جاك خوە بگرە چ نەمایە دێ گاز ھێت؟!!

 عبدالرحمن بامەرنی

ئەڤ دەربرینە ل سەر وێنەیەكێ (جاك و رووز) ژ فلمێ (تایتانیك) ھاتبوو نڤیسین و ل فەیس بوكێ ھەڤال (بژار محەمەد)، ب بەرچاڤێن من كەفتبوو. وێنە روودانا غەرقینا پاپورا تایتانیك پیشانددەت و دەما (جاك) دناڤ ئاڤا بەفرگرتییا دەریایێ دا و (رووز) دل ددلێ وی ددەت، كو بەرگریێ بۆ چێكەت و لدووماھیێ (جاك) دناڤ ئاڤا دەریایێ دا دبیتە بەستی.

وێنە ب سەرێ خوە و بەری چ جاكێن دی ببنە گەرەوا حكومەتا ھەرێما كوردستانێ، من گوت (حكومەتا ھەرێما كوردستانێ.. ئەڤە بخوە بەراوردكرنەكە بۆ نە سەركەفتنا حكومەتا مە بەرامبەر یارییا دگەل حكومەتا عیراقێ، كو وان چ كێشێن نە یێن بلاڤكرنا گازا سپی و نە ژی یێن غاز و پەنزینا نینن، ئەگەر ھەبن ژی، دێ ب ئاسانی و ب بەھایەكێ ئەرزان بدەست كەڤن) و بەری چ قوربانیێن دی و چ روودانێن دی یێن ناخ ھەژین دروست ببن، وەك ئەوا ڤان رۆژان ل ئێك ژ گوندێن سەر ب قەزا ئاكرێ روودای و تێدا دایكەك و 4 زارۆكێن وێ بووینە قوربانی و بەری ھەبن خوە بدەنە رەخێ حكومەتێ و گوتارا من كومێنت رێژ بكەن!

دبێژم پیچەكێ ھەرنە ناڤا تاخێن ھەژارا و بزانن ئەڤ خێزانە ژ نەبوونا كارەبێ و نەبوونا گازا سپی د چ رەوش دا دنالن! دا بیرا خواندەڤایێ خوە ل گوتنەكێ بینین، دەما دبێژیت: (كاپتنێ زیرەك ئەوە یێ بشێت پاپورا خوە ب سەلامەتی بگەھینیتە كەراڤێن دەریای) و حكومەتا زیرەك ژی ئەوە، یا بشێت خوشگوزەرانیێ بۆ ھاولاتیێ خوە پەیدا بكەت.

ـــــــــــــــــــــــــــــــــــــــــــــــــــــــــــ

https://www.facebook.com/groups/rwangeurexne/posts/5024206880950841/

http://www.rwangauraxna.com/ba/detail.aspx?IDNews=5183

چیرۆكێن سەركەفتنێ تایبەتە بۆ (ماموستایان)

 ع. بامەرنی

ماموستایەك ژ قوتابخانەیەكێ ھاتە ڤەگوھاستن و ماموستایەكێ دی ھاتە جھێ وی و د پولێدا، پسیارەك ژ قوتابیەكی كر، بەری قوتابی بەرسڤێ بزانیت یان نەزانیت، قوتابیێن پولێ ھەمییان كرنە كەنی. لێ ژ سەربورا ڤی ماموستای و بەرێخوەدانا وی بۆ چاڤێن قوتابیێن دی، زانی كو ئەو ھزردكەن ئەڤە قوتابیەكێ گەمژەیە و ھیچ تشتەكی نزانیت.

وانە ب دووماھی ھات و ماموستای گازی وی قوتابی كر و بتنێ دگەل ئاخفت و بەیتەكا شعری ل سەر كاغەزەكێ نڤیسی و گوتێ بۆ سوبەھی ژبەر بكە، وەك تو چاوان ناڤێ خوە ژبەر دكەی و ھشیار بی ڤێ نھێنیێ نەبێژییە كەسەكێ دی.

رۆژا پاشتر دناڤ پولێدا ماموستای ھەمان بەیت ل سەر تەختە رەشی نڤیسی و پشتی شروڤەكرنەكا كورت، ئەو بەیت ژبەرچاڤێن قوتابیێن دی رەشكر و گوتە قوتابییان، كی دێ شێت وێ بەیتێ بۆ من ژبەر بێژیت؟

كەسێ دەستێ خوە بلندنەكر، ژبلی وی قوتابی و گوتێ رابە وێ بەیتێ بێژە.

قوتابی ل بەر چاڤێن ماموستای و ھەمی قوتابیێن د پولێدا ئەو بەیتا شعری خواند و ماموستای دەست خوشی لێكر و گوتە قوتابییان، ھین ھەمی دەستان بۆ ب قوتن.

ڤی ماموستای ئەڤ چەندا ھەنێ بۆ ماوێ حەفتیەكێ ھەر دوبارە دكر و ھەر جار ماموستای پرسیار ژ ھەمی قوتابییان دكر، لێ ئەوی قوتابی بتنێ دەستێ خوە بلند دكر و قوتابیێن دی ھەمیان دەست بۆ د قوتان.

ئێدی باوەریەك بۆ قوتابی دروست بوو و گیانێ ھەڤركیێ لدەف دروست بوو و پشت بەستن ل سەر خوە بتنێ كر، دەمێ ئەزموونان نێزیك بوو و وی قوتابی گەلەك خواند و سەركەفتنەكا باش ئینا و چوو قوناغا ناڤەندی و زێدەتر باوەری بۆ دروست بوو و چوو زانكویێ و ماستەر بدەست ڤە ئینا و نوكە یێ دكتورایێ دخوینیت.

ئەڤ چیرۆكا نوكە ھین دخوینن، وی قوتابی بخوە نڤیسییە و ل ئێك ژ رۆژنامان بلاڤكریە و بتنێ من وەرگێرایە سەر زمانێ كوردیێ و لدووماھییا چیرۆكا سەركەفتنا خوە، لاڤەیێن خێرێ و دەست خوشیێ ل ماموستایێ خوە دكەت، كو ئەو بۆیە ئەگەر تا باوەری ب خوەبوونا وی بۆ خوە بزڤریت.

*ڤەگوھاستیە.

ــــــــــــــــــــــــــــــــــــــــــــ

https://www.facebook.com/groups/rwangeurexne/posts/5008529009185295/

http://www.rwangauraxna.com/ba/detail.aspx?IDNews=5160

پا ئەز حەز ژ (سەروكێ حكومەتێ) ناكەم!!

 عبدالرحمن بامەرنی

ئەز دا نڤیسم ئەز حەز ژ سەروكێ حكومەتێ ناكەم، ژبەركو نە ژ حزبا منە؟ لێ دا مانشێتێ نڤیسینا من درێژ بیت و من كورت ڤەبری و پێدڤی چ ھێڤە و وێڤەیا ناكەت، ژبەركو ئەز كوردم و سروشتێ مە كوردان یێ ھوسانە، دەما ئەم حەز ژ كەسەكی نەكەین، خوە ئەم حەز ژ دیكل و مریشكێن وان ژی ناكەین.

دێ ئێكسەر چمە ناڤ بابەتێ خوە، ئەو ژی چەند جاران من گوتارێن دكتورە نەوال سەعداوی كرینە كوردی و من د (روانگە و رەخنە)دا بلاڤكرینە، ناڤەرۆكا وان گوتاران ژی تشتێ جوان بوو و ل سەر ژیانا كوملگەھی یا رۆژانە بوو و ئەز وەك خواندەڤانەك، ھەر تشتێ ئەز دبینم نزیكی كومەلگەھێ مە بیت یان یێ جوان بیت، ئەز حەزدكەم بخوینم و جارنا حەزدكەم كەسێن دی ژی بخوینن، ھەر وەك بابەتێ مەریوان ھەلەبچەیی من بلاڤكری، كو زێدەتر نزیكی تێكستەكێ ئەدەبی بوو، لێ پەیامەك بوو، ژ بۆ گەلەك كەسان ئەڤێن ھەستا نەتەوایەتی لدەف كێم و بتنێ ل دەلیڤە و پارییان دگەرن و بابەتێ وی، نە نزیك و نە دوویر چ گرێدان ب حیجابێ ڤە نینە.

