قوناغا به‌رى سه‌رهلدانێ و پشتى سه‌رهادانێ د به‌رنامه‌كێ تايبه‌تدا ل سه‌ر كه‌نالێ عه‌سمانيێ گه‌لێ كوردستان

دگه‌ل ره‌وشه‌نبير سه‌برى سلێڤانه‌ى به‌شدارى به‌رنامه‌كێ تايبه‌ت بووين ل سه‌ر سه‌رهلدانێ و قوناغا به‌رى سه‌رهلدانێ و پشتى سه‌رهلدانێ و رولێ ره‌وشه‌نبيران د هه‌ردوو قوناغان دا و ئه‌وا مه‌ هه‌ردوويان دان و ستاندن ل سه‌ر دكر و هزرێن مه‌ نزيكى ئێك، قوناغا به‌رى زێده‌تر قوناغه‌كا گشتگير بوويه‌ و ئه‌وا ل سه‌ر ملێن ره‌وشه‌نبيران بگشتى، دروستكرنا زه‌مينه‌كێ بوويه‌ و قوناغا پشتى سه‌رهلدانێ، دڤيابايه‌ ل سه‌ر ئاڤاكرنا مێشكى تاكى هاتبايه‌ كاركرن و مخابن ئه‌ڤا هه‌نێ روونه‌دا و به‌ر پێن ره‌وشه‌نبيرى به‌رته‌نگ بووينه‌ و دێ بينين، هه‌رێما كوردستانێ ژلايێ ئاڤاهييان و هوتێل و جاده‌ه‌ و خزمه‌تگوزاريێن دى يا به‌ره‌ڤ پێچ چووى و د به‌رامبه‌ردا ئه‌وا پێدڤى بۆ ئاڤاكرنا مێشكێ تاكه‌ نه‌ هاتيه‌ كرن و دا كو ئارمانجا دروستا سه‌رهلدانێ بگه‌هيت، دڤێت تاك بهێته‌ ئاڤاكرن و ئه‌ڤه‌ و چه‌ندين دا و ستاندنێن دى و ئه‌ڤ به‌رنامه‌يه‌ ژى ژلايێ ميدياكار (كاروان سادق) ڤه‌ داهته‌ ئه‌نجامدان.
هه‌ر كه‌سێ حه‌ز بكه‌ت دشێت به‌رنامه‌ى و دا و ستاندنا مه‌ ل سه‌ر ڤى لينكى ته‌ماشا بكه‌ت دگه‌ل رێزكگرتنێ
https://www.youtube.com/watch…

وەك رۆژنامەڤان بەشداری بەرنامێ‌ پارنوراما بووم ل سەر كەنالێ‌ كوردسات نیوز

بەشدارییا مە ب (ڤیدیو) ل سەر لینكێ‌ خارێ‌ (https://vimeo.com/324145332)،

د بەرنامێ‌ پانوراما دا ل سەر كەنالێ‌ عەسمانیێ‌ كوردسات نیوز لدوور بابەتێ‌ (كارێ‌ راگەهاندنێ‌ ل هەرێما كوردستانێ‌ و لێكەفتێن وێ‌)، كو ئەز وەك رۆژنامەڤان ژ دهوكێ‌ و (كاروان ئەنوەر) سكرتێرێ‌ سەندیكا رۆژنامەنڤیسێن كوردستانێ‌ لقێ‌ سلێمانیێ‌ و (هەندرێن ئەحمەد) سكرتێرێ‌ سەندیكا رۆژنامەنڤیسێن كوردستانێ‌ لقێ‌ هەولێر و دان و ستاندن ل سەر چەند بابەتەكێن گرێدایێ‌ رەوشا راگەهاندنێ‌ ل هەرێما كوردستانێ‌ هاتنە كرن و ژوان بابەتان ژی (تا چەند راگەهاندن ل هەرێما كوردستانێ‌ د قەیرانێدایە) و (مامەلا راگەهاندنێ‌ ل سەر روودانێن نەخوازراودا چاوانە؟) و (راگەهاندن ل هەرێما كوردستانێ‌ سنورێ‌ نەتەوەیی تێ د پەرینیت؟) و چه‌ندین بابه‌تێن دی. جهێ‌ ئاماژێ‌ یە كو پانوراما ژ ئامادەكرن و پێش كێشكرنا میدیاكار (فێنك ئەحمەد)ە.

