عبدالرحمن بامه‌رنى
بە پەلە، ئەڤ پەیڤە سێ جاران لدویڤ ئێك هاتبو رێزكرن، (بە پەلە.. بە پەلە.. بە پەلە.. ئاژانسێن جیهانی ئاماژێ بو ددەن)، ئەڤە دەستپێكا گوتارەكا نڤیسەرەكا عەرەب، بناڤێ (منی حسێن) بو د مالپەرێ (ئەلحیوار ئەلموتەمەندن) دا هاتیە بلاڤكرن، یا راست، قەلەمێ ڤێ نڤیسەرێ زێدەتر ل سەر بابەتێن گرێدایی ژنانە و تشتێ جوان ژی دنڤیسیت و دارشتنا وێ ژی ژ وێ جوانیێ كێمتر نینە، ئەڤە ژی، نیشان ددەت كو ژنە نڤیسەرەكا خودان شیانە. تشتێ سەرنجا من ژڤی بابەتی راكێشای، هەر چەندە ژمێژە گوتار هاتیە بلاڤكرن، نیشاندانا كومەلگەهێ كوردی یە! ئەڤ كومەلگەهە ب كومەلگەهەكێ عەشاییری، پاشكەفتی دایە ناسكرن، ئەو ژی دبیاڤێ ژنان و مامەلەكرن دگەل دوسیێن حەژێكرنێ ژلایێ كچان ڤە. ئەڤێ نڤیسەرێ پالپشتی كریە سەر راپورتەكا (بی بی سی) كو دنڤیسینا خوە دا ئاماژە بو دای و هەر وەكو دبێژیت هەیڤانە 400 ژن ل كوردستانێ دبنە قوربانیێن خوە كوشتنێ و ژوان قوربانییان ژی، خو سوتنا ب ئاگری و تایبەت دەما دهێنە ئاشكەرا كرن كو پەیوەندیێن حەژێكرنێ هەنە. هەر چەندە من نەڤێت بابەتی دوێ چەندێ دا وەرگرم كا ئەڤ راپورتا وێ ئاماژە بو دای و بابەتێ خوە ل سەر گەرم كری و گوتارا خوە پێ نڤیسای كا چەند راستی تێدا هەیە، لێ هەر چاوا بیت، ئەڤ بابەتێ هەنێ یێ هاتیە نڤیسین و ئەگەر راست بیت یان راست نەبیت، گوتار گەلەك یا هاتیە خواندن و ڤێ گوتارێ رویەكێ نە شیرین بو كوردان یێ دروست كری و یێ بەرچاڤی جیهانێ و تایبەتی جیهانا عەرەبی كری.
ژبەركو گوتار بەری سێ سالان یا هاتیە بلاڤكرن، ژبەر هندێ زێدەتر ئەز ل سەر بابەتی و راپورتێ نا راوەستم، لێ دێ دوو خالان كەمە هێڤێنێ ڤێ نڤیسینێ، ئێك: ئایا ئەم ددانەنیاسینا رویێ دروستێ پێكڤە ژیانێ و یەكسانییا ژن و زەلامان دا د سەركەفتی بوینە؟ ئەگەر ئەم قوناغا پشتی سەرهلدانێ وەربگرین. خالا دوێ: چ دكێل دبێ ئاگر نینن و ئایا راستە تا نوكە ئەم نەشیاینە ل سەر مافێن ژنان راوەستین و ژن ژ نەچارەیێ بەرەڤ ریێن خوە كوشتنێ دچن؟!!
دخالا ئێكێ دا، كو بهزرا من گەلەك یا گرنگە و ئەگەر خوە دویری قەیرانێن سیاسی یان ئابوری بكەین و بتنێ بابەتێ پێكڤە ژیانێ و یەكسانییا دناڤبەرا ژنان دا وەربگرین، بهزرا من، ئەم د سەركەفتی نەبوینە! ئەز نابێژم گوهورین پەیدا نەبوینە، هزرا خەلكی نەهاتیە گوهورین، بەس ئەگەر مە پێنگاڤ بەرەڤ پێكڤە ژیانێ و مافێ مروڤی هاڤێتبن ژی گەلەك رێژەیی نە و تا نوكە ئەم نەشیاینە وەك پێدڤی خوە دگەل وەلاتێن پێشكەفتی و یێن رێزێ ل مافێن مروڤی و دیموكراسیبونێ دگرن بگونجینین و راستە چەندین بریار ژ پەرلەمانی د بەرژەوەندییا مافێن ژنان دا دەركەتینە، هەر ژ نەهێلانا كوشتنا وێ یان ژی ژ یاسایا فرەژنیێ و تا دگەهیە رێڤەبەریێن نەهێلانا توندوتیژیێ بەرامبەری ژنان كو ژنان ژ هەر دەست درێژیەكێ دپارێزن، لێ ئەڤە بتنێ بەس نینن، ژبەركو، ئەو بریارێن هەنێ، تنێ، رێگرتبون ل گەشەنەكرنا دیاردا كوشتنا ژنان ل سەر پاقژكرنا نامیسا بنەمالێ.
دخالا دوێ دا، كو من ڤیایە سەنگا بابەتێ خوە بێخم سەر، ئەڤ رابونێن مە ل سەر بنبركرنا هەر جورە توندوتیژیەكێ نە دبەرامبەری ژنان دا، بهزرا من، ئەگەر رێژەی ژی بەحس بكەین، ئەم دكارا نەبوینە و ئەگەر توندوتیژی یا بەرچاڤ نەهێتە كرنێ، توندوتیژی یا بەردەوامە و یاسا ژی وەك پێدڤی نەشێت ل سەر دەستهەلاتا عەشاییری یا زال بیت و بدەهان ژن، یێن دكەڤنە بن بارێ رەوشت و تیتالان و نە خودانێ بریارێن خوە نە و دڤێت ئەم گرنگیێ ب وان حالەتان بدەین، راستە رێژا خوە كوشتنێ و دیاردا خوە سوتنا ژنان گەلەك گەلەك كێم بویە و هەر چەند دكێم ژی بن، ژبەركو ئازادكرنا ژنێ، ئازادكرنا بەرەبابەكی یە، ئازادكرنا مێشكی یە و رولێ ژنێ مل بملێ زەلامی یان د پەروەردەكرنا زاروكی گەلەكە و نابیت ئەم پشت گوهـ بێخین. خالا ژ هەمیان گرنگتر ژی، ئەڤرو، هیچ تشتەك ناهێتە ڤەشارتن و ب دەهان رێكخراوێن تایبەت ب مافێ مروڤی ڤە ل وەلاتێ مە هەنە و راپورتێن خوە بلند دكەن، رێكخراوێن ئازادییا رادەربرینێ، رێكخراوێن نەهێلانا توندوتژیژیێ و پێكڤە ژیانێ و زاروكان و ژنان ووووو............تا دوماهیێ. دڤێت ژبیر نەكەین ژی، تا راستی ژ درەوێ دهێتە ئاشكەراكرن، ب دەهان نڤیسەرێن وەك ئەڤا ل سەری مە ئاماژە بو دای، دێ گوتارێن خوە نڤیسن و یا من دڤێت بێژم، بلا گوتارا ڤێ نڤیسەرێ بومە زەنگا هشیاریەكێ بیت، كو ئێدی ئەم زێدەتر ل سەر ئاڤاكرنا مێشكی راوەستین.
• الحوار المتمدن- العدد: 4118 - 2013 / 6 / 9
• دروژناما ئەڤرو ژمارە 1818 دا هاتیە بلاڤكرن.