دا بزڤرم بابەتێ خوە و مانشێتێ من بۆ ڤێ نڤیسینێ ئینای، ئایا ئەز مامەلێ دگەل سەروكێ حكومەتێ بكەم و بریارێن خوە ل سەر وی بدەم كا سەر ب چ حزب ڤەیە و كورێ كێییە و چ عەشیرە یان ئەز بریارێن خوە ل سەر حكومەتا وی بدەم وەك ئەرك و ماف، دوویر ژ وی و كەساتییا وی و كا ئەو چ ھزر بكەت؟ ھەمان تشت بۆ (د. نەوال سەعداوی و مەریوان حەلەبچەی) و ھەر كەسەكێ دی، ئایا ژبەركو تێبینی ل سەر وان، ژبەركو فكرا وان دژی ئیسلامێ یە؟ ئایا ئەگەر تشتەكێ جوانێ وان ب بەرچاڤێن من كەفت، نەخوینم، ژبەركو فكرا وان نە دگەل منە؟!

باشە ھەمان پرسیار بەلێ ب رەنگەكێ دی، ئایا ژبەركو ئەوێ ڤاكسینا كورۆنایێ دروستكری، فكر كافرە و نە موسلمانە، ئەز ڤاكسینێ نەدانم؟ ھەمان پرسیار جارەكا دی بۆ دروستكرنا كارەبێ و بۆ ترومبێلێ ئەڤا لێ سیار دبم و لیستە یا درێژە ژڤان پرسیاران و دا ژبیرنەكەم ژی، د نڤیسنێ و رەخنە گرتنێدا ئەم مامەلێ دگەل تێكستی دكەین و نڤیسەر لدەف مە نە گرنگە و ئھا ئەڤە یا دروستە؟!!!

ـــــــــــــــــــــــــــــــــــــــــــــــــــــــــــــــــــ

https://www.facebook.com/groups/rwangeurexne/posts/4943891865649010/
http://rwangauraxna.com/ba/detail.aspx?IDNews=5091

ئەم پێدڤی دروستكرنا شاكارێن ئەدەبینە؟!!

 عبدالرحمن بامەرنی

شاكار وەك زاراڤ بۆ كارێن گەلەك باش و جوان دھێت و مەبەستا من ژی، ئەز پێ بەحسا ئێك ژ كارێن جوان بكەم و ئەگەر زێدەتر بەحس بكەم، بەرییا چەند سالان بوو من رۆمانا (عومەر دەوران) یا ب ناڤێ (سیتاڤا تاریێ) خواند، كو ژ لایێ رێڤەبەرییا چاپ و بالاڤكرنێڤە ھاتبوو چاپكرن و (ھزرڤانی) ژ لاتینیێ ڤەگوھساتبوو پیتێن ئارامی و ئەو بۆ من ئێك ژوان رۆمانان بوو، كو من حەژ خواندنا وێ كری و رەھوانبێژی و زمان و روودان و سەرھاتییا رۆمانێ تێرا وێ چەندێ ھەبوون، ئەز نڤیسینەكا رەخنەیی ژی ل سەر بنڤیسم و بلاڤبكەم، ئەڤە بخوە پرۆژێ من یێ نڤیسینێ یە ل سەر رۆمانا دەڤەرا بادینان و ئەگەر نەچیتە دبن بوارێ پەسنێدا، تا نوكە من ل سەر 24 رۆمانێن دەڤەرا بادینان نڤیسین ھەنە و تا دەرگەھەكێ چاپكرنێ بۆ ڤەدبیت.

دا ڤەگەرم سەر بابەتێ خوە یێ من مەبەست پێھەی، ل ئێك ژ چالاكیێن ئێكەتییا نڤیسەران بوو، خودانێ رۆمانا سیتاڤا تاریێ ژی دناڤدابوو و دگەل سلاڤ و پرسیاركرنێ، گوت من رۆمانەكا نوی یا ھەی و من ھێشتا چاپ نەكریە و حەز دكەم بخوینی؟ كێشا من دگەل رۆمانێ د درێژاھییا وێدا بوو كو ژ 95337 پەیڤا پێكدھات و دیسان دگەل رێنڤیسێ، كو ئەو ب پیتێن لاتینی دنڤیسیت و ئەز ل خواندنا وێ یێ كوھم!

گوتە من بدلێ خوە بخوینە و دێ (ورد)ی بۆ تە فرێكەم، بۆ خوە بكە پیتێن ئارامی و من ئەڤ چەندە كر و من بۆ خوە دانا، د ماوێ ھەیڤەكێدا خواندنا وێ ب دووماھی بینم، ژبەركو ئەگەر ببیتە پەرتووك ب قەبارێ ناڤین دێ ژ 300بەرپەران دەرباز بیت. من رۆمان وەرگرت و ل مالێ و پشتی شیڤ خارنێ ل سەر لاپتوپێ خوە، من دەست ب خواندنا وێكر و تا دەمژمێر 12:30ی شەڤ من نیڤا وێ زێدەتر خواند و د شەڤا دوویێدا، من رۆمان بدووماھی ئینا و چەند لاپەرێن دەستپێكێ ئەز لێ ڤەگەرییامڤە، ژبەركو تەكنیكا نڤیسینێ یا جودابوو و من تێبینیێن خوە ژی بۆ نڤیسان و بۆ فرێكرن.

ئەز زێدەتر ل سەر ڤێ رۆمانێ ناراوەستم یا من مەبەست پێھەی، بوچی ئەم خوە ل شاكارێن نڤیسینێ نەكەینە خودان؟ بوچی وەك دەڤەرا بادینان كو ھەر دەم ئەم دبێژین پەرتووكخانا مە یا لاوازە و مە خواندەڤا نینە، ئایا ئەگەر ئەم پشتەڤانیا ڤان كارێن جوان بكەین و پەرتووكێ وان بۆ چاپ بكەین، بلا ل سەر بنەمایێ حزبی و ھەڤالینیێ نەبیت ژی، خوە ئەم دێ رەوشا خواندن و نڤیسینا ڤێ دەڤەرێ پێش ئێخین؟!!

ــــــــــــــــــــــــــــــــــــــــــــــــــــــــــــــــ

https://www.facebook.com/groups/rwangeurexne/posts/4967811353257061/

http://rwangauraxna.com/ba/detail.aspx?IDNews=5120

پەروەردا دھوكێ ل (موخل و بێژنكان) بكەن

 عبدالرحمن بامەرنی

دێ راستە راست مەبەستا خوە ژ ناڤئینانا (موخل و بێژنكان) دیاركەم و یا پێدڤی پەروەردا دھوكێ روھنكرنێ بدەت، ئەگەر نە دەت، دڤێت دیڤچوونەك ژبۆ بابەتی ھەبیت و لێپرسین دگەل ھەر كەسەكی بھێتە كرنێ، یێ دبیتە ئەگەرێ ھەدەردانا مالێ گشتی و ئینانەخارێیا ئاستێ زانستی!!!!

ئەڤا ئەز دێ نڤیسم ب ھەلكەفت بوو، ژبەركو كچا من ل پولا چارێ بنەرەتییە و ل سەر من پێدڤییە دەمێ خوە بۆ تەرخان بكەم و وانێن وێ ھاری نیشا بدەم. وانا كوردیێ ژی ئێك ژوانە، لێ راستی نمونا ڤێ پەرتووكێ تێرا وێ چەندێ ھەیە، كو دەھان نیشانێن پرسێ ل سەر ئاستێ زانستیێ قوتابییان دانین و بزانین ئەم ل بەرامبەری چ كێشەیینە؟!!

دا ژ پەرتووكێ دەسپێبكەم، د ھەر لاپەرێ تو بگەھیێدا، چەندین شاشیێن زمانی یێن زیق ھەنە، من گوت یێن (زیق)، ژبەركو ئەز بخوە نڤیسەرم و گەلەك جاران د نڤیسینێ و تایپكرنێدا ئەز پیتان د بەمە جھێ پیتان و دبیت شاشیێن چاپخانێ ژی جاروبار ھەبن. لێ د رۆژنامێ و كوڤارێ ژیدا، مە چەندین فلتەر ددانە نڤیسینێن خوە بەری دیزاینێ و پشتی دیزانیكرنێ ژی و دەما دچوو چاپخانێ، ئێدی ئەم نەدشییان چ راستڤەكرنا بۆ بكەین.

