ئێك من تێبگەھینیت جەژن بوو یان عەید؟!!

 عبدالرحمن بامەرنی

دبیت پسیارا من یا سەیر بیتن، ژبەركو جەژن و عەید ھەردوو ئێكن، لێ ئەز دێ پسیارا خوە برەنگەكێ دی ئازرینم، ئایا جەژنێ ھەمان سالوخەت(سیفەت)ێن عەیدێ ھەنە یان نە؟ ئەگەر بدیتنا من و تە ھەمان سالوخەت ھەبن ژی، لێ ئەز دێ بیرا خواندەڤایێ (روانگە و رەخنە) ل جەژنا نەوروزێ ئینم، كو چەندین جرە و بگرە و بكێش ل سەر جەژنا نەوروزێ ھاتنەكرن، كا ئایا جەژنە یان عەیدە؟ تا وی راددەی ھندەك كەس ھەبوون (نەوروز)ێ لێكدانی سفرێ دكرن، جار ب بەھانا كو نەوروز نەیا كوردانە و جار دگوتن كاوە نە كوردە و دگوتن ئەژەدھا كوردە و تا دووماھیێ و پرانیا بوچوونان ژی ل سەر تشتەكی د رێكەفتی بوون، كو پرانیا كوردان موسلمانن و د ئیسلامێ دا بتنێ دوو جەژن ھەنە، ئێك یا رەمەزانێ و یا دوویێ یا حاجییان و تا گەھشتیە وی راددەی، گەلەكان پێخوش نەبوو نەوروزێ بگێرن یان تا دەركەڤنە سەیرانێ ژی، ژبەركو ساخكرنا جەژنا نەوروزێ ب دژە دین ددانە زانین.

تشتێ ئەز پالدایمە ڤێ نڤیسینێ ژی، تێگەھشتنا مەیە بۆ زاراڤان، دەما ئەم نەزانین مامەلێ دگەل زاراڤ و تێگەھان بكەین، دەما مە دگوت جەژنا نەوروزێ، مە دگوت نەوروز ھەلكەفتەكا كوردییە و جەژنەكا نەتەوەییە و دەھان ھەلكەفت و جەژنێن دی یێن ھەین، لێ تشتێ وان ژ تاكە ھەردوو عەیدان جودا دكەت، ھەر جەژنەكێ یان ھەلكەفتەكێ رێ و رەسمێن خوە یێن جوداتر ھەنە. دەما ئەز جەژنا ژ دایكبوونا خوە پیروز دكەم، ئەو ئەز یێ ھەلكەفتەكێ دئینمە بیرا خوە، كو سالەك ژ تەمەنێ من دەربازبوو و ئەز دێ چمە د تەمەنەكێ دی و سالەك دیدا. ھوسان بۆ سەر سالێ ژی، دەما سەرێ سالێ دھێتە ساخكرن، مەبەسەت پێ ئەو نینە، ئەز دێ جەژنا بوونا عیسای(س) ساخ كەم، یا دروست ئەم یێ لدویڤ سالەكێ دچین، دوێ رۆژێدا سال نوی دبیت و ئەز دێ سالا بوری ھەلسەنگینم و پلانێن سالا بھێت ژی، دھزرا خوەدا دانم.

كێشا مەكوردان ئھا ژڤان ھوردەكارییان دەست پێدكەت، دەما ئەم تشتان ژ روویێ وان یێ سەرڤە دبینین نەك ناڤەروكێ! دێ بێژیت مانە كورێ فلان كەسییە! مانە فلان عەشیرە؟ مانە فلان حزبە؟ بەلێ راستە كورێ وی كەسییە ئەوێ تە ژێ گوتی و ژ وێ عەشیرێ یە ئەوا تە بەحسا وێ و ئەندامێ وێ حزبێ یە، ئەوا تو دگەل نە! بەلێ ئایا تو وی كەسی ناس دكەی، تو دزانی مرۆڤەكێ چاوانە، سەنگا وی، باشی و خرابیێن وی؟! نەخێر چ ژڤان تشتان نزانیت، ژبەركو پێش وەخت بریارا خوەیا دای؟

