ئەدەبا كوردی جودایە ژ ئەدەبا عەرەبی.. بەرسڤەكا نەرمە بۆ (ئەدیب عەبدوللا)ی

عبدالرحمن بامەرنی

بەری بچمە ناڤ بابەتێ خوە یێ من مەبەست پێ، دێ شرۆڤەكرنەكێ دەمە ناڤ و نیشانێ گوتارا خوە. (ئەدەبا كوردی)، ئەم ھەمی دزانین بۆ جھێ دەستئاڤێ دھێتە گوتن، ئەڤ ناڤێن ھەنێ ژی ھەنە، وەك: (تەوالیت، مەرافق، wc وووو ھتد). (ئەدەبا عەرەبی)، د بەرامبەر وێدا ئەم (تورە) بكار دئینن، تورە ژی زێدەتر زاراڤەكە بۆ رێزگرتنێ لخوە دھێتە بكارئینان، ئەڤێن جوان د ئاخڤیت و رێزێ ل ھەمی تشتەكی دگریت، گەلەك جاران دێ بێژینە زارۆكەكێ نە تەبتێ یان یێ شویم (خوە تورە بكە)، دیسان د زمانێ عەرەبیدا، ئەدەب دھێت كو كەسەكێ رازی ژ خوە و یان كو رەوشت و رەفتارێن وی و ئەدەب وەك پەیڤەكا ئەدەبی ژی دھێت، كو ئاخفتنكەر د گوتنێن خوەدا یێ رەھوان بیت و چەندین پێناسێن دی، ئەگەر وەك پێناسە مە بەحسكربیت و كورتییا وێ لدویڤ تێگەھشتنا مە (ئەدەب) بۆ ژانرێن ئەدەبی دھێت، وەك شعر و چیرۆك و رۆمان وووووو ھتد. (بەرسڤەكا نەرم)، مەبەستا من بڤێ نەرماتیێ، ھەر تشتێ مرۆڤ لەزێ تێدا بكەت و ھەلچوونێن مرۆڤی د زێدەبن و مرۆڤ د گەرماتیێدا بیت، ھینگێ بریار و ھەلسوكەفتێن مرۆڤی ژی دێ لەز و بەزاتی پێڤە دیار بیت. د كوردەواری ژیدا ئەڤ زاراڤە ژی زێدەتر بۆ بارانا نەرم و دژوار ھاتیە گوتن، كو بارانا نەرم د عەردیدا دچیتە خارێ و ھەمی شینكاتی و داروبار ژێ مفادار دبن و تا ئاڤا بنعەرد ژی و د بەرامبەردا بارانا بوش و دژوار ژی، ھەمی تشتەكی دگەل خوە رادمالیت و بتنێ زیانێ دگەھینیت ھەمی تشتەكی. (ئەدیب) بێی ناڤ ئینانا ناڤێ وی بتنێ وەك نمونە، ئەز دێ بەحس ل ھەڤالەكێ خوە یێ ئەز گەلەك رێزێ لێ دگرم كەم، كو ناڤێ وی (رەشاد) بوو و رەشاد بخوە پەیڤەكا عەرەبییە و یانكو ل رێكا راست بچیت و د كوردیێدا رامانەكا جوداتر ھەیە و بتنێ وەك نوكتە ئەم دبەر دكانەكێ را چووین و گیایێ (رەشاد)ێ، كو وەك كەرەفسێ بۆ خارنێ یا خوشە، ل بەردەرێ دكانەكا زەرزەواتی دھاتە فروشتنێ، وی ژ خودانێ دكانێ پرسیار كر، كا ناڤێ ڤی گیایی چییە؟ ژبەركو ب زاراڤێ وان ناڤەكێ دی ھەبوو و دڤیا خوە ژێ پشت راست بكەت، ئینا من گوتێ: ئەڤە ناڤێ تەیە و پێنەڤێت دگەل كەنیێ، ھەمان تشت بۆ كاك ئەدیبی ژی، ئایا پەیڤا ئەدیب د زمانێ عەرەبی دا یا زانایە و دھەمان دەمدا د زمانێ كوردیێ ژیدا ھەمی كەس رامانا پەیڤا ئەدیب دزانن، كو كەسەكە ل سەر ئەدەبیاتا كاری و داھێنانێ دكەت؟!!

دا ڤەگەرم سەر بابەتێ خوە:

پشتی ئاھەنگا ئیمزاكرنا چیرۆكێن (ئەدیب عەبدوللای) درێ و رەسمەكێ جواندا ھاتینە گێران و پەرتووك كەتیە بەردەستێ خواندەڤانان، پەرتووك بگرنگی ھاتیە وەرگرتن و ھاتە خواندن و بەلگە ژی، كو چەند نڤیسەران ل سەر وێ پەرتووكێ نڤیسان، ژوان ژی نڤیسەر (شەمال ئاكرەی) گوتارەك بناڤێ (گلێش نە پەیڤەكا ئەدەبی یە!!)، د رۆژناما ئەڤرو (ژماره (3035) رۆژا 13/10/2021)ێ بلاڤكر و ئەز بخوە ژی ئێك ژوان بووم، كو من كومێنت ل سەر وێ گوتارێ نڤیسای و ئەز ژی ھندەكێ دگەل كاك شەمالی بووم، كو ئەگەر تا ناڤێ پەرتووكێ (چەپا گلێشی) یا جوان ژی بیت، لێ بۆ ناڤێ پەرتووكێ رەنگە یا جوان نەبیت و وەك ھەڤالینی، كاك ئەدیبی تەلەفون كرو و مە ھندەك دان و ستاندن ژی كر و ئەو تشتێ كاك شەمالی نڤیسی و ئەدیب عەبدوللای ھەر د رۆژناما ئەڤرو یا ژمارە 3040 یا رۆژا 25/10/2021ێ بابەتەك لبن ناڤێ (ئەدەب كەنگی بابەتەكێ ئەدەبی یە؟) بلاڤكری، من كار ب وێ نڤیسینێ و ب یا كاك شەمالی ژیڤە نینە و ئەز ل سەر نا راوەستم. بتنێ تشتێ بمن ڤە گرێدای، كاك ئەدیبی لدووماھییا گوتارا خوە ئەڤ چەند پەیڤە نڤیسینە و نە راستەخو ئاراستەی من كرینە، ئاراستەكرنەك ب رەنگەكی ھەر وەكو مرۆڤ دبێژیت بەلگێن مێوێ و برنج و قیمە و زەیت و بتنێ وەرپێچان مابیت، كو ببیتە ئیپراخ و دەقێ وێ ژی ئەڤە یە:

(تێبینی : پشتی من مانشێتێ‌ نڤیسه‌رێ‌ هێژا دیتی , كو گلێش نه‌ په‌یڤه‌كا ئه‌ده‌بی یه‌ ؟ هه‌ر ئیكسه‌ر هزر بوو من چێبوو , كه‌نگی ئه‌ده‌ب په‌یڤه‌كا ئه‌ده‌بی یه‌ ؟ گه‌رماتیه‌ك بوو من چێبوو كو پتر هزرا خۆ تێدا بكه‌م , لێ‌ ب مخابنی ڤه‌ هه‌ڤاله‌كێ‌ منێ‌ نێزیك ب ڤی ناڤونیشانێ‌ من حه‌سیا , هه‌ر ئێكسه‌ر د مالپه‌ر و ئه‌كاونتێ‌ خۆ دا بابه‌ته‌ك ب ڤی ناڤی ئازراند , ئه‌و گه‌رماتیا دناخێ‌ من دا مخابن گه‌رم نه‌هێلا .).