دا بزڤرمە كچا خوە و وانا كوردیێ، ژبەركو ھند شاشی دزوور بوون، ئەگەر من ئەو شاشی ھەمی ل سەر پەرتووكا وێ راستڤەكربانە، دا ماموستایا وێ شەرێ وێكەت و وێ بخوە ژی نەدھێلا دەستكاریێ د ھیچ پەیڤەكێدا بكەم، ژبەركو دگوتی: "ماموستا ناھێلیت ئەم ل سەر پەرتووكێ بنڤیسین". كێشە نە بتنێ شاشیێن زمانی بوون، بەلكو گەلەك جاران پێش و پاشیێن پەیڤان ژی ھەبوون و د خواندنێ و نیشاندانێدا، دەما پەیڤ ژ دەڤی دەردكەفتن دگەل خواندنێ جھێ خوە نەدگرتن و ھەر وەكو كەسەك ل تشتەكی یێ كوھـ بیت، د دەمەكیدا دڤێت بابەتێن دبنە وانە بۆ خواندنێ، د رەھوان بن و قوتابی ل سەر نە راوەستیت، ئەڤە ژی بتنێ كەمتەرخەمییا ڤەگوھاستنێ و بادینیكرنا وان ماموستایان بوویە، ئەڤێن ل سەر ڤێ پەرتووكێ راوەستاین و بتنێ نمونەكا بچویك كو دوو پەیڤ وەك ئێك پێكڤە دھێن (د ڵاپەرە 21 كۆمپێوتەر، كومپیەتر)، یەعنی بەرئاقلە دوو پەیڤ و ب تەنشتا ئێكڤە و ھەر دوو ژی نە دروست؟!!

تشتێ بۆ من گەلەك سەیر ژی ژڤێ پەرتووكێ، ناڤێ پێنج ماموستایان وەك (بژارەكرن) ل سەر پەرتووكێ ھەیە و دبندا ھاتیە نڤیسین (پێداچوون.. لیژنەیەك ژ رێڤەبەریا گشتی یا پەروەردا پاریزگەھا دھوكێ)، خوە پەیڤا پارێزگەھـ ژی ب شاشی یا نڤیسی و لاپەرێ دوو ژ پەرتووكێ ئەڤ ناڤە ل سەرن:

سەرپەرشتێ زانستی یێ چاپێ: (..............).

سەرپەرشتێ ھونەری یێ چاپێ: (.............).

لڤێرە پرسیار، ئەڤ پەرتووكە ل سالا 2021ێ ھاتیە چاپكرن، كەسێن پێرابووین پارە یێن بەرامبەری كارێ خوە وەرگرتین و ب ھزارا دانە یێن ژێ ھاتینە چاپكرن و ل سەر قوتابخانا و قوتابییان ھاتینە بلاڤكرن، بابو پارێن وە بەرامبەری وی كاری وەرگرتین ب سەرێ خوە، وەك ھەر گەندەلیەكا دی، لێ كی دێ باجا ئاستێ زانستی و ڤێ بێ سەروبەیێ ب ستوو خوەڤەگریت؟!!!

ئەڤ پەرتووكا ب ھەلكەفت كەفتیە بەرچاڤێن من، دبیت بتنێ نمونەك بیت، لێ ئەز گومانێ د ئێخمە سەر ھەمی وان پەرتووكان ئەڤێن ناڤێ ڤێ لیژنێ ل سەر و دڤێت پەروەردا دھوكێ وان ماموستایان، بێخیتە بەر پرسیارێ.

• خواندنا كوردی قوناغا بنەرەتی ـ پولا چوارێ، سالا چاپێ 2021.

ـــــــــــــــــــــــــــــــــــــــــــــــــــــــــــــــــــــــــــــ

https://www.facebook.com/groups/rwangeurexne/posts/4915231471848383/

http://rwangauraxna.com/ba/detail.aspx?IDNews=5058

شەقا بچینی دێ شەقان ھەلینی؟!!

عبدالرحمن بامەرنی

وێنێ ژ ھەمیان بەرچاڤترێ بوویە بابەتێ سوشیال میدیایێ، بابەتێ پێھنا پولیسی بوویە، دەما دادوەشینیتە خویندكارەكێ زانكویێ! تا ڤێرە ئەڤ وێنەیە دێ گەلەك بلاڤ بیت و ھەر كەس و لایەنەك، دێ وەك خوە شرۆڤەیێ دەتێ و وەك وی دڤێت دێ بابەتی تێكڤەدەت! ژخوە ئەڤە بابەتەكێ نووی نینە ل ھەرێما كوردستانێ بڤی رەنگی بھێتە ئازراندن، لێ كێشا مە و ل سەر راوەستییانا مە، ئەم چاوان روودانان ھەلسەنگینین، ئایا ب گرتن و سزادانا سەرپێچكەران بتنێ بابەت دێ چارە بیت؟ ئایا یا دروست ئەم كێشان راستەخو چارەسەر بكەین وەك بەرەڤانیكرنێ و ئارامكەرەكێ یان ئەم كێشەییان ژ رھـ و ریشالان چارەسەر بكەین؟ ئھا ئەڤا دڤێ گوتارا كورتدا ل سەر راوەستم ئەڤەیە، ئەم چاوان كەلتورێ شەق و شەق داوەشینێ راوەستینین و بێژین بەسە؟!!

وەك رووھنكرن ژی، لدەف من بخوە خویندكار و تایبەتی خویندكارێن زانكویێ، رێزگرتنەكا مەزن ھەیە و (زانینگەھـ، خویندكارێن زانكویێ و ماموستایێن زانكویێ)، ئەڤە تەخا بلندن، كو ئەم سەرێ خوە پێ بلند بكەین و یاسا لدەف من ھەمی تشتەكە. ئەگەر مە مللەتەكێ ئاڤا بڤێت، ئەگەر مە ئارامی و ھاولاتیبوون بڤێت، دڤێت یاسا لدەف مە بتنێ ل سەر كاغەزێ نەبیت، بەلكو سەروەر بیت.

ئەز بخوە نزانم كێشە ژ كیرێ دەست پێدكەت و چ چیڤێن موسا پێغمبەری(س) ژی د دەستێ مندا نینن، لێ یا ئەر باش ژێ پشت راست، كەلتورێ (دەستێ دەرەكی) ژناڤ مە نەبرییایە و برەنگەكی و دوویان یێ زیندییە. ئەز بەحسا زەنگینی و گەندەلییا بەرپرسان و كومپانیێن وان ژی ناكەم! ئەز بەحسا حزبا و ساخكرنا كەلتورێ عەشیرێ و مەلاقێن حزبان ژی ناكەم.. ئەز چارەسەرییا كێشان بتنێ د پەروەردەكرنا دروستدا دبینم، (ئەگەر بابەتێ نڤیسینا خوە كورتكەمە سەر كەرتێ پەروەردێ)، دەما ماموستایەك ل سەر بنەمایێ حزبێ دبیتە رێڤەبەر و دبیتە سەرپەرشتێ پەروەردێ، ئھا دێ ئەنجام ئەڤە بیت! دەما پولیس، ئاسایش ل سەر بنەمایەكێ نە دروست بھێنە دامەزراندن، ئھا دێ ئەڤە ئەنجام بن!!

ڤێجا دێ مە چ ھیڤی ژ عەقلیەتەكا بڤی رەنگی حوكمرانیێ بكەت ھەبیت، ئەڤە سیھـ سالێن رەبەق بەردەوام و بەردەوام و بێی ھیچ گوھورینەك، مە ھوسان پەروەردەدكەن، پێنەڤێت دێ ئەنجام بڤی رەنگی بن، خویندكارێن زانینگەھێ ب بەرا و چوك شكێنیێ راھێلنە پولیسا و پولیس ژی، ب پێھنا ل سەرێ خویندكاران!!!!!

ــــــــــــــــــــــــــــــــــــــــــــــــــــــــــــــــ

https://www.facebook.com/photo/?fbid=10216336681009979&set=g.209899095715001

http://rwangauraxna.com/ba/detail.aspx?IDNews=5027

نڤیسینا پێشگوتنێ بۆ پەرتووكا (كاش فرۆش) یا سەعید شەریف

 عبدالرحمن بامەرنی

بوچی ئەڤ پەرتووكە یا گرنگە؟!

