ئەرێ گاز ئەرزان بیت یان گران بیت باشترە؟!!

عبدالرحمن بامەرنی

تو د وەلاەتەكی دا بژی و داھاتێ تە یێ سەرەكی (فروتنا گازێ) بیت، لێ تو خوزیا رابھێلی كو بھایێ وێ ئەرزان بیت، ما ئەڤە د خوەبخوەدا نە كارەساتە؟ سەرێ من بخوە ژ ڤێ ھەڤكێشەیێ ناھێتە دەر..!

یا بەرچاڤ.. ئەگەر بھایێ گازێ ل جیھانێ گران بوو، دێ موچە دوەختێ خوەدا ھێنە بلاڤكرن و لێبرینا 21%ژی نامینیت. ئەگەر موچە ھاتنە بلاڤكرن، كرێدار دێ كریێن خوە دوەختێ خوەیێ دەست نیشانكریدا دەن و قەرێ دكانا مەحەلێ دێ ھێتە دان و تو ئێدی سەرێ خوە نا چەمینی، دەمێ ناڤ چاڤێن تە ب ناڤ چاڤێن دكانداری دكەڤن و پێدڤیێن خوە یێن مالێ دێ ژ بازاری كری و دێ ئارام چییە ناڤ نڤینا خوە و كورتییا وێ، لێزڤریینا پارەی ژ دەستی بۆ دەستی، ھەمی دێ بكار كەڤن و بارێ ئابووریێ خەلكی دێ باشتر لێھێت.

یا نە بەرچاڤ.. دەما بھایێ گازێ گران دبیت، موچە (پەرێ وەكو بەرێ) دوەختێ خوەدا ناھێتە بلاڤكرن و لێبرینا موچەی ژی ب سەرێ خوە و ھەكو ب كوردی و كورتی دبێژن (یا بۆ خوە دمەرا دیتی)، بازار دێ گرانتر لێھێت، ژبەركو بلند بوونا بھایێ گازێ بھایێ دولاری ژی بلند دكەت و ھەمی تشت ئوتوماتیكی و بێ (حاسیبە) گرانبوون، ئەڤە ژبلی گرانبوونا بھایێ لیترا پانزینێ.

ھەڤكێشە.. ئەگەر بێژنە من، بھایێ گازێ گران بیت یان ئەرزان بیت بۆ تە باشترە؟ ئەز دێ بێژم ئەرزان بیت، ژبەركو گران بیت یان ئەرزان بیت موچە ھەر وەكی خوەیە! گران بیت بھایێ پانزینێ ژی دێ گران بیت و ئەڤە بۆ من بارگرانییە و ئەرزان ژی بیت، بھایێ پانزینێ دێ بۆ من سڤك تر بیت و ب پارێ دمینیت، دێ شێم ھندەك پێدڤیێن دی یێن مالێ بۆ خوە دابین كەم.

پرسیار.. كی ژ ڤێ ھەڤكێشەییا ئالوز بەرپرسیارە؟ پرسیارەكا ب ساناھییە و بەرسڤا وێ، بێ پلانی و كورتبینیا حكومەتێ بۆ خواندنا روودان و پێشھاتان، ھەرێمەكا عەقلیەتا حزبی و بەرژەوەندخوازان برێڤەدبەت و ھەڤركییا ئەڤە زێدەتر ژ (30) سالان ل سەر بنەمایێ (كی بلندە و كی كولندە) و بەرسڤا ژ ھەمیێ ژی خولیسەرتر، خوش باوەرییا مە ھاولاتییان و دەما ئەم قەستا سەر سندوقێن دەنگدانێ دكەین..

https://www.facebook.com/Rwange-u-rexne-%D8%B1%D9%88%D8%A7%D9%86%DA%AF%DB%95-%D9%88-%D8%B1%DB%95%D8%AE%D9%86%DB%95-105273955158848

دا پارێزگاری سوچبار بكەین؟!!

