كورسیكێن ڤالا د هولێڤە ناهێنە دیتن، بتنێ دوو رێزێن ئێكێ نەبن. دزانی رێزا ئێكێ ئەتەكێتێن خوە یێن هەین و ئەگەر روونیت ژی، دێ ئێك وی ژ جهێ لێ روونشتی راكەتەڤە. قەستا رێزا دویێ كر و ل كورسیكا ئێكێ ژ رێزا دویێ ژنەك یا روونشتی یە و زكێ وێ نەشیا هەستێن وی بەرامبەری ژنان بلڤینیت، هەر ئەو دزانیت چەند حەز ژ ژنێن دوو گیان ناكەت.یا باشتر ئەز ل رەخێ دی یێ هولێ بهێمە دناڤ رێزێدا و ل كورسیەكا ڤالا، جهێ روونشتنا خوە مسوگەر بكەم! خودانا زكی هەست بڤێ چەندێ كر و خوە قولپاندە رەخێ كورسیكێ و بهزرا وێ، ئەگەر ئەو ژی پیچەك خوە خار و ڤیچ بكەت، دێ شێت د بەررا بوریت، لێ شەپلینا ڤێ ژنا دوو گیان بەس نەبوو، كو ئەو دبەر سینگێ وێ را دەرباز بیت و لجهەكی روونیت! هێشتا ڤێ ژنا دووگیان خوە لجهێ خوە راستڤەنەكری پشتی ژ دەربازبوونا وی بێهیڤی بوی، دوو كچێن بەژن بلندێن خوە د مكیاجی را هێلای و زەند رویس، گوتنێ دەستیری بیت و دەربازی كورسیكێن ڤالا بوون.
ئەز گیرو بوویمە یان دێ شانوگەریەكا جوداتر بیت ژ ئەوێن بەری نوكە ئەز هاتیمە پێش، ئەڤە هزرێن وی بوون، هێشتا مژویلی بریارا خوە كا دكیش سەرێ رێزێ را جهێ روونشتنا خوە ل سەر كورسیەكێ بكەت، بەری ئەوێن ڤالا ژی تژی مرۆڤ ببن. ئەڤێ چاڤدێریا هولێ دكەت ب دوو دلی و شەپلینا وی زانی، كو ئەو ژنا ل سەر كورسییا ئێكێ ئەگەرێ دەربازنەبوونا وی یە، لێ تشتێ وی هزر تێدانەكری، ئەوی نەدزانی، كو زكێ وێ رێگرە ژ بو دەربازبوونا وی، نە ژن بخوە.
ئەڤە حەفیتەكە ژ نیڤ شەڤ پێدا و تا دبیتە سپێدە، ئەز خوە ژ نڤینا خوە ڤەددزم و ل سەر ڤێ مێزێ د روینم و ئەڤە جارا ئێكێ یە ئەز چیروكەكێ بنڤیسم و نەزانم دووماهیا وێ دێ چلێهێت. یا راستی بیت، دەما من دەست ب نڤیسینا ڤێ چیروكێ كری، من قەد باوەرنەدكر دێ ژنەكا دوو گیان هێتە دناڤ چیروكێدا و دێ هزرێن من ژ بەر ئێك بەت و نە بتنێ ئەڤە ئاریشا من و نڤیسینا ڤێ كورتە چیروكێ یە، بەلكو ل رێڤەبەریێ بەرپرسا بەشێ ئەز لێ، ژنە و یا ب دوو گیانە! لڤی باژێری چەندین رێڤەبەری هەنە و بتنێ رێڤەبەریا ئەز لێ ژنە و ئەو ژی یا ب دوو گیانە و ژ فشارا رێكخراوێن ژنان و كوتا ژنان و رژیانا چالاكڤانێن ژن بۆ سەر جاددان، حكومەتێ بریاردا وەزارەتەك بۆ ژنان بیت و وەزارەتا رێڤەبەریا مە ب سەرڤە، وەزیر ژنە و ئەوا من ژ بەرێخوەدانا خوە بۆ ژنان فەهم كری و ئەز گەهشتیمە ئەنجامەكی، زكێ وێ ژی یێ مەزن دبیت و تشتێ ژ هەمیێ زێدەتر ژی من نە ئارام دكەت، ئەو ژنا ئەڤە حەفتیەكە خوە ژ نڤینا وێ ڤەددزم و ل سەر ڤێ مێزێ د روینم، ئەو ژی یا ب دوو گیانە، لدووماهیێ ژی من هزرا خواندەڤانێ خوە كر و بوچی ئەز وێ ژنا من خوە ژ نڤینا وێ ڤەددزی بەشداری چیروكێ ناكەم و بهێت، بەر پەرێن من چر چر بكەت و چ دی چیروكێن هوسا بێ رامان نەنڤیسم. لێ باش بوو، ئەڤێ چاڤدێریا هولێ دكر، بنك منڤە هات و سەیدا سەیدایا وی ئەز ژ ڤێ تەنگەزاریێ قورتال كرم و جهەك ل رێزا پێشیێ نیشا مندا و ئێكەم جارە ئەز هەست بكەم، ئێك رێزێ ل نڤیسەرێن باژیرێ خوە دگریت و جهی ل پێشیا هولێ بۆ ڤالا دكەت، هندی من دیتی، نڤیسەر و رەوشەنبیر د پەراوێز خستینە!
*د كوڤارا رامان ژمارە (268) رۆژا 5/9/2019 دا بلاڤ بوویە.
لینكێ كوڤارێ https://www.raman-media.net/…