وەك بەرسڤدانەكا راستەوخو بۆ ھەڤال ئەدیبی، كو ئەو گوتارا من د مالپەرێ خوە یێ رەخنەیی (روانگە و رەخنە)دا لبن ناڤێ (ژ دیوارێ ئەدبێ بۆ دیوارێ فەیس بوكێ) بلاڤكری، چ گرێدان نە ژ نزیك و نە ژ دوویر دگەل ھزرا تە نەبوویە و مە ل سەر دان و ستاندن نەكریە ژی و بۆ سەلماندنا ڤێ چەندێ ژی، بتنێ وەك بیر ئانین:

من و ھەڤالێ نڤیسەر و وەرگێر (سادق سالح)ی كو بەری ھەیامەكی ل دھوكێ بوو و نوكە ل وەلاتێ سوید دژیت، مە ئەڤ دان و ستاندنە كربوو و من گوتبوویێ كو ئەز دێ بابەتەكێ بڤی رەنگی نڤیسم و دێ بەحسا زمان رەشییا ل سەر دیوارێ ئەدەبێ یێ بەری سەرھلدانێ و یێ فەیس بوكێ كەم و من گوتارەك بناڤێ (ژ دیوارێ ئەدەبێ بۆ دیوارێ فەیس بوكێ) بلاڤكر و تەمەنێ وی درێژ بیت، نوكە كاك سادق یێ ساخە و دشێت راستییا گوتنا مە ب سەلمینیت و تا وی راددەی، ئەو دگەل ھزرا من نەبوو كو ڤێ بەراوردكرنێ بكەمە گوتار، وەك ھەر جارێن دان و ستاندنێن من و وی، كو ئەم حەزدكەین ھەمی بابەتان بێخینە بن دان و ستاندنێن خوە.

ھزرێن تە بو تە و یێن من بۆ من:

لڤێرە نەكو بتنێ من ھزرا كاك ئەدیبی وەرنەگرتیە، بەلكو ئەدیبی بابەتەك یێ ئازراندی كو د بەژەوەندییا وی بخوەدا نەبوویە كو ناڤێ وی بخوە ئەدیبە و بتنێ وەك نمونە ئەز بینم، كو ئەڤە روودانەكا راستی ھاتبوو رویدان، ل سالێن ھەشتییان دوو كەسان گەلەك نەڤیان بۆ ئێك ھەبوو و ئێكی ژوان سكالا ل (دایرا ئەمنێ) یا سەردەمێ رژێما ژناڤچووی ل سەر ھەڤالێ خوە توماركر، كو وی دەست دگەل شورەشێ و پێشمەرگەی یا ھەی و بەلگێ وی ژی، كو ناڤێن ھەردوو كورێن وی ئێك مەسعودە و ئێك ژی ئدریس و پشتی ئەمنێ كابرایێ دی گازی كری و ئەڤ تومەتە داینە پال وی، گوتێ راستە ناڤێن كورێن من ئەڤەنە و لێ رۆژا ژ دایكبوونا وان بەری سالا 1975ێ یە و ھینگێ رێكەفتن دناڤبەرا حكومەتێ و شورەشێدا ھەبوو و لێ شوونا ھین من تاوانبار بكەن، ھەرن وی كابرای بگرن ئەڤێ سكالا ل سەر من توماركری، ژبەركو ناڤێ كورێن وی ژی ئێك مەسعودە و ئێك ئدریس و رۆژا ژ دایكبوونا وان پشتی 1976ێ یە و ھینگێ باوەری بۆ ئەمنێ دروست بوو و ئینا ئەو زەلام بەردان و ئەڤێ سكالا ل سەر توماركری و تومەت داینە پال، دەستە سەركرن.

تێبینی:

1ـ درۆژناما ئەڤرو ژمارە 3046 یا رۆژا 3/11/2021ێ دا بلاڤبوویە.

2ـ لینكێ رۆژنامێ https://en.calameo.com/read/00013941895ec6ae1c3eb

وەفایەك بۆ مەلا بەختیار

عبدالرحمن بامەرنی

من ئەو وەك سیاسەتمەدار ھند ناسنەكرییە ھندی وەك رەوشەنبیر، رەوشەنبیرەك ب ھەمی پیڤەرێن خوە. ل سالا 2005ێ بوو و ھینگێ دەستووری بۆ رۆژناما چاڤدێر ژلایێ ویڤە ھاتەدان و گوت: "چاڤدێر رۆژنامەكا نیمچە رەخنەییە و ب رەخنێ مللەت پێش دكەڤن و كومەلگەھـ بۆ باشترینێ دھێنە گوھورینێ و گەندەلی ب ھەمی جومگەیێن خوەڤە بەرەڤ كێمیێ و نەمانێڤە دچیت". ھینگێ ھەرێم ل سەر دوو ئیدارەییان یا دابەشكری بوو و گوتە من: "ژ رەخنێ نەترسە، رەخنێ ل ئیدارەییا سلێمانیێ بگرە و دڤێت مرۆڤ ژ كێماسیێن خوە دەست پێبكەت و ل بەرەیێ ھاولاتی بیت و ھەر دەست درێژییا ل سەر مافێن وی یێن ھاولاتیبوونێ بھێتە كرنێ، بێترس رەخنە بكە و چاڤدێر دڤی دەربارەییدا شییا تاكە رۆژناما رەخنەیی بیت ل دەڤەرا بادینان ڤی دەرگەھی ب قوتیت و شییای پێن خوە ل عەردی بشدینیت و ئەرشیفێ مە، ڤێ دیدەڤانیێ بۆ مە ددەت و نوكە ژی د (روانگە و رەخنە)دا، ئەم ل سەر ھەمان شوپێ دچین.

تاكە فێستیڤالا ل ھەرێما كوردستانێ شیایی بەردەوامیێ بدەتە خوە، ل ژێر سەرپەرشتییا وییە و 24 سالێن بێ ڤەقەتییان، شەرێ ناڤخویی و قەیران و كورۆنا و فێستەڤالا گەلاوێژ نە راوەستا و ئەڤە چار سالە لدویڤ پیڤەرێن جیھانی بوویە فێستیڤالەكا ناڤ نەتەوەیی و ئەگەر وەك دەڤەرا بادینان ئەز بەحس دكەم، ب ھاریكارییا وی و تێگەھشتنا وی، ھەر سال سێ نڤیسەرێن بادینان بەشداری فێستیڤالێ دبن و خەلاتی ژی دگەل خوەدئینن و ئەڤە ژبلی پرۆژێن وی یێن دی یێن رەوشەنبیری و دیموكراسی، وەك رۆژنامە و كوڤار و ئەڤێن وی باوەری پێھەی د بوارێ دیموكراسیكرنێ و یەكسانیێ و باشترین بەلگە ژی، كونفرانسێن(دابران و فیمینزم)ن.

لڤێ ھەرێما سەیر و سەمەر سیاسەتكرن و خزمەتكرن یا ئاسان نینە، ژبەر ھەلویستێن وی یێن نە گوھور، چەندین جاران باج دایە و ژ ھەلویستێن خوە پاشكەز نەبوویە و چەندین جاران، پێكولێن ژناڤبرنا وی ھاتینە كرن، چ ب ئاشكەرا و چ ژی ڤەشارتی و دووماھی جار، ژەھردانا وی..

ساخیێ و تەمەن درێژیێ بۆ وی دخوازین و دبێژین، مللەت پێدڤی كەسێن پاقژە و پێدڤی ئاڤاكرنا عەقلییە، نەك بلندكرنا ئاڤاھییان، كو وی ل سەر چەندین كەنالێن راگەھاندنێ ئەڤ چەندە ب تەحەددایێ گوتیە، كو وی ھیچ كومپانی و پرۆژێن بازرگانی نینن و ئەڤ (نینە) ژی لڤێ ھەرێما قوربسەر ھەروەكو سوران دبێژن، كێشەییان بۆ مرۆڤی دروست دكەت و ئەڤە شوونا دەست خوشی بۆ مرۆڤی بھێن.