 عبدالرحمن بامەرنی

پوستێ ھەڤالێ (مللەت) كو ل نڤیسینەگەھا پارێزگاری كاری دكەت، ئەز پالدامە ڤێ نڤیسینێ و ئەگەر ھندەك ھەبن بەرەڤانیێ ژ سوچباركرنا من بۆ پارێزگاری بكەن، ئەو دشێن ل خودانێ پوستی بزڤرن و ھین ژی وی سوچبار بكەن، ژبەركو باھرەكا سوچباریێ دكەڤیتە سەر ملێ وێ نڤیسینگەھێ ژی یان نەشیاینە كارێ خوە دروست بكەن و ئەوا پێدڤی ل بەر سینگا پارێزگاری دانن یان ژی پارێزگاری دڤێت ژ كێشێین سەرەكی دەربازی كێشێن لاوەكی و بەر چاڤێن میدیایێ ببیت.

ببورە پارێزگار، ئەگەر ھندەك كەس ھەبن و ب دەركەفتنێن تە یێن ژ نشكەكێڤە ب سەركەفتن بۆ تە بزانن، ئەز بەرۆڤاژی دبینم و ئەز دكەمە لاوازی بوتە، ژبەركو دیارە تو نەشیایە كەسێن ھەژی ل جھێن ھەژی بدانی! ژبەركو كارێ تە ئەو نینە تو ل ناڤا بازاری بگەری و بزانی كیلوییا باجان سوركان.... ب چەندێ یە؟ (ئەگەر ئەڤە نمونەكا باش بیت)، یا دروستتر تو بزانی ئەو باجان سورك ژ كیڤە دھێن و دێ چاوان دھەمی وەرزێن سالێدا و ب بھایەكێ گونجای ل بەر دەستێ خێزانێ بن ھەر گاڤا ڤییان و زیان ب جوتیاری نەكەڤیت، ئەو ژی تو بیر ل پرۆژێن خانیێن پلاستیكی و دانانا كارگەھێن تەماتێ بكەی و نوكە بالەتە یا دكەڤیتە باجان سوركان و دترسم وەك پار، جوتیار باجانێن خوە ب جاددێ وەربكەت!

ببورە پارێزگار، ل سەر چاڤدێرییا بازرگانی بشدینە و زێدەتر ل سەر دەرمانخانان راوەستن و دڤی بارێ نەخوشێ ئابوری دا و برینا موچەی و ئەڤ كەسێ دكەڤیتە بەر دەستێ نوژداران و ڤێ دەرمانخانێ و دەرمانخانا دی و تاقیگەھان، دا بزانی چەند جوداھی د فروشتنێ دا ھەیە و دا بزانی چەند خەلكێ ھەژار دھێتە ئیستیغلالكرن و خارنێن ماوە ب سەرڤە چووی ژی د پرۆژێن تەدا بیت، ئەڤێن دێ گڤاشتنێ ل سەر كەی، كو كەمتەر خەمی تێدا نەھێتە كرنێ، ژبەركو گرێدایی ژیانا ھاولاتییانە و ژھەمییان ژی تەخا ھەژار.

سەرەكی ل پانزینخانان ژی بدە ژ كەرەما خوە، پانزینا پیس، نورمال، موحەسەن، گرانی و ئەرزانی، جاران دێ یا موحەسەن بەردەینە تانكێن ترومبێلێن خوە و دێ بێژی خوزی من ژ فلان پانزینخانێ یا نورمال كربایێ باشتر بوو، ژخوە خودانێن موەلیدان، كێمكرنا ڤولتیێ كارەبێ، بھایێ ئەمپێری نەھێلە بھیڤییا لیژنێ بتنێ ڤە، كو ھەمی دجھەكی و دوویان را دگەھنە ئێك د قازانجی دا، ئھا سەرپەرشتیێ ل كومبونێن وان بكە، ئەو بكەیفا خوە پارەی نە ڤەبرن.

ببورە پارێزگار ئەگەر بارێ تە گرانتر لێبكەم، لێ دێ ڤێ سەرھاتیكا بچویك ژی بۆ تە ڤەگێرم: (گوتن دیكلێ پیرەژنەكێ ھاتە دزین و پیرەژنێ قەستا حاكمێ باژێری كر و گوتێ حاكمی خوش بیت، شڤێدی دزیكەرا دیكلێ من ژ كولكی یێ دزی؟ حاكمی گوتێ: دیارە پیرێ تو یا نڤستی بووی و تە ئاگەھـ ژ دزیكەران نەبوو وەختێ دیكلێ تە كولكی رەڤاندین! پیرێ گوتێ بەلێ حاكمی خوش بیت ئەز نڤستبووم، لێ من ھزر كر، تو یێ ھشیاری...).

