كەلتوركرنا سینەمێ

 

عبدالرحمن بامەرنی

دبیت ئەز سینەمێ رەخنە بكەم، لێ مەبەستا من رەتكرنا وێ نینە، ژبەركو ئەم پێدڤی كەلتوركرنا (سینەمێ)ینە. من گوت دبیت ئەز رەخنە بكەم، رەخنەكرنا من ل سەر خواندنا مەیە بۆ سینەمێ، ئایا ئەم دزانین گرنگییا سینەمێ بۆ مە وەك كورد چەندە؟ دەما ئەز بەحسا گرنگییا وێ دكەم، ئەز بەحسا وێ چەندێ ناكەم كا مە چەند ھولێن سینەمایێ ھەبن و مە فلمە فیستەڤال ھەبن و رێك ئەز بەحسا بەرھەمئینانا فلمان دكەم، ئەو فلمێن ئەم كورد دروست دكەین و فرێدكەینە ناڤ جیھانێ، مەبەستا من ب(ناڤ جیھانێ)، خەلكێن دی مە دڤان فلمان را ناس بكەت. ئھا من بەحسا ڤێ ناسكرنێ یە، ئەم چ رێك بگرینە بەر! ئەگەر ئەم خوە بەراورد بكەین دگەل بەرھەمئینانا سینەما جیھانی، ئەو رێژا فلمان ئەوا ئەو سالانە بەرھەم دئینن و ئەو فلمێن دەربرینێ ژ گەلێن وان، وەلاتێن وان، كەلتور و داب و نەریتێن وان دكەن، رێك من بەحسا كەلتور و داب و نەریت و زمان و نەتەوەییە. دڤێت ئەم دوو تشتا ژ ئێك جودا بكەین، مە سینەما كوردی ھەبیت، لێ ئەو ھەبوونە چ جورەك بیت؟ ئەو جورێ من دڤێت ژێ بێژم، ئەو فلمێن ل سەر كوردان و مێژوو ووووو دھێنە بەرھەمئینان، ئەو فلم بن یێن رەنگەڤەدانا كوردان دناڤدا بیت، ژبەركو ئەم ھێشتا دەربازی وێ قوناغێ نەبووینە فلمان بۆ بازرگانیێ بەرھەم بینین و ھێشتا ئەم یێ دقوناغا خوە ناسناندنێدا. ئەگەر ئەڤ فلمە فستیڤالە ژی دڤی دەربارەیدا پێنگاڤان بھاڤێژن، باوەردكەم ھینگێ فلمە فێستیڤالێن مە ژی رامانەك ژبۆ ھەبیت، ئەگەر نە، مەبەستا من ب نە، ئەگەر وەسا كار ژبۆ نەھاتبیتەكرنێ ژی، دڤێت ئێدی گرنگی و زێدەتر راوەستییان ل سەر ڤێ خالێ بھێتەكرنێ و ئەگەر سانسورەك ھەبیت ژی، ژبەركو ئەز نزانم! لێ دڤێت ئەو سانسورە د شێوازێ پشتەڤانیكرنا فلماندا بیت، ئەو فلمێن دڤێن ھاریكاریێ ژ حكومەتێ وەربگرن و من بەحسا وان ژیكە، ئەڤێن برێكێن دی فلمان بەرھەم دئینن، شووناسێ كوردان پێڤە دیار بیت.

ـــــــــــــــــــــــhttps://www.facebook.com/photo/?fbid=10217822186826696&set=g.209899095715001

https://rwangauraxna.com/ba/detail.aspx?IDNews=6904

ل فلمە فێستیڤالێ و فلمێ (جیران) یێ (مانو خەلیل)ی؟!!

 

عبدالرحمن بامەرنی

ئەز راستی بێژم لدووماھیا فلمی من روندكێن خوە پاقژكرن، لێ ھەر باش بوو ھێشتا روناھیێن ھولێ نەھاتبوونە ھلكرن و كەسێ ئەڤە تێنەئینادەر. لێ مافێ فلمییە ئەز ڤێ دانپێدانێ بكەم، كو بەلێ فلمێ وە شییا ھەستێن من ب ھەژینن، ھەژاندنەك كو ئەم كورد دڤێت چ جارەكێ خوە ژبیرنەكەین! خوزی ئەڤ فلمە بۆ سەركردایەتییا مە ژی ھاتبا پیشاندان، ھەر چنەبیت بەلكی ھەستێن وان ژی ھاتبانە ھەژاندن و دەستێن خوە تێكگرتبان.
فلم ل رۆژئاڤایێ كوردستانێ بوو، سەرخەتێ و بن خەتێ، یێ د سەرخەتێ و بن خەتێ نەگەھیت، لڤێ پارچێ كوردستان ھاتەدووبەشكرن ھندەك بۆ وەلاتێ توركیا و ھندەك ژی بۆ سورییا عەرەبی، سنور دناڤبەرا ھەردوویاندا ھاتبوو كێشان، برا ل ئالیەكێ و مەت ل ئالیەكی و خولیسەری بھەمی رەنگێن خوە. لڤێ پارچێ، زوردەستی و ژبلی سڤكاتی و كوشتنا عەلاش و بەلاش، ل ئالیێ دی، ئوما عەرەبی. دناڤا فلمیدا كو فلم بناڤێ جیران بوو، خێزانەكا جوھی ھەبوو، مەعلمێ عروبچیێ دڤییا كوردیێ ژبیرا خەلكی و زارۆكان ببەت، دگوت جوھی زارۆكان دكوژن و بیرا من ل یاریكێن مە یێن زارۆكینیێ دئینا، دەما ل دووماھیا ھەر یاریەكێ مە تبلێن خوە یێن قلیچێ دكرنە دناڤ ئێكرا و مە ئێك و دوو حیلدكر و مە دگوت (حیل حیل نە لمن و نە لتە، ھەمی بۆ جوھی فەلا)، ھینگێ ژی ڤان عەرەب و توركان بڤێ عەقلیەتێ ئەمێن خوش باوەر بناڤێ دینی د سەردادبرین و نوكە ژی ئەو سەردابرن یا بەردەوامە و ئەم ژی ل سەر ئێك و دوویا خوە و نە لمنێ و نە لتەیێ و گەفێن دوو ئیدارەیێ قیچ دكەن.
دووماھیا فلمی و دەما خێزانەكا كورد، ھاری خێزانا جوھی دكەن، ئەو ژنا من گوتی ب بەلاش و عەلاش ھاتیە كوشتن، بناڤێ وێ پاسەپورتەك بۆ كچا جوھی ھاتە چێكرن و وان گیانێ خوە رزگار كر، لدووماھییا فلمی ژی كو براستی قفلا فلمی تێرا وێ چەندێ ھەبوو، دەست خوشیێ ل دەرھێنەری بكەم، ئەو كچا چوویە دەرڤەی وەلاتی دزڤریتە كوردستانێ، ل كەمپێ، ل وێ خێزانێ دگەریت و خوە پێ دئینتە دەرێ، لێ تشتێ ئەز ژڤي فلمی تێر نەكریم، دەما لدووماھیا فلمی من پرسیار ژ دەرھێنەری كری، ئایا قفلا فلمی و زڤرینا وێ (ژنا جوھی) بۆ دەف جیرانێ خوە، خێزانا كوردی، ئەنقەست بوو یان ژی بتنێ بۆ قفلكرنا فلمی بوو؟ لێ من نەزانی ژ نەوێریان یان ژی كورتبینینێ دەرھێنەری گوت، ھاتبوو دا قەنجیێ ڤەگەرینیت!! لێ نەگوت كو تشتێ وان دگەھینتە ئێك، ڤان دەولەتان سڤكاتی ب ھەردوو نەتەوەیان دكرن، لێ جوھی لخوە ھاتنە دەرێ و كورد دناڤخوەدامان.

