ــــ مایتێكرن ـــــ

سیناریوییا ئێكێ‌:

د تەمەنێ‌ خویێ‌ گەنجاتیێ‌ دا بوو، دەما بەرەڤ سەرشویێڤە چوویی و دەرگەهـ ل سەر خوە داخستی.. گریا دەیكا وێ‌ نەشییا هیڤیێ‌ بۆ دروست بكەت، كو دێ‌ بابێ‌ وێ‌ ل سەر وی كوری رازی بیت، ئەوێ‌ وێ‌ سوزدایێ‌ یان بۆ وی بیت یان بۆ ئاخێ‌.. دولكێ‌ گازێ‌ ب سەرێ‌ خوە دا كر و بەری بابێ‌ وێ‌ ڤێرا بگەهیت و سوزێ‌ بدەتێ‌، كو وی و ئەوێ‌ وێ‌ بڤێت بگەهینتە ئێك، دوكێل ژ بن دەروكێ‌ سەرشویێ‌ دەركەفت و قیژیێن دەیكێ‌ و شكاندنا دەرگەهی، نەشییان ژیانێ‌ بدەنە كچا بوویە رەژی!

سیناریوییا دویێ‌:

پشتی سالەكێ‌ ژ راگەهاندنا مرنا وێ‌، خوشتڤیێ‌ وێ‌ پەیوەندی دگەل كچەكا دییا هەڤتەمەنێ‌ وێ‌ گرێدان.. جوانی و نازكییا ڤێ‌، هەمی بیرهاتنێن یا دی و سوزێن مرنێ‌ داینە ئێك (یان ئەز بۆ تەمە یان بۆ ئاخێ‌) ژ بیرێ‌ برن.. بابێ‌ وێ‌ ژی و خێزانا وێ‌ هەمیێ‌، پێشوزای ل وی كرن و دەرگەهێن مالێ‌ بۆ هێلانە ڤەكری.. ئەڤە پروسا هاوسەرگیریێ‌ پێك ئینای، هند ل مالا دەیبابێن خوە نینە، هندی ل مالا خەزیری..

راستڤەكرنا سیناریوییا ئێكێ‌:

ئەڤینداران حەز ژ سیناریوییا دویێ‌ نەكرن و هێشتا خواندەڤایێن وی چ هەلویست بەرامبەری چیرۆكێن وی وەرنەگرتین، چیرۆكنڤیسی چیرۆكا خوە ژ بەلاڤكرنێ‌ ڤەكێشا و دوبارە ب دارشتنا سیناریوییا ئێكێ‌ دا چوو خارێڤە..! بەری قارەمانا وی خوە د سەرشویێ ڤە ئاسێ‌ كەت و ئاگری بەردەتە لەشێ‌ خو یێ‌ تەر، بابێ‌ وێ‌ سوز دایێ‌، كو وێ‌ بدەتە وی كەسی یێ‌ وێ‌ بڤێت و هەردوو سیناریویێن ئێكێ‌ و دویێ‌ هاتنە ژێبرن..

دووماهی سیناریوو: 

بەرهەڤی بۆ شەهیانا وان هاتنەكرن و هێشتا سالا وان یا هەڤژینیێ‌ تەمام نەبوویی، مایتێكرنان دەستپێكرن.. شیرینییا حەژێكرنێ‌ و (یان ئەز بۆ تەمە یان بۆ ئاخێ‌)، هەمی دگەل دەمی چوون.. تا رۆژەكێ‌ هەڤژینێ‌ وێ‌ بریار دای، دەستێ‌ وێ‌ بگریت و بۆ مالا بابێ‌ وێ‌ و مایتێكرنێن وان بزڤرینیت، بەلێ‌ وێ‌ خو د سەرشویێڤە ئاسێ‌ كر و ئێكەم تشتێ‌ دەستێ‌ خو هاڤێتیێ‌، دولكێ‌ گازێ‌ بوو.. ڤێجارێ‌ قیژیێن دەیكا وێ‌ و رازیبوونا بابێ‌ وێ‌، نەشییان هیڤییا ژیانەكا خوش و ئایندەكێ‌ گەش بدەنێ‌، بۆ جارا دویێ‌ مرنا وێ‌ هاتە راگەهاندن!