دڤێت پارێزگار ژی یێ ھشیار بیت و گوھێن وی دڤەكری بن كا چ ل باژێرێ وی رووددەت، ھشیاربوونا وی ژی دەما رێڤەبەری و فەرمانگەھـ و ھەمی كەسەك كارێ خوە ژدل بكەن و ژ كەرەما خوە بتنێ چاڤدێرییا وان بكە ئەو كارێن خوە دروست بكەن، ھینگێ سەرباركێ وەستیانێن تە لناڤا بازاری نابن و دێ شێی لدەمێ بێھنڤەدانا خوە لناڤا خێزانا خوە روونی، شوینا وی دەمێ بێھنڤەدانێ ژی ب سەر راستكرنا مەڤە تەرخان بكەی..!

http://www.rwangauraxna.com/ba/detail.aspx?IDNews=4175

فەیس بووك

https://www.facebook.com/photo?fbid=10215784887295481&set=g.209899095715001

ژ ئسرائیلێ ڤەبن..؟!

 عبدالرحمن بامەرنی

ئێك ژوان شاشیێن زیقێن د ریفراندومێ دا ھاتینە كرن و داروبەر ل مە كرینە نەیار، دەما مە ب شانازیڤە ئالایێن ئسرائیلێ بلندكرین و مە بەھی بۆ كەساتیێن وان داناین. گەلەك جاران عەقلێ مە یێ بچویك تێرا پێشھاتان ناكەت و خواندنێن مە گەلەك كورت خایەنن، ئەم ھند كەسێن عاتفینە و تا نوكە ژی دەما ل فلمێن ھندی تەماشەدكەین، رۆندكێن مە دبەررا دھێنە خار و بڤان رۆندكان مە دڤێت بەرگریێ ژخوە بكەین، بێی كو ئەم بزانین، شوونا ئەم پێنگاڤەكێ بەرەڤ پێش بچین، ئەم چەندین پێنگاڤان بەرەڤ پاش دچین.

بەرییا چەند سالان بوو و بەرییا ئەم عەفرینێ ژی ژ دەست بدەین، ل ھوتێلا جوتیار ل دھوكێ كومبوونەكا كەنەكی ھاتە كرن و ئەز ژی وەك رۆژنامەڤانەك ئێك ژ بەشداربوویان بووم و دەما دەرگەھێ دان و ستاندنێ ھاتیە ڤەكرن، كو ئەز ئێك ژوان بووم یێن من دەستێن خوە بلندكرین، من گوت، ئەڤ خوپیشاندانێن كوردان ل وەلاتێن رۆژئاڤا دھێنە كرن و بلندكرنا وێنێ ئاپوی و ئالایێن پەكەكێ چ خزمەتا قەزییا كوردی ل رۆژئاڤای ناكەن و د روونشتنا برێكی دا، نوونەرێ پەیەدێ ل باشوور ل سەر وێ مێزا ئەز ل سەر روونشتی سلاڤ كر و پشتی بخێرھاتنێ گوت: "من باش كومێنتا تە فام نەكر!". من گوتێ، ئەم یێ ل بەرامبەری دوژمنەكی د بەرخودانێدا و نابیت ئەم رێ بدەین ئەو كارتێن دژی مە بكاربینیت، بەلكو ئەم پێدڤی وێ چەندێی نە، ئەم راییا جڤاكێ نیڤ دەولەتی بۆ خوە رابكێشین، تایبەت كوردان شیاینە ب شەرێ دژی رێكخراوا تیرورستییا داعشێ خوە بینە پێش. گوتە من: زێدەتر زەلال بكە؟". من گوتێ، بلندكرنا ئالایێن پەكەكێ و وێنێ سەروك ئاپوی خزمەتا ھاولاتیێن سڤیل یێن رۆژائاڤا ناكەتن، بەلكو توركییا دێ وەك كارتەكێ دخزمەتا داگیركارییا خوەدا بكارئینیت و وەلاتێن زلھێز ژی دێ ب چاڤەكێ كمێتر لمە نێرن و یا باشتر، ئەم وێنێ زارۆكێن ھاتینە كوشتن، خانیێن دھێنە خرابكرن و داروبارێن دھێنە سوتن پیشان بدەین؟! ھەر چاوا بیت ئەو رۆژ ب سەرێ خوە.