-------------------------https://www.facebook.com/photo/?fbid=10217814432272837&set=g.209899095715001

https://rwangauraxna.com/ba/detail.aspx?IDNews=6901

ئەو فلمێ ئەز لێدگەریام (بووكا بارانێ) بوو

 

عبدالرحمن بامەرنی

دێ كورتییا فلمی بەحس كەم، شەرێ داعشە و ژن و مێرەك سەماكەرن، ھونەرێ مللی، مێر پێشمەرگێ كەڤن بوویە و ژێ دھێتە داخازكرن بەرەڤ بەرەڤانیێ بچیت، دبێژیت ئێدی من كارێ خوە یێ ھەی، لێ فەرماندە دبێژیتێ ئەگەر ئەم بەرەڤانیێ ژخوە نەكەین، تیرورستێن داعش، دێ ژن و كچێن مە ل بازارێن مووسل و رەقایێ كەنە كەنیزە و فروشن! ئەڤ ئاخفتنە تێرا وێ چەندێ ھەبوو بەرەڤ بەرۆكێن شەری بچیت و ھەڤژینا خوە و كورێ خوە بھێلیت، لێ شەھید دبیت! ھەڤژینا وی شوی ب برایێ وی دكەت، بێی كو ئەڤ ھەڤژینیە یا دروست بیت، بتنێ بۆ بەرچاڤێن خەلكی و دەیك و بابێن زەلامی و دا ژن بشێت زارۆكێ خوە جوان پەروەردە و مەزن بكەت، دناڤبەرا (ھەژارییا شەھیدی ل كوردستانێ، پیتەپێنەدانێ ب خێزان و خوشكرنا ژیانا وان، ھزرێن گەنی یێن دەولەمەندان، سەمایێ، گورستانێ و ئایندەكێ نەدیار و حەزێن مرۆڤی بۆ ژیانێ، دەركەفتنا مێری كو نەھاتبوو شەھیدكرن و بدیلی(ئێخسیری) كەتبوو دەستێ داعشان). من رێك بەحسا فلمێ بووكا بارانێ یە، ژبەركو دڤی فلمیدا من سنعەتكاری نەدیت. ئەگەر برەنگەكێ دی بێژم، ژبەرێخوەدانا من و دیڤچوونا من بۆ تراجیدیایێن كوردی، ئێدی دەم ھات ئەم گوھورینان د ئاراستەكرنێن خوەدا بكەین، د پێشكێشكرنا گوتار و فلم و ھونەرێ خوەدا، راكێشانا چاڤێ جیھانێ بۆ خوە، ئەم وەك كورد، ئێدی چیرۆكێن خوە برەنگێن جودا، ھونەرییانە پیشانی خەلكی بدەین.
تشتێ بۆ من خوش ژ (بووكا بارانێ)، چاوان باران درژیێتە سەر عەردی و ئەو بخوە رێكا خوە ڤەدكەت، دفلمی ژیدا، ئھا بوی رەنگی روودانان ددانە دیڤئێك و ئەڤا ئەز دبێژم من بەحسا بینەرییا كوردی و ئاخفتنێن بەردیواركان نینە! من بەحسا بەحسا بینەرییا جیھانییە، ژبەركو ئێدی دڤێت پەیاما چیرۆكا مە دەربازی جیھانێ ببیت و ئەم ھونەرێ خوە و پەیاما خوە ژ لوكالییا دابونەریتان دەربازی دیجیتالییا جیھانیبوونێ بكەین.

ـــ تێبینی... ئەز دێ ڤێ رێزێ زێدەكەم، دیارە من پەیام دروست نەگەھاندییە، ئێك ژ فلمێن تژی ھونەر و جیھانی بوو، دەستێن وان ھەمان كەسان خوش یێن ب بەرھەمئینانا ڤی فلمی رابووین.

----------------------https://www.facebook.com/photo/?fbid=10217801252143342&set=g.209899095715001

https://www.rwangauraxna.com/ba/detail.aspx?IDNews=6892

دەرگەھـ و سە و (حسێن حەسەن)

 

عبدالرحمن بامەرنی

ئەز دا ناڤێ كورتە فلمی ژی نڤیسم، لێ ژ بەدبەختییا من ئەز زمانێ ئنگلیزی نزانم و ئەڤێن ب فلمە فێستیڤالێ ژی رابووین، ھزرنەكرینە بۆ ئنگلیزینەزانەكێ وەكی من، بەرنامێ پیشاندانا فلمان و دەمێ وان ب كوردی بنڤیسن.
من رێك بەحسا ئێك ژوان (7) كورتە فلمێن ئەڤرو ئێڤاری ھاتینە پیشاندان و رولێ ئەكتەرێ دھوكێ (حسێن حەسەن)ی، كو د سروسەرمایەكا بەفریندا، ل چول و چییان و دناڤا باكوزیركێن بەفرێدا، دەرگەھەك ل پشتێ بوو و فلمی چ گەھاندبیت و ئەگەر ئەز چیرۆكا وی وەك خوە تێگەھشتبم، ئەو ژ لاوازیا فلمی نینە، بەلكو منەكێ بینەر وەسا فلم دیت و بۆ خوە بوی رەنگی شرۆڤەكر.
دبیت ئێكەم جار من ھزركربیت ئەڤە چ دەرگەھێ بێ مەعنایە ب پشتا ویڤە و لڤان گروچیا و سەقایەكێ بەفریندا دگەریت، لێ ئەوی جاران دەرگەھـ ددانا سەرعەرد و ئەو دەرگەھـ ڤەدكر، دیمەن ددیتن، جارەكێ ژی خوە ب كورسیكێ ڤە كربوو نوژ و وەكی سەی (بێ مەبەست/ دگەل رێزگرتنێ بۆ ھونەرمەندی)، دەنگ ژ خوە دئینا و سەیێ وی ژی برەخ ڤەبوو. رێك دیمەنێن پشتی سەرھلدانێ و حوكمرانیا كوردان تا ئەڤروكە شەریت شەریت دھاتە بەرچاڤێن من، شوونا ئەم دەرگەھان ڤەكەین و بەرەڤ پێش بچین، ئەم یێن ماینە ب كورسیكێ ڤە و ئەز دیمەنێ من ژێ بەحسكری دوبارە ناكەم.
كورتە فلمێ دیێ من حەژێكری راستی، كو ئەز بێژم یێ ژمارە شەش بوو، كومەكا سەربازان شەھید كەفتبوون و ھەر ئێكی ژوان چیرۆكەك ھەبوو، كو ڤەگێرێ وان چیرۆكان ژی زارۆكێن وان كوشتییان بخوە بوون، تا لجھەكی كامیرە ل سەر سەرێ بریندارەكێ راوەستییای و ھێشتا حەفكا وی خوە دقوتا و بسەرخوەڤەھات و لێ ژ بەدبەختییا وی، سەربازەكێ دوژمن تڤەنگ قیچكرێ و نەشەقیا و ب برینداری و ژ وی و ژیێ دی، كا دێ كی یێ دی بەری كوژیت، لێ دەنگێ رادیویێ، لاسلكیێ مزگینیا راوەستاندنا شەری راگەھاند و ھەر ئێكی خوەدا كوژیەكی و جگارە ھاڤێتنە بەر ئێك، ب مەبەستا سەروك پێكھاتن و ئێدی كورێن ھەژارا ناھێنە كوشتن. لێ سەربازەكێ دی ژ نشكەكێڤە دھێتە ھنداڤ سەرێ وان و بۆ وی كێشە نینە كی ژوان ھەڤالێ وییە و كی دوژمنێ وی، ئەوی شێلكەكا گولەیان ل ھەردوویان رەشاند.
دەستێن وە خوش بن دەرھێنەرێن ھەردوو فلمان، وە پەیاما خوە ب رووھنی راگەھاند و منەكێ بینەر ئەو پەیام وەرگرت، ھیڤیدارم گەلەكێن دی ژی ب ھەمان دیتن پەیاما وە وەرگرتبیت.

