ئاخر نزانم دێ چ نڤیسم؟!!

 عبدالرحمن بامەرنی

یا ب ساناھی نینە بشێم، ھەر تشتێ من بڤێت بنڤیسم، خوە نڤیسینێ ژی دەم و جھێن خوە دڤێن و مێشكەكێ ئارام بۆ دڤێت!. ئەز چەند پێدڤی وی مێشكی مە دا بشێم چەند رێزان ل سەر كەساتییا تە بنڤیسم. ئاخر من بەحسا ھەمی كەساتییا تە نینە، بۆ من چ گرنگە تە حەز ژ چ خارن كربیت و ژیانا تە یا زارۆكینیێ چاوان و لكیرێ دەرباز بیت و ھینگێ ھەڤالێن تە كی و كی بن؟! بۆ من چ گرنگە تە خواندنا خوە یا سەرەتای ل كیرێ خواندبیت یان ژی تو چەند قوتابیەكێ زیرەك بووی یان تە چەند گوھدارییا كەس و كارێن خوەدكر! بۆ من چ گرنگیە سنێلاتییا تە ب چ شێوە دەرباز ببیت و حەزێن تە یێن ھینگێ د چاوا بن و تو وی دەمی كەسەكێ یاخی بی یان تو نیڤ مێرەكێ سەربەردای بی و ھەمیان دل ئێشییا خوە ژ رەفتارێن تە دیتبن، خوە نیڤ مێر و سنێلە دوی تەمەنێ خوەدا ھەمی د وەسا بوون و ئاخر ئەز بوچی ڤان بەحسان بكەم، یێن چ گرێدان بمن ڤە نە، دەما ئەز دھێم و چەند رێزا وەك وەفایەك ل سەر تە بنڤیسم، ئاخر ئەز نزانم بۆ من چ گرنگە، تە چەند ھزرێن جودا ھەبن و سەركەفتن و شكەستنێن تە چبوون و ئەگەرێن وان چبوون.

 

ھەڤالێ چەلكی، نانا ئەز نەشێم ناڤێ تە بینم، ببورە ژبەركو ھێشتا ئەز ب سەرخوەڤە نەھاتیمە و ھزردكەم، ئەز یێ لبن بێھوشییا بەنجەكا درێژ و نزانم دێ كەنگی من بەردەت و ب ھوش خوەھێمە ڤە، ئاخر تە ژیان ب ئاسانی وەردگرت و كێشێن تە گەلەك د بچووك بوون،  گەلەك گەلەك بچووكتر ژ ئەڤ ھەمی كەسێن دی یێن ژیان بۆ خوە دكرنە كێشە و دكرنە بار و ل پشتا خوەدكرن. چەند تو یێ جوداتر بووی و ب ئاسانی مرۆڤ دشییا خوە نزیكی تە بكەت و ل تە بستە بیت، ژبەركو تە چ تشتێ ڤەشارتی نەبوو. من گەلەك جار حەزدكر نەڤیانێن تە بزانم، ئەو تشتێن دلێ تە ژ ژیانێ رەش دكەن، بزانم ھەڤالێن تو حەژێ نەكەی كینە و خارنێن تو حەژێنەكەی چنە و تە نەڤێت ل كیژ جاددێ پیاسێ بكەی و سلاڤی كیژ ھەڤالی نەكەی.

 

بیرا تە دھێت دەما تە بەحسا ھەڤالێن خوە یێن بەشێ ناڤخویی ل ناسریێ دكر و دەما چەند كوردەكێن خەلكێ ھەولێرێ و سلێمانیێ دگەل تەدا، ھینگێ تە ل پەیمانگەھێ دخواند و سەرەرای ھەمی یێن دوی بەشی ڤە جوداتر بوون ژتە ب رەفتارێن خوەڤە و لێ تە ھەمی ئینانە سەر ئەوا تەدكر و تە رێكخستنەك ئێخستە دناڤ واندا و چەند ب تە ئارام بوون و تە خواندن ل بەر وان شیرینتر لێكر. بێژە من چ سحر بوو دگەل تە و ب ئارامییا خوە، ھەر كەسێ تە تێكەلییا وی كربا، زوی ب تەڤە دھاتە گرێدان؟ ئاخر ژ كیرێ بزانم تو چ جورەكێ مرۆڤان بووی؟!!

 

من ژ دل دڤییا من بیرھاتنەكا تە یا نەخوش بەحسكربا، ھەر ژبەرخوە نە و ژبەر ڤێ نڤیسینێ ژی نە، دا كەسێ نە گوتبا بتنێ تو یێ پەسنا وی دكەی. ئاخر ئەو چ ژ كەساتییا تە و دلێ تە دزانن ھەتا ڤێ بێژن، دەما من پێشنیار كری كو ژبلی من و تە و سەعیدێ شەریف، ئەم كەسەكێ دی ژی بكەینە جوقێ خوە یێ ھەڤالینیێ و تە گوتی نەنە، ئەڤا ئەم د ئێك دگەھین باوەرناكەم كەسەكێ دی د مە بگەھیت. ئاخر دزانم من ژی چەندین ھەڤال ھەبوون و سەعیدێ شەریف ژی چەندین ھەڤالێن خوە ھەبوون و ژخوە ھەڤالێن تە تشتەكێ دیێ جوداتر بوون و من چ جارەكێ ژ دەڤێ تە گولێ نەبوویە تە بەحسا ئێك ژوان ب خرابی كری، لێ بوچی تە دگوت جوقێ مە بەسە، ئھا شنی ئەز یێ ھەست بڤێ چەندێ دكەم و دزانم جوقێ مە و پیرێ مە یێ ژ دەستێ مە دەردكەڤیت.

 

ببورە ھەڤالێ جەمال ئەز نزانم چ دنڤیسم و نە ئەز دزانم من دڤێت چ بنڤیسم و ئاخر دێ چاوان ئەڤێن دی ئەڤێن ڤێ نڤیسینێ دخوینن دمن گەھن؟ ئاخر ئەو چ تشتەكی نزانن، ئەو گەلەك دویرن ژ پەیوەندییا من و تە یا ھەڤالینیێ و نزانم باوەردكەم نە ھەڤالینی بوو و دبیت براینی و دبیت ژ براینیێ ژی زێدەتر بیت.