ئەڤا ئەز وەك پێشگوتن بۆ ڤێ پەرتووكێ دنڤیسم، بتنێ د چوارچوڤەیێ گرنگییا نڤیسینا سیناریویێ دایە، كو براستی ئەگەر لێنێرینەكێ دڤی دەربارەیدا ل پشتی سەرھلدانێ و ھێڤە بكەین، ئەو كارێن تەمسیلی یێن بۆ تەلەفزیونێ یان رادیویێ ھاتینە كرن، كارێن بچووك بوون! مەبەستا من ب بچوكینیێ نە مەبەست كو ئەو كار د لاواز بوونە و دڤێ نڤیسینێدا ئەز ھیچ كارەكی ژوان نا ھەلسەنگینم، ھندی ئەز ل سەر ھەبوونا سیناریویێن بەردەست بنێرم.

 

 كارێن بچووك ژ نەبوونا سیناریویێن باشە و ژ نەبوونا سیناریویێن بەردەستە، ئەز باوەرم ئەكتەرێن باش مە ھەبوونە  و دەرھێنەرێن باش مە ھەبوونە و كەسان مە ھەبوونە، كو ب ئەركێ دەرھێنانا كارێن ھونەریێ یێن باش راببن، لێ نەبوونا دەقێن سیناریویێ، ئەگەرەكێ بھێز بونە ژ بۆ نەبوونا كارێن جودا و یێن پێش كێش.

ئەگەر بگشتی ل رەوشا ئەڤرو یا درامایا كوردی بنێرین، ل رەوشا تیڤیێن كوردی بنێرین، دێ بینین دراما بیانی ب سەردا گرتیە و ژبیرنەكەین، ئەڤ وەلاتێن ھەنێ برێیا ھونەرێ خوە و كەلتور و داب و نەریتێن خوە یێ مە داگیر دكەن، مێژوویا مە وەك وان دڤێت دگەھیننە مە و ژبەركو مللەتێ كورد بخوە ھاتیە داگیركرن و ئەڤ شورەش و بەرخودانێن ددرێژاھییا مێژوویێدا ھاتینە كرن ژی، جارەكا دی برەنگەكێ دیتر دھێنە داگیركرن ڤە و ئەگەر بەردەوامی ھەبیت، چاڤدێری بۆ نەبیت و چاڤدێریەكا لاواز بیت، ل دەمەكێ نەیێ دویر، ئەو مێژوویا مە یا ئەم شانازیێ ژی پێدبەین و بەرخودانێن خوە و مێرخاسێن مە ژی دێ ب خاین و خیانەتكاری ھێنە ناسكرن و ھینگێ مە چ تشتەك نامینیت، ئەم بۆ نفشێ نوی ڤەگێرین و ھەستا نەتەوایەتی لدەف وان خورت بكەین.

 

ئێك ژ مفایێن دیێن نڤیسینا سیناریویێ و ئەگەر بتنێ كار ل سەر سەرھاتیێن كوردەواری بھێتە كرن، ئەڤێن بتنێ سەردەڤ ماینە بێی كو وەك پێدڤی بھێنە كومڤەكرن و ئەرشیف كرن، ھەم دێ بەشەكێ كەلتورێ مە ژی ھێتە ساخكرن و دێ تشتەكێ خومالی ھێتە پێشكێش كرن، كو بینەرێ كورد و خواندەڤایێ كورد زێدەتر ھایداری رەوش و تیتالێن كوردەواری و ژیانا باب و باپیران بیت.

 

ژ خواندنا من بۆ ڤان پێنج سیناریویێن دڤێ پەرتووكێدا ھاتینە نڤیسین، ئەز وەك نڤیسەرەك گەلەك گەشبینم كو ئەڤ كارە و ئەگەر كارێن دی ژی بدەنە دووف، دێ ژ چەند ئالیانڤە مفایەكێ باش ھەبیت، ئێك: دێ سەرھاتی و كەلتورێ مە و ژیانا باب و باپیران وەك خوە ھێتە پاراستن و دوو: دێ مە دەقێن خومالی ھەبن، كو كارێ ھونەری و درامایێ ل سەر بھێتە دروستكرن، سێ: دەما تێكستێ باش، سیناریویا باش ھەبیت و ببنە كارێن ھونەری، چ سینەما یان دراما یان شانوو یان تا تەمسیلی ژی، دێ كەلتورێ بازاركرنێ دروست بیت و ھەتا ئەڤ كەلتورە دروست نەبیت و بازارێ ھونەری پەیدا نەبیت، ھونەرمەند نەشێت كارێن جوان بەرھەم بینیت و وەك چاوان ئەم دبینین، گەلەك وەلاتێن جیھانێ ب كارێن خوە یێن ھونەری و فلم سازی و دراما سازیێ داھاتەكێ باش پەیدا دكەن.

 

 

 

 

 

 

 

 

 

                                                    عبدالرجمن بامەرنی

كەلتورێ ھونەری پەیدا بكەن..؟!

 ع. بامەرنی

ب رێكەفت چەند خەلەكێن بەرنامێ ھونەریێ (ئاوزێن گەنجان) ل سەر كەنالێ عەمسانیێ وار tv من دیتن، ئێك ژوان ل نیڤا بازارێ دھوكێ و ب دروستاھی ل سیكا ماستی و چەند گەنجان ئامیرێن وان یێن موزیكێ د دەستاندا بوون و ستران دگوتن و ئێك ژ ڤان خەلەكان ژی ل سلێمانیێ بوو، ئەڤ كومە ژی ژ چوار ھونەرمەندێن موزیك ژەن پێكدھێت، ئامیرێن خوە یێن دەنگی و موزیكێ ل نزیك (سەھولەكە) ل سەر جاددا سەرەكی یا بناڤێ سالم دانابوون، كو جادەكا قەرەبالغە و موزیكەكا كوردییا رەسەن و ستران دگوتن. ژبلی ئەڤێن ل سەری من گوتین ژی، وەك بەرنامەكێ حەفتانە ئەگەر یێ شاش نەبم، ژبەركو من پەیوەندی برێكا سوشیال میدیایێ ب ھەڤالێن ڤی كەنالی كر، بۆ وەرگرتنا زێدەتر زانییاریان، لێ چ بەرسڤ نەبوون، لێ ئەز باوەرم ھەمی حەفتییان و ھەر جارێ ل جھەكی و ب شێوازەكێ و ھندەك موزیكێن نوی ل سەر شاشا ڤی كەنالی دەردكەڤن و دووبارەیا ھەمان خەلەكە، دھەما حەفتیدا ژی دھێتە پیشاندان.

یا من دڤێت بێژم، سەرەرای دەستخوشیێ ل ڤان گەنجان و چوونا وان بۆ ناڤ جھێن گشتی و ئامیرێن خوە ددانن و سترانێ دبێژن و گوھـ نادەنە خەلكی، بەلكو بتنێ گوھێ وان ل موزیكا وانە و ئەو سترانێن ئەو دبێژن. من گوت جھێن گشتی، مەبەستا من ژی ژڤێ نڤیسینێ جھێن گشتییە، ئەز نابێژم وەكی وەلاتێن دی بلا مە ژی كومێن موزیكێ ھەبن و ل سەر جاددان و ل جھێن گشتی سترانێ بێژن موزیكێ ب ژەنن و پارەی بەرامبەر وەربگرن، لێ ھەكە خوە ئەڤ چەندە ھەبیت ژی، ئەز بخوە ب كارەكێ شارستانی دزانم.

ل دھوكێ ئەگەر مە بڤێت ھندەك پێنگاڤان بەرەڤ پێش بھاڤێژین، دڤێت خوە ژ ھندەك داب و نەریتان دوور بكەین و ھندەك تشتێن نوی پەیدا بكەین، خەلكی، مەبەستا من ب ھەمی خەلكی و ھەمی تەمەنان ئەم بەشداری چالاكیێن ھونەری و رەوشەنبیری و وەرزشی بكەین، ئەگەر مە ئەڤ چەندە كر، دێ دوو ئەنجامان بدەستڤە ئینین، ئێك: خەلك دێ ژ بێھنتەنگییا رۆژانە یان ھەمی قەیرانان رزگار بیت و تا مێشكێ وی ئارام نەبیت، نەشێت ھزركرنا دروست بكەت و پێنگاڤا دروست بھاڤژیت و پلانان بۆ رۆژانێن خوە بدانیت و دوو: خەلكێ مە یێ وەستییای دێ شێت تەقەبوولا گەلەك تشتێن نوی كەت، ئەڤێ داب و نەریتان ل سەر وی فەرزكرین، بناڤێ شەرمێ و خەلك دێ بەحسا تە كەت و تا دووماھیێ.