https://www.facebook.com/photo/?fbid=10217809891359317&set=g.209899095715001

پەقینا سیستەمێ گازێ چ پەیامێ دگەھینیت؟!!

 

عبدالرحمن بامەرنی

ھندی وێڤەترە، قەبارێ ڤالاھیێ دناڤبەرا حكومەتێ و ھاولاتیدا بەرفرەھتر لێدھێت. ئەو ڤالاتیا ئەز ژێ بەحس دكەم، قەبارێ نە باوەریێ پیشانددەت، ئەڤا حكومەت و سەركردایەتییا كوردی ژ سەرھلدانێ وەرە شوونا بگەھینتە ئێك، دەرزا وێ مەزنتر لێدكەت! رەنگە ھەبن بێژن چاوان؟ ژبەركو حكومەت، مەبەستا من رێك حكومەتا ھەرێمێ و تا حكومەتا پارێزگەھێ و ھەتا دگەھیتە بەرپرسێ ھوبەكا بچیك ژی.
ئەگەر ب نمونە بەحسا ڤێ ڤالاتیێ بكەم، دەما حكومەت ب گرانبوون و نزمبوونا دولاری بزانیت و ھاولاتیێ خوە ئاگەھدار نەكەت، ژ نشكەكێڤە ھندەك دەولەمەند ببن و یێ نە دیتی ب دەفتەرێن دولاری باخڤیت! دەما حكومەت ئەجندایێ حزبێ پەیرەو بكەت، ھندەك ھەست ب ھاولاتیبوونا خوە بكەن كو دەرەجە دوونە، د بەرامبەردا ھندەك ھەست بكەن كو حزب پێدڤی وانەو ئەو مەرجێن خوە ب سەپینن، یاسایێ ب بەزینن، چ ئەو كەسێن ھەنێ، بالە دەستبن دناڤ حزبێدا یان خودان پێگەیێ خوە یێ عەشایری بن و ژ ئاخفتنا وان دەنگ بكەڤن، ب رژیێنە دناڤ سندوقێن دەنگدانێدا، ئھا كومپانی دێ ب بێ سەروبەریێ كارێ خوە ئەنجامدەن و ئێدی ھندی تە حكومەتەكا كارا ھەبیت، چ ئەو حكومەتە ل سەر ئاستێ ھەرێمێ بیت یان پارێزگەھێ یان ژی ھوبەكا بچیك بیت، دەستھەلاتا وێ حكومەتێ نەشێت گەندەلیێ سنگە پێ بكەت، دەرئەنجامێن وێ ژی مەرج نینە پەقینا سیستەمێ گازێ یێ دھی ل سلێمانیێ و ئەڤرو ل دھوكێ بیت، ژبەركو ھەمی پەقینان دەنگ ژێ دەرناكەڤیت و ھندەك ب ھێمنی دەرباز دبن و وەك لەھییێ یا وان دڤێت دگەل خوە رادمالیت بێی ھەست پێبكەین، دەھان نەخوشیێن جەستەی و یێن بەریكێ دناڤ خەلكیدا پەیدا دكەت!!!

------------------https://www.facebook.com/photo/?fbid=10217761065658705&set=g.209899095715001

http://www.rwangauraxna.com/ba/detail.aspx?IDNews=6878

ئەڤرو ل بازاری گەنجەكی پارێ مەیێ چایێ دا!

 

عبدالرحمن بامەرنی

ئەو بخوە روونشتنەكا ھەڤالینی بوو، پرانیا جاران ژی ئەم ڤێ روونشتنێ دبەینە جادا دادگەھێ تەنشت پاركا نەوروز، كو من نەڤێت پەسنا چایا وێ بكەم، دا بۆ نە بیتە ریكلام! خوە ببیتە ریكلام ژی ما چ قەیدییە، كەسەك خوە ب كارێ خوە ڤە ماندی بكەت و خزمەت خوش و چاڤێ وی ل كارێ وی بیت ھندی چاڤێ وی ل پارە ڤەرچكاندنێ، ئەكید دێ ناڤ و دەنگییا خوە دەرئێخیت.
ئەزو دوو نڤیسەرێن دی بووین و مە كورسیكێن خوە گەھاندبوونە ئێك، گەنجەكێ دی ل تەنشت مەبوو و دیارە دانوستاندنا مە ل سەر پەرتووكێ، ل سەر رۆمانێ و داھێنانێ بگشتی و ئافراندنێ سەرنجا وی راكێشا، راكێشانەك ھەر چەندە پشتا من ل وی بوو، لێ ھەڤالان گوت وی تەمام بێدەنگی ھەلبژارتبوو و گوھداری دكر. تشتێ سەنجا من ژ دانوستاندنا مە راكێشای، ھەمی جورەكێ بگرە و ڤەكێشێ بخوەڤە گرتبوون، باوەرم دوو سەعەتان مە ل وێرێ رووشتنا خوە دەربازكر و مە ئاگەھـ ژ دەمی نەما، لێ ھەڤالێ ل تەنشتا مە روونشتی، رابوو و سلاڤ كر، گوت ھندی دنیایەكێ ئەز ب دانوستاندنا وە كەیف خوش بووم، دانوستاندنەكا رەوشەنبیرانە بوو و پەسنا جڤات و روونشتنێن ھوسا كر، ژ ئاخفتنا وی یا دیاربوو كەسەكە تژی بەر چچكێن وی پرسیاربوون و ل بەرسڤان دگەریا، ب تنێیاتییا وی گەلەك پرس سەراڤ دكرن. وی كومەلگەھەكێ چاوا دڤێت و ئەو كومەلگەھی چاوان دبینیت! وی چ جورە دیتن و بەرێخوەدان و ئایندە ژڤی كومەلگەھی دڤییان، ڤێ رێژا دەرچوویێن زانكو و پەیمانگەھان، لێ ڤان ھەمییان ئەو تێر نەدكر، ئەو ل تشتەكێ بەرزە دگەریا، خەما وی كومەلگەھێ وی و ئایندێ وی بوو، ئەوی دڤییا بێژیتە مە ئھا ئەم پێدڤی ھزركرنێینە و پرسان بكەین و بۆ پرسیارێن خوە بەرسڤان كەر بكەین و نەبتنێ كەسێن مشەخور بین و تشتێ ژخواتر خواستنا وی، دەما چووی پارێن چایا خوە بدەت، چایچی چار چایێن دی بۆ مە ئینان و گوت وی گەنجی پارێ وە واسل كر، دەكەفتنا پەیڤا (واسل) كرنێ، ئەز باوەرم مە تژی بەر چچكێن گەنجەكی ھیڤی كرن!!