 

 ئاخر ئەز پێدڤی كەسەكیمە من ب راوەستینیت، ژبلی رێزكرنا پەیڤان ئەز چ دی نزانم و راستی ژی بیت ئەز نزانم دێ چ نڤیسم، لێبورنیێ ژ ھەر كەسی دكەم، ئەڤێن ڤێ نڤیسینێ دخوینن و بمن دكەنە كەنی، ئاخر ھین نزانن ئەز یێ چ دبێژم و ئەز یێ چ كود ڤەدكەم و یێ ھێلێن چ (تەلسم) ڤەدكەم، لێ یا ئەز ژخوە پشت راست، ئەڤا ئەز دنڤیسم دێ بەشەكێ گرانیێ ل سەر ملێن من سڤك كەت، ژبەركو گەلەك تشت ھەنە و من نەئیناینە زمان، لێ من باوەریەكا تەمام ب یاسایا ھێزا راكێشانێ ھەیی و ئەو تشتێن من نەگوتین، گیانێ تە یێ ھەست پێدكەت، ژبەركو لەز و بەزییا تە ئەم پێ ھێلاین، گەلەك تشتێن تە نیڤ تەمام ل پاش خوە ھێلان و گیانێ تە نەشێت ژڤان دەردووران بچیت و ئەو یێ ھەست ب مە دكەت و ئەم یێ ھەست ب وی دكەین و رێییا تە یا ڤەكری بیت..   

 

چلییا (جەمال چەلكی) و ئیمزاكرنا پەرتووكا وی

عبدالرحمن بامەرنی

دڤان رێورەسماندا كو ئەڤرو لدەمژمێر 3:30ێ ئێڤاری ل ھولا لالش پرێڤەچووین، ژبلی خواندنا گوتارەكێ، من وەك ئێك ژ نزیكترین ھەڤالێن وی و وەك وەفایەك بۆ وان رۆژێن خوەش و نەخوش مە دگەل ئێك دەربازكرین و وەك بەرھەڤكرن بۆ ڤان رێورەسمان من دوو ئەرك ئێخستنە سەر ملێن خوە، ئەو ژی بەرھەڤكرنا پەرتووكا وی ژ گوتارێن وی ئەوێن ھاتینە بلاڤكرن یان بلاڤ نەبووین، ژ ئەرشیفێ وێ و دیزاینكرنا پەرتووكێ و تا مە ئیمزاكرنا وێ كریە ئێك ژ برگەیێن ڤان رێورەسمان و دیسان سەرپەرشتیكرنا پاشكویەكێ تایبەت ب ھەفتەنامەیا (رێگای كوردستان)، كو ژ 4 بەرپەران پێكھاتبوو و مە پەیوەندی ب چەندین ھەڤالێن وی كر و ھەر ئێكی ژوان ب گوتارەكێ، مە ئەو پاشكوییە بەرھەڤكر و ل ڤان ھەردوو ئەركان ژی سوپاسییا مەلبەندێ شیوعی یێن كوردستانێ دكەم، ژبۆ گرتنە بەرا ئەركێ چاپكرنا پەرتووكێ و دیسان سەرنڤیسەرێ ھەفتەنامەیا رێگای كوردستان، كۆ ئەڤ پاشكویە بۆ تایبەت بۆ ڤێ بیرەوەریێ تەرخانكری و ناڤێ وێ ژی كریە (رێگای جەمال چەلكی).

گوتارا من دناڤ رێورەسمێن چلیێدا من پێشكێش كری:

یا ب ساناھی نینە تو بھێی و ل سەر كەسەكی باخڤی، پەیوەندییا تە ب وی كەسیڤە ھەمی سنور بەزاندبن. ئاخر ئەز نەشێم بێژم ئەو پەیوەندی بتنێ ھەڤالینی بوو، ژبەركو رۆژانە مرۆڤ ھەڤالێن نوی ناس دكەت، لێ جەمال چەلكی بۆ من برایەك بوو، من بەحسا وێ برایەتیێ ژی نینە، ئەوا ب خوینێ مرۆڤی دگەھینیتە ئێك، لێ ناسكرن ھینگێ دبیتە ھەڤالینی و ھەڤالینی ھینگێ دبیتە براینی، دەما مرۆڤ بەشداری خوشی و نەخوشیێن ئێك دبیت، مرۆڤ ھوردەكاریێن ژیانا ئێك بزانیت و مرۆڤی ئەو خیرەتە ھەبیت گوھدارییا ئێك بكەت و مرۆڤ ژ وێ گوھداریكرنێ بێزار نەبیت.

دەستپێكا ناسكرنا من بۆ ھەڤال جەمالی برێیا برایێ وی مەسعودی بوو، ھینگێ دڤییا شعرێن خوە لێكبدەت و بگەھینیتە چاپێ، ل نڤیسینەگەھا من ل رۆژناما چاڤدێر مە ھەڤدوو دیت و ئەم ل سەر شعرێن وی روونشتین، ئێكەم پەرتووكا وی یا شعری بوو بناڤێ (ئەتموسفەرێن دارێتنا ھزران) من پێشگوتنەك ژی بۆ نڤیسی، گەلەك كەیفا وی ب ھەڤالینیا من ھات، راستی بیت ئەو كەیف یا بێ بەرامبەر نەبوو، ژبەركو كەسەك نەشێت ھەڤالینیا كەسەكی بكەت ئەگەر یێ بەرامبەر ژی ھەمان ھەست بۆ نەبن، ئەڤ ھەڤالینیە بەردەوام بوو و نڤیسینان ئەم دگەھاندینە ئێك، نڤیسین بونە تەلەفون و تەلەفون بۆنە دەركەفتن و پێكڤە روونشتن و ھەر چالاكییا با یان من پەیوەندیا تەلەفونی بۆ دكر یان وی دكر و مە پێكڤە بەرێخوەدایێ و مە دكرە بابەتێ دان و ستاندنێن خوە.

من رێكخراوەكا كومەلگەھێ مەدەنی ھەبوو و ژ حەزكرنا وی بۆ كومەلگەھێ مەدەنی و خوبەخشیێ، مە پێكڤە رێكخراوەك بناڤێ راتێستا بو وی ژی دروست كر و مە دامەزراندن، چەندین كارێن رێكخراوەی مە یێن پێكڤە كرین و چەندین چالاكیێن رێكخراوەیی مە پێكڤە بەشدارییا بۆ كری، چ ل دھوكێ بن یان ھەولێرێ و یان ژی ل سلێمانیێ.