ژبیرنەكەین ژی دەما كەسەك دچیتە نیڤا بازاری و چالاكیەكا ژڤی رەنگی دبینیت، دێ چەند مێشكێ وی ئارام بیت كو ھەست بكەت ژیان یا ھەی، ئھا ئەڤە ئەوە یا من دڤییا دڤێ نڤیسینا كورتدا بینمە ژیان، ئەم ل ژیانێ بگەرین و ژیانێ پێش كێشی خەلكێ خوە یێ ماندی بكەین.

ـــــــــــــــــــــــــــــــــــــــــــــــــــــــــــ

http://rwangauraxna.com/ba/detail.aspx?IDNews=5078

مە دھوكییا ژی خودێیەك یێ ھەی؟!!

 عبدالرحمن بامەرنی

بەری چەند سالان بوو، ھەمان نیشانێن ھشكە سالیێ وەك ئەڤ سالە ل دھوكێ دیاردكرن. رێكەفت كارەك بۆ مە چێبوو و ئەز و ھەڤالەك بەرەڤ سلێمانیێ چووین، ھەر ئەم گەھشتین و نەگەھشتینە (كانی وەتمانێ) ل سەر رێكا ھیران و نازەنییا بۆ قەزا دوكان، چپكێن بارانێ ھاتن و تا ئەم گەھشتینە ناڤ سەنتەرێ سلێمانیێ، فرچێن جامان ڤێرا نەگەھشتن، ھندی خودێ كەرەمكر. وێ شەڤێ ئەم ماینە ل سلێمانیێ و سپێدێ ئەم ژ خەو رابووین عەرد یێ سپێ بوو و مە دا رێ و د ھەمان رێكا ڤەگەرێدا بۆ دھوكێ، ل (شەقلاوە) چكێن دووماھیێ ژ عەوران دكەتن و تا ئەم ھاتینە دھوكێ، نە ئەو سیك و نە ئەو بازار.

باشە ئەڤا ل سەری ئەم نەشێین مایێ خوە تێبكەین و تشتەكە خودێ باشتر دزانیت و ھەر ئەوە خودانێ دلوڤانیێ و جھێ وی بڤێت دێ بەرێ عەوران دەتێ، ئێ باشە حكومەت، حكومەتا ھەرێمێ، ئیدارا پارێزگەھا دھوكێ ما ھەتا كەنگی دێ پارێزگەھێن دی ل سەر حسابا مە ژیانێ كەن، حەتا كەنگی دێ جاددێن وان و قوتابخانێن وان و نەخوشخانێن وان و خزمەتگوزاریێن وان ل سەر حسابا مەبن و بەشەكێ پارێ تەرخانكریێ دھوكێ ژی بۆ وان چیت؟! ما یا بەرئاقلە تو ل دھوكێ لیترا پانزینێ د سەر 870 دیناران دا بیت و ل ھەولێرێ بێ خوە گەلەك ماندی بكەی، دێ تانكێ ترومبێلا خوە ل سەر 690 دیناران فول كەی!!!

دڤێت حومەتا خوە جھییا دھوكێ ژی دیڤچوونێ لڤێ چەندێ بكەت، ئایا ئەگەر چنە رێژا پانزینا ئەرزان ئەڤا دھێتە دھوكێ گەلەك كێمترە و بوچی ئەڤ جوداھییا بھایێ پانزینێ ژ پانزینخانەكێ بۆ ئێكا دی، كو بھایێ لیترێ ژ پانزینخانێ بۆ پانزینخانەكا دی گەلەك جوداھییا خوە ھەیە؟!!

ـــــــــــــــــــــــــــــــــــــــــــــــــــــــ

http://rwangauraxna.com/ba/detail.aspx?IDNews=5072

نڤیسینا پێشگوتنێ بۆ پەرتووكا (زێمارا دلی) كومەلە چیرۆكێن (ئەمجەد عوبەید)

 عبدالرحمن بامەرنی

ل جھێ پێشگوتنێ..

ئەز ناڤەشێرم، كو ئێك ژوان چیرۆك نڤیسێن ل دەڤەرامە و ھەر گاڤا چیرۆكەكا وان ب بەرچاڤێن من بكەڤیت، ئەز خواندنا وێ ژخوە ناكەم و ئەز دخوینم، خواندنەك نە دگەل دووماھی ھاتنا وێ پشت بدەمێ. من گوت ئەز، ژبەركو چیرۆكێ و ھەر تێكستێ نڤیسەر سنعەتكاریێ تێدا بكەت، ئەو تێكست من رادكێشییتە خوە، دناڤ تێكستی ژیدا ھند ناڤەرۆك و روودان بۆ من گرنگ نینە، ھندی یاریپێكرنێن نڤیسەری، ئایا تا چەند یێ سەركەفتی بوویە و تا چەند شیایە منەكێ خواندەڤا، ببەتە ناڤ كووراتییا تێكستێ خوەدا.

ئاخر تێكست ژی ھەر ھوسانە، ئەو نڤیسەرێ نەشییا بۆ چەند رۆژان، خواندەڤایی دناڤ قولاچێن تێكستێ خوەدا بگێرینیت و جیھانا خوە نیشان بدەت، ھینگێ كەنگی ئەو تێكستەكێ ئەدەبییە.

 

ئەو نڤیسەرێ من ژێ بەحس كری، كییە؟ گرنگ نینە من بەحسا كاك (ئەمجەد)ی وەك خودانێ ڤێ پەرتووكێ بیت، ھەر چەندە ئەو ئێك ژوان چیرۆك نڤیسێن كێمە ل دەڤەرا مە، كو ئەز ب قەلەمێ وان داخبار، تایبەت د بوارێ چیرۆك نڤیسینێدا و پرانییا جاران ژی دەما ئەز چیرۆكەكا وی دخوینم، ئەز پەیوەندیێ بۆ دكەم و بتنێ دەست خوشیێ لێناكەم، ژبەركو پەیڤا دەستخوشیێ بخوە دكەڤیتە سەر لێڤان، لێ ئەم دان و ستاندنێ دكەین و دان و ستاندنا مە ناچیتە د قالیێ كی بلند و كی كولند یان ئێك و دوو بكەینە د قەفەسا تاوانێدا، بەلكو پرۆسا نڤیسینێ بخوە ھوسانە، نڤیسین تا دروست و تەندروست بگەھیتە بەر دەستێ خواندەڤانی، دڤێت د چەند قوناغان را دەرباز ببیت و ژوان قوناغان ژی، رەخنە گرتن و رەخنە وەرگرتنە.

ئاخر چیرۆك نڤیسی ژی ھەمان تاس و ھەمان مەبەستە و گەلەك جاران پێشگوتنا كومەلە چیرۆكەكێ، تێرا ھەیە خواندەڤانی دوو جاران راكێشیتە خواندنا چیرۆكێن تێدا ھاتینە بلاڤكرن، جارەكێ چیرۆك نڤیس بخوە و جارا دی ژی كا ئەوێ پێشگوتن نڤیسی، چەند شیایە رێخوشكرنێ بۆ ڤێ جیھانا ھاتیە ئافراندن بكەت.

 

من ئافراندن ئینا سەر زمان، ئھا من مەبەست پێ ئەڤ خالەیە بگەھمێ، ئەز پێشگوتنەكێ بدەمە ڤێ پەرتووكێ و جوانیەكێ ل سەر جوانییا تێكستێن وی زێدەكەم، ھەر چنەبیت ژ نڤیسینێن من یێن رەخنەیی و سەرراڤكرنا تشتێن جوان، جوان مەبەستا من زیندی، كو ھەر دەم د نڤیسینێن خوە یێن رەخنەییدا، ل تێكستێن نڤیسەرێن دی ئەز ل زیندیبوونێ دگەرم و دڤێت خواندەڤا ھەست بڤێ زیندیبوونێ بكەت، ژبەركو چیرۆك نڤیس ژی خوداوەندەكە و ئالاڤێن وی پەیڤن و ژ پەیڤان تشتەكی د ئافرینیت، كو ئەو تشت دگەل مرۆڤی باخڤیت.

