دفن بلندی

 عبدالرحمن بامەرنی

من داخوازا تشتەكی كربوو.. نەھات، گیرۆ بوو، ئەو دەمەك بوو، بیرا من ناھێت، چو زانم كەنگی بوو، لێ بێھنەكا درێژە ئەز ل سەر ڤێ كورسیكێ روونشتی و ل ھیڤیێ. بتنێ یا ئەز دزانم گرێدانا من بڤێ كورسیكێ ڤە، گرێدای وان ھەمی تشتانە یێن ئەز دنڤیسم و خوە ئەڤ كورتە چیرۆكە ژی، ئەڤا نوكە تو دێ خوینی! تەخمین بكە، ئەڤ كورسیكە چەند ژ دەمێ من بۆ خوە دبەت و جارەكێ ژی من ھزر نەكریە، كەنگی ئەڤ كورسیكە لڤێرە ھاتبیتە دانان و نزانم، ئەگەر من دەست د دانانا وێدا ھەبیت! لێ بتنێ ئەز ل تشتەكی یێ پشت راستم، ڤێ كورسیكێ گرێدانەك دگەل ڤێ گولا رەنگ سور ھەیە، ئەڤا دناڤ ڤێ حەودا گولاندا و ئەڤا برەنگێ خوە یێ سور، سەر ژ ھەمی گولێن دی ستاندی..

سوراتیا ڤێ گولێ ژ رەنگێ شمكا وێ یا چم سورە، ژبەر وێ چمكێ، ئەز حەز ژ ھەمی تشتێن سور دكەم و دەما بابەت دھێتە سەر رەنگان، ئەز خوە ب سەر رەنگێ سوردا بەرددم و دەما بەحسێ جورێن ڤەخارنان ژی دھێتە كرن، ڤەخارنێن رەنگێ وان سور، من دناڤ خوەدا بەرزە دكەن و ھەر جارا ئەز دگەل ھەڤالان ژی دروونمە خار، ئەز داخوازا شەرابەكا سور دكەم. نوكە ژی من حەز ل سەر ڤەخارنا تشتەكێ سور ھەیە! چا ژی بیت بلا، رەنگێ وێ ژی برەنگێ ڤێ گولێڤە دچیت و ژ رەنگێ شمكا وێ یا چم سورە..

ئەڤە نزیكی دەمژمێرەك بوری و كەسێ بۆ من چ نە ئینا، كەسێ خوە ل داخوازیا من نەكرە خودان، كا دێ چ ڤەخووم و دلێ من دچیتە چ؟! راستی بیت ئەز ژی یێ سەیرم، ما كەنگی جارەكێ ئێكی ژمن خاستییە، كا تە چ دڤێت و بۆ تە چ بینین، ھەر من یا دیتی، ئەز بخوە یێ چوویم و تشتێ من ڤیای، من یێ ل بەر خوە دانای و خزمەتا خوە یا كری..

ئەگەر بۆ تەیێ خواندەڤا، راددێ پەیوەندیا من دگەل وێ مەرەق بیت و تە بڤێت ھەمی تشتەكی بزانی؟!! سەروبنێن پەیوەندیا مە خوە دڤێ گوتنێدا دبینن، كو گەلەك جاران ژمن تورە بوویە و دوبارە زڤریە باوەشا پەیڤێن من، دەما دگوت: "نە ئەز دگەل تە دقەتینم و نە بێی تە".

لێ ھەمی تشت ھاتنە ژناڤبرن، دەما من وێرەكی دایە خوە و من ڤیای ژ نشكەكێڤە وێ ماچیكەم و ئەو ب ھەمیڤە تێك چووی..! ئەو تشتێ ئەز و ئەو د گەھاندینە ئێك، بتنێ یاریكرنا ب پەیڤانە و قەد رۆژەكێ ژی من باوەرنەدكر، ئەو وێرەكیێ بدەتە خوە و بۆ ئاشتبوونەڤەنا من و خۆ بھێت یارییا ب زنجیرا پەنتەلونێ من بكەت..

ئەز دێ بەشەكێ ژ چیرۆكا خوە و وێ بۆ ھەوە ڤەگێرم، ژبەركو د نڤیسینێن وێدا من ئەو ناسكریە، د نڤیسینێن خوەدا رێك ب سوزانیەكێ ڤە دچیت و ل دووماھیێ من دەست ژ حەزێن خوە بەردا و ئەز ل پەیڤێن وێ عاشق بووم.. دبیت ھین باوەرنەكەن، لێ گەلەك گوتن و ئەڤ تشتێن من دناڤ نڤیسینێن خوەدا گیان پێ بەخشی، ھەر ئەو بخوەیە..

درێژ ناكەم، من خوە فێری زمانێ پەیڤان كر، دا بشێم دناڤ پەیڤێن وێدا یاریان بكەم. من خوە فێری مەلەڤانیێن دگەل پەیڤان كر، مەلەڤانیا دناڤ دەریایا پەیڤان ژیدا، مرۆڤی شێت دكەت، رێك ئەز ب شێتەكیڤە دچم، تایبەت دەما د نڤیسینێن وێدا نقووم دبم..