كێشا مە كوردان، ئەم پێش وەخت بریارێ ددەین..! ھەر كەسێ نە ژ حزبا مە بیت، ئەوی چ ماف د باژێری دا نینە و ھاولاتیێ دەرەجە دوویە (كو بیرا مرۆڤی ل سەردەمێ سەدامی دئینیت، چاوان ئەم كورد ھاولاتیێن دەرەجە دوو بووین). ھەمان بابەتێ من ئازراندی ژی، بۆ شاش تێەھشتنا مەیە بۆ ئاینی، بتنێ نمونا جەژن و عەیدێ بەسە بۆ دەھان بابەتێن دی، وەك ئەڤێ نمونا من ل سەر جەژنێ ئینای، بریار یا دای كو موسلمانان بتنێ دوو عەید یێن ھەین، ھەر كەسێ ئێكا دی ساخ بكەت، ئەو نە موسلمانە و تشتێ بۆ من ژڤێ ھەڤكێشەیێ ھەمیێ سەیر ژی، كو رەنگە ببیتە بەرسڤەك بۆ ناڤ و نیشانێ گوتارا من و ئەو ھەمی جرەییا ل سەر وان گوتاران دھاتە كرن، ئەڤێن د رۆژانێن نەوروزێ دا ل (روانگە و رەخنە) دھاتنە ئازراندن و فتوە بۆ دەردكەفتن، پرانیا زارۆكێن ب جل و بەرگێن نوی و دێمەكێ گەش دھاتنە بەر دەرگەھی دگوتن: جەژنا وە پیروز بیت و كەسێ نە دگوت عەیدا وە پیروز!!!

http://www.rwangauraxna.com/ba/detail.aspx?IDNews=4281

ژ روانگە و رەخنە و بێخەمییا مە بێزار نەبن

 عبدالرحمن بامەرنی

دبیت بەشەكێ وێ ژ كەمتەرخەمییا من بیت یان ژ گەلەكییا تەپكێن درێییا مەدا ھاتینەڤەدان و د كوردەواریدا ھاتیە گوتن (مەلەڤان ژی د خەندقن)، لێ ئەڤە بتنێ رەڤینەكە ژبۆ خوە رازیكرنێ، وەك ھەمی ھەلنگفتنێن مەكوردان، شوونا ئەم بەر پێن خوە باش ڤەوژێرین و سەدان حسابان بكەین و شنوی پێنگاڤا خوە ب ھاڤێژین، دێ ھنگافتنێن خوە كەینە ستوویێ ھەڤالێن خوە. بوویە بتنێ ئەز خوە كەمتەر خەم دبینم، ژبەركو دڤیابا من سەدان حسابێن دی لبەراھییا خوەدانابانە.

سەرەرای مانا مالپەرێ روانگە و رەخنە ل سەر ئەنترنێتێ* و تا نوكە یێ چالاكە و كاری تێدا دكەین، لێ مەبەستا مە یا سەرەكی، ژ دەست دەركەفتنا گروپییە ل سەر فەیس بووكێ، ژبەركو ب باوەرییا مە، دناڤ گروپیدا ئەم زێدەتر دشێین دان و ستاندنێ ل سەر بابەتان بكەین و د شاشییاندا ئێك دوو راستڤەكەین و دەما ئەم بابەتێن رەخنەیی بلاڤ دكەین، مەبەستا مە شكاندنا چ لایەنان نینە ب یێن (ئاینی و نەتەوایەتی و پێكھاتەیی و حزبی)ڤە. لێ ب رەخنە گرتنێ ئەم دشێین خوە ئاڤا بكەین، ئەم دشێین گەلەك شاشییان راستڤەكەین و دبیت دگەل مێژوویێ گەلەك تشت دناڤ مەدا ببنە راستی و مە ب پیروزی ل قەلەم دابن، لێ ئایا تا وی راددەی ئەو تشت د پیروزن و دەما ئەم دان و ستاندنێ ل سەر بكەین، ئەم ژ رێ دەركەتین؟!! نەخێر.