ڤەگەرە ژبەركو تاكە تشتێ ل ھەرێما كوردستانێ پێدڤییا مە پێ ھەی، كەسانێن میناكێ ھەوەنە ژبۆ پێشخستن و بەرفرەھكرنا پرۆژێن دنییا دیتنێ و نەك پێشخستن و بەرفرەھكرنا پرۆژێن بەریكێ و كومپانیێن بازرگانی و تە ئەم وەسا یێن فێركرین، تاكە دارا بەر دچنێ، دارا بەرھەمدارە...

ژ ئەدەبێ روسی.. دەما نڤیسین ناخێ مرۆڤی د ھەژینیت!!

 ئەنتون تشیخوف

ئەز بەری دوو خولەكان یێ مریم.. من خوە بتنێ دگەل كومەكا فریشتان دیت و ھندەكێن دی كو ئەز نزانم ئەو چنە. من ھیڤی ژێكرن من بزڤرینە ژیانێ ڤە، ل سەر خاترا ھەڤژینا من، كو ھێشتا یا بچیكە و كورێ من یێ ھێشتا روناھی نەدیتی. ھەڤژینا من ئەو سێ ھەیڤ بۆ یا ب دوو گیان، چەند خولەكێن دی ژی دەرباز بوون.

ئێك ژ فریشتان ھات و تشتەك وەك شاشا تەلەفزیونێ د دەستان دا بۆ و گوتە من، دەم دناڤبەرا دنیایێ و ئاخرەتێ دا گەلەك یێ جودایە، لڤێرە خولەك بەرامبەری گەلەك رۆژێن وێرێ یە.

ئەو شاشە ھلكر و ئێكسەر ھەڤژینا من دەركەفت و زارۆیەكێ بچیك ل بەر سینگا بوو! وێنە گەلەك یێ بلەز بوو و ھەر چەند خولەكان دەم دھاتە گوھورینێ، كورێ من مەزن دبوو و مەزن دبوو، ھەر تشتەك دھاتە گوھورینێ. ھەڤژینا من، ناڤ مالی گوھوری و شییا موچێ من یێ خانەنشینێ وەربگریت. كورێ من ل قوتابخانێ ھاتە وەرگرتنێ، خیشك و برایێن من ئێك ئێكە ھەڤژینی پێكئینان، ھەمی بوونە خودانێن ژیانا خوە یا تایبەت. گەلەك روودان پەیدابوون. دناڤ قەرەبالغییا لڤینێ و وێنێ شێلی، من وێنەك ل پشت وان دیت یێ نەلڤ، ھەر وەكو سیبەرەكا رەش، گەلەك خولەك دەرباز بوون، ئەو سیبەر ل ھەمی وێنان وەك خوە بوو.

ل وێرێ چەندین سال دەرباز بوون و ئەو سیبەر ھەر بچیك دبوو و كێم دبوو. من گازی ئێك ژ فریشتان كر، من ھیڤی ژێ خواستن ئەو وێ سیبەرێ بۆ من نزیك بكەت، تا بشێم باش ببینم. فریشتەكێ دلوڤان بوو، نە بتنێ وێنە بۆ من نزیك كر، بەلكو وێنە لدویڤ دەمێ دنیایێ پیشاندا و ھێشتا ئەز یێ ل جھێ خوە روونشتی، ئەڤە پازدە سالە، ئەز ڤێ سیبەرێ دبینم دكەتە گری و ئەز دكەمە گری، ئەڤ سیبەرا ھەنێ ژی، بتنێ "دەیكا" من بوو.

وەرگێران: ع. بامەرنی

شانووگەرییا ناتانییا و راوەستیانەك؟!

 عبدالرحمن بامەرنی

ھەر كەسەك خوشیەكێ ژ ھونەری وەردگریت و ئەز دێ ڤێ خوشیێ سەر رێژ كەمە ھونەرێ شانۆیێ و ئەو شانۆگەریا ئەز ئەڤروكە چوویمە پێش، كو ژ لایێ رێڤەبەریا ھونەرێ شانۆیێڤە ل ھولا پەیمانگەھا ھونەرێن جوان ھاتبوو نمایشكرن و پالپشتیكرن. ئەڤرو نمایشا دوویێ بوو و لێ یا گرنگ بۆ من، ئەز شییام بدلێ خوە ڤێ شانۆگەریێ ببینم و من پرانیا لڤینێن ئەكتەران، دەنگێ موزیكێ، روناھی یا ل سەر دەبێ شانوویێ و ئاخفتنا ئەكتەران، كو ل ھەمی شانوگەریێن ئەز چوویمێ، ئەكتەران ل سەر دەبێ شانۆێ فونەتیكەكا تایبەت بخوە ڤە ھەیە و ھەر وەكو دبێژنە بینەران، ئەڤە شێوازێ ئاخفتنا مەیە و ئاخر دڤێت ژی تشتێن جوداتر ھەبن، بۆ نمونە: دەبێ شانوویێ بلندتر بیت و لڤین و نمایشا ئەكتەران ب شێوازەكی بیت چاڤێن بینەران بدویڤ خوەڤە راكێش بكەن، ھەر چنەبیت دا چاڤێن بینەری دگەل ھەناسە و لڤینان بن و تشتێ خوش ژ شانۆگەرییان ئەز حەژێدكەم ژی ھەر ئەڤە یە، دەما ئەكتەر ل سەر دەپێ شانویێ و ب ھاریكارییا موزیكێ و رۆناھیێ، كارلێكی دگەل من وەك بینەر دكەت و من دكەتە بەشەك ژ ئەوا دھێتە نمایشكرن.

ئەڤا ل سەری نە بابەتێ منە، لێ ئەڤە رامان نینە ئەز ڤی كارێ جوان بەحس نەكەم، ئەكتەرێن زیرەك و خودان شییان ب بەرچاڤێن من كەفتن و ھێشتا پەیمانگەھـ ب دووماھی نەئینا بوون، كو ئومێدەك لدەف من پەیداكر، مە كارێن ھونەرێ شانۆیێ یێن جوان یێن ھەین، لێ ل جھێن ڤەشارتی و تایبەت بۆ ھندەكان دھێنە نمایشكرن و ھینگێ ئەز تێناگەھم مفایێ نمایشا بەرزە دێ چبیت؟!!

باژێر ب گەلەك تشتان ئاڤا دبن، ئەڤە گەلەك جاران من یا ھاتیە بەر گوھێن من، لێ ب تاوەران ناھێنە نمایشكرن، تاوەر بتنێ بۆ لبەر كێشانا سیلفیانە لێ ھونەر و چایخانە و كافیتریایێن رەوشەنبیری و ھونەری، پەرتووكخانە و شوونەوار و موزەخانە باژێری دئیننە پێش و دبنە ناسناما باژێری و خەلكی بەرەڤ باژێری ڤە دئینن و دەما دزڤرنە باژێرێن خوە یان وەلاتێن خوە، ئەو بەحسا تاوەرێن مە ناكەن، ژبەركو یێن مە ل بەر چاڤێن یێن وان ھەر ژمارە نینن، لێ دێ بەحسا ھونەری كەن و رەوشەنبیرییا تە و یا من كەن..!