دا بھێمە سەر ئسرائیلێ و داخویانیێن وان، د ریفراندومێ ژیدا دگوتن، كو فروكێن ئسرائیلێ یێ ل عەسمانا و ھەر گاڤا شەرەك دروستبوو، ئەو دێ د ھەوارا كوردان ھێن، بێی بزانین، كو پشتەڤانییا وان بۆ و مە ناڤتێدانا مە بۆ وان، دێ رەخ و دوورێن مە زێدەتر لمە ھار كەن و دێ دنیایێ لمە كەنە قەلپیچكا كەزانێ و ھەر وەكو وە لمە كری ژی.

نوكە ژی ھەمان قاونە، دەما بەرپرسێن ئسرائیلێ دەبارەی سەربەخویا كوردستانێ داخویانییا ددەن، ئایا مفا تێدا ھەیە یان ژی دێ ب خرابی ب سەێ مەدا شكێت..؟ گەلەك یا شاشە ئەم د راگەھاندنێن خوەدا ڤی بابەتی پیشان بدەین و خوە پێڤە بگرین، ژبەركو ئسرائیل دخەما مەدا نینە و بتنێ ئازراندنا بابەتی دێ وەلاتێن نەیار و ناكوكی دگەل مە ھەی، ل سەر سەرێ مە كەنە گورگێ ھار...!

http://www.rwangauraxna.com/ba/detail.aspx?IDNews=4105

فەیس بوك

https://www.facebook.com/photo?fbid=10215717679935339&set=g.209899095715001

خیڤەتگەھا شاریا ژ كارەساتێ بۆ كارەساتێ

 عبدالرحمن بامەرنی

ھەر ژدوھی ژ روودانا سوتنا خیڤەتەگەھا شاریا وەرە، كو تێدا زێدەتری 300 چادر ھاتینە سوتن، وێنێن دلھەژین و پوستێن خەمگین د سوشیال میدیایێ دا دكەڤنە بەرچاڤێن مرۆڤی. وێنێ ئامانێن خوارنێ و خێزانەك نەگەھشتی خوارنا خوە یا نیڤرو تەمام بكەت و برەڤێ رانەگەھشین. پایسكلەكا سوتی و زارۆكەكی دەستێن خوە ھاڤێتینە سكانێ وێ و خەما وی ژڤێ روودانێ بتنێ پایسكلا وی رزگار بیت. پارێن سوتی، كو خوھا ئەنییا ھندەك كەسان و بتنێ مەبەستا وان دەما ڤەدگەرن، بشێن چەند بلوكان داننە سەر ئێك و سەرێ زارۆكێن خوە بكەنە دبنڤە. دایكێن دكەنە گری و چاڤێن وان ل عەسمانی، ئایندێ خێزانێن جارەكا دی دەربەدەر دبن ڤە و سەدان سەدان وێنێن دی یێن روندكان ژ چاڤێن مرۆڤ دئیینە خار.

ئەڤە بەشەك ژوان دیمەنان بوون، ئەڤێن ب چاڤكێ كامیرێ ھاتینە كێشان و بلاڤكرن، ژبلی ئەو وێنێن نەھاتینە بلاڤكرن و ژبلی ئەوان ھەمی چیرۆكێن دبن چادرگەھا ڤە بووینە خارنا ئاگری و ھێشتا خەمێن كارەساتا داعشێن تیرورست گەفێ ل سەر ئارامی و تا خەونێن وان ژی دكەن. ئەڤێن ل سەری بتنێ ئەو وێنە بوون كو دكەفتنە بەر چاڤێن مرۆڤی و و پوستێن ھاتینە نڤیسین، چ ژوان وێنان كێمتر نەبووینە ژ ڤەگەھاستنا ئەگەرێن روودانێ و بتنێ دێ ئێك پوست دانین، كو ب زمانێ عەرەبی ھاتیە نڤیسین:

(تو دناڤ وەلاتێ خوەدا پەنابەر بی و بۆ ماوێ ھەشت سالان دبن چادرگەھەكێ دا بی، ئەڤە بخوە نەھامەتییە و كاریسەت نە بتنێ د سوتنێ دایە، بەلكو كاریسەت ئەوە تو بێ وەلات بی و تە چادرەك ھەبیت و تە (شنگال) نەبیت، ژبەركو ئەو ل سەر مێژا سیاسییان ل سەر ئێك زێدەكرنەكا بەرچاڤدایە ـ ان تكون لاجئا في وطنك وتحت خيمة لمدة ٨سنوات فتلك مصيبة و الكارثة ليست في الحرق، الكارثة انك بلا وطن تمتلك خيمة ولا تمتلك سنجار، لانها في مزاد علني على طاولة السياسين Trifa Ali).

http://www.rwangauraxna.com/ba/detail.aspx?IDNews=4059

فەیس بووك

https://www.facebook.com/photo?fbid=10215670995568259&set=g.209899095715001

سیاسەتا داربرینێ!

 عبدالرحمن بامەرنی

كەس نەبێژیت، توركیا یا داران ژ چیایێن مە دبریت ب بەھانا دا گەریلایێن پەكەكێ خوە د ناڤرا نەڤەشێرن! ئەڤ سیاسەتا داربرینێ زەنگەكا مەترسیێ یە، ئەگەر حكومەتا ھەرێمێ ل سەر ڤێ دیاردێ نەھێتە سەر خەت، ئاماژەیەكا باش نینە و بەرێخوەدانا توركییا بەرێخوەدانەكا دوژمنكارانەیە بۆ خەلكێ باشووری بگشتی، نەك بتنێ پەكەكێ. ژبەركو پەكەكە ئەڤرو لڤێ دەڤەرێ و سوبەھی ل دەڤەرەكا دی و بتنێ خودانێن چاندكا خوەنە، لێ برینا داران ئێك رامان ددەت، ئەو ژی تالانكرن. لڤێرە پرسیار، ئایا توركیا ھاتیە ئاخا ھەرێمێ تالان بكەت یان گەریلایان دەربێخیت؟!!

ئەڤ سیاسەتا توركیا ل بەرامبەری ھەرێمێ پەیرەو دكەت، خوە ئەگەر وەك دەولەت خوە ژێ بێ ئاگەھـ بكەت ژی، لێ دڤێت حكومەتا ھەرێمێ بكەتە بابەت و ب سڤكی نە وەرگریت، ژبەركو سیاسەتەكا ژڤی رەنگی، چ ژ سیاسەتا داعشان كێمتر نینە، ئەوا داعشان ل بەرامبەری وان جھان پەیرەو دكر، دەما ب سەردا دگرتن و دكرنە جھێن خوە.

ھاتنا توركیا بۆ ناڤ ئاخا ھەرێمێ ژی، ھەمان (تاس و حەمامە). باوەردكەم توركیا ژی دزانیت ل ھەرێمێ چ روویددەت و دزانیت سەنگا مە چەندە، ھەم سەنگا ناڤخوەی و ھەڤركی و دو بەرەكییا حزبێن مە و دیسان ھەلسەنگاندنا وەلاتێن زلھێز، ئەڤێن پاراستنا ھەرێمێ دكەن و تایبەت وەلاتەكێ وەكو ئەمریكا و ئایا ئەو چەند ژ مە و ئەدائێ مە د رازینە و ئەو چەند ڤێ سیاسەتا ئەم پەیرەو دكەین، ب رەوا دبینن!!

ھیڤیدارم ئەز شاش بم و حزبێن مە خواندن بۆ ڤێ چەندێ و ڤێ مەترسیێ ھەبیت و ئاگەھداری ھەمی ھوردەكارییان بن، لێ ئەز قەد ل باوەر نینم، ژبەركو حزبێن مە مژوولی پیل و پارە و كومڤەكرنا دەنگانە و خەلك یێ پێ ل عیرێ مە ددانیت و ھێشتا خەما حزبێن مە ژی ل ھەرێمێ، (كی بلندە و كی كولندە و سپیكرنا پیڤازێن ئێك و دوو...!).

http://www.rwangauraxna.com/ba/detail.aspx?IDNews=4032

رۆژنامەگەریا كوردی ل بەر گومانێ!