ھەر ھوسان بۆ بابەتێن سیاسی ژی، دەما ئەم بابەتەكێ رەخنەیی ل كەساتیەكێ حكومی یان حزبی یان ژی ل حكومەتێ بخوە دگرین، دیارە لەنگیەك یا ھەی و یا دروست لێزڤرین بۆ سەر راستكرنا وێ لەنگیێ ھەبیت، بێ كو ئەم ئێك تومەتبار بكەین و ھندەك تشتان پالدەینە نڤیسەرێ بابەتی یان مالپەری تومەتبار بكەین، كو ب سەر فلانە لایەنی ڤەیە، بتنێ دا شەرعیەتێ د چاڤێن خواندەڤاییدا دروست بكەین و وێ لەنگیێ ل بەر چاڤ ڤەشێرین و خوە ژ راستییان دوور بگرین.

دڤێت فێر ببینە لوژیكەكێ، ئەم ب رەخنێ ئاڤا دبین! ئەڤە ژ سەرھلدانێ وەرە لبن بەھانەیێن جودا مە خوە رەخنە نەكریە، مە شەرعیەت ب دوو ئیدارەیێ دا و دوو ئیدارەیێ سیاسیێن بازرگان بەرھەمئینان. مە شەرعیەت ب شەرێ براكوژیێ دا و نە بتنێ مە تڤەنگ ب سینگێ ئێكڤە پەقاندن، مە ھەڤچەپەرێن خوە ب خاین ل قەلەمدان!.

بوویە ب ھاریكارییا وە، ئەم دشێین ڤێ پێنگاڤێ دووبارە بكەین و گروپێ خوە یێ فەیس بووكێ ژی چالاك بكەین , رەخنا خوە دژوارتر بكەین. رەخنە ژبۆ شكاندنا چ كەسان و چ ئاینان و چ پێكھاتەییان، رەخنە ژبۆ ھلكرنا گلوپەكا سوورە ژبۆ ھەر كەس و لایەنێ كەمتەرخەمیێ دكەت و ژ چوارچوڤێ بۆ ھاتیە دەستنیشانكرن، لاددەت. ئەم پێكڤە دشێین خوە رەخنە بكەین و ئەم پێكڤە دشێین بێژینە خرابی خراب و بێژینە باشی باش.

تێبینی: گروپێ نوویێ روانگە و رەخنە rwangeurexne (https://www.facebook.com/groups/266090471950055)

ـــــــــــــــــــــــــــــــــــــــــــــــــــــــــــــــــــ

http://www.rwangauraxna.com/ba/detail.aspx?IDNews=4227

ئێك شعر و دوو راستڤەكرن

عبدالرحمن بامەرنی

شعرا من مەبەست پێھەی، ئێك ژ شاكارێن (مەحمود دەروێش)ە و ژلایێ نڤیسەرێ چیرۆك نڤیس (ئەنوەر محەمەد تاھر)ڤە ھاتیە وەرگێران و د كوڤارا پەیڤ ژمارە (84) ڵاپەرە 130 دا ھاتیە بلاڤكرن و نڤیسەرێ ب ھایكو نڤیس و وەرگێرانێ بەرنیاس (شەمال ئاكرەی)، راستڤەكرن دایە وەرگێرانا نڤیسەرێ ئێكێ و د دەستپێكا نڤیسینا خوەدا، ڤێ رستێ بكار دئینیت، دەما دبێژیت:

(ستایلێ نڤیسینێ ژ جەم دەروێشێ هەلبەستڤان یێ تێکهەلە ژ هەلبەستێ و پەخشانێ و ریتم و وێنەیێن کورت و پوخت..)، ھەر ئەڤ رستە ژی بوویە، ئەز ل سەر وەرگێرانا ھەردوو نڤیسەران راوەستاندیم، سەرەرای كو دەمەك بوو لینكێ نڤیسینا نڤیسەرێ دوویێ ژلایێ نڤیسەری بخوەڤە بۆ ھایداربوونێ بۆ من ھاتبوو ھنارتن، لێ ژ كورتییا دەمی، ئەز ل سەر نە راوەستیا بووم، سەرەرای جوانییا شعرێ و بەراوردییا وێ دگەل كەتوارێ مە یێ ئەم تێدا دژین، دێ ھزركەی شاعرەكێ كورد ئەڤ شاكارە یا نڤیسای نەك شاعرەكێ عەرەب و فەلەستینی.

