ئەگەر هات و ئەز خوە بێخمە دناڤبەرا دو هەلبژاردەیاندا، كیژان دەرگەهێ وێ ڤەكری بهێلم و كیژان داخستی، پەرلەمانی یان قوتابخانێ؟ بێ هزركرن و ئێكسەر دێ بریارێ دەم، بلا دەرگەهێن قوتابخانان بهێنە ڤەكرن و یێ پەرلەمانی بهێتە داخستن. هەر چەندە رەنگە گەلەك من رەخنە بكەن، كو پەرلەمان بۆ هەرێما كوردستانێ دەستكەفتەكێ گرنگە، لێ پێنەڤێت من ژی دێ بەهانەیێن خوە هەبن و دێ هوسان بەرسڤا وان دەم:
ئەو تشتێن من پالڤەددەن كو دەرگەهێ پەرلەمانێ داخستی بهێلم، ئەڤە ژ سەرهلدانێ وەرە و تا نوكە، ئەم خەونا ب جڤاكەكێ مەدەنی ڤە دبینین و مە دڤێت وەكی وەلاتێن پێشكەفتی بین و ئازادییا رادەربرینێ و ئازادییا بیركرنێ و ئازادییا هەلبژارتنان لدەف مە هەبیت. بكورتی ئەم بزانین هەست ب دیمكراسیبوونێ بكەین، ئەو دیموكراسیەتا ب هزاران قوربانی و جانگوری مە ژبۆ داین، كارەسات و كیمیابارانكرن و دەربەدەركرن و دەهان دەردەسەریێن دی. لێ رەنگە پسیار بهێتە كرن، پەرلەمانی چ گرێدان پێڤەهەیە؟! لڤێرە ژی دێ من بەرسڤا خوە هەبیت، ژبەركو ئەم د دیموكراسیەتێ نەگەهشتینە و مە پیروزییا وێ یا گوری نەزانینا خوە كری. هەلبژارتنێن مە یێن بناڤ دیموكراسی، هەمی ل سەر
شیوازەكێ سەقەت هاتینە برێڤەبرن. ئەڤ كەسێن ئەم دكەینە نوونەرێن خوە و فرێدكەینە پەرلەمانی، ئەم ب نەزانین د هەلبژێرین و دەنگێ خوە ددەینێ. ل سەر بنەمایەكێ زانستی ناهێنە دەست نیشانكرن، (حزب و عەشیرەت و ئاین) رولی د كاندیدكرن و دەرێخستنا واندا دگێرن. ژبەركو پێش وەخت ئەڤ هەرسێكێن هەنێ، ئاستێ زانینا مە د هەلسەنگینن و خالا لاوازییا مە دزانن، ئەم ژی ژ وێ نەزانینێ، لبن باندوورا وان هەرسێ كارێكتەرێن من دەست نیشانكرین، نوونەرێن خوە د هەلبژێرین.
ئەڤ پیڤەرێ دەست نیشانكرنێ ژی، دێ بیتە ئالاڤ د دەستێ حزباندا و پەرلەمانتار نەشێن نوونەراتییا وی خەلكی بكەن یێن دەنگ داینێ، دێ چ چێبیت؟! شوونا ئەو ببنە نوونەرێن خەلكی دێ بنە نوونەرێن حزبان. شوونا خەما خەلكی ل وان هەبیت، دێ خەما وان سەرخستنا حزبا وان بیت. بڤی رەنگی گەندەلی پەیدا دبیت، نە شەفافیەت، خەلكێ نە ژ هەژی دێ خوە ل جهەكی بینیت كو ئەو بخوە ژی دزانیت، ئەڤە نەجهێ وییە و لدووماهیێ كی دێ باجێ ددەت؟ پێنەڤێت ئەڤە ژ سەرهلدانێ وەرە ئەم باجا ڤێ عەقلیەتێ و ڤێ نەزانینێ ددەین. باشە قوتابخانێ چ گرێدان پێڤەهەیە؟ پسیارەكا جوانە، ژبەركو ئەگەر لناڤ جاددە و كولانێن پارێزگەهێن هەرێمێدا هاتن و چوونێ بكەین و كا چ دكەڤیتە بەر چاڤێن مە، ئاڤاهیێن بلند، پێشكەفتن، هوتێل و موتێل و ترۆمبێلێن گێچ سفر و لیستە یا درێژە، لێ د بەرامبەردا، مەژی نەهاتیە ئاڤاكرن، تاك نەهاتیە پێگەهاندن، خەلك ب شاشی د دیموكراسیەتێ گەهاندینە، نزانن پسیارێ ژ مافێن خوە بكەن، نزانن دێ چاوا دەربرینێ ژ حەز و خواستەكێن خوە كەن و لیستەكا درێژا ڤان نەزانینا.
لڤێرە دا كو هەڤسەنگیێ دناڤبەرا پەرلەمانی و قوتابخانێدا دروست بكەین و بزانین بوچی من قوتابخانە ب سەر پەرلەمانی ئێخست؟ ژبەركو ئەڤە هەمی باجا وێ نەزانینێ یە ئەم ددەین، ئەوا ب ئەنقەست ئەم دناڤرا هێلاین. ئەگەر مە گرنگی ب زانینێ دابا، دا مە بەرسڤا دروست و نە دروست بۆ هەمی تشتەكی و هەمی هەلبژاردەیەكێ هەبیت، نوكە ژی ئەم نە دكەتینە د ڤان قەیراناندا و ئەگەر پسیار بهێتەكرن، ئەڤ قەیرانێن هەنێ دەرەكینە و ژ دەرڤەی هێزا پەرلەمانینە؟ د بەرسڤێدا ئەز دا ب نەخێر سەرێ خوە هەژینم و هەر چەندە بارەكا دەرەكی ژی دگەلدابیت، لێ پەرلەمان رێرەوێ حوكمرانیێ سەر راست دكەت، پەرلەمان چاڤدێریێ ل سەر حكومەتێ دكەت و پەرلەمان هەیبەتێ و باوەریێ دناڤ خەلكیدا دروست دكەت و ئەگەر دوبارە پسیارێ ژمن بكەی، ما پەرلەمان ژ ئەڤێن تە گوتین ل كیڤەیە؟ ئەز دا بەرسڤا خوە ب ئالیێ خەلكیدا شوركەم و بێژم، خەلك ژ خوە و ژیارا خوە و ئایندێ زارۆكێن خوە یێ پشت راست نینە، تا ئەڤ پشت راستبوونا هەنێ ژی پەیدا نەبیت، باوەری بۆ خەلكی دروست نەبیت كو پاشەرۆژا وی یا گەرەنتی كریە، زارۆكێن وی و زارۆكێن بەرپرسەكی ل هەمان قوتابخانە دێ خوینن و لیستەیا درێژە، دێ هەر گەندەلی و نە ئارامی و دوو دلی د بەردەوام بن. ئەگەر پسیارا دەرئەنجامان ژی ژمن بكەی؟ دێ بێژم هێشتا ئەم نەشیاینە ژ كەلتورێ بەری سەرهلدانێ قورتال ببین و ئەم یێ د درێژەپێدانا وێ ترسێدا و دهەمان زڤروكێداینە، هەر چەندە بەرگەكێ نوی ژی دبەردا بیت.
----------------------------------------------
* گوتار ل سه‌ر سايتێ روانگه و ره‌خنه
*گوتار ل سه‌ر فيس بوكێ روانگه و ره‌خنه