ئاخر ئەگەر بەشەكێ ئافراندنێ لدەف نڤیسەری و خودانێ تێكستی نەبیت، دێ چاوا شێت لڤینەكێ دەتە تشتەكێ ئەز ل سەر راھاتیم و بۆ من كەتە تشتەكی زیندی، من زیندیبوون دڤێت و نڤیسینا پێشگوتنا من ژی ھەمان سەراڤكرنە، كو تەیەكێ خواندەڤا راكێشمە خواندنا وێ زیندبوونا من دڤان چیرۆكاندا دیتی.

عبدالرحمن بامەرنی

نڤیسینا پێشگوتن بۆ پەرتووكا ھەلامەتێن شەڤێ یا عەلی بەندی

 عبدالرحمن بامەرنی

ھوزانڤان جوداتر ژ كەسێن دی..

ھەڤالینیا زێدەتر ژ 30 سالان، تێرا ھندێ ھەیە مرۆڤ بشێت ئێك دوو ناس بكەت، ھەر چنەبیت ھندەك وێستگەھان ژ ژیانا وی، گەنجاتیا وی، مژوولاھیێن وی و حەزێن وی، ئەڤێن ھەنێ ژی ھەمیان دێ كورتكەمە ناڤ جیھانا نڤیسینێ، ژبەركو نڤیسینێ و شعرێ ئەم كرینە ھەڤال، بەردەوام ژی ئەم بەرھەمێ ئێك دوو دخوینین، ھەر چنەبیت شعر گەلەك نھێنیان ژ ھوزانڤانی دیار دكەت، ئاستێ ویێ ھزركرنێ و مەعریفێ و یا گرنگ لدەیف من بخوە و تایبەت ئەڤێن شعرێ دنڤیسن، شێوازێ یاریكرنا وانە ب پەیڤان و ئەو سنعەتكاریا ئەو د شعرێن خوەدا دكەن.

 ئەڤ ھەڤالینییا ئەز ژێ بەحس دكەم ژی ھوزانڤان (عەلی بەندی)یە، كو شعرێ ئەم كرینە ھەڤالێن ئێك و نوكە ئەز پێشەكیكێ بۆ كومەلا وی یا شعران دنڤیسم.

 

ھوزانڤانی ژ ھەر کەسەکێ دی زێدەتر باوەری ب وێ جیھانێ ھەیە، یا ئەو  تێکستێ خوە تێدا زیندی د ھێلیت. د وێ جیھانێ ژی دا ھەست ب گڤاشتنێن دەرەکی ناکەت و چ بھای ژی بۆ دەمی و وان عرف و عادەتان نا دانیت، یێن دەوروبەرێن وی بۆ خوە ژ ھزر و ڤەرێژا بیروباورێن خوە، بۆ خوە کرینە پیروزی و ل سەر پرێڤە دچن.

 

 ھوزانڤان دەما دکەڤیتە بن باندورا نڤیسینا دەقەکێ نوی، ھەست ب چ ئەزمونێن پێش وەخت ناکەت، ھندی ھەست ب وێ چەندێ دکەت، کو ئەڤ دەقێ وی دێ بیتە جھێ لێزڤرینێ و دێ (واقعەکێ) نوی دروست کەت. ھوزانڤان ھەمی تشتەکی دبینیت و دا بشێت وان ھەمی تشتان ژی گیانی و رحێ بدەتێ، ل بەرکرنەکا نوی دگەریت و ئەڤ بەرکرنا ھەنێ ژی، ئەو وێنە نە ئەڤێن ژ سحرا خەیالا خوە بۆ کەر دکەت و دکەتە بەر ڤە و سەروسیمایەکێ دی پێ دپەخشیت و ژڤێ ھەڤکێشەیێ ژی، ئەوا دناڤبەرا ھوزانڤانی و تێکستی دا دھێتە دیتن، ھندەک ژ ساخلەتێن ساحریانە د خودیێ شاعری دا دھێنە دیتن، تا بشێت دەقێ خوە د قالبەکێ چێکری و نە یێ سروشتی دا بینتە بەرچاڤ. ژبەرکو د بنەرەت دا، سحر و شعر ژی ب دوو دەستە خویشکان دھێنە ناسکرن یان کو ھەردوو ژ دایکبویێن ئێک مالبچیکن.

 

 ژڤی روانگەی ژی ئەگەر سحر پێرابوونەک بیت و شیا بیت ھەر ژ ئەزەل سەرنجا خەلکی بۆ خوە راکێشا بیت، شعر ژی بھەمان روانگەی، خەلکەک بخوە ڤە حێبەتی کریە و سەرنجا وان بۆ خوە ئینایە، شعر جوداتر ژ سحرێ ئەڤا ب کریارێ نەھێتە نمایشکرن، ب خەیالی دھێتە دەربرین و ژبەر ھندێ ژی ھەر دووک رویێ ئێک دراڤن و بتنێ زمانێ شعرێ یە رویێ وێ جودا دکەت و جوان دھێلیت.

ژبەركو ب باوەریا من شعر سنعەتكاریە زێدەتر ژی كو ئیلھام بیت، بوویە ھەر ھوزانڤانەك جوداتر پەنایێ د بەتە بەر ئالاڤێن ل بەر دەستێن خوە، ئەو تشتێن ئەو دبینیت، ئەو تشتێن ئەو پێ داخبار دبیت، ئەو تشتێن كارتێكرنێ ل وی دكەن، بۆ ھوزانڤانەكی ژی كارێ وی یێ سەرەكی دناڤ خێزانێن ئەنفالكریان دا بیت،  خەمێن وان، ئێش و ئازارێن وان، چیرۆكێن وان یێن نەھێنە ژبیركرن، دەردەسەری و ئەو كابوسێن ب شەڤێن درێژ خوە ژوان دوور نەئێخن، پێنەڤێت دێ ڤان ھەمی تشتان كارتێكرنا خوە یا راستەوخو ژی ل سەر نڤیسینا شعران ھەبیت. 

نە بتنێ ئەنفال، گەلەك تشتێن دێ دناڤ ڤان شعران دا من دیتن، ھوزانڤانەكێ عاشق، ھوزانڤانەكێ حەزا لێگەریانێ لدەف ھەی، ھوزانڤانەكێ بۆ جوانیێ نڤیسایی، بۆ جوانیێ سەماكری و دبەر جوانیێ را ئەڤ شعرێن ھەنێ نڤیسین، ئەگەر جوانی نەبیت، ھینگێ پەیڤان ژی رامانا خوە نابیت و تشتێ ھوزانڤانان ژ كەسێن دی جودا دكەن ژی، جوانیە و نھێنییا دپشت پەیڤان را، ل خواندنا ڤان شعران ژی ڤان ھەمی تشتان دێ بینین و ھەست پێكەین.

عبدالرحمن بامەرنی

 

دچار هەیڤاندا (936) بابەت د(روانگە و رەخنە)دا هاتینە بلاڤكرن

عبدالرحمن بامەرنی

د هەر كارەكیدا پێداچوون و هەلسەنگاندن یا گرنگە، ژبۆ وێ‌ چەندێ‌ مرۆڤ پێشخستنێ‌ دكارێ‌ خوەدا بكەت. دڤان چار هەیڤێن بوری دا و بدروستاهی ل رۆژا 23/1/2020 ێ‌، ئێكەم گوتار مە د مالپەرێ‌ (روانگە و رەخنە)دا بلاڤ كر و تا نوكە بووینە 936 گوتار و بابەت.

