عبدالرحمن بامەرنیبو شكاندنا بێدەنگیا تە
ئەز دێ ڤێ یاریێ بدوماهی ئینم و
سەفەرێ كەم!
من نەڤێت یاریەكا تژی خەم بیت و
سەفەرا من جلێن بێدەنگیا تە لبەر بن..
سەفەرا من ل ویستگەهەكا تژی مروڤ دەست پێدكەت
فارگون دتژی نە و حەشامەتن
رێ جودایە و تابلو دجودانە و
كەنی و گری و بشكورین و هەوایێ ئەم دهەلكێشین ژی جودایە..
هەمی تشت دناڤ حەشامەتێ را بەرزەیە و
چاڤەرێی هاتنا كەسەكێ ژی ناكەم!
جگارا خو، وەك من دڤێت هل دكەم و
پێكێ خوە یێ شەرابێ وەك من دڤێت فر دكەم
دوماهی فیتكا تەمەنێ یاریێ یە
هەمی تشتێن من یێن منن و
هەمی تشتێن خو ژی دگەل خوە ببە..
دفارگونێن ڤێ شەمەندەفرێ دا
خەریبیێن تە ناكەم
ناهێلم چ دی
تو د بەرپەرێن من دا خو نازدار بكەی،
شرین بكەی،
من ماچ بكەی،
سەرێ خوە دانیە سەر سینگێ من،
پرچا خوە ب بەر من وەربكەی،
ژوورا من تژی عترا خوە بكەی،
دناڤ بەرپەرێن من دا
ببیە پەیڤ
وێنە
رستە
شعر..
هەمی بەرپەرێن خوە دێ پێچم و
هەمی وەستیانێن خو دێ كەمە دگولدانەكێ دا
گولدانێ، ئێدی وەك هەرو ئاڤ نادەم
هەرو نابەمە بەر تیشكا حەتاڤێ و
ل سەر مێزا بیرهاتنێن خوە دێ پشت دەمێ..
دێ پشت دەمە تە و
دێ پشت دەمە گولدانێ و
دێ پشت دەمە وێ ژنێ!
ئەو ژنا بتلیا تری ڤە دچوو
ئەو تلیا، من دبەر نڤیسینێن خوە را دكرە شەراب
مە گلاسێن خوە تژی دكرن ژ شەرابەكا سوور
ئەو ژنا ب تیشكا روژێ ڤە دچوو
ئەو تیروژكا، من پەنجەرا ژوورا خوە لبەر رویێ وێ دهێلا ڤەكری..
ژنەك، ل سەر چ لاپەران نە دهاتە نڤیسین
ژنەك بو، ئەو ب فرچێ چ شێوەكاران نە هاتبو كێشان
ب كامیرا چ فوتوگرافان نە هاتبو زوم كرن
خو نەدابو دەستێ چ روماننڤیسا و
نە كەتبو سەر ئەزمانێ چ سترانبێژا
ژنەك بو ژ زەمەنەك دی و
ژ دەڤەرەك دی و
ژ پەرتوكەك دی
ئەو هەمی بو و ل سەرێ دەفتەرێ ژمارە ئێك بو و پیتا ئێكێ بو
ژنەك بو و خو ژ یاریێ ڤەدهێلا
ژنەك بو و دما چاڤەرێی زڤستانەكا بێهنا بهارێ ژێ بهێت
دەریا ب چاڤێن شێتەكی تەماشا دكر و
باران ب چاڤێ سوزانیەكێ!..
دڤێ فارگونێ دا
ژبلی من و دویراتیا تە و ئەزمان و
پیستێن مروڤێن دی یێن نە ژ رەنگ و دەنگێ مە
هەمی تشت حەشامەتە و
ل هەر ویستگەهەكا ئەم دگەهینێ ژی
حەشامەتەك دهێتە خار و حەشامەتەك سیار دبیت
مەبەستا من ژڤێ سەفەرێ ئەو نەبو
ئەز ئێك ژ وێ حەشامەتێ بم!
لڤێرە، هیچ و هیچ
دڤێت ب سزادانا دلێن خوە
یارییا مە دەستپێكری بدوماهی بینین..!