د كوڤارا پەیڤ ژمارە 79 دا هاتیە بلاڤكرن.

ئەو فلمێ‌ دبەر بەرێخوەدانا ویرا من دو جارا تف كریێ‌!*

عبدالرحمن بامه‌رنی

ئەز ئێك ژوان كەسانم یێن حەزا بەرێخوەدانا فلمان هەی و تایبەتی ژی، ئەڤێن ب كومەلگەهی و ژیانا مرۆڤایەتیێ‌ و سەربورانڤە گرێدای، لێ‌ كێشا من هەر دەم ئەو دەمێ‌ ڤالا بدەست من ناكەڤیت و بۆ ئێكەم جار ژی، دگەل بەرێخوەدانا فلمەكی، كو بهەمی پیڤەران ئێك ژوان فلمان بوو، كو ئەز گەلەك بخوڤە گرێدایم، لێ‌ ل دووماهییا وێ‌، من دو جاران تف كرە فلمی و ئەو تفا من، نە بوو چیرۆكا فلمی یان دەرهێنەری یان ئەڤێن چیرۆكا فلمی داناین، لێ‌ بۆ ئەوێن زەڤلەكێن خوە بۆ شەران دەردئێخن.

فلم بۆ سەردەمانێ‌ شەرێ‌ دویێ‌ جیهانی ڤەدگەرییا و فروكەكا هەڤپەیمانا و ب دروستاهی یا ئەمریكا، ل سەر باژێرەكێ‌ یابانێ‌ چەند ئامانج بوردومانكرن، لێ‌ ئەو فروكە ژ گوللێن بەرگرییا یابانییان قورتال نەبوو و ئاگر ژێ‌ بلند بوو و ل ناڤ سنورێ‌ وەلاتێ‌ چینێ‌ كەتە ناڤ دارستانەكێ‌ و یابانیا سنور بەزاندن، دا ئەڤێن د فروكێدا دەستە سەر بكەن، ژبەر كو چینی و یابانی ئێك نەبوون و كوشتن دناڤبەرا واندا هەبوو، هەمیان خوە ب پەرەشوتێ‌ بەردابوو خارێ‌، بەری فروكە بكەڤیتە عەردی و ئاگكر بەر بیتێ‌ و بتنێ‌ پەرەشوتا فروكەڤانی ب دارێڤە مابوو و ب هوشخوچوونێ‌، هەڤالێن وی هزركرن یێ‌ مری و دكەڤنە دناڤ دەستێن شەركەرێن یابانیا و هەمیان دكوژن. 

ژنەكا بێ‌ زەلام و بتنێ‌ ئێك زارۆك هەی و خانیێ‌ وێ‌ ژ گوندی ڤەدەر، فروكەڤانی دبینن و قورتال دكەن و د سەردابا خانیێ‌ خوەڤە ڤەدشێرن پێ‌ وی یێ‌ بریندار دەرمان دكەن. یابانی دهێنە ناڤ گوندی و ل فروكەڤانی دگەرن و دزانن لناڤ گوندی یێ‌ ڤەشارتییە و چەند زەلامان ژ گوندییان دكوژن، كو ئێك ژوان زەلامان حەزكریێ‌ وێ‌ ژنێ‌ بوویە یا ئەو فروكەڤان قورتال كری و بتنێ‌ دا وی ئاشكەرا نەكەت، ئەو ل بەر چاڤێن وێ‌ هاتە كوشتنێ‌ و دا گەلەك ڤێ‌ ڤەگێرانێ‌ درێژنەكەم، چەندین زەلامێن دیێن گوندی دهێنە كوشتنێ‌ و دەما فروكەڤان ئاشكەرا دبیت و هندەكێن چینی دهێنە كەنارێن رووباری بۆ قورتال كرنا وان، فروكەڤان و ژنك و زارۆكا ژنكێ‌ درەڤن و چەكدارێن یابانییان ددەنە دووف و گوللەكا وان، ب پشتا وێ‌ ژنێ‌ دكەڤیت و گیانێ‌ خوە ژ دەست ددەت و ئەو فروكەڤان و زارۆكا بچووك دهێنە قورتال كرن، دەما فروكەڤان ژ برینا خوە ساخ بووی و هێشتا ل نەخوشانێ‌، ئەو كچك ژی یا لدەف بوو، ژبەركو كەسەك نەبوو چاڤدێرییا وێ‌ بكەت، پشتی دەیكا وێ‌ هاتیە كوشتن، ئەفسەرەك هات و ئەركەكێ‌ نوو دا وی فروكەڤانی، ئەوی بەرێخوەدا وێ‌ كچێ‌ و ئەركێ‌ خوە یێ‌ نوو بجهـ ئینا، ب بەهانا وێ‌ چەندێ‌ خوە رازیكر، كو ئەفسەر دێ‌ بو وێ‌ كچا بچووك، ل خێزانەكا چینی گەریت، كو وێ‌ بخودان بكەن. 