ستاقێ كاری

شانووگەریا ناتانیا

دەرھێنان و ئامادەكرن: ھا عبدالعزیز

دراماتورگ: مسعود عارف

نڤیسەر: بدل محارب

ئەكتەر:

شرین ئەیوب

نیگار تبی

عمر عادل

وارڤان ھشیار

احمد موستەفا

میزەند سەعید

ھرمان ھاشم

ھیفان امین

بێكار خلیل

سەربار تەیب

ھ. دەرھێنەری:

ڤەدەر سەعید

ــــــــــــــــــــــــــــــــــــــــ

http://rwangauraxna.com/ba/detail.aspx?IDNews=4828

رەخنەیەك و دەستخوشیەك

 ع: بامەرنی

د ئەڤ سالەدا چەند كەساتیێن دھوكێ ژ نڤیسەر و ھونەرمەندان وەغەرا داویێ كرن و ژوان ژی (سەدیق شەرو، نزار ئەحمەد بامەرنی، تێلی سالح، عەبدولغەنی كوڤلی و ئیسماعیل تاھر جانگیر و سوزان عەبدولھادی نەفروز و دھی ژی ھونەرمەند ھەكار باجلوری)، كو براستی بیت ئەڤ كەسێن ھەنێ ستوونێن ھەر باژێرەكی نە و ھەر مللەتەكینە. ژبەركو ھندەك كەسێن ھەین بتنێ بۆ خوە و بۆ خێزانا خوە و بۆ دەروبەرێن خوە دژین، لێ ژیانا نڤیسەر ۆ رۆژنامەڤان و ھونەرمەندان جوداتر، دژین دا تشتەكی بگەھینن كومەلگەھی و جوانیەكێ ل سەر جوانییا خوەزایی زێدە بكەن و نڤیسین و ھونەر ژی، مللەتان پێش دئێخن و دئینە پێش.

یا من دڤێت ئەز بێژم، ئەم چاوان خوە لڤان كەساتییان بكەینە خودان ئەڤ كەساتیێن ژیانا خوە بۆ مللەتی تەرخانكرین، ئەرێ مانە پێدڤییە وەغەرا وان ژی ب شێوەیەك جوداتر بیت؟ ئەگەر ئێكسەر بچمە سەر بابەتێ خوە و ئەوا ئەڤرو ل سەندیكا ھونەرمەندێن دھوكێ من دیتی ب ھەلكەفتا وەغەرا بێ داوییا ھونەمەند (ھەكار باجلوری)، دنیایەك ئەز شاد كرم، ژبەركو ھەر چنە بیت دەما ھونەرمەندەكێ دی خەباتێ دكەت و دبیاڤێ خوەدا كار دكەت، دێ ھەست كەت پشتی مرنا وی ژی دێ گرنگی ب وی ھاتیە دان.

گرنگ نینە ئەو پیتەدان چەند بیت، لێ خرڤەبوون و پارچە موزیكەكا بۆ ڤێ ھەلكەفتێ گونجای و خواندنا پەیڤەكێ تێرا وێ چەندێ ھەبوون دەستخوشیێ ل سەندیكا ھونەرمەندان بكەین و خوزی ھەمی سازیێن مە یێ رەوشەنبیری ئەڤێن دیتر ژی، ھەمان پێنگاڤ بۆ ڤان كەساتییان ھاڤێتبان، ئەڤێن ژیانا خوە بۆ جوانكرنا روویێ شارستانییا مللەتی تەرخاندكەن، ژبەركو ئەو نە ملكێ خوە نە، بەلكو ملكێ باژێرێ خوە و كومەلگەھێ خوە و نەتەوا خوەنە.

لدووماھیێ ژ خودێ دخوازین، جھێن وان بەھەشت بیت و باركرنا وان ژناڤ مە، ڤالاتیەكێ ل پشت خوە دھێلیت و باژێر ب داھێنان و بزاڤێن رەوشەنبیر جوانە و ئاڤا دبن.

ــــــــــــــــــــــــــــــــــــــــــــــــــــــــــــــــ

http://rwangauraxna.com/ba/detail.aspx?IDNews=4834

ژ دیوارێ ئەدەبێ بۆ دیوارێ فەیس بوكێ

 عبدالرحمن بامەرنی

گەلەك ناڤێن دی بۆ ئەدەبێ دھێنە گوتن و من بەحسا (ئەدەبی و ئەدەبیاتا) نینە و ژوان ناڤێن بەربەلاڤ و ل سەر زمانێ خەلكی، وەك: (تەوالێت، دەستئاڤ، ئەدەب، مەرافق و wc) و ھەمی ژی ئێك رامان ددەن، بابەتێ من دڤێت ل سەر بنڤیسم چ گرێدان ب وان ھەمیان ڤە نینە، ژبەركو ئەو كریارا دوێرێڤە دھێتەكرنێ، بابەتێ من نینە و بابەتێ من بتنێ ل سەر (خەبەر رەشیێ)یە..

خەبەر گوتن و جنێودان و خوە داپیڤان یان ھەر ناڤێ دی بۆ بدانی، ھەر ھەمی دچنە دخانا لاوازیێدا. چ ئەو لاوازییا ھەنێ ئەو بیت یا مرۆڤی شیانێن بەرھنگارییا راستەوخو نەبن یان ژی مرۆڤ جھێ وی یان وی كەسی بخوە ناس نەكەت یان مرۆڤ ل بەرامبەری وی نەشێت باخڤیت یان ژی مرۆڤ ل جھەكێ ئارام بیت و دووری وی كەسی بیت، ئەڤێ مرۆڤ خەبەرا دبێژیتێ.

دیرۆكا خەبەر گوتنێ ئەڤا من دڤێت بكەمە میناك، بەری سەرھلدانێ بوو و درووستر ل سەر دەمێ سەدامی بوو، ئەدەبێن مزگەفا نەمابوون، ئەگەر ل سەر دەرگەھێن وێ ب دەھان خەبەر ب بەرچاڤێن تە نەكەفتبانە و ڤێجا ب ئەدەبا را ھەرە، یێن قوتابخانێ و خارنگەھا وووووو و ل وی دەمی كەس نەدشییا راستەوخو بەرھنگارییا سەدامی ببیت، بوویە پەنا دبرنە بەر نڤیسینا خەبەر رەشیێ و ھەر چنە بیت، ل وێرێ بێھنا خوە پیچەك دئینا، ھەر چاوان دەما زارۆكەك خوە ددەتە بەتەنێ و خوە دادپیڤیت یان ئێك زیانا ئێكی بكەت و نەزانیت كییە و ب خەبەرا، دلێ خوە ھین بكەت.

تاڤێرە ئەز زێدەتر ناچم و دێ ھێمە سەر ئالاڤێن نوی یێن جیھانی بەردەستی مە كرین و ژوان ژی دیوارێ فەیس بوكێ، كو ھەر كەس دشێت بكەتە سەكویێ خوە و شوكور دێ ئەڤرو دیوارێن دەھان كەسان بینی و یا دەست ب سڤكاتیێ و خەبەر رەشیێ كری و ئەو پیڤەرێن من بۆ خەبەر رەشیێ ئیناین، پێدڤی دوبارەكرنێ ناكەت، ھەمان تشت ل سەر ئەڤان ژی دگونجیت، ئەڤێن ئەزمان رەشیێ دكەن.

خەبەر رەشییا ڤی سەردەمی ل سەر دیوارێن سوشیال میدیایێ، زێدەتر بۆ كەسانە، ئەڤ كەسێن سەركردایەتییا مەدكەن و ھەر كەسەكێ ژ حزبا مە نەبیت، ئەم سەركردێن وان سڤك دكەین و بتنێ ئەگەر گوتارا خوە یا كورت كورتر لێبكەم و دا بێ چەپ و چیر بگەھیتە ئەڤێن خەبەر رەش.

