ئەز ژی وەك گەلەك كەسێن وەك خوە بۆ مە خودانێ راجێتەكا نوژداری و من قەستا دەرمانخانەكێ كر، كو ئەڤە نمونا پترییا دەرمانخانێن دهوكێ یە. من خوە گرت، لێ خوە گرتنا من "نە ب دوور بۆ بەلكو ب زوور بۆ" و ئەڤێ ل بەر دەرمانخانێ راجێتا من ژ دەستێ من ئینا دەرێ و پشتی ژ رەفاتكەكێ قەستا یا دی كری و دوو سێ جار هاتی و چوویی، ل سەر مێزا ل بەر سینگا من و خوە چەند جورێن حەب و دەرمانان رێزكرن و بلەز و بەز، قەلەمەكێ (جافێ سەرتیژ) ددەستان دا بو و دەست ب خیچ كێشانێ كر و دەستێ وی بلەز تر ژ ئەزمانێ وی گوت: ئەڤی سپێدێ و ئێڤاری بەری خارنێ بخو و ئەڤێ دی روژێ سێ جاران پشتی خارنێ دێ خوی وووووووو تشتێ من دیتی ئەو حەبك و دەرمان یێ دزەرفی دا و ددەستێ من راكرن و چاڤەكێ وی لمن و چاڤێ وی یێ دی ل راجێتا كەسەكێ دی، گوتە من: پارێ تە دكەڤن (.....). یا بمن مای، من گوتێ: ما تو بخێرا خوە ڤان دەرمانان ددەیە من یان ژی دێ پارێ خو بەرامبەر وەرگری؟ گوتە من: ئەكید دێ پارێ خو دەی! من زەرفێ وی ل بەر چاڤێن وی خالی كرە سەر مێزێ و من گوتێ: تو ب وژدان، بەرێخوە بدە خیچكێن خوە یێن تە كێشاین، كا دێ زانی هەر جورەكی چەند خیچ ل سەرن یان تە چ ل سەر نڤیسی یە كا ئەڤە (قبل یان بعد)ە؟ یا دوێ ژی كەسەكێ نە خواندەڤا برنە مالێ و ژبیرێ چوو كا هەر جورەكی تە بو چاوا گوتیە، مانە دڤێت خیچكێن تە برەنگەكێ وەسا بن كو دەما نیشا جامێرەكی ددەت بێژتێ خارنا ڤان دەرمانان بڤی رەنگی یە. براستی ئەڤ بێ وژدانییا من نەعیمێن وی گەلەك تەحل كرن و شینا بێژیتە من تو راست دبێژی و ئەڤ قەلەمێ ئەز پێ دنڤیسم بكێر ڤی كاری ناهێت! گوتە من: دەرمانێن خوە بهێلە ل سەر مێزێ و هەرە دەرمانخانەكا دی، ئەگەر بدلێ تە نەبیت.
هەر چەندە ئەڤ ڤەگێرە یا بەری چەند هەیڤانە، لێ تشتێ ئەز كێشایمە ڤێ نڤیسینێ، بەرییا چەند روژان، زاروكەكی كو چاڤەكێ وی سور ببو، برنە (نەخوشخانا هیڤی) یا زاروكان، پشتی دەرمان و قەترە داینێ. قەترەك نیشانی من دان كو دڤێت دوو چپكا بكەنە دەڤی و دگوتنە من ما چاڤ ل كیرێ و دەڤ لكیرێ! براستی دا بێژم ئەو شولێ نوژداری یە ما هین چ ژێ دزانن، لێ من ئەو قەترە ژوان وەرگرت و من سەحكرە كاغەزا دناڤ قالكێ دا كو بەروڤاژی وانە و دڤێت بو چاڤی بیت!! ئەز نابێژم ئەوێ ل بەر دەرمانخانێ بكارئینانا دەرمانی دروست نەگوتیە، بەس ما كەس هزر ناكەت ئەگەر نەخوشی شیرەتێن نوژداری ژبیركرن یان گەلەك جاران مروڤ كەسەكێ دی فرێدكەتە دەرمانخانێ و رەنگە ئەو ژبیربكەت و شوونا مفا ژوێ چارەسەریێ بهێتە وەرگتن نەخوشی زێدەتر دبیت!
یا من دڤێت بێژم دەرمان یاریكێن زاروكان نینن و مرن و مانا خەلكی دگەلە و دڤێت نە بهیڤی بەلكو ب (فەرمان) ئەڤێن ل دەرمانخانان كارێن خوە دروست بكەن و ب قەلەمەكێ جوان رێنمایێن ڤەخارنا حەب و دەرمانان بهێتە نڤیسین، تشتەكێ گەلەك نە یێ جوان و سەردەمیانەیە دەرمانخانێ قەلەمێ تایبەت نەبیت و هەر (عەیبە) ژی.
ـ تێبینی: دروژناما وار ژمارە 1395 دا هاتیە بلاڤكرن.
