عبدالرحمن بامه‌رنى
پرانیا خەلكێ دهوكێ (تەوفیق)ی ناس دكەن و ئەو ب گوتنا سترانێن هونەرمەندێ وەغەركری (تەحسین تاها)ی یێ ناڤدارە، ئەڤە بۆ نەوەیێ سالێن هەشتێییا و نوتان ژی ژ چەرخێ بوری و پشتی رێكا ستێرا و چەندین بەرنامێن هونەری ل رادیو و تیڤییان، تەوفیق بۆ نەوەیێ نوو ژی هاتە ناساندن و سوشیال میدیایێ، رولەكێ مەزنتر دڤێ چەندێدا گێرا و تشتێ مای، كەسەك بهێت و ل سەر (تەوفیق)ی كار بكەت.
تەوفیق گەنجینەیە
دەما ئەم دبێژین تەوفیق گەنجینەیە و دڤێت بهێتە ئاشكەراكرن، ئەم پشت بەستنێ ل سەر هونەرمەندێن جیهانی دكەین، دەما رولێ خوە دگێرن و نمونا (مستر بین)ی نزیكترینە بۆ تەوفیقی و ئەگەر هونەرمەندەكێ مەیێ دەرهێنەر، كاری ل سەر وی بكەت و چوارچوڤەكی بۆ دارێژیت، ب مەرجەكی تێكەلی چ گروپان نەكەت و تەوفیقی وەك هەی پیشان بدەت، باوەردكەم، زێدەترین بینەران دێ لدوورێن خوە كومڤەكەت و نە كەس ژ بەرێخوەدانا وی تێر دبیت و نە كەس ژێ بێزار دبیت ژی.
تشتێ تەوفیقی جودا دكەت
رەنگە ئەم ڤێ پرسێ بكەین، مانێ مە ل دەڤەرا بادینان چەندین هونەرمەندێن دیێن كومیدی هەنە؟ لێ ژیرنەكەین، هەر كەسەكێ ب چاڤەكێ هونەری تەماشا بكەت، هونەرمەندێن دی و كتەكا كێم نەبن، دەما رولێ خوە دگێرن، هەلچوون یا دناڤ رەفتار و گوتنێن واندا هەی و بێی هەست بكەن، بینەر دلگرانییا خوە ژێ د بینیت و رەنگە د بەرێخوەدانا دویێ دا ژبۆ وان كاران، مرۆڤ ژێ بێزار ببیت. لێ لدویڤ وان چەند پارچە ڤیدیویێن ل سوشیال میدیایێ بلاڤ دبن و تەوفیق رولی دگێریت، مرۆڤی هەر دڤێت تەماشا بكەت، ژبەركو دل پاقژییا وی و بێگونەهییا د رەفتاركرنێ و گوتنێ و بیركرنێدا، وەرگری بخوەڤە گرێددەن. ئاخر وەرگر ژی لدویڤ وان تشتان دگەریت، یێن زیندی، یێن گیان دناڤدا و رەنگە ئەڤە پرسیار بیت، بوچی فلمێن هندی زێدەتر بینەرییا خوە ل دەف كومەلگەهێ مە هەنە؟ ژبەركو ئەو ب هەست رولێ خوە دگێرن! یا لدەف تەوفیقی ژی چ بزانین بیت یان ژی بەرەللای و بێگونەهی بیت، گێرانا یان دەرئێخستنا هەمان هەستانە و نمونە ژی، ئەو پارچە ڤیدیویا ل سوشیال میدیایێ بلاڤە بووی و دەما سەرتراشەك سەرێ تەوفیقی بێ پارە دتراشیت و كەسەكێ دی دبێژتێ پرچا تە گران یا قوساندی، ئەو هەر دمینیت پا چاوا یا گرانە؟ مانێ چ پارە ژمن وەرنەگرتینە، تا تەوفیق بخوە ژی دكەڤیتە گومانێ، لڤێرە پرسیار كی دێ شێت رولەكێ ژڤی رەنگی گێریت؟
هونەر پیشەیە
دەما ئەم باس ل پیشەی دكەین، ئەم باس ل داهاتەكی دكەین، پرسیار، ئایا تەوفیق پێدڤی داهاتی یە یان نە؟ ئەكید وی ژی خەون یێن هەین و ئەكید، خێزانەك یا وی پرێڤە دەبت و ئەگەر تەوفیقی داهاتەكێ باشتر هەبیت، دێ چاڤدێریەكا باشتر دناڤ وێ خێزانێدا هێتە كرنێ.
كی دێ گەنجینێ ئاشكەرا كەت
ئەگەر ب چاڤەكێ رەخنێ ل درامایێن كومێدی یێن دەڤەرا مە تەماشا بكەین و سەرەرای ئەڤێن دهێنە بەرهەمئینان ژی، لێ ژ رەخنێ دبێ بار نینن و من نەڤێت ڤی گوتارێ بۆ ڤێ چەندێ تەرخان بكەم، لێ خوزی، دەرهێنەرێن مە، كو ل دەڤەرا مە دەرهێنەرێن باش هەنەو كومپانیەكێ دگەلدا خوە لڤی بابەتی كربانە خودان، ئەز باوەردكەم دا خزمەتەكێ ژی ل دەڤەرا مەكەن و دا قازانجەكێ دارایی ژی بۆ خوە پەیدا كەن و ژبیرنەكەین، هونەر ئالاڤەكە بۆ پێگەهاندنا گەلان.
• د رۆژنانا ئەڤرو ژمارە 2723 رۆژا 16/12/2019 دا هاتیە بلاڤكرن.