ئەز ناڤەشێرم ھەڤال جەمال چەلكی كارتێكرنەكا زور ل سەر من ھەبوو، كو ئەز دناڤ كارێن رێكخراوەی و یێن رەوشەنبیری دا یێ بەردەوام بم، بوچی؟ ژبەركو دوو تشتان ھەڤال جەمال ژ كەسێن دی جودادكر، كەسەك بوو مایێ خوە دكەسێن دیدا نەدكر و ھەر دەم یێ گەشبین بوو، كەسەك بوو باوەرناكەم ئێك كەس ھەبیت بێژیت دلێ من یێ ژێ مای یان ئەڤ تشتێ نە جوان لدەف ھەبوو و جھێ بێزاریێ بوو، تشتێ دوویێ یێ من زێدە حەژێدكر، كەسەك بوو ھەست ب ماندیبوونێ نەدكر، تایبەت بابەتێن گرێدایی پرسێن نەتەوایەتی بانە، ئەوی خوە دكێشایێ و بۆ خوە بگرنگ وەردگرتن، ئەرشیفێ وی ل فەیس بوكێ وێ شەھدەییێ بو ددەت، ئەو تشتێن وی دنڤیسین و بلاڤدكرن.

ئەز بەحسا كارێ وی یێ حزبی ناكەم، لێ رژدییا وی دكارێ ویدا و دلسوزییا وی بۆیە ئەڤرو ھەڤالێن وی بیرەوەرییا چل رۆژیا وی ساخ بكەن، ئەز باوەرم ژی چوونا وی دێ ڤالاتیەكا مەزن ئێخیتە ناڤ ھەڤالێن وی ژی و ئەو دێ زێدەتر ھەست پێكەن، ژبەركو نڤیسەرەكێ چالاك بوو و د ھەمی رۆژنامە و كوڤاراندا، چاڤدێرەكی سیاسی یێ چالاك بوو و داخویانیێن وی ھەمی د مەقبول بوون و ئەڤە ژی روویەك بۆ ژ بۆ مەلبەندێ دھوكێ یێ حزبا شیوعی یا كوردستانێ و زێدەباری كارێ وی یێ رەوشەنبیری.

تشتێ ئەز و ئەو پرانییا جاران دگەھاندینە ئێك، ھەڤالێ مە یێ سیێ بوو، كو وی گەلەك جاران دگوتێ پیرێ مە بەسە و ئەم ب ھەمی تشتان دگەل ئێك دگونجین، ئەو ژی ھەڤال سەعیدێ شەریف بوو. ل بەرییا ھزر ل ساخكرنا ڤان رێورەسمان ژی بھێتە كرنێ، ئەز و كاك سەعید ل سەرڤێ چەندێ ئاخفتین، كو فەرە چلیا وی بھێتە ساخكرن و خوشبەختانە ھەڤالێن وی یێ مەلبەندی بڤێ چەندێ رابوون، ھەر باش بوو بڤێ بیرەوەریێ و ددەمەكێ گەلەكێ كورتدا، وەك وەفایەك بۆ خەباتا وییا نڤیسینێ، ئەم شیاین ژ بەرھەمێن وی یێن بلاڤكری پەرتووكەكێ ئامادە بكەین و بگەھینینە چاپێ. كو دێ ل دووماھییا ڤان رێورەسمان دەست ب ئیمزاكرن و بلاڤكرنا وێ كەین.

لدووماھیێ و یا من نەڤێت چ جارەكێ ھزرێ تێدا بكەم و ئەز ژێ دڤەجنقم، دەما دزانم جەمال چەلكی یا وەغەر كری. رێكا تە یا ڤەكری بیت و رحا تە یا شاد بیت.

بۆ دەنگێ ئەمریكا ل سەر كوشتنا گەنجێ دھی ئەم ئاخفتین

 عبدالرحمن بامەرنی

ھەر چەندە من كێمتر ژ ئێك خولەك بۆ بەرچاڤێن كامیرێ ئاخفت، لێ باشە ئەز بكەمە گوتار و ببیتە مژارەك و ل سەر راوەستییان بۆ ھەبیت. ئەو ژی دھی ل دھوكێ گەنجەك ب دەستێ برایێ خوە ھاتیە كوشتن، ژبەركو رەگەزێ خوە گوھورییە. پێنەڤێت رەگەز گوھورین د كومەلگەھێ مەدا چ وەك داب و نەریت و چ وەك ئاین ژی، ب ھیچ رەنگەكی یێ رێگە پێدای نینە و ھەر نابیت سوحبەت ل سەر بھێتە كرنێ.

مە گوت داب و نەریت و ئاین، پێنەڤێت ژی ئاین ب سەر داب و نەریتان دكەڤیت و ئەو تشتێ ئاین قەبیل نەكەت، داب و نەریت ژی قەبیل ناكەن، لێ پرسیار، ل سەر دەمێ جاھلیەتێ چەند كەس ھەبوون كچێن خوە دكوشتن، ژبەركو باب و براییان شەرم دكرن، كەسەك كچێن وان بۆ خوە ببەت؟! پێنەڤێت چیرۆك د مشەنە و لێ دگەل ھاتنا ئیسلامێ، ئەو كەلتور ھاتە بنبرنكرن و كەسێ ئێدی كچێن خوە نەكوشتن.

من ئەڤ نمونە نەئینایە بێژم رێ بھێتەدان یان نەھێتە دان، لێ وەك زانستی دیاركری، ڤان كەسان ھرموونێن وان نزیكی یێن مێیینانە، ئایا ما باشتر نابیت، لیژنەكا ئاست بلند ھەبیت، ژ (كەسێن ئاینی و ماموستایێن زانكویێ و نوژدارێن تەندروستی و ڤەكولەرێن كومەلایەتی) ل سەر ڤێ كێشێ راوەستن و بگەھنە ھندەك چارەسەرییان، بەری قوربانیێن دێ ژی ددوفرا بھێن؟!!

ـــــــــــــــــــــــــــــــــــــــــــــــــــــــــ

http://www.rwangauraxna.com/ba/detail.aspx?IDNews=5381

— مع ‏‎Selam Balayi‎‏.

حكومەتێ ب كرێ بدەن؟!!!