كورتە چیرۆك ڤێدانا بیرهاتنان

ـ ڤێدانا ئێكێ‌ ـ

ئێكە و نابیتە دو

ئەڤ دیوارە ل سەر ناڤێ‌ من یێ‌ هاتیە تاپووكرن و ئەگەر رۆژێ‌ سێ‌ جاران پالا من لێ نەبیت، ب پشت راستیڤە ئەز دوو جاران هەر دهێم یان پالا خوە د دەمێ‌ یان ژی جهێ‌ روونشتنا خوە ل سەر ڤی كەر بلوكی خوەش دكەم. 

چاڤێ‌ من لێ‌ یە، ئەڤە ژ سپێدێ ژ خەو رابووی، جارا سیێ یە دهێتە هنداڤ بەلەكونێ و ل سەر پێن خوە د زڤریتەڤە. هەر جارەكا دهێت، چاڤێن خوە ل كولانێ هەمیێ د گێرینیت و تا پشت راست نەبیت، ل سەر پێن خوە نا زڤریت، هەر جارا دهێت ژی، ئەز ل بەر ڤی دیواری مە و هشك راوەستیای، خوە لڤین ناكەڤیتە مژوولانكێن چاڤێن من!

 ڤێجارێ  ئەو بخوە هات، بەلێ هاتنا وێ نەشیا من ژ جهێ من بلڤینیت و پیرە دایكا وێ، دوو چاڤ هەبوون پێ زێرەڤانیا كچا خوە دكر و ب هەردوو چاڤێن دی، ل كولانێ و ل قورمێ داران دگەریا، كا دێ رەشاتیا من دكیرێ را، ستێركا چاڤێن وێ بۆ خوە راكێشیت.

 نە ژ دەڤێ من، دبێژن ڤێ پیرەژنێ حەفت مێر كرینە و خوە ژ دویان دایە بەردان و د شەڤا بیكینیا وێدا، ل زاڤایەكی نەبوویە سپێدە و دویێن دی نەگەهشتینە بكەنە ئێك سال و یێ شەشێ كەس نزانیت ب چ سەرچوویە و ئەڤێ نوكە لدەف مای، یێ كەتیە قورنەتی و دێ بێژی، بەری حەفت سالان یێ مری و ژ قورنەتێ خانی، نەشێت دو پێنگاڤان ژ جهێ خوە بلڤیت. 

حەژێكرنا من بۆ كچا وێ، نزیكە دێ بنە دو سال و تشتێ ئەز شیایم دگەل وێ باخڤم یان بكەم، دو جاران من دەستێن وێ یێن گرتین و ب دزیكیڤە من ماچەك لێدایە و ب هژمار نۆكە پێنج نامێن وێ، د كومەدینا مندا نە. 

ئەڤا نۆكە ئەز بو وە دبێژم، هەمان ئەو گوتن بوون، جارەكێ من بۆ دەیكا وێ ڤەگێراین و هەمان گوتن بوون ل سەر سكالایا دەیكا وێ من گوتینە رێڤەبەرێ قوتابخانێ و هەمان گوتن بوون، ل بەرامبەری دادوەری من بەرەڤانی پێ ژ خوە كری و ئەڤە ئەز ژ قوتابخانێ‌ ب ئێكجاری هاتیمە دەركرن، هەرو لبەر چاڤێن خێزانا خوە ژ مال دەردكەڤم و پەرتۆكێن من یێن قوتابخانێ‌ لبن كەفشێ منن، قوتابخانە و كەسپ و كار و تا قیبلەگەها من ژی، بوویە خوە ڤەنیساندنا ل بەر ڤی دیواری و یان دێ‌ دەیكا وێ‌ من وەك زاڤایێ‌ خوە قەبیل كەت یان ل سەر دفنا وێ‌، دێ‌ رازی بیت ئەز ببمە زاڤایێ‌ وێ‌!