ـــــــــــــــــــــــــhttps://www.facebook.com/photo/?fbid=10217578357651119&set=g.209899095715001

http://www.rwangauraxna.com/ba/detail.aspx?IDNews=6825

ئەڤرو رۆژا قەھوێ بوو و ئایا ئەم ژی دشێین (قەھوا كەزانا) تەوزیف بكەین

 

عبدالرحمن بامەرنی

ئەڤرو ل بارەگایێ رێكخراوێن دیموكراتی مە روونشتنەكا قەھوەڤەخارنێ دروست كربوو ب ھەلكەفتا رۆژا قەھوێ، كو كەسێن بەرێز دگەل مە جەمیابوون. ھەڤالێ ڤێ بڤێ چەندێ رابووی كاك رەقیب بوو و وەك نەریتەك پیچەكێ بەحسا ڤێ رۆژێ كر، تشتێ سەرنجا من ژ ڤێ روونشتنێ و ڤەخارنا قەھوێ راكێشایی، ئایا ما ئەم نەشێین تشتەكێ ھوسا بۆ خوە تەوزیف بكەین و دەما گەشتیارەك بۆ نمونە سەرا پارێزگەھێن ھەرێمێ ددەت، تشتەكێ ژ قەھوا مە ژی بزانیت و رھـ و ریشالان بۆ دروست بكەین؟

من بەحسا قەھوا كەزانایە و ئەم دەڤەرەكین ب سەدان و ھزاران بنێن كەزانان لدەف مە ھەنە، سابین ژێ دروست دكرن و زەیت ژێ دروستدكرن و مەرەمیت وەك دەرمان ژێ دروست دكرن و دگەل كەلاندنا وێ قەھوە ژی ژێ دروستدكرن، رەنگە نوكە ھندەك دەولەتێن دی بۆ خوە ئەڤ قەھوە تەوزیف كربیت و شانازیێ بۆ خوە پێدبەن، لێ خوە ئەگەر یا مە ژی ژبێ دەولەتییێ ئەم نەشیاینە بكەینە یا خوە، ژبەركو نەبوونا ئارامیێ و دروستكرنا كارگەھا و تا دووماھیێ.

لێ ئەم نوكە دشێین، كونفرانسەكی ل سەر قەھوا كەزانان، چەند ڤەكولینەك ل رھـ و ریشاللێن وێ و ھندەك تشتێن گرێدایی وێ و كارگێرییا پارێزگەھێ و سازیێن رەوشەنبیری ژی پێن خوە دگەل بشدینن و تایبەتمەندیەكێ بۆ دروست بكەن، باوەردكەم د سالەكا دیدا كەسەك خوە ژ بەسرا ژی بھێت، دێ قەھوا كەزانان ژی ڤەخووت و دشێ دوو سێ شیشەكێن ڤێ قەھوێ دگەل خوە بەتە باژێرێ خوە بەسرا ژی، ئایا ئەڤە یا بزەحمەتە، بتنێ وەك پرسیار.

https://www.facebook.com/photo/?fbid=10217430879284252&set=g.209899095715001

كوردستان ێ حەیاتە...!

عبدالرحمن بامەرنی

من بتنێ نیڤ دەمژمێر ھەبوو و دڤیابا ب ترۆومبێلێ قەستا فەرمانگەھەكا حكومی بكەم و ڤەگەرم ڤە، یانكو ئەو نیڤ سەعەت دا برێكێڤە چیت، من 10 خولەك ژی دەستیری وەرگرتن و ھەر چاوا بیت وەك من دانایی چوومە فەرمانگەھێ و ژوورا چویمێ، بەرێ مندا ژوورەكا دی و ژبەركو وان پێش وەخت پەیوەندی بمن كربوو، یان كو ئەز گیرو نابم. ل وێ ژوورێ پەسەندەك دامن، ئەو نڤیسارا ئەز ژبەر چوویمێ ل ژوورا ئێكێ بوو و دەما دوان 3 خولەكاندا زڤریم، دەرگەھـ یێ داخستی بوو، كو دوو ژن و زەلامەك د وێ ژورێ ڤەبوون و من قەستا ژوورا برەخ ڤەكر و من پرسیارا وان كر، گوت یێن چووین نانی بخوون و دەمژمێر دروست 12ی نیڤرو بوو، یان كو دناڤبەرا تێشتێ و فراڤینێ دا بوو، من ژی گوتێ نان و نوكە؟ گوت ما نابیت نانی بخوون؟ من ژی گوتێ، بەلێ ھەمی مرۆڤ نانی دخون و بالندە ژی نانی دخون و مێری ژی نانی دخون و دەیناسوور ژی نانی دخون و كێشا مللەتەكێ بەخت رەش ھەمی ب نان خارنێ ڤەچوو.. چ خولیسەرییە و كوردستان چ حەیاتە!!

https://www.facebook.com/photo/?fbid=10217424479084251&set=g.209899095715001

ل كلینیكا نوژداری!