عبدالرحمن بامەرنی

ئێكەم جار و بەری بێژنە من تە چاڤ ب حكومەتێ نارابن، چیرۆكا من دگەل كارەبا (عام) و پیڤەرێ ئاڤێ بزانن! رۆژ نیڤرو بوو و ئەو سەعەتەك بوو ئەز ھاتیمە مال، (7) جاران كارەبا (عام) چوو و پشتی چەند خولەكان داھێتەڤە و من تەلەفونا (صیانێ)كر، بۆ من (3) دەقیقا بابەتێ كارەبێ و پیڤەرێ زیرەك (شەرح)كر و ھیچ تشتەكی تێنەگەھشتم، ل دووماھیێ گوت: دبیت كارەبا تە یا دروست بیت لدویڤ ئەمپێرێن بۆتە دھێن، لێ دیارە كەسەك ل (محەلێ) دچیت (قاتعی) دئینتە خارێ و بلندكەتەڤە و پاشی پێشنیار دا من، كو بچمە رێڤەبەریا گشتی و ژ وێرێ (عەریزەكێ) بدەم و بچمە بەشێ سەخبێریێ، كو بھێن پیڤەرێ من یێ زیرەك ل مالێ ب پشكنن، كا یێ دروستە یان نە.

ئەوا ل سەری كێشا كارەبێ یە و دا بھێینە سەر بابەتێ پیڤەرێن زیرەك یێن ئاڤێ و نڤیسینا (عەریزێ). من پارێ ئاڤێ ھیچ جارەكێ گیرونەكریە و دەما گوتی پیڤەرێن ئاڤێ گرێدەن، ئەز ژ بەراھییان بووم یێن من پیڤەرەك ژ بازاری كری و من كەسەك ئینای پیڤەری ل سەر حەنەفییا (رەئیسی) گرێدەت. لێ یا من تێبینی كری، پارێ من یێ ھەیڤانە چەند قات یێ دھێت و راستی بیت، من ژی ئێدی پارە نەدا! تا رۆژەكێ ژمێریار(عەداد) ھاتی و مە ژێ پرسیار كری؟ گوت: مانێ خانیێ وە یێ كریە (تجاری)!.

ھەر چاوا بیت چوومە رێڤەبەرییا ئاڤێ و ژڤێ ژوورێ بۆ ژوورا دی و گوتە من عەریزەكێ بدە؟ درێژناكەم دوو رۆژێن دی ژی مامە ب مامەلێڤە و دوو رۆژان، اخوازا دەستوریێ و ھەر باش بوو من ترۆمبێل ھەی، ئەگەر دا پارێ تەكسیێ ژی چیتە سەر!!.

دا بزڤرمە سەر (ب كرێدانا حكومەتێ!!)، پێنەڤێت ژی كەس ڤێ گوتارا من(خەلەت) لێكنەدەت، ژبەركو بتنێ ئەز دێ چیرۆكەكێ ڤەگێرم و ئەو ژی ل سالێن حەفتیان ل ھەلكەفتەكێ، رۆژنامەنڤیسەكێ فەرەنسی پرسیارێ ژ (مەسعود محەمەد)ی دكەت: ئەگەر كورد بۆنە حكومەت، تو ژی كریە سەرۆك، دێ چاوان حكومەتێ برێڤەبەی؟

مەسعود محەمەد د بەرسڤێدا دبێژیت: من ناكەنە سەرۆك.... ئەگەر ئەڤە روودا ژی، دێ ماوێ (10) سالان وەلاتێ خوە ب كرێ دەم و ھەمی وەزیر و پەرلەمان و كاربەدەستێن حكومەتێ ژ وەلاتێن ئەسكەندەنافی ئینم، كو ئەو وەلاتی برێڤە ببەن و داھاتێ وەلاتی ژی كەمە (4) پشك، سێ پشك بۆ وان و پشكەك بتنێ بۆ مللەتێ من.

رۆژنامەنڤیس ب سەرسورمانیڤە دبێژیتێ: دێ بۆچی ڤێكەی؟!!

مەسعود محەمەد دبێژیت: ئاخر ئەز دزانم ئەگەر ئەم كورد وەلاتێ خوە برێڤە ببەین دێ چەند بەرەڤ وێرانیێ ڤە بەین! لێ ئەگەر دڤان دەھـ سالاندا ئەم وەلاتێ كوردستانێ ھەمیێ ژی بدەینێ، بتنێ دێ لبن دەستێ وان فێری حوكمداریێ و وەلات برێڤەبرنێ بین، ھێشتا ھەر ئەم مفادارین، ژبەركو وی دەمێ دێ فێربین چاوان وەلاتی برێڤەبەین.

ـــــــــــــــــــــــــــــــــــــــــــــــــــــــــــ

https://www.facebook.com/photo/?fbid=10216582272189605&set=g.209899095715001

http://www.rwangauraxna.com/ba/detail.aspx?IDNews=5377

ئەز جگارا ناكێشم..