مە دیت ل بەرییا چەند سالان مە سڤكاتی ب سەركردێن عەرەبێن عیراقی دكر و د بەرۆڤاژیدا، مەددیت وان ژی وێنێن سەروكێن مە و كەساتییا وان بن پێدكر. لناڤ مە ژی ھەمان تاس و ھەمان حەمامە، لڤێرە ئەم سڤكاتیێ و خەبەر رەشیێ ب سەركردێن لایەنێ دی و حزبێن دی دكەین و ل وی ئالی ژی، ھەمان تشت دگەل سەركردێن مە دكەن و ئەگەر خەبەرێن فەیس بوكێ ب ترازییا خەبەر رەشییا بەری سەرھلدانێ ژی ب پیڤین، ھەمان وەزنە و ھەمان عەلبە و كەسێن لاواز بڤێ چەندێ رادبن و من دڤێت ڤێ گوتارا كورت ب گوتنەكێ بدووماھی بینم، چ كانیێن زەلال مە نینن یان مە نەھێلاینە ئەگەر مە تبلا خوە نەكربیتە دناڤدا و دەما ئەم بەرەزیڤكێ خوە دكانیا ئێكی وەردكەین، ئەم دڤێت ھزرا شێلیبوونا كانیا خوە ژی بكەین.

یا تا نوكە ئەم تێنەگەھین، نە ئەم دزانین سەركردێن خوە بكەین ھێما و ئەم ژبیردكەین، كو ئەڤە دیوارێ فەیس بوكێ یە نەیێ ئەدەبێ.

ـــــــــــــــــــــــــــــــــــــــــــــــ

لینكێ گوتارێ ل سەر سایتێ روانگە و رەخنە:

http://rwangauraxna.com/ba/detail.aspx?IDNews=4819

دا ئێك و دوو (حیل) بكەین!

 عبدالرحمن بامەرنی

ڤان ھەلبژارتنان ئەم ل بەرامبەری چەند بابەتان راوەستاندین، ئێكەم بابەت ل بانگەشەیا ھەلبژارتنا مە گەلەك ھەلچوون دیتن و مە گەلەك پوست دیتن، جورە ھێرشكرن و سڤكاتیپێكرن دناڤدا بوون، كو پێدڤی نەدكر ئەو ھەلچوونە لدەف مە دروست بانە، ژبەركو ھەر چەند سالان جارەكێ ھەلبژارتن یێن دھێنەكرنێ و ئەڤە ژبلی ھەلبژارتنێن پەرلەمانێ كوردستانێ دگەلدا و یێن جڤاتا پارێزگەھان ژی، یان كو ئەوا دناڤبەرا ھەلبژارتنێ بۆ ھەلبژارتنا دی تێرا وێ ھەیە ھەر لایەنك و ھەر كاندیدەك بزانیت دێ چاوان و چ رێك گریتە بەر، كو خەلك باوەریێ بدەنێ و دەنگێن دەنگدەران بۆ خوە مسوگەر بكەت و پێدڤی ناكەت بار بھێتە سەر ملێن گای، شنی بەرپێكێن خوە ب شدینین.

لێ ھەر چاوا بیت ل زارۆكینیێ، ئەم دا ل سەر دوو بەرەیان دابەش بین لدویڤ جورێ یاریێ و مە ھەڤركانێ ل سەر سەركەفتنێ دكر و لدووماھیا یاریێ، مە تبلێن خوە یێن قلیچێ دكرنە دناڤ تبلێن ئێكرا و مە ئێك و دوو حیلدكر.

دووەم بابەت حزبێن مە یێن سیاسینە و ئایا ئەو چاوان یاریێ بكەن؟ وەك دبینین ژ ھەلبژارتنێ بۆ ھەلبژارتنێ رێژا ساختەكاریێ كێمتر دبیت و ژ ھەلبژارتن بۆ ھەلبژارتنێ خەلك ژی یێ تێدگەھیت و باندورا عەشیرەتێ یا لكێمیێ ددەت و ئەڤ سیستەمێ نوكە، سیستەمێ بازنەی بخوە ژی تێرا وێ چەندێ ھەیە، لایەنێن سیاسی و ئەڤێن حەزدكەن خوە بەربژێر بكەن چ سەربەخو یان دناڤ حزبەكێدا، كو بزانن دێ چاوان ھەستا دەنگدەری بۆ خوە راكێشن و ئەڤە ژی ب شیان و پاقژی و ئارمانجێن ویڤە گرێدایە!

ئەگەر تا راددەكی ئەڤ باندورە ھێشتا مابیت، باوەردكەم بۆ ھەلبژارتنێن بھێت دێ سەنگا وێ كێمتر بیت و خەلك دێ بەربژێری بتنێ خوینن، نە لایەنێ ویێ سیاسی و نە ژی عەشیرەتا وی و دڤێت تێبگەھین، ھەلبژارتن زانستەكە و ژ وێ چەندێ مەزنترە، كو ئەم سڤك بەرێخوەبدەینێ و یێ دڤی زانستی بگەھیت، دێ دەنگێن خوە زێدە كەت.

بوویە باشترە حزبێن مە ژی ئێك و دو حیل بكەن و ل بەغدا بتنێ مە ئێك بەروك ھەیە، ئەم شەری دگەلدا بكەین و ل سەر مە پێدڤییە دباش و خرابیاندا د ئێكگرتی بین.

بابەتێ تایبەت ژی كو بمە وەك (روانگە و رەخنە)ڤە گرێدای بوو، چەند گوتار مە بلاڤ نەكرن، ژبەركو مە ھەست دكر جورە بانگەشە بۆ لایەنەكێ دیاریكری یان بەربژێرەكی یا دناڤدا یان دێ زیان بدەنگێن ھندەك بەربژێران كەڤیت، بوویە مە داخواز ژ نڤیسەرێ خوە دكر كو د بلاڤكرنا وێدا لمە ببورن و ژوان دخوازین ئێك و دوو حیل بكەین، ژبەركو بانگەشە و دەنگدان مافێ لایەنێن سیاسییە و مالپەر دێ یێ مە ھەمیان بیت و ھندی بشێین دێ سەربەخوویا وی پارێزین.

ـــــــــــــــــــــــــــــــــــــــــــــــــــــــــــــــــــــــــــــــــ

لینكێ گوتارێ ل سەر سایتێ روانگە و رەخنە

http://rwangauraxna.com/ba/detail.aspx?IDNews=4802

سوزان مر، نەخێر سوزان نەمرە؟!

 عبدالرحمن بامەرنی

من برێكا نڤیسینێ ئەو ناسكر، نڤیسەرەك كەس دوێ نەدگەھشت، دەھان نڤیسینێن وێ د مالپەرێ (روانگە و رەخنە)دا من بلاڤكرینە، ل ئێكێ گەلەك ھێرشی وێ ھاتە كرنێ، نە ژبەركو نەشیابوو پەیاما خوە بگەھینیت، لێ ئەوێ ل بلنداھیەكێ دنڤیسی گەلەك مەزنتر ژ كەلەخێ خوە یێ بچووك و ئەمێن ب كەلەخێ خوە یێ تەمام، نەدشیاین دوێ بگەھین.