 

عبدالرحمن بامەرنی

ھندەك بابەت د بچیكن و ھندەك دبێژن بەرناكەڤیت مرۆڤ بەحس بكەت، لێ تشتێ بچیك دشێت بەرسینگا قەبارەكێ گەلەك مەزن بگریت و وەك زلكەكێ شخارتێ و دەما دھاڤێژیە ناڤ پرێزەكێ و خولیێ لجھێ خوە دھێلیت، ئھا بابەتێ من ژی وەكھەڤیەكا ھوسا یا ھەی دگەل بچویكیێ و مەزنیێ!. ھەر چەندە ئەز بەحسا نوژداری و بهایێ پلێتا وی ناكەم و كا رۆژێ چەند نەخوشان برێڤەدبەت و رۆژا وی دگەهیتە چەند پاران، ئەڤە لدویڤ شیانێن هەر كەسەكی دمینیت، ئەگەر مرۆڤ پیتەی ب كارێ خوە بدەت، خوە پێش بێخیت و ببیتە جهێ باوەریا خەلكی دێ ناڤ و دەنگیا مرۆڤی دگەلدا دەركەڤیت و خەلك بخوە دێ قەستا مرۆڤی كەت و گەلەك جاران ئەز دبێژم، ل پارەی نەگەرە دێ پارە بخوە لتە گەریت و دڤێت هەر ئێك ژمە یێن خودان كار و پیشە، هەڤكێشەیەكا ژڤی رەنگی لبەر سینگا خوە دانیت.
یا من دڤێت بێژم، ئەو دەمێ نەخوش ل كلینیكا نوژداری و ل ژوورا پێشوازیێ، كو سكرتێرێ نوژداری ل پشت مێزەكێیە و جهێ روونشتنا نەخوشان یێ هەی، ژبۆ وەرگرتنا دوورا خوە بۆ چوونا دەف نوژداری، رەنگە دێ نیڤ دەمژمێرێ و هندەك جاران زێدەتر ژ دەمژمێرەكێ ژی نەخوش ل هیڤییا دوورا خوە مینیت، دڤی ماوەیدا گەلەك جاران زارۆك یێن هەین، تا مەزن ژی، یان نەخوشێن هەین و ئەڤ نەخوشێن هەنێ پێدڤی ئاڤ ڤەخارنێ دبن، ئەرێ ما دێ ئینانا بەفرگرەكا بچیك و تژی ئاڤ بیت، دێ چەند ل سەر نوژداری راوەستیت وەك پارە؟!!
براستی ئەز پێش نوژداری ڤە شەرم دكەم، كەسەك سەرەدانا مرۆڤی بكەت و تایبەت كەسەكێ بێهن هلمای و نەخوش و نەئارام و روونیتە خارێ و ئەو كەس دێ پارەی ژی دەتە مرۆڤی، ژبەركو نوژدار دێ پشكنینا حالەتێ وی كەت و چارەسەریێ ژی بۆ نڤیسیت، ما دێ كارتونەكا ئاڤێ ب دوو هزار دیناران چەند ل سەر نوژداری گران راوەستیت!!

----------------------https://www.facebook.com/photo/?fbid=10217405243323369&set=g.209899095715001

http://www.rwangauraxna.com/ba/detail.aspx?IDNews=6768

دەیك....!!!

 

ع. بامەرنی

دەیكا زارۆكەكێ ھەشت سالی چوو بەر دلوڤانیا خودێ، بابێ وی ژنەكا دی ئینا و جارەكێ گوتە كورێ خوە: چ جوداھی دناڤبەرا دەیكا تە یا كەڤن و دەیكا تە یا نوی دا ھەیە؟
زارۆكی ب ھەمی بێگونەھیا خوە گوت: دەیكا من یا ژ راستا درەو دكرن و دەیكا من یا ژ قەستا یا راستگوویە!
بابێ وی ژڤێ بەرسڤێ حێبەتی ما، ئینا گوتێ: ئەڤە چاوا؟
زارۆكی گوت: دەما من یاری كربانە و من دلێ دایكا خوە ھێلابایە، دەیكا من دا بێژیتە من: ئەگەر تو ھەر ھوسا یێ ركوو بی، ئەز خارنێ نادەمە تە..! بەلێ من گوھداریا وێ نەدكر و ژبەركو من دزانی ئەو راستییا نابێژیت و دێ ل ناڤ كولانێن گوندی لمن گەریێت و دەستێ من گریت و ئینتەڤە و خارنێ دەتە من.
بەلێ دەما نوكە ئەز یاریا دكەم، دەیكا من یا نوی دبێژیتە من: ئەگەر تو یارییا بەس نەكەی، ئەز خارنێ نادەمە تە! و ئھا ئەڤە دوو رۆژە ئەز یێ برسی..!
وەرگرتیە.

ــــــــــــــــــــــــــــــــــhttps://www.facebook.com/photo/?fbid=10217382870604065&set=g.209899095715001

http://www.rwangauraxna.com/ba/detail.aspx?IDNews=6746

ئەگەر شانوگەرییا (ھۆشێن تەرمەكی) رەخنە بكەین

 

عبدالرحمن بامەرنی

ئەز بخوە ئێك ژ پشتەڤانێن ھەر چالاكیەكا ئەدەبی و ھونەریمە ل باژێری بھێتەكرنێ و ئەز دبینم، ئەو پێنگاڤەكن بەرەڤ پێشڤەچوونێ و ئاڤەدانكرنا باژێری، ژبەركو ئاڤەدانكرن لدەف من ئاڤاھیێن بلند و تاوەر نینن، ھندی من بەحسا ئاڤاكرنا مێشكی بیت.
شانۆگەریا (ھۆشێن تەرمەكی) ژی ئێك ژوان چالاكییان بوو، كو دڤی دەرگەھیدا ئەم بەرەڤ خوە كێشایین و سەرەرای ماندیبوونا دەرھێنەری، یا ئەكتەران كو ھەمی شیانێن خوە ل سەر دەپێ شانۆیێ پیشانددان و ستافێ شانۆیێ یێن لپش پەردێ، كو من بخوە وەك نڤیسەرێ ڤێ گوتارێ ھیچ تشتەك نینە ل سەر زێدەبكەم، ژبلێ دەستخوشیێ، لێ وەك بینەرەكێ ڤێ شانۆگەریێ ئەز دێ ھندەك سەرقەلەمكان نڤیسم.
ژبەركو ھێشتا مە كەلتورێ شانۆیێ ل باژێری نینە، ھێشتا مە بینەرێن شانۆگەرییان پەیدا نەكریینە، ئێدی زوویە ئێكسەر ئەم شانۆگەریەكێ پێشكێشی بینەرێ خوە بكەین، چ پرسان د سەریدا دروست نەكەت و باوەشكێن خەوێ دبەر بەرێخوەدانێ را بھێنێ، شانۆگەریەكێ كو بینەر خوە دناڤادا نەبیت، نەشێت كارلێكێ دگەل وی دروست بكەت و خوە ئەو دەقێ ھەلبژارتیێ ل سەر ئاستێ جیھانێ چەند یێ بەربەلاڤ و بھێز بیت و یا من دڤێت زێدەتر بێژم، خوە ئەگەر ھەلبژارتنا دەقەكێ شانۆیێ ل ئاست نزمتر ژی بیت، لێ ب مەرجەكی بینەرێ شانۆیێ دروست بكەت، ئەڤە یانكو مە ب پێنگاڤ بینەرێن شانۆیێ ل باژێری دروستكرن.
ئەز نمونەكێ ژی بێژم، گەلەك جاران مە ھەڤالان دان و ستاندن كریە و ھەڤالەكی تشتەكێ جوان و زانستی ڤێھەبوویە، لێ ژكێم تێگەھشتنا مە بۆ بابەتی، ئەم نەشییاینە وەربگرین، وی ھەڤالی گوتیە ئەز دێ (دوو دەرەجكان ژبەر ھەوە ھێمە خارێ، دا ئاستێ خوە بینمە ئاستێ ھەوە)، مەبەستا وی دا ئەم دوی بگەھین و ئھا من بەحسا ڤان دوو دەرەچكانە، ئەگەر مە بڤێت شانۆیا مە جھێ خوە بریت و بینەری بۆ دروست بكەین، دڤێت دەرھێنەرێن مە ژی دوو دەرەجكان ل سەر خاترا مە بینەران بھێنە خارێ، ژبەركو ئەڤە گازندا من بتنێ نەبوو، بەلكو ل بەر دەرێ ھولێ مە ئەڤ دان و ستاندنە كرن و مە وێنەك ژی وەك بیرھاتن دگەل دا گرت.