 عبدالرحمن بامەرنی

من گەلەك چیرۆك دگەل جگارێ و كێشانا جگارێ ھەنە و لێ ل دووماھیێ، ئەز شییام ب ئێكجارێ جگاران بھێلم و ژخوە دوور بێخم. من كێشە دگەل جگارێ نەبوونە، سەرەرای د سەردەمانەكیدا ئەز ببومە ئێك ژ شارەزایێن تیتنێ، ئەگەر ژمن پرسیار بكەی ژی كا مفایێن جگارێ زێدەترن یان زیانێن وێ؟ بێ دوو دلی دێ بێژم، مفایێن وێ دێ زێدەتر بن و تایبەت بۆ كەسەكێ وەك من نڤیسەر بیت. ئاخر من چ دگەل خەلكێ دی ھەیە، ئەڤێن نەخوش و بۆچی بلا ئەو ژی ل بەر تەندروستییا خوە راوەستن.كابرا یێ دبێژیت، بھێلە جگارا ناكێشیت و ما ئەو چ ژ جگاران دزانیت، رك و رك ژی ئەڤ ئاخفتنە بۆ من یا ئاراستەكری بوو. ئێ باشە ئەز جگارا ناكێشم بەلێ بوچی ئەز چ ژجگارا نزانم؟! كا وەرە بۆ تە بەحسا خوە بكەم:
ل دەستپێكا سالێن نوتان بوو، ھینگێ من كەر دكانەك ھەبوو، تشتێن كێم تێڤە بوون و كارتونەكا تیتنێ ژی و دەفتەركەكا جگاران دگەل، ھەر كەسەكێ دھات و جگارەك ژێ تێكربا، ئێك دا بێژیت ئەڤ تیتنە یا نەرمە و ئێك دا بێژیت یا دژوارە و دچوونە دكانەكا دی. وی دەمی من جگارە دكێشان و من بۆ خوە گوت: تو بێژی ئەڤ جگاركێشە ھوو د شارەزانە كو جورێن تیتنێ ژێك ناس بكەن و من و ھەڤالەكێ خوە شەرتانێ كر. ئەو تیتن من كرە دوو كارتوونان و من بھایێ ئێكێ ژ یا دی گرانتر لێكر و ھەر كەسێ دھات ژ ھەرودوویان دكێشا و یا ئەرزان بجھـ دھێلا و یا گران دكری.
چەند مللەتەكێ سەیر بوو و درێژناكەم د دوو سالێن من ل بەر وێ دكانێ، ئەز بوومە (خەبیرێ) تیتنا خوش و یا نەخوش و گەلەكان كیسكێ خوە دھاڤێتە بەر من، تایبەت ھەكە بۆ كەسەكی تیتن ژ جھەكی ھاتبا، دئینا نیشا من ددا و من ب شارەزایا خوە جگارە ژێ تێدكر و من دگوتێ یا خوشە یا نە. ئەز خەبیر بووم و براستی ژی دوان سالاندا ئەز ئێك ژ شارەزاترین كەس بووم بۆ دیاركرنا تیتنا خوش و یا نەخوش، ھەر چنەبیت ل گوندێ لێ ژ دایكبوویم.
ھەر چاوا بیت من ئەڤە بۆ گوت و من گوتێ من جگارە ھێلان. كابرای ب سەیرڤە گوت: ئەڤە من دوو جاران جگارە ھێلان و ئەز یێ لێ زڤریمە ڤە و پاتە چاوان ھێلان؟ من گوتێ: رۆژەكێ من گوت ئەز ناكێشم و من جگارێن پاكیتا خوە ل سەر ھەڤالان بلاڤكرن و من بریاردا، ئەز جگاران نەكێشم و تا نوكە ژی ئەز ناكێشم و بتنێ بریارەك بۆ دڤێت و نە زێدەتر و تو ژی دشێی وەبكەی؟!!

ـــــــــــــــــــــــــــــــــــــــــــــــ

https://www.facebook.com/photo/?fbid=10216578833623643&set=g.209899095715001

http://www.rwangauraxna.com/ba/detail.aspx?IDNews=5371

بەرھەم یان ھشیار؟!!

 عبدالرحمن بامەرنی

چ بەرھەم بیت یان ھشیار بیت! وە راستی بڤێت ل ھەرێما كوردستانێ، ئەم پێدڤی ھەردووكاینە و نە ئەم مللەتەكێ ھشیارین ل سەر دەستكەفتێن خوە و نە ژی ئەم مللەتەكێ بەرھەمدارین و بشێین مفای ژ ئەوا مە ھەی وەربگرین.

ئەز بەحسا ھەردوو بەرێزان ناكەم، ژخوە ھەردووكان پێگەیێ خوە یێ سیاسی دناڤ حزبێن خوەدا ھەیە و ھەردوو حزب پشتەڤانیێ بۆ دكەن و یێ شەرێ سار بۆ دكەن، ژبلی كو ھەردووكان سەربورا دەستھەلاتێ ھەیە دناڤ حكومەتا عیراقێ دا و ئەڤە ھەمی بابەتێ من نینە و ئەز خوە ل تێلێ نادەم، یا من دڤێت بتنێ ئەز نمونەكا گەلەك بچووك بینم و ب بابەتێ خوە ڤە گرێدەم، كو ژ رێكەفت ناڤێ ھەردوو بەرێزان ھەلگرێ نیڤشكێ بابەتێ منن، یێ من دڤێت ژێ بەحس بكەم، ئەو ژی بەرھەمداری و ھشیاری.

بابێ من رەحمەت لێ بیت، سەرھاتیەك ڤەدگێرا و دگوت: "خوینداری كەفتە دناڤبەرا دوو گونداندا و ل بەر ئێك راوەستان، ل گوندەكی چەند كەسێن عاقلمەند دگەل ئێك روونشتن و بریاردان كەسەكی ب دزیكیڤە فرێكەنە گوندێ دیتر بۆ سەح و سییان، ئەگەر خەلكێ وی گوندی مژوولی جوت و جوتیاریێ بن و پەز و حێوانان و كەسەكی ژوان گوت داسكا من یا نەخوشە و ئێكی گوت دەستكێ مەربێلێ یێ شكەستی و ئێكی بەحسا ئالفێ حێوانی كر، ئەم دێ ب سەردا گرین و تولێن خوە ژێڤەكەین، ژخوە ئەگەر قەسەو سوحبەتێن وان ل سەر چەك و سیلەحی بن، ئێكی بەحسا فیشەكا كر و خەنجەرێ و ئاخفتنا وان ل سەر تولڤەكرنێ و بەرگریێ و شەری بیت، ئەم دێ چین داخازا سولحێ ژێكەین". ئاخ بابێ من تو چەندێ مەزن بووی بڤان سەرھاتییان، خودێ بێژێ وی ھینگێ دزانی دێ حزبێن مە ھەمان كێشە ھەبیت؟!!

ئێ راستی ژی بیت د ئەڤروییا مەدا و بێ بەرھەمییا مە ل ھەرێما كوردستانێ، قەیران یا دبێژیتە قەیرانێ جھێ من بكە و ژ نەھشیارییا مە ل سەردەستكەفتنێن مە دگەل عیراقێ، ئەڤا ددەستورێ عیراقێ دا لبن فشارا ئەمریكا و ھەڤپەیمانیێن وێ بۆ مە ھاتیە نڤیسین ژی، لبیرا وە بیت بڤی دەست و داری و ژبێ تفاقییا مە، دێ برگەیێن وێ ھێنە گوھورین و ئەم بتنێ دێ تەماشەڤان بین!!