ئێك ژوان بابەتان گوت: "ئەگەر شوونا گەنج پارەی ب مەزێخن و كوچبەر ببن، شوونا وێ پرۆژێن بچووك ب وی پارەی ڤەكەن و دێ شیانا ژیارا خوە پێ دابین كەن". ئەوێ بڤێ نڤیسینێ كێشەیەك بەرچاڤ كر، ب چوونا گەنجان دێ ئالیسەنگی كەڤیتە دناڤبەرا كور و كچان دا و رێژا كچان دێ زێدە بیت و كور دێ كێم بن! ئەوێ ھەست ب مەترسیەكێ دكر، كو رەنگە ئەگەر نوكە ب زیقی دەرنەكەڤیت ژی، پشتی چەند سالێن دێ قەیرەبوون و كێشێن كومەلایەتی مشە بن و ژ بەردەست دەركەڤن.

ئەوێ نڤیسی و ئەم دوێ نەدگەھشتین، ئەم بەزینە نیشتیمانیاتا و ئەم دابەزینە سەر حكومەتەكا بێ پلان، مە بەھانە بۆ گەنجان دەرێخستن و ئەوێ ل لاتەكێ دنڤیسی و مە ب عەقلێ خوە یێ بچووك ل لاتەكا دی دخواند و مە ب كومێنتێن خوە ھێرشی وێ كرن و نە بتنێ ئەڤ بابەتێ وێ، بەردەوام ھزرێن وێ دجودا و وێرەك بوون.

دوو جاران ب ھەلكەفت من سەرەدانا وێ كریە ل مالا وێ ل دێرالوكێ، ھەر كەسێ ئەو ژ نزیك نەدیتبیت، بتنێ قەرقودەك بوو، دڤیابا بالیفك ل بەر پشتا وێبا و خارن و نڤستن و دەركەفتن و ھلگرتنا وێ شووشتن و ڤەشووتن، ھەمی ب ھەلگرتن بوون، لێ ھزرێن وێ، داھێنانێن وێ گەلەك دمەزن بوون، ژ كەسەكێ ئاسای زێدەتر دژیانێ دگەھشت، ئەز دبێژم دژیانێ دگەھشت، ژبەركو دویربینیا وێ زێدەتر بوو.

وێ شعر دنڤیسین و دگەل سەیدایێ خورشید ئەحمەد، فەیس بوك كربوونە دیوانا شعری و ئێكەم پەرتووكا وان من پێشەكی بۆ نڤیسی و دیزاین ژی و چەندین پەرتووكێن شعری دگەل سەیدایێ خورشید ھەنە، ددوماھی ناما خوە ژی دا كو رەوشا وێ بەرەڤ خرابینێڤە دچوو گوت: "أربعاء 9:20 ص

سلاڤ بخودێ هەما ئەز کەلەخم گەلەک نەیا باشم هەکە مرم ژی گەردەنا من ئااازاکەن ئەز تەحملێ ناکەم

ئەز دوهی داخل کرم دوو سێ لان و شرینقەکرنە ناڤ هەتا شەڤێ ل خەستێ بوم

ئەڤروژی گوت بینن یان ئامێدیێ یان دهوکێ دێ من داخل کەنە ڤە".

خەبەرێ وەغەرا تە یا ھەتا ھەتایێ ئەم ھەمی ئێشاندین، خودێ جھێ تە بكەتە بەھەشت و لدەف مە تو یا ئازاكری و دێ زیندێ مینی..

ــــــــــــــــــــــــــــــــــــــــــــــ

http://rwangauraxna.com/ba/detail.aspx?IDNews=4792

بۆ (كوردسات نیوز) ل سەر دەستەسەركریێن بادینان مە ھوو گوت

 عبدالرحمن بامەرنی

ھەر چەندە ئەڤا نوكە دنڤیسم و ھندەك زێدەتر ژی، بابەتێ دان و ستاندنا مەبوو ل سەر كەنالێ عەسمانیێ كوردسات نیوز، كو بریار بوو ئەڤرو دادگەھكرنا (4) دەستەسەركریێن بادینان ل ھەولێرا پایتەخت برێڤە بچیت، لێ من ب باش زانی ئەز بكەمە بابەتێ نڤیسینەكێ ژی و بابەت زێدەتر بھێتە گەنگەشەكرن.

تشتێ مە دڤیا زێدەتر فوكسا خوە یا ئاخفتنێ بدەینە سەر، ئەرك و مافێن ھاولاتییان و ئەرك و بەرپرساتیێن حكومەتێ بەرامبەری ھاولاتییان بوون. كو بدیتنا مە، مافێ ھەر كەسی ھەیە داخوازا مافێن خوە یێن خزمەتگوزاری بكەت، داخوازا مافێن خوە یێن ژیانێ بكەت. پێنەڤێت ژی ھاولاتی ئەڤان داخوازییا دێ ژ حكومەتێ كەت و حكومەت ژی وەك ئەركەكێ رەوشتی و بەرپرساتییا وێ، نەچارە لدویڤ گازییا وی بھێت و روونكرنا بدەتێ، ئەگەر نەشییا وان داخوازییان بۆ بەردەست بكەت و ھینگێ دێ ھاولاتی بیتە بەشەك ژ حكومەتێ و تشتەكێ ئاساییە ژی ھاولاتی بۆ بدەستڤەئینانا ڤان داخوازییان، گردبوونەڤەیان بكەت، خوە پیشاندانان بكەت، رەخنێ بگریت و وەك چاوان، دناڤ خێزانێدا، ژن یان زارۆك یان گەنجی داخوازی ژ كەسێ ئێكێ یێ خێزانێ ھەنە و وی نەچار دكەن، پێدڤیێن مالێ ژ خورانێ و جل و بەرگان و دانا پارێ خانی و كارەبێ و ئاڤێ و نوژداری و كرینا دەرمانان بەردەست بكەت، ژ كیڤە بینیت؟ ئەو بابەتەكێ دییە و دڤێت ئەڤ بابە یان كەسێ بەرپرس ژ خێزانێ بۆ تاكێن خێزانێ روھن بكەت، ھەر چەندە زارۆكێ ساڤا شیر دڤێت و ئەو نەیێ نزانیت و ھوسان، ھەمان نمونە مەزن بكە دناڤبەرا ھاولاتی و حكومەتێدا.

یا نەدروست دڤی دەربارەیدا، ئەگەر ھات و زەلامی سەرا داخوازكرنا شیرێ زارۆكێ ساڤا ل ژنێ حەیتاند و پشتا خوەدایێ، یان كریا خانی ووووو ئەو خێزان ئێشاندن و سڤكاتی پێكرن، ھەمی دێ نەفرەتان ل وی كەسی كەن، كو كریارەكا شاش یا كری، ژبەركو ئەو مافێ وانە و ھوسان، دەما حكومەت دھێت و ڤان كەسان دەستە سەر بكەت، ژبەركو داخوازا مافێن خوە یا كری، ھەمی كەس دێ وێ حكومەتێ لاواز بینن، ژبەركو نەشیایە لدویڤ داخوازیێن ڤی ھاولاتی بچیت.

تشتێ من تیشك كێشایە سەر ژی كو ب مخانیڤە نمونێن وێ ل ھەرێما كوردستانێ ھەنە، دەما ئەم وەك حكومەت رەفتارێ وەك حزب دكەین، مەبەستا من ب حكومەت، ژ بلندترین پوستێ حكومی تا دگەھیتە بەرپرسێ ھوبەكێ ل دام و دەزگەھەكێ حكومی، ھینگێ دێ ئەڤ كەیسە د بەردەوام بن، ئازادییا رادەربرینێ دێ ھێتە سنورداركرن و ھەژاری دێ مشە بیت و گەندەلی ب بەرچاڤی دێ ھێتە كرن و دەرئەنجام ژی، ئاڤاھی و تەوار دێ ھەر بلند و بلندتر لێھێن و مەلاق و كویلاتی ژی دێ تژی جاددێ و كولانێ بن.