ــــــــــــــــــــــــــــــــــhttps://www.facebook.com/photo/?fbid=10217371482479369&set=g.209899095715001

http://www.rwangauraxna.com/ba/detail.aspx?IDNews=6731

دا بزانی بۆچی ھەژار د ھەژارن و بوچی زەنگین د زەنگینن

 

ع. بامەرنی

**گوتێ: **كیلویا خیارا ب چەندێ یە؟
**پیرەمێرێ ل بەر مێزێ گوت: **ب ھزار دیناران.
**گوتێ: **دێ پێنج كیلویان بەم، ئەگەر كیلویێ ل سەر (750) دیناران نەدەیە من، دێ چمە جھەكێ دی كرم.
پیرەمێری گوتێ: وەرە ببە بەلكەی خودێ دەرگەھەكی بۆ مە ڤەكەت، تو ئێكەم بكری.
وی خیارێن خوە كرین و خوشیەكا سەركەفتنێ ددلیدا دروست بوو، ژبەركو شیا خیارێن خوە ب ئەرزانی بكریت.
ئێڤاری ھەڤالێن خوە دگەل ترۆومبێیلا خوە یا (...) سیاركرن و چوونە ئێك ژ خوارنگەھێن ھەرە باشێن باژێری.
روونشتنە سەر مێزەیەكێ و داخوازا باشترین و خوشترین خورانێن خوارنگەھێ كرن.
كێمەك ژوێ خورانێ خوارن و گەلەك ژێ ھێلانە دناڤ سێنیكاندا.
پاشی چوو دا پارێ خوارنێ بدەت و دیت ل سەر پسولێ 170 ھزار دینارن و گوتێ خودانێ خورانگەھێ: ئەڤە بۆ ھەوە 200 ھزار دینار و پارێن مایی ژی بۆ ھەوە.

دبیت تا ڤێرە چیرۆك تشتەكێ ئاسایی و رۆژانە بیت، لێ یا سەیر د چیرۆكێدا، پرانییا مە ب كێم و زێدەھی ڤە ئەم ڤان جورە مامەلا دكەین، ئەم دگەل زەنگینان ددەست ڤەكرینە و دگەل ھەژاران ژی جرەجرێ سەرا ربعەكێ دكەین...!!!!
ـ بدەستكاریڤە.

--------------------https://www.facebook.com/photo/?fbid=10217352812212624&set=g.209899095715001

http://www.rwangauraxna.com/ba/detail.aspx?IDNews=6698

چیرۆكەكا كورتە بەلێ یا كاریگەرە

 

ع. بامەرنی

ئێكی ھوسا نڤیسی بوو:
بەری چەند سالان ھەڤالێ من مربوو.
ژ نشكەكێڤە تەلەفونەك ب ژمارا وی بۆ من ھات و دەركەفت كورێ وی و داخوازا كرینا پایسكلەكێ ژمن كر.
من گوتێ: سەرچاڤان، بەلێ ما تو من ناس دكەی؟
گوتی: نەخێر، بەلێ من وێنەكێ بابێ خوە دیت و كەسەك دگەلدابوو و ل پشتا وێنەی ئەڤ ژمارا تەلەفونێ ل سەر بوو و ھاتبوو نڤیسین: "ھەكە ھین پێدڤی تشتەكی بون و ئەز یێ بەرھەڤ نەبم، ھین دشێن ژڤی داخواز بكەن، ژبەركو ئەو ئەزم بەلێ ل جھەكێ دی".

ـــــــــــــــــــــــــــhttps://www.facebook.com/photo/?fbid=10217324210457598&set=g.209899095715001

http://rwangauraxna.com/ba/detail.aspx?IDNews=6648

كەنیا ڤێ پیرەژنێ ب دنیایەكێ یە!

ع بامەرنی

ئەڤ پیرەژنا ھین وێنێ وێ دبینن، ناڤێ وێ (چین)ە و تەمەنێ وێ (90) سال بوون و شقەیەكا لاو ل نیڤا پاریسێ ھەبوو و كەس نەبوو چاڤێ خوە بدەتێ. پارێزەرەك لێ دەركەفت و گرێبەستەك دگەل ئیمزاكر، كو ئەو ھەیڤانە (2500) فرەنكێن فەرەنسی بدەتێ ھندی د ژیانێ دا بیت، بەرامبەر وێ چەندێ، ھەر گاڤا ئەو مر، ئەو شقە بۆ وی بیت و گرێبەست دناڤبەرا ھەردووكاندا برێكەكا یاسایی ھاتە ئیمزاكرنێ..
پیرەژن رازی بوو و پشتی 26 سالان ژ رێكەفتنێ، كو ئەو پارێ ھەیڤانە پارێزەری ددایێ دوو بەھایێن شقێ تێھەبوون.. پارێزەر مر و ئھا ئەڤە یا جەژنا بوونا خوە یا 116ێ دگێریت..
ـ وەرگرتیە ب دەستكاریڤە.

ـــــــــــــــــــــــــــــــــhttps://www.facebook.com/photo/?fbid=10217308714510209&set=g.209899095715001

http://www.rwangauraxna.com/ba/detail.aspx?IDNews=6607

فەیسبۆك و ھەڤالێن بنئاڤكی!!