ئەز یێ فێر بوویمە ھەمی تشتێن وێ، دڤێت بێدەنگیا وێ تێكنەدەم و ھەستێن وێ نە ئازرینم، ئەز ژ ماچێ یێ فێربوویم، گەر وێ حەز نەبیت، ب ھەمیڤە تێكدچیت و دنیا لبەر چاڤێن وێ رەش دبیت و ئەز ژ زنجیرا پەنتەلونێ خوە ژی یێ فێر بوویم، ھەر دەما وێ حەز ھەبیت، دێ ل بەر سینگا من روینیت و چاڤێن خوە رك و رك ئێختە ناڤ چاڤێن من..

ناڤ چاڤێن من..! ببورن ئەگەر وێنەی ئارمانجا خوە یا دروست نەھنگافتبیت، ئاخر نەچارم پەنایێ بەمە بەر دروستكرنا وێنەیەكێ ئازراندنا ھەستان، خو ئەگەر زنجیرا پەنتەلونی ژی دناڤدا بیت. ھەر ژبەرخوە نە، ژبەر وێ و دا بزانیت ھەستێن من بەرانبەری وێ چنە، ژ بەر خواندەڤای ژی، ئەڤێ دەمێ خوە ددەتە خواندنا ڤێ چیرۆكێ و ھەر چنەبیت، تفێ لڤێ عەشقێ و دفن بلندییا ڤێ ژنێ نەكەت..

ــــــــــــــــــــــــــــــــــــــــــ

كوڤارا پەیڤ ژمارە 84

موستەشارەك ب (زیندانیێ سیاسی) ھاتیە توماركرن

 عبدالرحمن بامەرنی

ئەڤا ل سەری نیڤەكا پوستێ بسپورەكی یە دبوارێ ئەنفالاندا، كو چەند پەرتووك ل سەر ئەنفالان چاپكرینە و چەندین سالە وەگ چالاكڤان دبیاڤێ ئەنفالاندا كاری دكەت، كو دھەمان دەمدا نڤیسەر و رۆژنامەنڤیسە ژی و ئەز ل باوەرم، ئەوی دەنگ و باسی ئەو گەلەك یێ ئێشاندی، تا بكەتە پوست و ل ئەكاوەنتێ خوە ل تورێن كومەلایەتی ل سەر (فەیس بوكی) بلاڤبكەت. پوست بڤی رەنگی ھاتیە بلاڤكرن: (موستەشارەك ھاتیە توماركرن و وەرگرتن وەك زیندانیێ سیاسی، كەنالەكێ كوردی ژی دیدارەك دگەل كر وەك كورد پەروەر دایە ناسكرن).

تشتێ بۆ من ژ پوستی سەیر، سەرەرای كو ناھێتە ڤەشارتن كو گەلەك ژ نەچارییا خوە دبوونە چەتە و گەلەكان ھاریكارییا پێشمەرگەی ژی یا كری و د سەرھلدانێ ژیدا و ژبەركو ئەو خودان چەك ببوون و لناڤ باژێری بوون، وان ژی شوون دەستێن خوە دگەل ھاولاتیان ھەبوو، موستەشاران شیاینە ژیانا گەلەكان رزگار بكەن، ئەڤێن ژ عەسكەریێ درەڤین و ژ زیندانان دەرێخستینە و ناسنامێن چەتاتیێ كرینە د بەریكێدا، لێ ئەڤە ھەمی ل سەرەكی و بابەتێ (زیندانیێ سیاسی و كوردپەروەری) ل سەرەكێ دی.

پتشی سەرھلدانێ و ب بریارەكا سەركردایەتیا كوردی لێبورین بۆ ھەمییان ھاتە دەركرن، چ ئەڤێن چەتە و موستەشار و ئامر سری و چ ژی ئەڤێن بەعسی وەك رەفیق ووووو ئەز بخوە ب بریارەكا حەكیمانە دزانم، كو بەرۆڤاژییا وێ مە دیت ل عیراقێ بۆ ئێك ژ ئەگەرێن سەرھلدانا داعشێن تیرورست، كو عەقلێ مودەبەرێ داعشان ئەفسەر و بەعسیێن كەڤن بوون، ئەڤێن ژھەمی تشتەكی ھاتینە بێبەھركرن(ئەڤە بابەتەكێ دییە).