خالەكا دی ژی رەنگە ئەم پاشماوێ وێ یێ خراب نەزانین، سەرەدەرییا حكومەتێ دگەل ڤان كەیسان، چ حكومەت بزانیت یان نەزانیت، جڤاكێ نیڤ دەولەتی دبینیت و دخوینیت و ھەلسەنگاندنا ھەرێما كوردستانێ دكەت، ب حكومەت و پەرلەمان و حزبڤە د ھەلسەنگینیت و ھینگێ ئەو بریارێ ددەن، ئایا د ئایندەدا مە شیانێن خوە رێڤەبرنێ دێ ھەبن یان نە، كو ئەو گلوپا كەسكا سەرخوەبوونێ بۆ مە ھل ب بكەن یان نە؟!!

ــــــــــــــــــــــــــــــــــــــــــــــ

لینكێ گوتارێ ل سەر سایتێ روانگە و رەخنە

http://rwangauraxna.com/ba/detail.aspx?IDNews=4761

حزبێن دەستھەلاتدار خەلكی ب (نانبرین)ێ دترسینن و یێن ئیسلامی ب (خودێ و پێغەمبەران)

عبدالرحمن بامەرنی

مە بەحسا رێڤەبەرا و بەرپرسێن ئێكێ دكر، كابرای دیموكراسیەت ب مە دفروشت و دگوتی: "ژ باشیێن دیموكراسیەتێ، دەما كەسەك ل جھەكی بھێتە دانان، دێ لدویڤ زیرەكاتی و پەیوەندیێن وی بیت، دەوروبەرێن وی دێ وی نرخینن، ئەگەر شیانێن رێڤەبرنێ و ھەلگرتنا بەرپرساتیێ و بریاردانێ ھەبن، دێ دەنگی پێدەن و ئەگەر ئەڤ سالوخەتێن ھەنێ لدەف نەبن، دێ ھەڤركێ وی، شوونا وی باوەرییا وان بدەستڤە ئینیت، ئەڤێن مافێ دەنگدانێ ھەین بۆ وی پوستی".

تاڤێرە ئەز دگەلدا یێ ھەڤرا بووم، ئەگەر وەك وی بیت، ھەر خودان پوستەك دا كو لجھێ خوە بمینیت یان دەنگان بدەستڤە بینیت، كو بەرپرساتیەكێ بدەستڤە بینیت، دڤێت باوەریا ئەڤێن ل دەوروبەرێن خوە پەیدا بكەت. دڤێت ژ مەزناتییا خوە و ژ خوە نەگرتنا خوە چەند پایەكان بھێتەخار، ژبەركو ئەو دێ پێدڤی دەنگێن ھەمیان بیت، دەنگێن پلە نزمەكی دگەل بەرپرسەكێ پایە بلند دێ وەك ئێك بن. ئەو نەچارە سپێدەھییان سلاڤی ھەمیان بكەت، پسیارا كێم و كاسیێن وان بكەت، خوە دیاربكەت كو دێ شێت بەرەڤانیێ ژوان ھەمیان كەت و چ جوداھیێ دناڤبەرا كەساندا ناكەت، خوە مرۆڤ و ناسیارێن وی ژی بن، دێ پێش وەخت زانیت، دەستتێوەردانا وی بۆ گەندەلیێ و دزینێ، دێ خەلكی ژوی دویر كەت و دێ نەچار بیت، خوە ژ ھەمی جورەكێ دزیێ و گەندەلیێ بدەتە پاش، خوە ئەگەر حزبی ژی بیت، دێ پێدڤی بیت باوەرییا ھاولاتییان ژ بێ لایەنان و تا حزبێن دی ژی بۆ خوە پەیدا بكەت، ژ عەشیرەتێن دی و ژ دەڤەرێن دی ژی و تا ڤێرە، ئەز سەدا سەد دگەل یێ ھەڤرابووم.

ئەز دێ بەحسا دوو عەقلیەتا كەم، كو مخابن تا نوكە ژی ئەڤ ھەڤیرە ئاڤێ ڤەدخووت و ھەمان قاون دھێتە لێدان.

نمونا حزبێن دەستھەلاتدار:

ل ھەلبژارتنێن سالا 2005ێ بوو، ھینگێ وەك میدیاكارەك ل بارەگایێ قایمقامیێ كارێ مە بلاڤكرنا پوستەران و بەرھەڤكرنا كوستەران و چەندین كارێن دی دڤی بواریدا بوو. زەلامەك ھاتە دەف مە و گوت ئەز ل فلانە گوندیمە، گوت ئەز و ھەڤژینا خوە پێكڤە نەشێین بھێنە دەنگدانێ، ژبەركو مە زارۆكەكێ پەككەفتی یێ ھەی و دڤێت ئێك ژمە لدەف بیت، گوت من دڤێت ئەز ناسناما ھەڤژینا خوە ژی بینم و دێ پێش وێڤە دەنگی دەم! مە گوتێ ئەڤە ناچێبیت.. پشتی زانی ھەمی رێ لبەر ھاتنە گرتن، گوت: ھەما بلا ئەرزاقی ژمن ببرن ئەم زارۆكێ خوە بتنێ ناھێلین دخانیڤە، من گوتێ ما كێ گوتیە دێ ئەرزاقی ژوە برن؟ گوت: بەلێ كت كتە ل مالێن مەیێن گەریاین و یا گوتیە مە ئەگەر دەنگی نەدەنە (....)، دێ ئەرزاقێ وە برین.

نمونا حزبێن ئیسلامی:

ل دەستپێكا سالێن 2000ێ بوو، ھینگێ ھەلبژارتن بۆ باژێرڤانیا دھوكێ بوون، حزبێن بەشدار پارتی و یەكگرتو بوون و ئێكەتیێ ل زوونا كەسك ل دەرڤەی بازنەی بوو. ئەم ل دیوانەكێ دروونشتی بووین، وەك ھەر جار، من و پرسیارێن خوە بۆ خواندنا ئەڤێن دی، ئێكی ژوان كو باوەرناما دبلومێ ژی ھەبوو و ئەز سەدا سەد دزانم نە ئێكگرتوویە، گوت ئەز دێ دەنگێ خوە دەمە یەكگرتووی ئیسلامی، من ژی گوتێ بوو؟ گوت رۆژا قیامەتێ دێ خێر و گونەھێن من كەڤنە د میزانیێدا و دێ فریشتەیەك(مەلائیكەت) بێژیتە من، خێرێن تە زێدەترن ھەرە بەھەشتێ، ئەز ژی دێ د سەر پرا سیراتێ را چم و دێ فریشتەكێ دی پێ من گریت و دا من بكێشیتە ناڤ جەھنەمێ، دێ بێژمێ مانێ ئەز یێ ژ خێر و گونەھان دەرباز بوویم و ئەز بەحەشتیمە؟ دێ بێژیتە من، بیرا تە دھێت ل فلانە ھەلبژارتنێ، ناڤێ حزبەكێ (ئیسلام) پێڤە بوو و تە دەنگێ خوە نەدایێ.

ئەز باوەرم، نوكە ژی حزبێن ئیسلامی ب ناڤێ خودێ و پێغەمبەران یێ دەنگان خرڤەدكەن و حزبێن عەلمانی ژی، بناڤێ برینا ئەرزاقی و ترساندنێ و عەشیرێ و مرۆڤكانێ یێ دەنگان لخوە زێدە دكەن..

تشتێ ئەز گەھاندیمە قەناعەتێ ژی، دیموكراسیەتا مە دێ ھەر ئەڤە بیت، ژبەركو ئیسلامیێن مە نانێ خوە پێ ب (ئاینی) دخوون و علمانیێن مە ژی، دڤێن ئەم ھەر د قاپیتێ باپیرێ خوەدا ھزر و رەفتارێ بكەین.