ئەڤ گوتارێن مە بلاڤكرین ژی، گەلەك بیاڤ بخوەڤە دگرتن، (سیاسەت، كلتور، كومەلگەهـ، زانست، ئابوور، هونەری، ژنان، پەروەردە، ساخلەمی، لێنێریا تە و نیو میدیا ... هتد) و نڤیسەرێن بۆ مە د نڤێسین ژی، بێ‌ جوداهی و بێ‌ فلتەر، هەر بابەتەكێ‌ بۆ مە هاتی مە یێ‌ بلاڤكری. ناڤەشێرم مە هندەك ژ وان بابەتان بۆ خودانێن وان زڤراندینە ڤە، ئەڤێن ناڤزراندن تێدا یان سڤكاتی ب ئاینەكی یان ژی ناڤتێدانا كەسان و حزبان و دڤی بیاڤیدا گەلەك جاران نڤیسەران گازندە دكرن، ئەرێ‌ ما مالپەر نە رەخنەییە؟! د بەرسڤێدا، بەلێ‌ مالپەرێ‌ (روانگە و رەخنە) مالپەرەكێ‌ رەخنەییە، لێ‌ ئەم ل سەر حسابا چ لایەنان نابینە داردەستێ‌ چ لایەنێن دی.

گەلەك جاران نامێن تایبەت گەهشتینە و پسیاركرینە، ئەرێ‌ كی پالپشتییا مالپەری دكەتن؟! یا راستی بیت، ئەو كەسێن دنڤێسن، ئەو كەسێن هەست ب بەرپرساتیێ‌ دكەن و دیاردێن نە شیرین دبینن و وان دیاردان رەخنە دكەن، هەر ئەون پالپشتیێ‌ لێ‌ دكەن، بۆ ڤێ‌ چەندێ‌ ژی گوتارێن د مالپەریدا دهێنە پارڤەكرن ڤێ‌ دیدەڤانیێ‌ ددەن و مە هەولنەدایە و هەولنادەین ژی، مالپەر ببیتە ناڤتێدانا چ لایەنێن سیاسی.

تشتێ‌ دڤان چار هەیڤێن بوریدا زێدەتر ئەم ل سەر راوەستییاین و تایبەت پشتی دەركەفتنا حالەتێن ڤایروسێ‌ كورۆنایێ‌ ل هەرێما كوردستانێ‌ و كەرەنتیبوونا هاولاتییان د خانیڤە، مە هزر دوێ‌ چەندێدا كر، كو پێدڤییە ئەم زێدەتر خوە ب وەستینین و ببینە هەڤكارێن وەزارەتا تەندروستی و ناڤخویی بۆ پێگیریكرنا هاولاتییان ب رێنمایێن ئەو دەردكەن.

بدەهان بابەت ل سەر خوە پاراستنێ‌ مە بلاڤ كرینە، ئەڤە وەك ئەركەك نیشتیمانی و رەوشتی، ددەمەكیدا كو خەلك و هاولاتی د خانیێن خوەڤە بێزار دبوون، مە هزر دوێ‌ چەندێدا دكر، شوونا گەنجێ‌ مە دەمێ‌ خوە ب یاریێن بێ‌ مفا و بوبجی و مژوولاهییانڤە دەرباز بكەت، ئەم رێ‌ ل بەر وان ژی ڤەكەین و هەر چنەبیت ببنە خواندەڤان و تا راددەیەكێ‌ دڤی بیاڤیدا مە پێنگاڤ هاڤێتن، كو سەردەمێ‌ راگەهاندنا ئەلەكترونییە و پرانیا خەلكی ژ مەزن و بچووكان ئەنترنێتێ‌ بكار دئینن، چ برییا كومبیوتەری یان ژی ب موبایلێ‌ بیت.

تشتێ‌ دیێ‌ ئەم شانازیێ‌ پێدبەین، گەلەك كەسان ژ مالپەرێ‌ (روانگە و رەخنە) خوە هاڤێتنە بیاڤێ‌ نڤیسینێ‌ و گوتارێن جوان نڤیسینە و د سەركەفتی بووینە، گەلەك كچ هەبووینە و دبیت بەری نوكە رێكێن خوە ئینانە پێش بۆ نەبیت و مالپەری دەرگەهـ بۆ ڤەكر، كو نڤیسین و گوتارێن خوە بلاڤ بكەن و هەست بكەن، دڤی بیاڤیدا چ جوداهی دناڤبەرا رەگەزێ‌ نێر و مێدا نینە.

تشتێ‌ لدووماهیا ڤێ‌ گوتارێ‌ من دڤێت ل سەر راوەستم، لێنێرین و رەخنێن خواندەڤا و نڤیسەرانە بۆ مالپەری، ب ئازادانە هەر تشتێ‌ وە بڤێت كومێنت بكەن و ئەم دێ‌ بهووری ل سەر راوەستین و دیراسەتكەین، ژ پێخەمەت ئەم مفای ژێ‌ وەربگرین، رەخنێن وە، تێبینیێن وە و ئەم چ كێم بكەین و چ زێدە بكەین..؟!

*بابه‌ت ل سه‌ر مالپه‌رێ روانگه‌ و ره‌خنه‌

http://www.rwangauraxna.com/ba/detail.aspx?IDNews=1145

*بابه‌ت ل سه‌ر فيسبوكێ مالپه‌رى

https://www.facebook.com/groups/209899095715001/

٤٥سالییا دامەزارندنا (ی. ن. ک) و چەند دیتنەک

عبدالرحمن بامەرنی

بەری ئەز بچمە ناڤ بابەتێ من مەبەست پێھەی ئەز ل سەر بنڤیسم، ئەز دێ ژ بیرئانینا ٤٥ سالیا دامەزراندنا یەکێتی نیشتیمانی کوردستان دەستپێکەم و ڤێ یادێ ل ھەمی خەلکێ کوردستانێ و ھەمی ئەندام و لایەنگرێن وێ پیروز کەم، ب وێ ئومێدێ، ئەڤ یادە ببیتە دەلیڤەیەک، کو ھەڤگرتن و ئێکرێزییا ناڤ مالا کوردی پێ قایم ببیت و شەرێ راگەھاندنێ دناڤبەرا (یەکێتی و پارتی)دا بھێتە راگرتن، ژبەرکو بارودوخێ کوردستان تێدا دەرباز بیت، ل سەر مە فەرز دکەت، ئەم ئێک و دوو قەبوول بکەین و ئەم دەستێن خوە بکەینە دناڤ دەستێن ئێکدا.

ئایا کورد خاین و تێکدەرن یان کال فامن؟!

کەسێ ھندی کوردان خیانەت و نە پاکی دگەل ئێک نەکریە و ژ ڤی ئەگەری ژی، تانوکە کورد نەبووینە خودان کیانەکێ سەربەخوو. ئەگەر ئەم ڤێ بکەینە پرسیار، ئایا راستیەک بۆ ڤێ چەندێ ھەیە؟! د بەرسڤێدا و لدویڤ ئەوا بۆ مە ھاتیە ڤەگێران، ئەگەر بەرپەرێن مێژوویێ و شورەش و بزاڤێن کوردی ھەمیان تێکڤەدەین، ل ھەمیان دێ خیانەتێ بینین، لێ مە چ جارەکێ پرسیار نەکریە، ئایا قەدەرا کوردانە و ھەر جار ئەو ب خوە خیانەتێ و نە پاکیێ دگەل ئێک و دو دکەن و ڤان بزاڤ و شورەشان ژناڤ دبەن؟ یان ژی تشتەک دی دپشت ڤێ چەندێ راھەیە؟!!

درامایێن کوری گەلەک بالا من بۆ خوە رادکێشن، تشتێ سەرنجا من ژێ رادکێشیت ژی، ھەر کەسێ نە پاکیەکێ بەرامبەری وەلاتی بکەت، دێ بێژنێ ما تو ناترسی مێژوو ب خرابی ناڤێ تە بینیت! مێژوو لدەف وان چاوانە، دەستەکەکا چەند کەسی، ژ کەسێن دلسوز و راستگوو بۆ نەتەوا خوە ھاتینە دەست نیشانکرن، کارێ وان بتنێ بەلگەکرن و تومارکرنا روودانایە وەک خوە، سەرەرای کو دەستھەلاتا ئیمبراتوری ل وەلاتێن وان بلندترین دەستھەلاتە و خەلک تا راددێ پەرستنێ رێزێ لێدگرن، لێ دەستھەلاتا وی ل سەر ئەڤێن مێژوویێ ژی د نڤیسن نینە. ھەر تشتێ رووبدەت ئەو بەلگە دکەن، ھەر ئەو روودانە چ بیت و ب کێڤە گرێدای بیت. مەبەستا من ژ ئینانا ڤی میناکی چبوو، نڤیسینا مێژوویێ وەک خوە، دا بشێن مفای ژ بوریێ خوە وەربگرن و ئایندێ خوە ل سەر شاشیێن خوە ئاڤا بکەن.

