا گورستانێ دبینم و ژ دویرڤە تو ل بنێ دارێ تەماشای گورێ وێ دكەی!

ئەو كور ب سیندا ڤێرا چوو و گوتی ھەبیت نەبیت تو جانا منی؟!! لێ كی دێ وی تێگەھینیت، كو بتنێ ئەز گیانەكم و نە زێدەتر و نوكە ئەڤ گیانە د لەشێ كچەكا دیدایە و ب فرۆكان نەبیت، چ جاران ئەو ناگەھیتە دەف! كی دێ وی تێگەھینیت، كو جانێ نوكە یا بوویە رابردو و دوو رۆژان گوندی ھەمی ب بەھیا وێڤە د مژویل بوون و كەس نەدشییا دەیكا وێ ب راوەستینت و بێژیتێ، ژیێ كچا تە ھەر ھندە بوو و كی دێ ڤی كوری راوەستینیت، ئەڤێ ھەمی رێك گرتینە بەر، بتنێ دا بشێت لدویڤ ناڤ و نیشانێن من بھێت و ھەمی ھەولێن وی ب بەرئاڤێدا چووین.

 نوكە ژی چەند ب ھلكەڤیت، ئەم پەیوەندیێ دگەل ئێكدا دكەین و بەری نوكە بتنێ وی جلكێن رەش لبەر دكرن و ریھێن خوە نە د تراشین، لێ نوكە گەلەك جاران پرچا خوە ژی شەناكەت و ھندەك جاران ژبیردكەت، جلكێن خوە ژی بكەتە بەرخوە و ھەر گوندیێ كەتە رێكا وی، دێ موبایلا خوە نیشاندەت و بێژیتێ ڤالێنسیا من یا ساخە و دێ وێنێ من و سیلفیێن من و گوندێ منێ نوی (ساترا بوون) نیشاندەت و ژ گوندییا ھەمیان، بتنێ ئەو زەلامێ ناڤ و دەنگێن وی ب باشی چووین و ئەز دبن ترومبێلا خوەڤە ھێلایم باوەر ژێدكەت و چەند جارەكێ چاڤێن دەیكا من ب وی دكەڤن، دبێژیتێ: كا وێنێ كچا من نیشا من بدە و خودێ دزانیت، وی دەمی چ ئاگر بەردبیتە كەزەبا وێ!!

-------------

د كوڤارا پەیڤ ژمارە 88 دا بلاڤ بوویە.

https://de.calameo.com/read/0003445764eea8a0d6a7a...

كورتەچیرۆك ((شۆكرۆیا عەزێ))

عبدالرحمن بامەرنی

ئەو بخوە شێخ نەبوو و نوكە دبێژنە من ژی شێخ، لێ ئەز نەشێخم، بتنێ ئەز كالوخك ھەلگرێ شێخی بووم. ئەگەر شێخ ل مالێ نەبایە، دگوتنە من شێخ و هەر جهێ شێخ ژى لێبا، ئەز لدویڤ پێ وى بووم و ئەگەر گوندییا باب و باپیرێن من ناس نەكربانە، دا هزركەن شێخ باپیرێ منە و كەسێ نەدزانى كو تشتێ من دگەهینتە شێخی، بتنێ ئەو نڤشتووكە یا ژ پەرێ سوور دھێتە چێكرن و شێخی سوزا دایە من، كو چێكرنا وێ نڤشتوكێ نیشا من بدەت.

شێخی ھوسا دگوت: ھەر نڤشتووكەكا ئەز چێدكەم كارەكی دكەت، ھندەك ژن و مێران ل بەر ئێك رەش دكەن و ھندەك ژی وان ل بەر ئێك شیرین دكەن، ھندەك نەڤیانێ دروست دكەن و ھندەك ژی ڤیانێ دروست دكەن و نڤشتووكا ژ ھەمییا بۆ من گرنگتر، نڤشتووكا پەرێ سوور بوو، دەما شێخی دگوت: "ھەر گاڤا ئەڤ نڤشتووكە د دگەل مرۆڤیدا بیت و بنڤیت، ھەر كچ و ژنا مرۆڤی بڤێت، وێ شەڤێ دێ دگەل مرۆڤی جوت بیت" و ژڤی گوندێ خرەكێ، بتنێ چاڤێ من ل سەر شوكرۆیا عەزێ یە..

خەلكى پسیارا شێخی ژ من دكر و من بۆ ژڤان ددانان و سەرێ دیوانان بۆ شێخی بوو و ئەز برەخ ویڤە د روونشتمە خارێ. خارنا خوەش بۆ شێخی دهات و پاریێ من ژى د گەلدا بوو و هەر جهێ شێخ چبایێ ژى، پێ من لدویڤ پێ وى بوو و كالوخكێ وى د ملێ مندا بوو.

تشتێ ئەز ژ وى كالوخكى و نڤشتووكێن شێخی فێر بویم، بتنێ من ب ددانێن خەلكیڤە د بێنا و پترییا جاران، شێخی ئەز پێش خوڤە فرێدكرمە ڤى كارى و دگوتە من، هەر جارا تو قەستا نەخوشەكى بكەى، ڤى كالوخكى دگەل خوە ببە، ئەڤ كالوخكە دێ حیجابێ دناڤبەرا تەو ئەجناندا دروست كەت! ژبیرنەكە ژى ناڤ و دەنگیا ڤى كالوخكى چ ژ ناڤ و دەنگیا من كێمتر نینە و هەر كەسێ چاڤێن وى ڤێ بكەڤن، دێ نیڤا نەخوشیا وى ژ دەف چیت.