ــــــــــــــــــــــــــــــــــــــــــــــــــــــــــــــــــــ

http://rwangauraxna.com/ba/detail.aspx?IDNews=4735

یا وەرگرتی دێ نڤیسم و من چ شول بیا كوردی نینە

 

و: ع، بامەرنی

دناڤ سوشیال میدیایێدا تشتێن سەیر و سەمەر دكەڤنە بەرچاڤێن مرۆڤی، یێن باش دێ دگەل ھەوە پارڤەكەین و یێن نەباش ژی دێ خوە ژێ دوور كەین. ئەڤ سەرھاتییا نوكە ژی گەلەك دناڤ مەدا دھێتە ڤەگێران و مە گوتنا وێ ب كوردی ژی ھەیە، لێ ئەز باوەرم ئەڤا دناڤ مەدا دھێتە ڤەگێران، جوداھییا خوە دگەل ئەڤێ ھەیە و لێ د ھەردووكاندا، رولێ ژنێ بەرز دھێتە نرخاندن و گوتن بڤی رەنگی یە:

(ل پشت ھەر زەلامەكێ سەركەفتی ژنەكا زیرەك ھەیە).

بنەكوكا ڤێ گوتنێ ژی بڤی رەنگیە:

كومپانیەكا مەزن بۆ كرێكارێن خوە، گەشتەك ل سەر لێڤا دەریاچەكێ رێكخست.

دەریاچە ژی یا تژی تیمساح بوو و خودانێ كومپانیێ ھەر بۆ ترانە، گوتە كرێكاران ھەر كەسەكێ بشێت ب مەلەڤانیا ژ ڤی ئالیێ دەریاچێ بچیتە ئالیێ دی، ئەز دێ ئێك ملیون دولار دەمێ.

ئەگەر تیمساحی ئەو خار ژی، ئەز دێ ملیون و نیڤ دولاران دەمە خێزانا وی.

ھیچ كرێكارەكی دخوەرا نەدیت، دەربازی دەریاچێ بیت و ژ نشكەكێڤە، كرێكاران دیت ئێك ژ كرێكارێن ھەڤالێن وان خوە ھاڤێتە ناڤ ئاڤا دەریاچێ و د ھەڤركییا خوە رزگاركرنێ و تیمساح یێ بدویڤ ڤە، دەریاچە ب سەلامەتی دەربازكر.

ئەڤ كرێكارێ ھەژار، دناڤ گوندێ خوەدا بۆ ملیونێر و بۆ گرنگترین كەسایەتی دناڤ خێزانا خوە و گوندییاندا.

بەلێ ئەو یێ ركوو بۆ كو بزانیت، كێ ئەو پالدایە د ناڤ وێ دەریاچێدا و بكەیڤتە ناڤ وێ كوما تیمساحاند.

ل دووماھیێ، بۆ دیار بوو كو ئەو كەس ھەڤژینا وی بوو!!

ژ وێ رۆژێ ئەڤ گوتنا ناڤدار پەیدا بوو، كو ل پشت ھەر زەلامەكێ سەركەفتی ژنەكا زیرەك ھەیە.

دەما پێلاڤ دگەل نیشتیمانی یەكسان دبیت

 موحەمەد ماخوت*

گەلەك شێوازێن گوتار نڤیسینێ ھەنە و نڤیسەر ژی ژبۆ گەھاندنا بابەتێ وان دڤێت بگەھینن، پەنایێ دبەنە بەر گەلەك شێوازان، تایبەت ئەڤ شێوازێ بزانن دێ خواندەڤان زێدەتر كونتاكێ دگەلدا كەت و شێوازێ گوتارا ئەدەبی یان ساخر، جورەكە زوی پەیاما خوە دگەھینیت، ھەر وەك دڤێ گوتارا نڤیسەرێ سوریێ بناڤ و دەنگ (موحەمەد ماغوتی)دا.

ـ دادوەر: ئەرێ تە ل رۆژا ھندەی ھندە ل گورەپانا گشتی و جاددێن ب قەرەبالغ گازیدكر، كو نیشتیمان دگەل پێلاڤێ یەكسانە؟

ـ گونەھبار: بەلێ.

ـ دادوەر: ئو ل بەرامبەری رێزێن پالە و جوتیاران؟

ـ گونەھبار: بەلێ.

ـ دادوەر: ئو ل بەرامبەری پەیكەرێن قارەمان و لناڤ گورێن شەھیدا؟

ـ گونەھبار: بەلێ.

ـ دادوەر: ئو ل بەرامبەری ناڤەندێن خوبەخشیێ و شەركەرێن دێرین؟

ـ گونەھبار: بەلێ.

ـ دادوەر: ئو ل بەرامبەری كومێن گەشتیار و سەیرانچییان؟

ـ گونەھبار: بەلێ.

ـ دادوەر: ئو ل بەرامبەری ئاڤاھیێن رۆژنامەڤان و ئاژانسێن دەنگ و باسان؟

ـ گونەھبار: بەلێ.

ـ دادوەر: نیشتیمان.. خەونا زارۆكینیێ یە و بیرھاتنێن پیراتیێ نە و حەزێن گەنجان و گورستانا داگیركەر و تەمعاكاران و قوربانیێن بھەمی سەرومالێن خوە، ب دیتنا تە ئەڤە ھەمی بتنێ بەراوردە دگەل پێلاڤەكێ؟.. بوچی؟ بوچی؟

ـ گونەھبار: ئەز بەنی ئەز یێ پێخاسبووم.

موحەمەد ماغوت:

*گەمژەییە ئەگەر بەرگریێ ژ نیشتیمانەكی بكەم و من خانیەك دناڤدا نەبیت.

• گەمژەییە ئەز قوربانیێ ب گیانێ خوە بدەم و زارۆكێن من پشتی من خازوكیێ بكەن.

*گەمژەییە دەیكا من ژ بەرزەبوونا من بێچارەبیت و نەزانیت بوچی ئەز مریمە.

*شەرمەزاریە ئەز ھەڤژینا خوە پشتی خوە بۆ كێلبێن سا بھێلم.

• نیشتیمان ئەوە بنەمایێن ژیانێ بۆ من پەیدا بكەت، نە ھوكارێن مرنێ. ژێیاتی(انتماء) درەوەكە سیاسیان داھێنایە ژ پێخەمەت وان ئەم بمرین!

*من باوەری ب مرنێ نینە ژ پێخەمەت نیشتیمانی، نیشتیمان ب كەسێ خەسار نابیت ئەمین خەسار.

*دەما نیشتیمان دكەڤیتە بەر شەرەكێ، دێ گازی ھەژاران كەن بەرگریێ ژێبكەن و دەما شەر بدووماھی دھێت، گازی دەولەمەندان دكەن بۆ دابەشكرنا دەستكەفتان!

*دڤێت تو بزانی ل نیشتیمانێ من، سینگێ قارەمانان تژی رساس دبیت و زكێ خاینان تژی مال، ئەو كەس دمریت یێ نەھەژی مرنەكێ ل سەر دەستێ كەسەكی شایستەی ژیانێ نەبیت!

ــــــــــــــــــــــــــــ

ـ كوردیكرن: ع بامەرنی

ـ موحەمەد ئەجمەد عیسا (ماغوت) (12 كانینا ئێكێ 1934- 3 نيسان 2006)، بەرچاڤترین شاعرێن ھەلبەستا پەخشانكی ل وەلاتێ عەرەبی، ل سلمیە ل پارێزگەھا حەمایێ ژ دایكبوویە.

http://rwangauraxna.com/ba/detail.aspx?IDNews=4689