عبدالرحمن بامەرنی

ئەڤە نە بتنێ ناڤ و نیشانە بۆ راكێشانا خواندەڤانی، بەلكو ئەڤە راستیەكا تەحلە كو پشتی 123ێ سالان ژ رۆژنامەگەریا كوردی، ئەڤرو ئەم وێ د خرابترین بارودوخدا دبینین و دەولەت سەرێ عەقلیەتا حزبی، ئەم رۆژنامەگەریا كوردی بێخینە بەرگومانێ! ئەڤرو ب سایا ھەمان عەقلیەتێ، ھەر حزبەكێ راگەھاندنا خوە ھەیە و سایت و پەیچێن خوە یێن سەختە ھەنە و رۆژنامەڤانێن حزبی لدوورێن خوە خرڤەكرینە و مكیاجكرنا خوە پێدكەن، نە بتنێ ئەڤە، بەلكو ھەر ب سایا ڤان حزبان، قارەمانێن كارتونی دروست بووینە و جاشێن دوھی بووینە كاراكتەرێن ئەڤرو و گەلەك بەرپرسێن ئەڤرو كو بەرپرس نەبوون، كرینە بەرپرس و گەلەك ژی كرینە سیاسی، كو ھەر سیاسی نەبوون.

ئەڤرو ئەم یێ د رۆژا سالیادا رۆژنامەگەریا كوردی دا دەرباز دبین، بەلێ سالیادەك جوداتر ژ ھەمی سالیادێن دی، برەنگەكێ یا بوویە جێبەجێكەرێ پلانێن پشت دەرگەھێن داخستی، شوونا راستییان بلاڤ بكەن وەك خوە، راستییان شێلی دكەن، شوونا ببیتە پەنجەرەیەك بۆ بەرچاڤكرنا راستییان، ئاشتییا كومەلایەتی تێكددەن و دوو بەرەكیێ دناڤ خەلكیدا دروست دكەن و خەلكی ل سەر دەڤەران دابەشدكەن و ل بەر ئێك رەش دكەن.

د سالیادا رۆژنامەگەریا كوردی دا، دڤێت ئەم بیر ل دەركەفتنا ئێكەم رۆژناما كوردی بكەین و پسیارێ ژخوە بكەین، بەدرخانیا بوچی ئەڤ سنعەتە ئینایە دناڤ مەدا، ئایا ئەم پێ ئێك نە شیرین بكەین و حزبێن خوە ل سەر حسابا مللەتی بینینە پێش یان ئەم ب سایا ڤێ پێشكەفتنا ئەڤرو جیھان گەھشتیێ، ئەم رۆژنامەڤان و ئەم راگەھاندكار رولێ زێدەتر بگێرین و رولێ مە د چاڤدێریاندا ھەبیت، ئەم ببینە گوھـ و زمان و چاڤێن خەلكی ل سەر دەستھەلاتێ و چاڤدێرییا وان بكەین ل سەر راستڤەكرنا شاشیێن وان، ببینە چاڤدێر ل سەر رولگێرانا وان، ببینە چاڤدێر ل سەر بوارێن كومەلایەتی و ئابوری و سایسی و رەوشەنبیری؟

پیرۆز راگرتنا ڤێ رۆژێ مە دئێخیتە دناڤبەرا دوو ھەلبژاردەیان دا یان ئەم بەردەوام بین ل سەر عەقلیەتا حزبێ و پیشەیێ راستگوویا خوە و بێلایەنییا خوە ب مكیاجكرنا وان بگوھورین یان ژی پیشەیێ خوە وەك رۆژنامەڤانێن ئازاد ب پارێزین، كو چاڤێ خەلكی و دیروكێ ل سەر مە و رولگێرانامەیە، كو ددەمەكیدا دیرۆك دلوڤانیێ بكەسێ نابەت.

http://www.rwangauraxna.com/ba/detail.aspx?IDNews=3779

فەیس بووك

https://www.facebook.com/photo?fbid=10215452362942580&set=g.209899095715001