ئێڤارەكا درەنگ ئەز ڤەگەرا مە مال و شوكرۆیا عەزێ یا ل سەر دۆشكێ حەوشا مالا مە روینشتى بوو، جارنا ژی خوە ب گول چیچەك و رحانێن ناڤ حەودكا گولاندا مژویل دكر. ئەز ل پشت سەرێ وێ راوەستیام و من گوتێ:

ـ گول دناڤ گولاندا چدكەن؟!

هەر وەكو ئێكى ئاڤەكا تەزى ب سەریدا كرى، ئێك بەژنى خوە رابوو و گوتە من:

ـ تو لكیڤە بووى، ئەڤە من سێ جاران رییا مالا وە دا بەر سینگا خوە و ئەز تە نابینم!

پسیارا وێ نە بتنێ بۆ من یا خەریب بوو، دهەمان دەمدا، بۆ من خەونەك بوو، شوكرۆیا عەزێ بۆ سێ جاران ژ بەر بەژن و بالا من و دیتنا من قەستا مالا مە بكەت! دەڤێ من ما بەش و ئەو كچا من خەون پێڤە ددیتن و مرادا من بتنێ دگەل من ئاخفتبایە، ئەڤرو یا لمن دگەریت! هێشتا من بەرسڤا پرسا وێ نەداى، دەنگێ دەیكا من ئەز ژ خەیالێن من ڤەگەراندم و كولوخكێ من دا بن كەفشێ من و گوتە من:

ـ كورێ من، دگەل شوكرۆیێ هەرە مالا وان، ددانێ دەیكا وێ یێ ئاریایى، دا بۆ پێڤە بێنى.

هەر چەندە بێهنا شوكرویێ ژ بەر دەیكا وێ یا تەنگ بوو و دڤیا ئەم زوى گەهشتباینە مالا وان، لێ هەر من خوە ڤەدهێلا و چ جارەكێ هوسا بۆ من هلناكەڤیت! دڤێ ئێڤارێدا و بتنێ دگەل شوكرویێ و ڤان كولانێن تەنگ تا ئەم دگەهینە مالا وان. من پێن خوە گران دكرن و لهنداڤ گیڤاندێ چەمێ ھناران، كو ئەو كولانك گەلەك بەرتەنگ دبیت و تا جهێ دوو دەوارێن باركرى پێكڤە ناكەت دبەر ئێكرا ببورن، من دەستێ شوكرویێ گرت و نزانم چاوان من جرعەت دا خو، من ماچەك ژ رویێ وێ دزى. شوكرویێ نەعیمێن خوە نەخوش كرن و دا خوە زڤێركەت و خەبەران بێژیت، لێ بیرێن ددان ئێشانا دەیكا وێ و كولوخكێ لبن كەفشێ من، هەمى تشت ژبیرێ برن و گوتە من:

ـ ئەگەر تو دێ خوە جڤێل كەى، هەما نەهێ و دێ بێژمە دیكا خوە ل مال نەبوو!

ـ نەخێر ئەز دوبارە ناكەم، بەس بزانە ئەڤە دەستپێكا حەژێكرنا منە بۆ تە.

هەر چەندە وێ چ بەرسڤێن ئەرێنى و نەرێنى نەدانە من، بتنێ رییا مال گرت و ئێدى خوە ژ من دویر دكر، ب تایبەت ل جهێن تەنگ و بێ مرۆڤ، لێ من یا بدلێ خوە كر و من دلێ خوە بۆ ڤەكر، ئەز یێ پشت راست بوم ژى، ئەگەر ئەڤرو وێ سەرا ماچەكێ خوە زڤێر كربیت، سوبەهى دێ شێخ چێكرنا نڤشتووكا پەرێ سوور نیشا من دەت و نە بتنێ ماچەكێ، بەلێ دێ دبەرخوەدا رازینم و ژ سەرێ نەینووكێن پێن وێ تا كولیڤانكا سەرێ وێ، دێ خرەكێ ماچ رێژ كەم.

كالوخكێ لبن كەفشێ من و ئەڤە چەند رۆژە شێخ ژ گوندی دووركەفتی و من پەرێن ناڤا كالوخكێ ھەمی تێكڤەدان و من پەرێ سور نەدیت. شێخ ڤەگەریا و من چ كرە و من چ نەكرە، هەمى من بۆ وی ڤەگێران. من بەحسێ ددانێ عەزا دەیكا شوكرۆیێ بۆ كر و كەیفا شێخی بمن هات. من بەحسا كولوخكی و چێكرنا نڤشتووكان و پەرێ سور كر، شێخی گوتە من لەزێ نەكە و ھەلگرتنا كالوخكێ بخوە پەرێ سورە و نە ئەز د شێخی گەھشتم و نەشێخی زێدەتر بۆ من روھنكر، من شێخ ھێلا و برێكا مالێڤە شوكرویێ خوە درێكا مندا ڤەشارتبوو و گوتە من پەححححححح!!! ژ پەحێنا وێ دوو بەژنی خوە ئەز بلند بووم و ئەگەر كەنییا وێ ژناڤ دەحلێ دەرنەكەفتایە، دا ھزركەم ئەجنێن كولوخكی یێن دەركەتین و خوە ل بەر من كرینە رەشە. لێ ئەز زڤریم و شوكرۆ رەڤی و من ل بنێ ھنارەكێ گرت، دەما من كولوخك ژملێ خوە ڤەكری و دا خوە كار خوش كەم، شوكرۆیێ خوە ژناڤ دەستێ من ھەلاند و ئەڤە ژ ھینگێ وەرە، من دوبارە پسیارا نڤشتووكا پەرێ سور ژ شێخی نەكریە و نە ئەز ئێدی كلوخكێ ژملێ خوە ڤەدكەم و نە شوكرۆ ژی دەستان ژ یارییا خوە و ترساندنا من بەرددەت.

ـ دگوڤارا بادینان ژمارە (1)دا بلاڤبوویە.