شعر بخوە ئەڤە یە، یا عەرەبی و ئەوا من وەرگێرای

ستنتهي الحرب

و يتصافح القادة

وتبقى تلك العجوز تنتظر ولدها الشهيد

و تلك الفتاة تنتظر زوجها الحبيب

و اولائك الاطفال ينتظرون والدهم البطل

لا اعلم من باع الوطن

و لكنني رايت من دفع الثمن

شەر دێ بدووماھی ھێت و

سەركردە دێ چنە دەستێن ئێك

ئەو پیرەژن ژی، دێ ل بەندا كورێ خوە یێ شەھید مینیت و

ئەو كچ، ل بەندا ھەڤژینێ خوە یێ خوشتڤی و

ئەڤ زارۆكە ژی ل بەندا بابێ خوە یێ قارەمانن

ئەز نزانم كێ وەلات فروشتیە

بەلێ من ئەو دیت یێ بھایێ وی دایی..

ئەو رێزا من دڤیا ل سەر راوەستم و زێدەتر زومێ بێخمە سەر، بتنێ ئەڤەیە:

(و تلك الفتاة تنتظر زوجها الحبيب).

ئەگەر ل وەرگێرانا (ئەنوەر محەمەد تاھر) تەماشە بكەین:

ئەو ژن چاڤەرێیا زەلامێ خو یێ خوشتڤی

وەرگێرانا (شەمال ئاكرەی)

ئەو ژن دێ ل چاڤەرێیا ھەڤژینێ خو یێ خوەشتڤی مینیت

وەرگێرانا من ژی بڤێ رەنگی بوویە:

ئەو كچ، ل بەندا ھەڤژینێ خوە یێ خوشتڤی و

رەنگە ھەر كەسێ ڤان ھەر سێ وەرگێرانا بخوینیت، ل سەر خالەكا بەرچاڤ راوەستیت، ئەو ژی (ژن یان كچ)، پێنەڤێت كچ دەما شوی دكەت یان ھەر كچەكا شووكری بناڤێ ژن دھێتە ناسكرن و چ جارەكێ كەس نابێژیتە ژنا شووكری كچ. لێ لڤێرە ئەگەر باشتر ل سەر شعرێ راوەستین، دێ سێ وێنە یێن من مەبەست پێھەی و شاعری ژی سەنگا شعرا خوە دایە سەر، دێ كەڤنە بەر چاڤێن مە و بڤی رەنگی (پیرەژن، كچ، زارۆك).

پیرەژن دێ ل بەندا كورێ خوە یێ شەھید مینیت، یان كو ئەم دشێین بێژین، بەندەمانا وێ گەلەك ناڤەكێشیت و تەمەنێ وێ رێ نادەتێ گەلەك بمینتە ساخ.

شاعری وێنەك پەلكێش كریە، ژبۆ دووماھییا قوناغا مرۆڤی، ئەو ژی پیراتی و گرێدانا وێ ب كورێ وێ یێ شەھید ڤە، یان كو دبێژیت چاڤەرێبوونا وێ یا ژ تەمەنێ وێ یێ كورتێ مای د خوت و ھێزا ڤێ وێنەی ژی ھەر د ڤێ قوناغا تەمەنیدایە، كو ئێدی ئەڤ پیرەژنە چ تامێ ژ ژیانێ نابینیت، چ دوبارە شووكرن بیت یان ئەگەر ھەڤژینێ وێ یێ ساخ بیت، دوبارە زارۆكەكێ دی بینیت، بتنێ یا ل بەر سینگا وێ مای، ئەڤ پیرەژنە دگەل ڤی كورێ شەھید د بەندەمانێ و كول و كەسەران دا بمینیت.

ئەو كچ، ل بەندا ھەڤژینێ خوە یێ خوشتڤی.. ئەڤ وێنە گەلەك یێ روونە و باوەردكەم ئەگەر ھەردوو وەرگێران ھندەك ژ دەمێ خوە بۆ شعرێ ژی تەرخان كربایە، نە بتنێ وەرگێرانێ، دا زانن، ئینانا پەیڤا (كچ) شوونا ژن، كو ھەر كچا شوو بكەت دبێژنێ ژن و قوناغێن دناڤبەرا (كچ و ژن)دا گرێدای تەمەنی و ھژمارتنا سالان نینن، بەلكو بتنێ گرێدای ھەڤژینیێ نە، ئەوا دناڤبەرا ژن و مێژەكی دا دھێتە كرن. لڤێرە ژی مەبەست نە سكس كرنە، رەنگە كور و كچەك ڤێ كریارێ ئەنجام بدەن و ھەر كور و كچ بمینن، لێ دەما گرێبەستا ھەڤژینیێ دناڤبەرا كچ و كورەكیدا ھاتە موركرن، ھینگێ كور دبیتە زەلام و كچ دبیتە ژن و ئەڤە زێدەتر بۆ كچێ یا ل باوە، لێ بوچی شاعری پەیڤا (كچ) ئینایە!!