 

عبدالرحمن بامەرنی

سوشیال میدیایێ دەرگەھەكێ دی و یێ نوی، ل بەر پەیوەندییان یێ ڤەكری. ئێدی تو دێ دگەل وی كەسی بەردەوامیێ كەی و دەمێ خوە دەیێ، یێ تو بزانی تشتێ وەكھەڤ دناڤبەرا وە ھەردووكاندا ھەیە. تورا فەیسبۆكێ ژی كو زێدەترین خەلك بكاردئینن، ئالاڤەكێ باشێ پەیوەندیكرنێ یە و گرنگ نینە ئەو كەسێ بەرامبەری تە چ رەنگ بیت، چ عەشیرەت و حزب و ئاین و مەسەب بیت، گرنگ نینە ئاستێ ویێ زانستی چەند بیت و یێ ساخلەم بیت یان پەككەفتی، یێ جوان بیت یان كرێت و تشتێ گرنگ بۆ مرۆڤی بتنێ ئەوە، ئەو چ دنڤیسیت و ئاستێ وی یێ ھزركرنێ و دەربرینێ و تێگەھشتنێ تا چ راددەیە.
لڤێرە ژی ھەر ئێك ژمە كومەكا ھەڤالان ھەیە و گرنگیا ڤان ھەڤالان، بۆ وەرگرتنا زانیارییان و لێكگوھراتنا پێزانینا و ئەز بخوە وەك نڤیسكار و راگەھاندكارەك و سەرنڤیسەرێ مالپەرێ (روانگە و رەخنە) و دا كو زێدەتر خوە نزیكی ھەمی تەخێن كومەلگەھی بكەم، ئەز پێدڤی ھەڤالانم، ھەڤالێن چالاك و ژ نەچاریێ ھەر چەند رۆژان، ئەز پێداچوونەكێ دناڤ ھەڤالێن خوە یێن فەیسبۆكێ دا دكەم و ھندەكان مەقەس دكەم، ئەڤێن بھزرا من ئەو دزێدەبن یان دچالاك نەبن و یان ژی ھندەكان ئەكاونتێن خوە داخستبن ژبەر ھەر ئەگەرەكێ و گەلەك جاران ب بێ دەستی، ھەڤالێن منێن دروست ژی دكەڤنە بەر مەقەسێ و لێبورینێ ژوان دخوازم و ئەڤە نە ژ ئەنقسەت بوویە.
تشتێ ژڤێ ھەمیا من گوتی و من دڤێت بێژم، ئەو كەسێن تازە دڤێت داخوازا ھەڤالینیێ بۆ مرۆڤی فرێبكەن و دێ پروفایلێ وان ڤەكەی دا بزانن چ كەسە، دێ بینی یا ھاتیە نڤیسین (...... مەلەفێ خوە یێ قفل كری!)، ئێ سەیدایێ بەرێز، مادەم تە دڤێت بنئاڤكی ھەڤالینیێ دگەل مندا گرێدەی، ئەز نەچار نینم تە وەربگرم و تشتێ بۆ من سەیر ژڤی جورێ داخازكرنێ، چ ژ زانین و ئاگەھی بیت یان نەزانین و بێ ئاگەھی بیت، ئەڤە یا دبیتە دیاردە و یا دروست تا تو مەلەفێ خوە قفل بكەی ژی، ئەوێ تو داخازیا ھەڤالینیێ بۆ فرێدكەی، دگەلدا نامەیەكێ بنێرە و خوە بدە ناسكرنێ.

ــــــــــــــــــــــــــــــــــــــhttps://www.facebook.com/photo/?fbid=10217301065678993&set=g.209899095715001

http://rwangauraxna.com/ba/detail.aspx?IDNews=6590

ژ نڤیسینێن من ھەر دڤێت بخوینم!

ع. بامەرنی

كەسێن دانعەمر ل شەرمێ نەدەن و وان ب بیردانكا وان تاقی نەكەن و بێژیێ:
ـ ئایا تە ئەز ناسكرم؟
ـ پا ئەز كیمە؟
ـ پا ئەز كورێ كێمە؟
بزانە دێ ئەڤ جورە پرسیارێن ھەنێ بۆ وانا گەلەك ددل ئێش بن و دێ ھەست ب كێماسیێ كەن. یا دروست دەما سلاڤدكەیە وان، ناڤێ خوە بێژە و خوە بۆ بدە ناسكرنێ، ژبەركو ئەگەر بیردانكێ پشتا خوە دابیتە وان، بلا رەوشتێ جوان پشتا خوە نەدەتە تە.
وەرگرتیە ژ مالپەرەكی عەرەبی بێ ناڤێ ژێدەری ل سەر بیت.

ـــــــــــــــــــــــــــــــhttps://www.facebook.com/photo/?fbid=10217287946031010&set=g.209899095715001

http://www.rwangauraxna.com/ba/detail.aspx?IDNews=6570

ڤێجارێ بلا بۆ ژنان بیت

ع. بامەرنی

ھوسا من خاندبوو: جادوگەرەك ھاتە نك دوو ھەڤژینان و گوتێ، ژبەركو وە باشترین ھەڤژینی ھەیە و ئەڤە نزیكی 35 سالانە ھین دگەل ئێك، ئەز دێ ھەر ئێك ژ ھەوە ھیڤیەكا وی بۆ بجھـ ئینم و بۆ خوە داخواز بكەن.

ژنێ گوت:

من دڤێت دگەل زەلامێ خوە دنیایێ ھەمیێ تێكڤەدەم، بێی كو ئەم ژێك ڤەبین.

جادوگەرێ ب دارێ خوە بازنەك ل سەر عەردی دروستكر و دوو پلێتێن فروكێ ژێ دەركەفتن و كرنە ددەستێ ژنێ دا و بۆ دوورا زەلامی، ئینا زەلام روونشتە خارێ و گوت:

ببورە خوشتڤیا من، بەلێ ھیڤیا من ئەوە ئەز ژنەكێ بینم، كو 30 سالان ژمن بچوكیتر بیت.

ژنكێ ھەست ب بێھنتەنگی كر و ھەست كر خەنجەرەك ب سینگێ وێ كەفت و بێ ھیڤی بوو، بەلێ چ بكەت، ھەر ئێك ژوان بتنێ ئێك ھیڤی ھەبوو.

لڤێرە جادوگەرێ ب دارێ خوە بازنەك ل عەردی دروست كر و تەمەنێ زەلامی بۆ 90 سال و یێ ژنێ وەك خوە ما.

مەبەست ژڤێ ڤەگێرانێ ژی ھندەك زەلام ھزردكەن ئەو د ژیرن، بەلێ ژبیردكەن لدووماھیێ ژی ھەر ژنن جادوگەر.

وەرگێران ژ عەرەبیێ.

ـــــــــــــــــــــــــــــــــــــ  https://www.facebook.com/photo/?fbid=10217281878919336&set=g.209899095715001

http://www.rwangauraxna.com/ba/detail.aspx?IDNews=6559

سوبەھییا مە ژ ئەڤرویا مە خوشترە یان بەرۆڤاژی؟!!

 ع. بامەرنی

ژیان مە د دویخوەرا دكێشیت و ئەم ھشیار نابین، تا ئەم دبینین شەمەندەفرا تەمەنی ئەم ھێلاین و ھەر تشتێ مە یێ جوان و خوشترین سالێن ژیێ مە یێن دگەل خوەبرین! ئێدی نە مە خەونێن خوە كرنە راستی و نە ژی ئەم ژیاین وەك مە ڤیایی، ئەم ب ئەوا بۆ مەھاتیە نڤیسین رازیبووین و گوتنەكا ھەی ھەرا دگەل مە، دبێژیت: "سوبەھی دێ جوانتر بیت، تا ئەم مەزن بووین و بۆ مە ئاشكەرابوو كو دھی جوانتر بوو، سوبەھی بتنێ تشتەكێ بەرزەیە و ئەم لھیڤیێ بووین و قەد نەھات....