ـ ڤێدانا دویێ‌ ـ 

سمینارا سەیدای

ـ بەرێز دلێ‌ تە نەمینیت، هەر وەكو تۆ ئەتەكێتێن دانیشتنێن ڤی باژێری دزانی، رێزا ئێكێ‌ بتنێ‌ بۆ بەرپرس و رێڤەبەرێن دام و دەزگەهانە و تو دشێی ل رێزا دویێ‌، جهەكی بۆ خوە پەیدا بكەی و ل سەر كۆرسیەكێ‌ دانیشی؟ 

ئەڤە مەزنترین هۆلا ڤی باژێری یە و بكێمی 800 كەس دشێن ل سەر كورسیكان روونە خارێ‌، لێ‌ یا من هزر نەكری، ئەڤ ژمارە دو جار هند لێهات، ئەگەر ئەڤێن ژ پێرڤە ژی دگەلدا بهێنە هژمارتن. 

ژ نشكەكێڤە چەپ رەپا دەستقوتانا خەلكی، هندی ئێك د هولێڤە هەی، ئاگەهی هاتنا سەیدای كرن و هەمی رابوونە ژ پێرڤە و تا سەیدا گەهشتییە سەر دەپێ‌ شانویێ‌، دەستێن خەلكی ژ چەپ رەپێ‌ نە دراوەستان، بتنێ‌ ئەڤێ‌ برەخ منڤە نەبیت، خوە ب خواندنا پەرتۆكەكێڤە مژوولدكر و دا من ژ گومانا پسیاركرنێ‌ رزگار بكەت، گۆتە من: (دیارە ئەڤە جارا ئێكێ‌ یە تو لڤان سمیناران ئامادە دبی؟). ئەڤ پسیارە كر و خواندنا پەرتۆكێ‌ بۆ وی ژ بەرسڤا من گرنگتر بوو و من ژی خوە تێنەگەهاند. 

ئەڤە نە ئێكەمین سەیدایە لڤی باژێری، هەر كەسێ‌ كورسیەك بدەست كەفت، دبیتە سەیدا سەیدایا خەلكی دگەلدا و هەمی ئەزمانێ‌ خوە بۆ حلی دكەن.

 هاتنا من بۆ ڤێ‌ هولێ‌، نە دا بۆ سەیدای دەستان بقوتم یان ژی گۆهدارییا ئاخفتنێن وی بكەم، ژبەركو ئەز دزانم ئەو تشتێ‌ ئەو دبێژیت دووبارەكرنا دوهی یە و بۆ ئەڤروییا خەلكی چ تشتێ‌ تازە دگەلدا نینە.

سمینار بەرەڤ دووماهیێ‌ د چوو و دەستێن گەلەكان د بلندكری بوون و ئەڤێ‌ سمینار پرێڤە دبر، ناڤێن وان كەسان د نڤیسان یێن دڤیان پسیارێن خوە ژ سەیدای بكەن، ئەڤێ‌ برەخ منڤە هێشتا پەرتۆكا وی ل بەر چاڤێن وی بوو و خوە بنك من ڤەخار كر.

ـ هەر وەكو سمینارا سەیدای ب دووماهی هات؟

 ڤێجارێ‌ من هەست كر، دێ‌ بەرسڤا من ژ خواندنا پەرتۆكا وی گرنگتر بیت و دگەل زڤرینا من بۆ لایێ‌ وی، سوراتییا تیشێرتێ‌ دبەردا، ئەز راكرمە سەر پێیان و دناڤ وێ‌ حەشامەتێ را، مە هەردوویان خوە ل بەردەرێ‌ هولێ‌ دیت و دەما ژ من پرسی، تە ژ سمینارا سەیدایی چ فێمكر؟ ئەم گەهشتبوینە نەپەنیەكێ‌ و ب هەمبێزەكێ‌، من بەرسڤا پسیارا وێ ژبیركر. 

عبدالرحمن بامەرنی

• د كوڤارا رامان   ژمارە  262 ل رۆژا 5/3/2019ێ‌ دا هاتیە بلاڤكرن.