كاریكاتورێن روانگە و رەخنە

عبدالرحمن بامەرنی

(فەحسا نوژداری)

پشتی ب چەند كومێنتان د(روانگە و رەخنە)دا مە بەرسڤا ئێك و دوو ل سەر بابەتەكی دای، دوماھی جار گوتە من ھەرە بۆ خوە (فەحسەكێ) چێكە. باوەردكەم ھین ھەمی دڤی دەستەواژەی گەھشتن، فەحسەكێ چێكە یان كو ھزرێن تە یان مێشكێ تە دروست كارێ خوە ناكەت. راستی بیت ڤێ كومێنتێ دووسێ رۆژەكان ئەز ئێخستمە ناڤ گێلەشوكا ئینان و برنا ھزران، ھین بێژن ئەو راست دبێژیت و ئەز پێدڤێ سەرەدانا نوژدارەكی مە؟!..

ئێ باشە دا خوە ژڤێ دوو دلیێ قورتال بكەم، جارێ ئەز نزانم سەرەدانا كیش نوژداری ژی بكەم و كابرای ژی ھەر خێرا خوەكر، ھەما بلا ناڤێ نوژداری ژی گوتبایە من..

(دژە دین)

ژبەر سڤكاتیێن وی ب نڤیسەرەكا ژن، كو د (روانگە و رەخنە)دا بابەتێ خوە یێ ئەدەبی بلاڤكری، نە بتنێ من ھوشداری دایێ كو كومێنتا خوە راستڤەكەت، (كو ھەردەم ئەڤ كومێنتێن جورە ناڤزراندن تێدا ھەی، ئەز ئاگاداریێ ددەمە خودانێ كومێنتێ و چ ژ جوامێریا خوە یان رێزگرتن بۆ خواندەڤانێن مالپەری، كومێنت دھێنە راستڤەكرن)، من ئێكسەر ژ مالپەری بلوككر و كابرایێ رێز ل كومێنتا خوە نەگرتی وەك كارڤەدان د پەیچەكێ ئاینی دا، لوگویێ مالپەری بلاڤكربوو و دیار كربوو كو مالپەر دژە دینە؟!

ئێ كەكێ من، خوە ئاین ل سەر سڤكاتیكرنێ ب خەلكی لبەر خەلكی شیرین نابیت، دڤێت مرۆڤ ژخوە دەست پێبكەت دا خەلك باوەریێ ب مرۆڤی بینیت..

(مەسینھەلگر)

پشتی قەیرانێن ھەرێمێ یێن ئێك لدویڤ ئێك بەریكێن وی ڤالا كرین، ھەر وەك بۆ ھاتیە ڤەگێران ھەكە مرۆڤ خوە شیرین بكەت دێ د چاڤێن حزبێ دا مەزن بیت، كو ئەڤە ژی (عەقلیەتا كەڤنە بەعسیانە) و ھێشتا ھندەك پەیرەو دكەن، دەما دگوتن (ما تحب السید الرایس)، ئێكسەر دابەزییە سەر (روانگە و رەخنە) و بناڤ و نیشان ب كرێ گرتی ل قەلەمدایە و راستی ژی بیت ئەز دا بەرسڤا وی دەم و دا دەستەواژەیێ (مەسینھەلگر) بۆ بكار ئینم، پاشی وەك رێزگرتن ل ھەمی خواندەڤایێن مالپەری، ئەز پاشكەزبووم ژ نڤیسینا بەرسڤا خوە و من ب سینگەكێ بەرفرەھـ وەرگرت!!

بەس ھەر باش بوو، كومێنتەك بۆ چوو و ب (مەلاق) ناڤكر..

(حیجاب و میجاب)

پشتی بابەتێ حیجابێ شلق ب (روانگە و رەخنە) ئێخستین و خواندەڤا كریە دوو بەش، چ یێ دگەل دا و چ یێ ھەڤدژ! من ژی گوت دا ئاڤەكێ بڤی قەرقەشێ دا بكەم و من كومێنتا خوە ب(حیجاب و میجاب)ێ دەستپێكر و یا راست من زانی من چاوا نڤیسی لێ من نەزانی دێ چاوا خوە ژ ھێرشێ ڤەكێشم، كو كومێنتێ گوتە كومێنتێ جھێ من بكە..!

ئێ باشە زمانێ كوردی و كەلتورێ كوردی و چاندا كوردی یا كوردیە و ئاین نەھاتیە ڤی زمانی و كلتوری و چاندێ تێكبدەت، بەلكو بتنێ باوەریێ بلاڤ دكەت، بەس دێ بۆ كێ بێژی..

(لایك و كومێنت)

وەك كارڤەدان گوت ئێدی ئەز بۆ (روانگە و رەخنە) نا نڤیسم، پشتی من ژمارا ئەڤ كەسێن گوتارا وی خواندین بۆ (سكرین) كری و بۆ فریكری، كو زێدەتر ژ سێ ھزار كەسان بوون د شەڤ و رۆژەكاندا. شوونا كەیفا وی بھێت، گوت ئەز ئێدی بۆ تە نانڤیسم و گوت ئەڤ خەلكە یێ ھندێ نینە مرۆڤ خوە پێڤە ماندی بكەت و تشتێ جوان بنڤیسیت، یا راستی بیت مافێ وییە ما ئەگەر گوتار یا جوان بیت و نڤیسەری خوە پێڤە ماندی كربیت، ما چ قوسیرییە ئەگەر ھەر چنەبیت ئەم وەك كومێنت گولەكێ بۆ فرێكەین دێ جارا بھێت تشتەكێ جوانتر نڤیسیت..!!