شاعر گەلەك ب ئاشكەرای و ب وێنێن سادە و سەنگ، شعرا خوە د نڤیسیت و دیار دكەت كو كچەكە و ل بەندا ھەڤژینێ خوە یێ خوشتڤی یە، لڤێرە پێدڤی ناكەت شاعر بێژیت ژنەك چاڤەرێییا... ژبەركو دەما پەیڤا كچ دئینیت، بێی كو تەمەنێ وێ دیار بكەت، ئەم خواندەڤا دێ زانین كو شاعری دڤێت بێژیت كچەكا شنوی شووكریە و شەری ھەڤژینێ وێ بەرزەكریە.

ئاخر ھێزا ڤی وێنەی ژی ھەر د ئینانا پەیڤا (كچ) دایە نە پەیڤا (ژن)، ھەروەكو ھەردوو وەرگێر ب لاساییكرنا ئێك و دوو ھەمان شاشی كری. مەبەستا شاعری نە كچە و ھەڤژینی پێك ئینایە، بەلكو ئەو ژی دزانیت دەما كچ ھەڤژینیێ پێك دئینیت یان كو دێ بیتە ژن، لێ شاعری ئەنقەست پەیڤا كچ یا تەوزیف كری، دا دیار بكەت كو شەر دلوڤانیێ ب كەسێ نابەت و گەلەكان دھێلنە چاڤەریێ بێ ئومیدیێ و خوە كچا شنوی شووكری بیت ژی و باوەر دكەم وێنە یێ روونە.

سەبارەت وەرگێرانا ھەردوو نڤیسەران (تلك الفتاة تنتظر زوجها الحبيب).

ئەنوەر محەمەد تاھر:

ئەو ژن چاڤەرێیا زەلامێ خو یێ خوشتڤی

ئەڤ وەرگێرانە پێدڤی ل سەر راوەستیانێ نینە و ھەر كەسێ بخوینیت، دێ زانیت دروست نەھاتیە وەرگێران و تشتەكی دیتر بالا وەرگێری یا بۆ خوە راكێشایی.

شەمال ئاكرەی:

ئەو ژن دێ ل چاڤەرێیا ھەڤژینێ خو یێ خوەشتڤی مینیت

مادەم نڤیسەرێ دووێ كو (شەمال ئاكرەی) ب راستڤەكرنا وەرگێرانی رابوویە، دڤیابا زێدەتر ل سەر وەرگێرانا خوە راوەستبا، پێدڤی ناكەت ل سەر پەیڤا (كچ و ژن) راوەستم، ئەز باوەرم زێدەتر روونكرنێ نا ھەلگریت، لێ ئەز نزانم ئەو (دێ) یا نڤیسەری ئینای، مەبەست پێ چییە، ژبەركو (دێ) لڤێرە یان كو دێ دەست ب چاڤەرێبوونێ كەت.

ئەو بخوە شاعر یێ روون و ئاشكەرا دبێژیت، دێ شەر ب دووماھی ھێت، بەلێ دھەمان دەمدا ئەو شەر یێ د بەردەوامیێ دا و كورێ پیرەژنێ یێ شەھید بووی و دیسان ئەو كچا گەنجا/ سنێلە یا ل ھیڤیا رێكا ھەڤژینێ خوە كو دیار ببیت، ئەو ژی ئەگەر شەری ھێلابیتە ساخ!! یان كو مەبەستا شاعری لڤێرە، یێ دبێژیت شەر یێ بەردەوامە و یێ پێشبینی دكەت ژی كو شەر دێ ب دووماھی ھێت و ئەو ھەر سێ كەسێن شاعر ئاماژە بۆ داین (پیرەژن، كچ و زارۆك) دێ بنە قوربانیێن كەسێن خوە یێن نزیك ژ دەستداین و بازرگانێن شەری، دوبارە دێ دەستێن خوە كەنە دناڤ ئێكدا ڤە.