سەبارەت خیانەتێ و نە پاکیێ، ل ھەمی جھەکی و ل ناڤ ھەمی نەتەوەکی خیانەت و نەپاکی دھێتەکرنێ و ژ ئادەمێ باب بگرە و ھەردوو کورێن وی (قابیل و ھابیل)ی و بەردەوام تا ئەڤرویا ئەم تێدا، دوو بەرەکی و نەڤیان و خیانەت و نەپاکی ھەبووینە. لێ جوداھییا مە د چ دایە، جیھان ھەمی بۆ خوە مفای ژ بوریێ خوە وەردگریت، مفای ژڤان نەپاکییان وەردگریت بتنێ کورد نەبن، کو ل سەر ڤان نەپاکییان راوەستن، بزانن وان خەلەتی ل کیژان خالێ کریە و بۆ وێ خالێ و وێ گرێ یێ ڤەگەرن، دا دوبارە ل ھەمان خال نە ھلنگڤن ڤە و شوونا ڤێ بکەن، ئێکسەر دێ شکەستنا خوە کەنە ستوویێ ھەڤالێ خوە و برایێ خوە و ھەڤچەپەرێ خوە.

بڤی رەنگی کورد دھەمان زڤرۆکدا بەردەوامیێ دکەن و خوە گیانەوەر ژی (....) دەما د رێکەکێ رادچن و د ھلنگڤن، دوبارە وێ شاشیێ ناکەن، ژبەرکو دزانن شاشییان وان ل کیرێ یە و بۆ خوە دکەنە سەربور. لێ کورد ئەوێ ژی ناکەن، شەکەستنێ ب شکەستنەکا دی د نخێڤن و وەک میێ ژ ھەڤیری کێشای، پاقژ و کوردپەروەر دەردکەڤن و ھەڤچەپەرێن وان ژی خاین و خوفروش دمینن.

ئەرێ لڤێرە پسیار، ما کال فام ب شاخن؟! د بەرسڤێ ژی دا نەخێر، کال فامان چ شاخ نینن، لێ ھەر کارەکێ ئەو دەست ببەنێ، باش دیراسەت ناکەن، بەرھەڤیێن دروست بۆ ناکەن، زێدە د عاتفینە و لدویڤ خەون و خەیالێن خوە، پرۆژێن خوە ددانن. کال فام ئەو کەسن یێن بێ بەرنامە، د نێزیکبیین، بێ پلان، گوھێ وان د دەستێ خەلکیدا و ھەمی تشتی ب سەرێ خوەدا د شکێنن، بەرژەوەندا خوە ب سەر بەرژەوەندا دوزا خوە دئێخن و ل ئێکەم ھنگاڤتن ژی، شوونا ل گرێیا شەکەستنا خوە بگەرن، بەھانا بۆ شکەستنا خوە ددانن و گەلەک ب ساناھی ژی، ھەڤال و ھەڤچەپەرێن خوە ب (تێکدەر و خیانەتکار) دزانن.

ـ گوتار ل سه‌ر مالپه‌رى

http://www.rwangauraxna.com/ba/detail.aspx?IDNews=1221

ـ گوتار ل سه‌ر په‌يچىێ فيسبوكى

https://www.facebook.com/groups/209899095715001/?multi_permalinks=3256580197713527&notif_id=1590824526051112&notif_t=feedback_reaction_generic

دێ چێبيت..!

عبدالرحمن بامه‌رنى

چه‌ند پوسته‌كێن فيس بوكى بيرا من لڤى كاريكاتورى ئينان، كو د (رۆژناما چاڤدێر)دا مه‌ بلاڤ كربوو و ژلايێ كاريكاتورڤان (زێره‌ڤان سالح)ى ڤه‌هاتبوو چێكرن. به‌رى بزڤرمه‌ وان رۆژێن ئه‌ڤ كاريكاتوره‌ تێدا هاتيه‌ چێكرن و كا هزرا چێكرنا وى ژكيڤه‌ هاتبوو، ئه‌ز دێ پيچه‌ك ل سه‌ر چه‌ند پوسته‌كان راوه‌ستم كو ئه‌ز كێشايمه‌ ڤێ نڤيسينێ. 

سه‌ره‌راى كو گه‌له‌ك كه‌س باس ل موچه‌ى دكه‌ن و نه‌دانا مووچه‌ى و بارودوخێ نه‌خوش و بێكارى، لي پوسته‌كى گه‌له‌ك سه‌رنجا من راكێشا، كو بڤى ره‌نگى بوو: (حكومه‌ت ب هه‌مى ناڤێن خودێ ئه‌م مفلس بووين).

ئه‌ڤ پوستێ ل سه‌رى يێ كه‌سه‌كى يه‌ و ماموستايه‌ ژى، ماموستا يانكو نه‌وه‌يه‌كى فێردكه‌ت و داخوازا وى ئه‌و بيت، موچێ وى بده‌نێ، ئه‌كيد يان كو گه‌له‌ك تشت يێن هه‌ين ب سه‌قه‌تى يێن برێڤه‌چووين و تا بگه‌هيته‌ وى ئاستى، حكومه‌ت نه‌شێت موچه‌ى بده‌ت، بابه‌ت گه‌له‌ك تايان بخوه‌ڤه‌ دگريت و هه‌مى ژى بۆ سياسه‌تا كورتبين ڤه‌دگه‌رن.

داڤه‌گه‌رم سه‌ر كاريكاتوورى، هينگێ ل نڤيسينه‌گا رۆژنامێ هه‌ر تشته‌كێ ئالوز ببا و مه‌ ڤيابا هيڤيه‌كێ بۆ په‌يدا بكه‌ين دا بێژين دێ چێبيت، ئه‌ڤ دێ چێبيته‌ كه‌فتبوو سه‌ر ئه‌زمانێ مه‌، ل وى ده‌مى د رۆژنامێ دا هه‌مى ژماران مه كاريكاتوره‌ك ژى بلاڤ دكر، كاريكاتورێن مه‌ ژى ل سه‌ر كه‌توارێ ژيانا رۆژانه‌ بوون، هه‌ڤالێ كاريكاتورڤان ژى كاك زێره‌ڤانى ژ گوتنێن مه‌ ئه‌ڤ كاريكاتوره‌ دروست كر و ب رۆژنامێ ڤه‌ گرێدا، كو رۆژنامه‌ هيڤييا و ده‌نگ و باسان دده‌ته‌ خه‌لكى و هه‌ر په‌يڤا (دێ چێبيت) دوباره‌ دبيت و ئه‌ڤه‌ ژ سه‌رهلدانێ وه‌ره‌ خه‌لك چاڤه‌رێ و هێشتا نه‌چێبووى. ئه‌و يێ ل ناڤ گورستانێ و ئه‌م يێ دبينه‌ هه‌ستى و هه‌ر ل هييڤيا چێبوونێ نه‌ و تشتێ سه‌ير ژى، كو كاريكاتورى هێزا خوه‌ ژێ وه‌رگرتى، ئه‌وێ دگورى ژى دا ب هه‌مان ده‌ردێ مه‌ ژ ڤێ دنيايێ يا باركرى و هێشتا چێنه‌بوويه و باوه‌رناكه‌م ژى بڤى ده‌ست و دارى و بڤێ عه‌قليه‌تێ ژى چ جاره‌كێ چێبيت!!

رۆژنامه‌ ژى نه‌مايه‌، ئه‌گه‌ر دا بێژينه‌ كاريكاتورڤانێ خوه‌ بلا كارێ ويێ ڤێجارێ خرابكرن و سه‌روشنى ئاڤاكرن بيت، به‌لكو چێبيت و چ دى بێ ئومێدى ب خه‌لكێ مه‌ڤه‌ يا ديار نه‌بيت، راستى ژى خه‌لك وه‌ستييا..!   

• بابه‌ت ل سه‌ر مالپه‌رى

• http://www.rwangauraxna.com/ba/detail.aspx?IDNews=1326

بابه‌ت ل سه‌ر فيس بوكێ مالپه‌رى

• https://www.facebook.com/groups/209899095715001/permalink/3287081021330111