ــــــــــــــــــــــــــــــــــــــــــــ

https://www.facebook.com/photo/?fbid=10216568641608849&set=g.209899095715001

http://www.rwangauraxna.com/ba/detail.aspx?IDNews=5356

د سالیادا دوێ یا (روانگە و رەخنە)دا مە رەخنەبكەن

 عبدالرحمن بامەرنی

ئەڤرو 23/1/2022، دێ دوو سال ل سەر دەستبكاربوونا مە د مالپەرێ روانگە و رەخنەدا دەربازبن، ئەكید مالپەرێ روانگە و رەخنە ژ لایەنەكیڤە دھێتە پالپشتیكرن، لێ پرسیار، ئایا ئەم شیاینە بكەینە مالپەرەك دەربرینێ ژ ھەمی تەخ و چینان بكەت، بێی جوداھییا سیاسی و ئاینی و پێكھاتەیی، كو ھەمی خوە تێدا ببینن و رەنگڤەدانا چ حزب و لایەنان ل سەر نەبیت؟!! ئینانا ڤێ پرسیارێ ژی ددەمەكیدایە، كو ئەڤە بۆ ماوێ سێ رۆژانە مە راپرسییەك د مالپەریدا دانایە و ئەنجامێن ل بەرچاڤ لدویڤ پرسیارا مە تا دەمژمێر (11:00)، بڤی رەنگی بوینە:

(رۆژا 2022/1/23 دێ بنە دوو سال ل سەر دەستبكاربوونا مە د مالپەرێ (روانگە و رەخنە)دا، تو سەربەخویا مە د مالپەریدا چاوان د ھەلسەنگینی؟) و بەرسڤ بڤی رەنگێ بوونە:

ـ گەلەك باش (شیایە سەربەخویا خوە ب پارێزیت).. (214).

ـ تا راددەیەكی (شیایە سەربەخویا خوە ب پارێزیت).. (156).

ـ نەخێر (نەشیایە سەربەخویا خوە ب پارێزیت).. (33).

سەرەرای كو ئەڤ راپرسییە تا دەمێ بلاڤكرنا ڤێ گوتارێ كەتیە بەرچاڤێن 2912 كەسان، لێ رێژا بەشداربوونێ بتنێ 403 كەس بووینە، لڤێرە دوو بابەت خوە دئیننە پێش، سەرەرای ھەمی ئاستەنگییان، لێ مە مالپەرێ (روانگە و رەخنە) كرییە دەرگەھەك بۆ رەخنەگرتنێ و دگەل بەرچاڤگرتنا ھندەك یاسا و رێسایان، كو نابیت نڤیسین (ناڤزراندن، سەرخستنا حزبەكێ و پرۆپاكندە بۆ حزبەكێ ل سەر حسابا حزبەكا دی بیت، بابەتێن ئاینی و راگرتنا پیروزیێن ھەمی ئاین و پێكھاتەیان)، جوداتر ژڤێ ژی، ھەر بابەتێ ھاتیە بەردەستێ مە و بێ جوداھی مە بلاڤكریە. خالا دییا من دڤێت بینمە زمان، ئەو ژی مە درووشمەك بلاڤكریە (دوورخستنا میدیا و سوشیال میدیایێ ژ ناڤزراندن و كەرب و كینێ)، كو ئەڤە بەشێ ھەرە ب زەحمەتێ مەبوو د مالپەریدا و ئەو سڤكاتی و بێرێزییا ژ لایێ خواندەڤانیڤە بۆ نڤیسەران دھاتن.

یا من دڤێت بێژم، روانگە و رەخنە دەرگەھەكە و چاوان مە ھەولدایە ئەڤ دەرگەھە بۆ ھەمیان یێ ڤەكری بیت و ھەمی دیتن و نڤیسینێن خوە یێن رەخنەی تێدا بلاڤبكەن، دا پێكڤە ڤی كاری بكەین و فشاران ل سەر لایەنێن پەیوەندیدار دروست بكەین، ئەو ژی ب لایك و كومێنتێن خوە و بلا بەس بیت رۆژانە گازندێن مە و پت و پت و نە رازیبوونێن مە، ئەم دشێین ڤێ بكەین؟ بەلێ ئەم دشێین بكەین.

خالا جوداتر سەبارەت ھندەك بابەتان، مەرج نینە ھەردەم ئەو تشتێ دھێتە بلاڤكرن یێ راست و دروست بیت. لێ پرسیار، ئەو بابەتێ دھێتە ئازراندن، دەربرینێ ژ خودانێ نڤیسینێ بتنێ دكەت یان رێژەكا دییا خەلكی ھەنە، ھەمان ھزر دكەن؟ ئھا مەبەستا مە ئەوە، ئەم شاشییان راستڤەبكەین و خەلك فێر بیت ئەو بخوە راستی و شاشییان ژ ئێك جودا بكەت و دڤێت تێبگەھین، ھەتا ئەم خوە رەخنە نەكەین، ئەم نەشێین خوە سەر راست بكەین و ئەڤە ب كەسەكی بتنێڤە دروست نابیت، بەلكو ئەم ھەمی یێ د پاپورەكێدا و چەند شلق ب ئاڤێ بكەڤن، دێ مەترسی ل سەر ھەمییان وەك ھەڤ ھەبیت و چەند دەرییا یا ئارام بیت، ژیانا ھەمیان دێ یا خوش بیت و یا ب سەلامەت بیت.

بوویە تایبەت دڤێ رۆژێدا، ئەم پێدڤی ھەر كومێنتەكا رەخنەیینە كو پلانا خوە یا سالا بھێت ل سەر دارێژین، دبیت كومێنتا تە پالەك بیت بۆ ژ جھبرنا مەزنترین دیوار ل بەرامبەری گەندەلیێ، خوە ئەو پالڤەدان چەند یا بچویك ژی بیت..

راپرسی:

https://www.facebook.com/.../rwan.../posts/5106980536006808/

ــــــــــــــــــــــــــــــــــــــــــــــــــــــــــــــــــــــــــــــــــــ

https://www.facebook.com/photo/?fbid=10216553055659210&set=g.209899095715001

لینكێ گوتارێ ل سەر سایتێ روانگە و رەخنە

http://www.rwangauraxna.com/ba/detail.aspx?IDNews=5331

ئێك ژ ژنان بەسە*

نەوال سەعداوى

وەرگێران: ع. بامەرنی

دەیكا من هەولددا ئەز بامیا هەرشاندى و ملوخیێ لدویڤ وێ رێكێ ب كەلینم، یا بابێ من حەژێدكەت. بابێ من ژى چ جورێن بامیێ و ملۆخیێ ناخوت، ئەگەر لدویڤ رێكا دەیكا وى یا گوندى نەبن. دێ دفنا خوە كەتە د سێنیێ دا و دێ بێهنا زارۆكینیا خوە و دایكا خوە ژێ هلكێشیت و هەر گاڤا ئەو بێهنە ژى ژ وێ خارنێ نە دیت، بێهنا وى تەنگ دبیت. دەیكا من كچا باژێران، ژ مالباتەكا رەوشەنبیر و چوویە خاندنا فەرەنسى، هەمى خەونێن وێ ژى ئەو بوون، دەرمانەكێ نوى وەك یێ (خاتین كیورى) ئاشكەرا بكەت..