ئەڤە بوو ئەوا بەشەك ژ شەری ل پاش خوە هێلایی، ژنەكا هەڤژینێ‌ خوە ژ دەستدایی، كچەكا بچووك دناڤ دەستاندا و رەنگە تەمەنێ‌ وێ‌ لدوورێن هەشت سالان بیت، حەزكریێ‌ وێ‌ ل بەر چاڤێن وێ‌ هاتە كوشتن، دا فروكەڤانێ‌ بیانی و نە ژوەلاتێ‌ وان بهێتە رزگاركرن! چەندین گوندیێن دیێن بێگونەهـ هاتنە كوشتن، دا فروكەڤانێ‌ بیانی و نە ژوەلاتێ‌ وان بهێتە رزگاركرن! چەندین خانی و باغ رەزێن وان هاتنە سوتن و خرابكرن، دا فروكەڤانێ‌ بیانی و نە ژوەلاتێ‌ وان بهێتە رزگاركرن و لدووماهیێ‌ ئەو ژی هاتە كوشتن و یا نەخوش، فروكەڤانێ‌ بیانی و ژ نە ژوەلاتێ‌ وان، ئەركێ‌ خوە ل پێش چاڤدێرییا وێ‌ كچێ‌ ئێخست، كو د شییا بۆ وێ‌ ببیتە دەیك و باب و ژیانا وێ‌ خوش بكەت، ئەوا دەیكا وێ‌ ژ پێخەمەت رزگاركرنا وی، هەمی تشتێن خوە و خوە گیانێ‌ خوە ژی ژ دەستدای. 

رەنگە ئەڤ ڤەگێرانا كورتا ل سەری من نڤیسای، هەر كەسەك ژمە چەندین لێكدانان بۆ بكەت و ب پشت راستی ژیڤە، هەمی لێكدانێن هەنێ‌ د دروستن، هەر چەند د بەروڤاژی ئێك بن ژی و بەری ئەم خوە ل بریارا دروست بگرین، كا ئایا ئەگەر ئەم باین، دا فروكەڤانی پارێزین و ب سەر بلندی بێژین، مە فروكەڤانێ‌ دوژمنێ‌ دوژمنی، نە ئێخستە ناڤ لەپێن دژومنی، سەرەرای باچ و كوشتیێن مەداین و یان ئایا دا گوندێ‌ خوە گیانێ‌ گوندیێن خوە و كەس و كارێن خوە پارێزین و فروكەڤانی رادەست كەین؟!! گەلەك ڤەگێرانێن هوسان یێن رووداین و خەلكی باجا وان ب گیانێ‌ خوە یادای و د دوبارە ڤەگێرانا واندا, هەر ئێك ژمە وەك خوە شلوڤەكرنێ‌ ددەتێ‌ و هەر ژیان ژی هوسان بوویە و گەلەك ئەڤ جورێن دەردەسەرییان ل پاش خوە هێلاینە.

*د ژمارە 2601 یا رۆژا 18/6/2019ێ‌ دا بلاڤ بوویە.