ئێ بخودێ مامو حەقێ تەیە، ئەگەر مە زانیبا ئێك و دوو بلند بكەین، دا ئەڤرو باشترین ھونەرمەندێ شێوەكاری و شانووڤان و سترانبێژ و شاعر و رۆماننڤیس دناڤ مەدا ھەبن، لێ ھەچیێ سەرێ خوە بلندكر شوونا ئەم پالپشتیێ بۆ بكەین، بھوستەكێ ئەم پێن وڕ د عەردی دا دبەینە خار..

ــــــــــــــــــــــــــــــــــــــــــــــــ

https://www.facebook.com/groups/rwangeurexne/permalink/3967868273251379/

http://www.rwangauraxna.com/ba/detail.aspx?IDNews=3127

سەروكی بگوھورن؟!

 

مە بەحسا نەبوونا گازێ دكر ل زڤستانێ، مە بەحسا نەبوونا كارەبێ دكر و مە بەحسا نەبوونا موچەی دكر و بارودوخێ نەخوشێ خەلكی، ھەژاری و بێكاری و نە دادی و مە بەحسا گەندەلیێ دكر، مە بەحسا بەرپرسان و كار بەدەستان دكر، مە بەحسا ئاستێ زانستیێ نزمێ خویندكاران دكر، دڤان ھەمی سوحبەتان ژی دا، مخابن تشتەك نەدھاتە بەردەڤێ مە، ئەم خوە گەشبین ببینین!

ژ نشكەكێڤە كچا وی یا د تەمەنێ دەھـ سالیێ دا ئاخفتنەك گوت، نە بتنێ مە چ جار ھزر تێدا نەكریە، بەلكو مە بۆ یاری ژی چ جارەكێ ھزر دوێ چەندێ دا نەكریە، دەما گوتی، ئێ دێ سەروكی بگوھورن!!.. سەروكی؟!!!! ئەڤ ئاخفتنە ژ دەڤێ مە ھەردووكان پێكڤە دەركەفت و ل حێبەتی و سەرسورمانیا مە سەحكر و جارەكا دی گوت، بەلێ سەروكی بگوھورن..! مە گوتێ تو ڤێ چاوا دزانی؟ گوت: ل قوتابخانێ ماموستای بۆمە بەحسا نەدادیێ و نەبوونا خزمەتگوزارییان دكر، ئەگەر كەسێن خراب و نەباش و گەندەل رێبەرییا وەلاتی كرن و ئەڤێن كار ددەستاندا بوونە دز و داھاتێ وان برێژەكا نە بەرئاقل زێدەبوو، دڤێت خەلك ببیتە خودانێ بریار و دەنگێ خوە و دڤێت ئێكەم تشت، ھزرێ دگوھورینا سەروكی دا بكەن.

ئەم لدوور خو زڤرین، ھەر باش بوو كەسێ گوھـ ل مە نەبووی، (سەروكی بگوھورن)، یا دبێژیت سەروكی بگوھورن...!! تشتێ غەریب ئەو قوتابخانا وێ لێ دخاند چ تشتێ وەسا نیشا نەدایە، كو ھاولاتی سەروكی ناگوھورن بەلكو سەروك خەلكی دگوھورن و ئەگەر ئەو كچا من بایە ل قوتابخانەكا ژڤی رەنگی بخوینت، دا ئێكسەر چمە سەر ئیدارێ و بەرسینگا رێڤەبەری و ماموستایێ ئەڤ وانە گوتی گرم و دا ژێ داخواز كەم، ل ئاخفتنا خوە پاشكەز بیت.

ببورە سەروك تو ل وێ پیچا دان و ستاندنا مە و بێ رێزییا مە نەگرە، ژبەركو تەمەنێ وێ یێ ھندی نینە بزانیت وێ چ تاوانەك مەزن كر، تو ل وێ كچێ نەگرە، ژبەركو ل دوورە وەلات یا مەزن بووی و ئەو چ ژ بەھایێ تە نزانن..

ببورە سەروك تو ژ ھەمی گوھورینا مەزنتری، نابیت كەس ھزرێ ژی دگوھورینا تەدا بكەت، تو سەروكێ مەی و كێشە نینە داھاتێ تە چەند بیت و كێشە نینە چەند كومپانی بناڤێ تە ھەبن و پارێ تە یێ كاش ل پانكێن چ وەلات بن و كێشە نینە ئەگەر تو نیشتیمانی و ھزرا نەتەوەی و خەباتا پێشمەرگەی و خوینا شەھیدا دگەل بەرژەوەندیێن خوە یەكسان بكەی.

ببورە سەروك، ئەم دێ ھێینە گوھورین و تە ئەم ھوسا یێن فێركرین، تو ھەر لجھێ خوە بمینە قوربان.

ـــــــــــــــــــــــــــــــــــــــــــــــــــــــــــــــــ

ل سەر مالپەرێ روانگە و رەخنە

http://www.rwangauraxna.com/ba/detail.aspx?IDNews=2963

ل سەر فەیس بوكێ روانگە و رەخنە

https://www.facebook.com/groups/rwangeurexne/permalink/3902100839828123/3/