ئەز دناڤبەرا دوو تەبەقێن هەڤدژدا دژیام، دگەلدا ژى، ئەو كەلتۆرێ ب هزاران سالان هاتیە ڤەگوهاستن، هەڤدژیا ئەز ژێ بەحس دكەم یا دناڤبەرا عەقلێ ژنان و لەشێ وێ و مەزنترین ئەدیبێن رۆژئاڤاى و رۆژهەلاتى نڤیسى نە، كو مێیاتیا ژنان عەقلێ وان بەرزە دكەت. (تەوفیق حەكیم) ژى ئێك ژ مەزنترین ئەدیبێن مسرێ كو بدژایەتیا ژنان هاتیە ناسكرن، بەلێ دانپێدانێ دكەت، كو ئەو حەز ژ ژنا جوان دكەت بەس نە عەقلێ وێ، دیسان گوتییە ژن گەلەك كرێت دبیت دەما كارێ سیاسەتێ دكەت یان ژى فەلسەفێ یان ژى نڤیسینێ، گوتییە ژى، كو زەلامێ گەمژە ئەوە یێ ژنەكا تێر عاقل بینیت، نڤیسینێن دلئێشن یان هەر ژنەكا تێرعەقل بیت و هزرێ ل خارنا بامیێ و ملوخیێ نەكەت.

نڤیسەرێن جیهانى یێن ژن، ژیانەكا تەحل برینە سەر، كو هندەك جاران بەرەڤ مرنێ و خوە كوشتنێ ڤە دبرن، هەر وەكى ب سەرێ (فیرجینیا و سیلیڤیا بلاس) یا ئەمریكى و (ئەروا سالح) یا مسرى هاتین. ژبەر ڤێ ژى نڤیسەرا ژن خوە ب گەمژەیێ دەردئێخیت، دا بشێت كارێ خوە و هەڤژینێ خوە ب پارێزیت، ژنا نڤیسەر خوە ژ بابەتێن ل سەر ژنان دویر دئێخیت دا رازەمەندیا سەروك و كاربەدەستان بدەست ڤە بینیت، بتایبەتى دەما هێزا ئیخوانان و حزبێن سەلەفى یا خورت بیت.

ئێك ژ هەڤالێن من نڤیسەرەكا بەهرەمەند بوو، بیرهاتنێن خوە بەرى دوو سالان بلاڤكرن، هیچ بەحسێ دلئێشیێن خوە نەكر ئەڤێن دگەل دەستهەلاتا بابێ خوەدا دیتین یان ئەو خرابیا زەلامێ وێ ب سەرێ وێ و سێ كچێن وێ دا ئیناین، كو ئەو و هەر سێ كچێن وێ هێلاین و چویى ژنەكا دى ئیناى و كورەك ژێ بوى، دا ناڤێ وى و خێزانا وى هەلگریت. ڤێ نڤیسەرێ دڤان بیرهانێن خوە دا بەحسێ بیرهاتنێن ئەڤێن دى دكر، ئێك پیت ژى بەحسا خو نەبوو. بەحسێ رەخنەگرێن ئەدەبێ زەلامكى دكر، بەحسێ شورەشێن مروڤایەتى یێن بلند دكر، ژیان، ئازادى، دادى. رەخنە ل نوخبەیا مسرى دگرت، كو زوى ژ عەهدەكى بو ئێكێ دى دهێنە گوهورین و نڤیسینا بابەتێن كویر، هەڤركیا دژى گەندەلیێ و چەوساندنێ، بەحسێ زارۆكینیا خوش ل سەر لێڤێن دەریایێ دكر، وان خەلاتێن ئەدەبى یێن دەولەتێ پێشكێشى وێ كرین، گورەپانا ئازادى كو گەلەك خوینا شورەشگێران هاتیە رێتن، شەهیدى ئەڤێ مرى و دكریە گازى بژیت مسر و فەلەستین و عیراق و بەحسێ قارەمانیا بابێ خوە ل شەرێ فەلەستین دكر. نڤیسینێن وێ خوە دناڤا 350ى لاپەران دا بوون و ئێك پیت ژى ل سەر دەیكا خوە نە نڤیسا بوو، كو بتنێ د ژووەركا تارى ڤە لدەف (سەیدا زەینەب) وەغەرا دوماهیێ كرى.

نڤیسەرەكا دى یا مسرى یا پێشكەفتى ل گورەپانا سیاسى یا شورەشگێرى، گەشتەك بۆ كونگرەكێ ئەدەبى ل فەرەنسا كر، دا ئاریشا نڤیسەرێن ژن ل بن سیبەرا رژێما باب سالاریێدا بەحس بكەت، پشتى زڤرى یە ڤە ژى، كو گۆتارەكا درێژ بلاڤكر، ئێك پەیڤ ژى بەحسا بابەتێ كونگرەى نەكر، بەلكو بەحسێ دارشتنا خەریبیێ ژ خێزانێ و وەلاتێ خوە دكر، هەر چەندە بتنێ ئێك حەفتى ژ مسرێ دویر كەتبوو، ل جاددێن (شانزلى) یێن فرەهـ و سیبەرا داران پیاسەدكر و خەریبیێن كولانا خوە ل تاخێ بولاق دكر، كو برایێ وێ لێ خو پیشاندان دكر بەرى ب گولەیەكێ گیانێ خوە ژ دەست بدەت، خوینا ب قێرى ڤە و بێهنا گلێشى و دەنگێ مایكروفونا ل مناران هەمبێزا جەرەسێن دێران دكر، بێهنا ژ كەبابێن بژارتى دفرى، بێهنا بخیرێن (حەج متوەلى) كو تەوافا سەیدێ مە حسەین دكرن، دەعامیێن ترومبێلا و میكروپاسان و لاڤێن خازوكان، نڤیسینێن ل سەر دیواران، كو هەمیان بەحسا شورەشێ و بەرخوەدانێ دكرن و ئەڤە هەمى ژى دجوان بوون، لێ ئێك پەیڤ ژى ل سەر كونگرەى نە نڤیسى، كو ژ بەر وى گەشت كر بوو، كو ئاریشێن ژنان ژ لایێ نڤیسەرێن ژن ل بەر سیستەمێ باب سالارى، دان و ستاندن ل سەر دهاتنە كرنێ.