ـ وەرگرتیە....

ــــــــــــــــــــــــــــــــــــ https://www.facebook.com/photo/?fbid=10217298947546041&set=g.209899095715001

http://www.rwangauraxna.com/ba/detail.aspx?IDNews=6592

بۆ ژنان.. ئەگەر وە بڤێت ھەڤژینیا وە یا سەركەفتی بیت؟!

  عبدالرحمن بامەرنی

من گوت بۆ ژنان، مەبەستا من ئەو نینە ئەز لایەنێ زەلامی بگرم و یێ ژنان بەردەم، لێ بەرێخوەدانا من بۆ زەلامی دڤێ پرسێ دا دبیت تا راددەیەكی یا جودا بیت، ب كێماسی پشتی من ئەڤ كورتە ڤیدیویە دیتی، چالاكڤانەكا ژن د میانا دیدارەكێدا دگەل پێشكێشكارەكێ ھوسان بەحسا زەلامان بگشتی دكر، دگوت: "دەما زەلام ل بازاری یان جھەكێ گشتی دچن، ھەر ژنان بكەڤیتە بەرچاڤێن وان، ئەو حەزدكەن لدویڤ بچن و بەژنا وان چاڤێن زەلامان دكێشیتە خوە، ئەڤە ژی وێ رامانێ نادەت كو زەلام بتنێ ھزرا سكسی دكەن و ژبەر ھندێ زەلام ڤێ رەفتارێ دكەت، نەخێر ژبەركو زەلام ب سروشتێ خوە وەك زارۆكەكی یە و دەما ژنان دبینیت ب دەیكا خوە د شبھینیت و ئێكەم سەرنجا وی بۆ ڤێ چەندێ یە!!

 دبیت ئەڤ نمونا من ئینای پیچەك یا سەیر بیت یان ھندەك برەنگەكێ دی سەحكەنێ، لێ راستیەك یا بۆ ھەی و دیتن ژ دیتنێ جوداھییا خوە دكەت و ھەر بۆ زێدەھی جارەكێ د پارچە ڤیدیویەكا دی دا ھوسا ب بەرچاڤێن من كەفت، خودێ كورەك دا بۆ ژنەكێ و كچا وێ یا بچیك ھاتە دەف و یاری ب وی كوركی كرن و گوتە دەیكا خوە، نوكە تە كورەك و كچەك یێن ھەین؟ ژنكێ گوتێ نەخێر من دوو كور و كچەك یێن ھەین، كچك شووك بوو گوتێ چاوان؟ ژنكێ گوتێ تو ئێك و برایێ تە و بابێ تە ژی، چاوان ئەز چاڤدێریا تە و برایێ تە یێ ژنوو خودێ دای دكەم، وەسا ئەز چاڤدێرییا بابێ تە ژی دكەم. تا ڤێرە ئەز دێ نمونێ خوە بەس كەم، لێ ئھا دروست من بەحسا تێگەھێ (چاڤدانێ یە یان چاڤدێریكرنێ)یە، ئەو پەیڤا دڤێت ھەمی ژنەك بزانیت دێ چاوان ل سەر ڤێ پەیڤێ راوەستیت و ھەڤژیینا خوە پارێزیت، پێنەڤێت ژی سەركەفتنا ھەر ھەڤژینەكێ خوشییا ھەردوو ھەڤژینانە، سەرەرای ھەژاری و نەداریێ.

دا بزڤرمە سەر بابەتێ من مەبەست پێھەی:

ئەو تشتێ ژن تێنەگەھیت، تێگەھێ چاڤدێریكرنێ یە، ھەڤژینیا سەركەفتی دڤێت چاڤدێری بۆ ھەبیت و ئەگەر باخچەك چەند یێ جوان بیت، گولێن وێ و ئەو شینكاتی و كەسكاتیا دناڤ دا، بێھنێن خوش ھەبن، لێ ئەگەر رۆژانە چاڤدێری ل وی باخچەی نەھێتە كرنێ، ئەو باخچە دێ بەرەڤ چرمسینێ ڤەچیت و ھوسان دێ گەلەك ھەڤژینان بینی كێشە دناڤبەرا واندا دروست دبن، ئەگەر لدویڤ بچی، دێ بینی وان چیرۆكەكا حەژێكرنێ دناڤبەرا خوەدا ھەبویە و دبیت چەند سالان وێ حەژێكرنێ ڤەكێشابیت و لێ دەما بوینە ھەڤژین، ھەڤژیینا وان گەلەك دوم نەكێشا و ناكوكی سەرھلدان، بوچی؟ ئەكید ئەڤ ژن و مێرە ھەمان پرسیار ژخوە دكەن یان دێ ئێك لومەكەن، مانە ھەر ئەم بووین و مە دگوت بتنێ بگەھینە ئێك بلا مە ھیچ تشتەك نەبیت، پابوچی ئەڤ كێشێن ھەنێ دروست بوون!!

یا من دڤێت بێژم بۆ كوران و كچان، بۆ زەلام و ژنان، حەژێكرن و پرۆسا ھەڤژینیێ دڤێت چاڤدێریكرن بو ھەبیت، چاڤدێریكرنەكا بەردەوام ھەبیت، نابیت كچ دقوناغا كچینیێ دا ھەمی بەرھەڤیێن خوە جانكرنێ بكەت، لڤینێن خوە، ئاخفتنێن خوە و دەما شی دكەت بێژیت مانێ خلاس ئەز ب ئومێدا خوە گەھشتم و ئێدی دەستان ژخوە بەردەت، ئەڤە مەزنترین گەفە ل سەر ھەڤژینییا سەركەفتی، ژبەركو د پرۆسا یان قوناغا ھەڤژینیێ دا تشتەك نینە ب ناڤێ ھەمی تشت بدووماھی ھاتن و ئەم گەھشتین ھیڤیێن خوە، ژبەركو شنی ھندەك تشتێن دی سەرھلددەن گرێدای ژیانێ و گرفتێن ژیانێ و ئاستەنگێن ژیانێ، كو رۆژانە تشتێن نوی پەیدا دبن، ئھا دڤێت ژن و زەلام چاوان بەری قوناغا ھەڤژینیێ دچاوا بوون، نەرماتی دئاخفتنێ و رەفتاراندا كو زێدەتر نزیكی ئێك بن، بڤی رەنگی ژی ڤێ بەردەوامیێ بدەنێ، ھینگێ نە پارە و نە ھیچ تشتەك نابیتە ئەگەر كو دووركەفتن دناڤبەرا واندا دروست بیت و دێ ژیانا وان دگەل ئێك سەرەرای ھەر تشتێ بكەڤیتە رێكا وان، یا بەردەوام بیت، ژبەركو دێ پێكڤە چارەسەرییا بۆ ئاریشەیان پەیدا كەن و ل خوشیان ژی دێ كێكێ پێكڤە كەركەن.

ـــــــــــــــــــــــــــــــــــ

 درۆژناما ئەڤرو ژمارە 3161 یا رۆژا 19/6/2022ێ بلاڤبوویە