ل دووماھیا نڤیسینا خوە یا كورت، ئەز دێ بیرا نڤیسەرێ دوویێ كاك (شەمال ئاكرەی) لڤێ رستا وی ئینم، ئەوا وی بۆ شارعەكێ وەك (مەحمود دەروێش) نڤیسی دەما دبێژیت:

(ستایلێ نڤیسینێ ژ جەم دەروێشێ هەلبەستڤان یێ تێکهەلە ژ هەلبەستێ و پەخشانێ و ریتم و وێنەیێن کورت و پوخت..)، ژبەركو ئەو بخوە یێ دبێژیت ستایلێ دەروێشی یێ تێكھەلە و دڤیابا ئەو شاشییا وەرگێرانی د سەر ویرا دەرباز نەبایە.

ــــــــــــــــــــــ

• مەحمود دەروێش، ئێك ژ گرنگترین شاعرێن فەلەستینی و عەرەب و جیھانیە و ناڤێ وی ب شعرا شورەش و وەلاتی ڤە ھاتیە گرێدان. دەروێش ب گرنگترین كەس دھێتە ناسكرن، یێن شعرا عەرەبی یا نوی بەرەڤ پێش برین و ھێما ئێخستینە دناڤدا. د شعرا دەروێشی دا حەژێكرن ب وەلاتی ڤە تێكەلی ئێك دبن و ب خوشتڤییا مێ ڤە دھێنە بەستن. ل سالا 1941ێ ھاتیە سەردنیایێ و ل سالا 20082 ل ھیوستن، تكساس، ل ویلایەتێن ئێكگرتی كوچ كریە.

• ئەنوەر محەمەد تاھر، كوڤارا پەیڤ ژمارە (84) ڵاپەرە 130.

• شەمال ئاكرەی، پێداچوونەك بۆ دو ھەلبەستێن (مەحمود دەروێشی) یێن وەرگێرای، رۆژناما ئەڤرو، ژمارە 2938 یا رۆژا 21/4/2021.

* نڤیسینەكا من یا رەخنەی لدوور وەرگێرانا شعرەكا (مەحمود دەروێش)ی، كو ژلایێ (ئەنوەر محەمەد تاھر)ڤە ھاتبو وەرگێران بۆ كوردیێ و (شەمال ئاكرەی)، ئەو وەرگێران راستڤەكربوو و داوی جار، من ژی خوە تێكەلی راستڤەكرنا وێ وەرگێرانێ كر. نڤیسین د كوڤارا پەیڤ ژمارە 85 دا ھاتیە بلاڤكرن.

https://www.facebook.com/ebdulrehman.bamerni/posts/10215925563372295 *

لێبورین ژ ماموستایان، بەلێ ئەڤە راستیە!!

عبدالرحمن بامەرنی

پوستەك ب زمانێ عەرەبی ل سەر تورا (فەیس بوكێ) كەتە بەچاڤێن من و دگەل لێبورینێ ژماموستایان، دێ وی پوستی وەرگێرمە سەر زمانێ كوردیێ و دێ گوتارا خوە ژی ل سەر نڤیسم..

(چەند ماموستایەك بۆ ھەلكەفتەكێ ھاتنە داخوازكرن و ل فروكێ سیاربوون و دەما دەرگەھێن فروكێ داخستین، ئەو ماموستا ھاتنە ئاگەھداركرن كو ئەڤ فروكە ژ چێكرنا قوتابی و خویندكارێن وانە، ماموستا كەتنە لەپێن خوە و ھەمیان ڤییان ژ فروكێ دەركەڤن و بترس بەرەڤ دەرگەھێ فروكێ ڤە چوون، دا گیانێ خوە رزگار بكەن، بتنێ ماموستایەك نەبیت و ئەو ل سەر كورسییا خوە ئارام یێ روونشتی بوو. دەما پرسیار ژێكرین، ئەرێ ماموستا تو بوچی نە رەڤی؟ ب باوەریڤە گوت: ئەو قوتابیێن مەنە. ئێكێ دی پسیار ژێكر: تو یێ پشت راستی، تە وانە باش گوتینێ؟ ماموستای گوت: ئەوا ئەز ژێ پشت راست، فروكێ شیانێن فرینێ نینن).