ئەو بخوە ژى ئێك ژوان بوو، كو مافێن وێ ژلایێ دەیبابێن وێ ڤە هاتینە خارن، دەما شوو ب وى كەسى نە كرى یێ بابێ وێ بوو هەلبژارتى و پاشى شوو ب هەڤالەكێ خوە كرى ل دامەزراوێ، كو پشتى شیكرنێ زانى ئەو نزانیت بامیێ و ملوخیێ لدویڤ لێنانا دەیكا وى دروست بكەت و وێ زێدەتر حەز ل سەر نڤیسینێ هەیە ژ لێنانێ، كو سێ جاران هاتیە تەلاقدان. چاوان زەلامێن (بولاق) بڤێ چەندێ رادبن و ژ نشكەكێ ڤە من ل سەر رێكا خوە دیت، گوت ئەز ژ گوتنێن (تەوفیق ئەلحەكیم) پشت راست بووم، من گوتێ تە بوچى ل سەر كونگرەى چ نە نڤیسى؟ گوتە من ما تو عەقلیەتا سەروكێ پارتێ نزانى ئەڤا ئەز دگەلدا؟ عەقلیەتا سەرنڤیسكارێ ئەز لدەف وى دنڤیسم؟ ما پێدڤى دكەت خو تووشى وى تشتى بكەم یێ تو تووش بویێ؟ بتنێ كەسەك بەسە پێش مە هەمیان ڤە بهێتە سزادان.

*حوار المتدمن، نوال السعداوى، واحدە من النساء تكفى، 2013.

ـــــــــــــــــــــــــــــــــــــــــــــــــــــــــ

https://www.facebook.com/photo/?fbid=10216496956056755&set=g.209899095715001

http://www.rwangauraxna.com/ba/detail.aspx?IDNews=5241

تعديل

٩٤أنت، Segvan Ertisi، Qirin Ico و٩١ شخصًا آخر

٩ تعليقات

مشاركة واحدة

أعجبني

تعليق

مشاركة

رۆژەكێ ل توركییا؟!!

 عبدالرحمن بامەرنی

ئەز دێ ژ نەخوشیەكا خوە بابەتێ خوە نڤیسم، بۆ چەندین سالان من ھەست ب نەخوشییا ھەودانا گەریێ و بەلاعینا دكر، پرانییا نوژدارێن تایبەتمەندێن دھوكێ یێن دفنێ و گەریێ من سەرەدانا وان یا كری، زێدەتر وانان ژی دگوت بەلاعینن و لدووماھیێ ئەز وەستییام و من بخوە بێ راجێتا نوژداری، سەرەدانا دەرمانخانان دكر و من حەب وەردگرتن، لێ پرانییا جاران ژی وان حەبان مفا نەدگەھاندە من.

درێژ ناكەم رۆژەكێ من بریاردا ئەز قەستا نوژدارەكی بكەم و لدھوكێ یێ بەرنیاس نەبیت. ئەو بوو ل بەرامبەری دولار سەنتەر، نوژدارەكێ ناڤێ سیێ ئوسێ بوو و من بۆ خوە گوت ل دھوكێ ئەڤ نوژدارە نینن. من سەرەدان بۆ كر و پشتی پرس و بەرسڤان و كا ئەز چ كاری دكەم (چەندین سالان سەعەتچی و نڤیسەر)، گوتە من ھەرە (تیشكەكێ) بۆ ستویێ خوە بگرە. دەما من نیشادای، گوتە من (فەقەر)ەكا ستوویێ تە كێشەكا بچیك یا تێدا و دەما سار دبیت د ئێشیت.

ئەز دێ كورت ڤەبرم پشتی من چارەسەری خاری، چوومە نەخوشخانەكا حكومی و نوژداری گوتە من تە خێرە، من گوتێ من چ كێشە نینن و من كێشا خوە نوژدارێن دھوكێ بۆ گوت و من گوتێ ئەز سەرەدانا كلینكیا چ نوژدار بكەم؟!!

مەبەستا من ژڤێ ڤەگێرانێ، پرانییا نوژدارێن مە، دەما نەخوش سەرەدانێ بۆ بكەت، نابێژیتێ ئەڤە تایبەتمەندییا من نینە و دێ دەست ب دانا دەرمانان كەت و پارێن خوە وەرگریت، خوە ل كومەلگەھێن مە ژی ھوسانە، مرۆڤ نزانیت دێ چاوان سەرەدانا نوژدارێ دروست كەت!

من گوت رۆژەكێ ل توركییا! ئەز دگەل نەخوشەكی چوومە توركییا بۆ چارەسەریێ، ل كومەلگەھا مە قەست كریێ، ئێكەم جار ئەم چووینە دەف نوژدارەكێ، پشتی مە نیشانێن نەخوشیێ گوتینێ، وی شنی بەرێ مەدا نوژدارێ گرێدان ب نەخوشیێ ڤە ھەی و ئەگەر ل دھوكێ ژی و تایبەت كومەلگەھێن مە یێن نوژداری (كو من بخوە نەدیتە ئەگەر ھەبن ژی)، تشتەكێ ھوسان ھەبیت، بەری نەخوش بكەڤیتە دەستێ نوژداران و بەریكێن وی بھێنە ڤەچراندن و تژی (مەعیدا) وی گێچێ نەدروست بكەن، ما باشتر نینە ئەگەر نوژدارەكێ شیرەتكار بتنێ بۆ ڤان شیرەتان ھەبیت و خوە ئەگەر تشتەكێ كێم ژلایێ كومەلگەھا نوژداری ڤە بۆ بھێتە خەرجكرن ژی؟!!

ئەڤە ژبلی ئەڤ پارێ دەردكەڤیتە ژ دەرڤە و زەحمەتییا نەخوش دبەت تا دچیتە ئیرانێ و توركییا...

ــــــــــــــــــــــــــــــــــــــــــــــــــــــــــــــــــــــــــــ

https://www.facebook.com/photo/?fbid=10216491664164461&set=g.209899095715001

http://www.rwangauraxna.com/ba/detail.aspx?IDNews=5234