یا من دڤێت بێژم و وەك بوچوون و رەخنە ل حزبێن مە یێن كوردی بێ جوداھی و پەنایا وان بۆ ڤان موستەشاران، ژبەركو گەلەك ژوان سەروك عەشیرن و دشێن دەنگان بۆ حزبێ خرڤەكەن و ڤەبرینا موچێ تایبەت بۆ وان و كوچكا وان و حەرەس و حیمایە بۆ كوچكێن وان و پاراستنا وان. ئەڤە ژ چەند روویەكانڤە خرابیێن خوەھەنە، ئەز ناچمە سەر رولێ وان و ھەلسەنگاندنا وان بكەم ژروویێ خیانەتێ و ھاریكاریێ ڤە، بتنێ دێ خرابیێن ڤێ چەندێ ئاشكەرا كەم، كو ئەز باوەرم چەند نمونێن دی ژی ھەنە :

ئێكەم تشت: چەند ئەم رولی ب سەروك عەشیران بدەین، ئەم یێ رولێ یاسایێ لاواز دكەین، ژبەركو ئەم دبینن ل سەر خاتر خاترانێ گەلەك ژ یاسایێ رزگار دبن و كێشە ب رێكێن عەشایری دھێنە چارەسەركرن و ژن و كەسێن ھەژار و بێ دەستھەلات تێدا دبنە قوربانی.

دوھەم تشت: ئەم نوكە یێ دبیرئانینا ئەنفالاندا و مە بڤێت و نەڤێت موستەشاران رول د ئەنفالاندا ھەبوویە، ھەر چەنەبیت ئەم رێزێ ل قوربانیێن ئەنفالان بگرین و خێزانێن وان، كو زەحمەترین ژیان برییە سەر و تا نوكە ژی ئازارێن وان بەردەوامن، بلا ئەم وان سزا نەدەین، لێ ئەم پاداشت ژی نەكەین!!.

http://www.rwangauraxna.com/ba/detail.aspx?IDNews=3752

ڤاكسین مابوو!!

 عبدالرحمن بامەرنی

حكومەت و بەرپرس چ دی نەشێن خەلكی ب سەر رێداببەن و باوەریێ بۆ دروست بكەن! كێشا دناڤبەرا حكومەتێ و خەلكیدا خوە لڤێ ڤالاتیێ دا دبینیت، ئەوا چەند وێڤەترە قەبارێ وێ فرەھتر لێ دھێت. جوداھیا دناڤبەرا زەنگینی و ھەژاریدا گەلەك یا مەزن بووی، كەسێن ئاست ناوەند كێم دھێنە دیتن. ھەمی تشت یێن كەتینە بن كونتروللا كومپانییان و كی كومپانیا برێڤە دبەت، كێشە دناڤاندا نینە، بەلكو كێشە یا د دەستھەلاتا واندا ھەی.

بەری چەند ھەیڤان مە ئاماژە ب بابەتەكی دا، كو بازرگانەكی ڤیا كارگەھەكا تەماتێ دروست بكەت، لێ رێ بو نەھاتە دان، ئەڤە ددەمەكیدا جوتیاران ب سندوقان باجانێن خوە ب عەردی وەردكرن و بەری چەند رۆژان بریارا قەدەغەكرنا مریشكان و بتنێ رێ ب سێ كومپانیا بھێتە دان مامەلێ ب كرین و فروشتنا وان بكەن، دەما بۆ پشت راستكرنێ من پسیار ژ ئێك ژ خودانێن گومركێن ئاھێن خوارنێ یێن بكوم كری، گوتە من ئەگەر تو دھی ھاتبای، دا كارتوونا مریشكا دەھـ ھزار دیناران كێمتر كری.

ڤاكسین مابوو تبلا وە نەچوویە دناڤرا، ئەڤرو سوشیال میدیا ھەمی یا بۆمای، دەھان پوست دێ ب بەرچاڤێن تە كەڤن، دێ ڤێ جوداھیێ بینی و دێ ھەر گازندا ژ خەلكی كەن و ل تەنگاڤییا و ل ھەلبژارتنان دێ پەنایێ بەنە بەر دەستێ وی و ھەر گاڤا ب دەنگێن وی شەرعیەت بدەستڤە ئینا، دێ پێ ل پشتێ دانن و ھەمی تشتەكی ل سەر گران كەن، بتنێ دا چەند سەنتەكێن دولاری ژێ قازانج بكەن.

كی حكومەتێ پرێڤەدبەت و كی دیڤچوونێ بۆ دكەت، خودێ دزانیت، جوداھیا بھایێن تشتان، دەرمانخانێ بۆ دەرمانخانێ و بلندبوونا پانزینێ یا ژ نشكەكیڤە ھەمی بلا بەرسڤ بن بۆ وان ئەڤێن پێش وان ڤە دئاخڤن.

مخابن ئەڤرو ئەم یێ بەحسا باوەریێ و چاكسازیێ و ھاولاتیبوونێ دكەین و د پشت را مەلاقا و بەرپرسێن بازرگان، ھەستا ھاولاتیبوونێ و ئینتیمایێ یا كریە سفر، ھیڤیدارم ئەڤ تشتێن من گوتین وەنەبن یان رێژەیی بن!

ــــــــــــــــــــــــــــــــــــــــــــــــــــــــــ

http://www.rwangauraxna.com/ba/detail.aspx?IDNews=3731

https://www.facebook.com/groups/rwangeurexne/permalink/4211181468920057/