ئەز دێ نمونەكێ وەك بەراوردی ئینم، كا ئایا كێشە د چ دایە، كو ئاستێ خویندكاران بڤی رەنگی یێ لاواز بیت؟

ئەز ل پولا پێنجێ سەرەتایی بووم و ل وی دەمێ ل پولا پێنجێ شنی وانا عەرەبیێ دھاتە زێدەكرن، ھینگێ ل گوندێ بامەرنێ ژنەكا پیر بناڤێ (سەیدا مریەم) ھەبوو، خودێ ژێ رازی بیت و ئەم پرانیا زارۆكان دچووینە مالا وێ، ژ بۆ خواندنا دەرسێن قورئانا پیروز.

مالا وێ ئێك ژوور بوو و ل بەر سینگا وێ وەك ھولەكێ بوو، دیوارێن وێ ژوورێ خرەك كالوخكێن مە زارۆكان بوون ئەڤێن مە قەستا دەرسێ دكر، ڤان كالوخكان ژی لدویڤ ئاستێ وی كەسی یێ دھاتە دەرسێ، یان دەفتەركا ئەلیف بێتكا یان جزیا عەمایێ و تەبارەك و ھندەكان قورئانا پیرۆز تێدا بوون.

بۆ ماوێ سالەكێ من قورئان لدەف ختم و جاری كر، لێ بۆ ماوێ ئێك ھەیڤ تا دەفتەركا ئەلیف بێتكا من بدووماھی ئینای، كو (ئەبجەد و تەحیات) ھەمی مە ب ئەبجەدی د خواندن. مەبەستا من ب ھەیڤەكێ، ئێكەم تشت بنەمایەكێ خواندنێ لدەف مە دروست كر تا وی راددەی، دەما چوویمە قوناغا ناوەندی، ھینگێ (موتالعا) عەرەبی ھەبوو، ماموستایێ مە یێ عەرەبیێ ئێك جار د خواند و دا بێژیتە من بخوینە، ژبەركو خوە ئەگەر ئیشارەت ل سەر پەیڤان نەبانە ژی من دروست دخواند. نە بتنێ ئەڤە، دەما پەرتووكەك ب بەرچاڤێن من دكەفت، ئەز دشییام باش بخوینم و سەرەرای كو من دیار كری، خواندنا من ب زمانێ كوردی بوو و من چ ژ قەواعدا عەرەبیێ نەدزانی.

دا بھێمە سەر بابەتێ خوە و بەراوردییا خوە، ئەرێ بوچی ماموستایێن مە نەشێن بنەمایەكێ دروست نیشا خوێندكارێ خوە بدەن، كو بشێن ل سەر وی بنەمای ھەر چنەبیت، بشێن دروست بخوینن و بنڤیسن؟! بھزرا من ژبەركو خەما وان یا زێدەتر تەمامكرنا پەرتووكێ یە، نە كو گەھاندنا ماددەی، تایبەت ل قوناغێن دەستپێكی یێن بنەرەتی و دەما من پسیار ژ ماموستایەكی كری، كو ئەڤ شێوازێ لەزكرنێ د خلاسكرنا پەرتووكێ دا نەیێ دروستە و رەنگە خوێندكار دێ شەشێ بنەرەتی ژی بدووماھی ئینیت و بدروستاھی نزانیت بابەتەكی بخوینیت؟! دا بێژیت مانێ سەرپەرشتیارێن پەروەردێ دیڤچوونا مەدكەن و بۆ وان گرنگە پەرتووك بدووماھی بھێت!

كەس نەبێژیتە من ژبەركو ژیانا ئابووریا ماموستای نەیا گەرەنتیكریە و موچە نینن و قەیرانن، ژبەركو دوو رێك ل بەر سینگا ماموستای د مینن یان دەستان ژ وانە گوتنێ بەردەت یان ژی دروست ب ئەركێ خوە رابیت؟!!

https://www.facebook.com/groups/rwangeurexne/posts/4555277127843821/